Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Johanu 19:1-42

19  Enẹwutu, to ojlẹ enẹ mẹ, Pilati plan Jesu bo hò e.  Awhànfuntọ lẹ sọ lọ̀n jẹgbakun owùn tọn de bo ṣinyọ́n do ota na ẹn bosọ yí awugbó sopẹ́-vọ̀ tọn de do doaṣọ́na ẹn;  yé sọ jẹ e dè wá ji bo nọ dọmọ: “Kúdo lewhenu, hiẹ Ahọlu Ju lẹ tọn!” Podọ yé nọ hotómẹ na ẹn ga.  Pilati sọ vọ́ tọ́n bo dọna yé dọmọ: “Mì pọ́n! Yẹn plan ẹn jẹgbonu wá na mì, na mì nido yọnẹn dọ yẹn ma mọ oylan de to okọ̀ na ẹn.”  Enẹwutu, Jesu tọ́njẹgbonu, bọ jẹgbakun owùn tọn to ota na ẹn bọ e tin to awugbó sopẹ́-vọ̀ tọn de mẹ. Ewọ sọ dọna yé dọmọ: “Mì pọ́n! Dawe lọ!”  Ṣigba, to whenue yẹwhenọgán lẹ po ponọ lẹ po mọ ẹn, yé dawhá bo dọmọ: “Whè e do núgo! Whè e do núgo!” Pilati dọna yé dọmọ: “Mìlọsu ni plan ẹn bo whè e do núgo, na yẹn ma mọ oylan depope to okọ̀ na ẹn.”  Ju lẹ gblọnna ẹn dọmọ: “Míwlẹ tindo osẹ́n de, podọ sọgbe hẹ osẹ́n lọ, ewọ dona kú, na e ylọ ede dọ visunnu Jiwheyẹwhe tọn wutu.”  Enẹwutu, to whenue Pilati sè ehe, obu jẹ e ji dogọ;  ewọ sọ vọ́ biọ họ̀nmẹ ayimatẹn-gán tọn bo dọna Jesu dọmọ: “Fie wẹ hiẹ wá sọn?” Ṣigba, Jesu ma na ẹn gblọndo depope. 10  Enẹwutu, Pilati dọna ẹn dọmọ: “Hiẹ ma kẹnù demẹ na mi wẹ? A ma yọnẹn dọ yẹn tindo aṣẹ nado tún we dote podọ yẹn sọ tindo aṣẹ nado whè we do núgo wẹ ya?” 11  Jesu gblọnna ẹn dọmọ: “Hiẹ ma na ko tindo aṣẹ de do ji e eyin e ma ko yin nina we sọn aga. Ehe wutu wẹ dawe lọ he ze mi do alọ towe mẹ tindo ylando he klohu.” 12  Na whẹwhinwhẹ́n ehe wutu, Pilati to aliho dín nado tún in dote. Ṣigba, Ju lẹ dawhá bo dọmọ: “Eyin hiẹ tún dawe ehe dote, a ma yin họntọn Sesali tọn. Mẹdepope he hẹn ede zun ahọlu to hodọ jẹagọdo Sesali.” 13  Enẹwutu, to whenue Pilati ko sè ohó ehelẹ, e hẹn Jesu jẹgbonu, ewọ sọ sinai to whẹdaján de ji to fihe nọ yin Zannu Titẹ́, ṣigba Gabbata to Heblugbe mẹ. 14  Todin, azán awuwle* na hùnwhẹ juwayi tọn wẹ; e yin nudi gànhiho ṣidopotọ* mẹ. Ewọ sọ dọna Ju lẹ dọmọ: “Mì pọ́n! Ahọlu mìtọn!” 15  Ṣigba, yé dawhá dọmọ: “De e sẹ̀ sọn aimẹ! De e sẹ̀ sọn aimẹ! Whè e do núgo!” Pilati dọna yé dọmọ: “Be yẹn ni whè ahọlu mìtọn do núgo wẹ ya?” Yẹwhenọgán lẹ gblọn dọmọ: “Míwlẹ ma tindo ahọlu de adavo Sesali.” 16  Enẹwutu, to ojlẹ enẹ mẹ, ewọ ze e do alọ yetọn mẹ na e nido yin whiwhè do núgo. To whenẹnu, Jesu jẹ alọ yetọn mẹ. 17  Podọ ewọ lọsu wẹ hẹn yatin lọ yì fihe nọ yin Taká Tẹnmẹ, he yin Gọlgọta to Heblugbe mẹ; 18  yé sọ whè e do núgo to finẹ gọna dawe awe devo lẹ, dopo to awà ehe ji podọ awetọ to awà diẹ ji, ṣigba Jesu to ṣẹnṣẹn. 19  Pilati sọ wleawuna nukinkan de bo ze e do yatin lọ go. E yin kinkàn dọmọ: “Jesu Nazalẹti tọn Ahọlu Ju lẹ tọn.” 20  Enẹwutu, susu Ju lẹ tọn wẹ hia nukinkan ehe, na fihe Jesu yin whiwhè do núgo te sẹpọ tòdaho lọ; podọ e yin kinkàn to Heblugbe, Latinigbe, po Glẹkigbe po mẹ. 21  Ṣigba, yẹwhenọgán Ju lẹ tọn lẹ jẹ didọna Pilati ji dọmọ: “Hiẹ kàn ‘Ahọlu Ju lẹ tọn’ blo, ṣigba dọ e dọ dọ, ‘Yẹn wẹ Ahọlu Ju lẹ tọn.’” 22  Pilati gblọn dọmọ: “Nuhe yẹn kàn ko yin kinkàn.” 23  Todin, to whenue awhànfuntọ lẹ ko whè Jesu do núgo, yé yí awugbó etọn lẹ bo má do ẹnẹ, dopo na awhànfuntọ dopo, yé sọ yí awù odò tọn ga. Ṣigba, awù odò tọn lọ ma tindo titọ̀tẹn de na e yin linlọ̀n sọn aga wá odò. 24  Enẹwutu, yé dọna ode awetọ dọmọ: “Mì gbọ mí ni ma tlẹ́n ẹn blo, ṣigba mì gbọ mí ni magbe mẹhe tọn e na yin gbọn vòbibla dali.” Ehe yinmọ na adà Owe-wiwe tọn lọ nido sọgan yin hinhẹndi he dọmọ: “Yé má awugbó ṣie lẹ to yede ṣẹnṣẹn, yé sọ blavo do avọ̀ ṣie lẹ ji.” Podọ na nugbo tọn, awhànfuntọ lẹ wà onú ehelẹ. 25  Ṣigba, onọ̀ Jesu tọn po nọviyọnnu etọn po tin to ote to yatin etọn kọ̀n; Malia asi Klopasi tọn po Malia Magdaleni po sọ tin to finẹ. 26  Enẹwutu, to whenue Jesu mọ onọ̀ etọn po devi he e yiwanna lọ po to ote to finẹ, e dọna onọ̀ etọn dọmọ: “Yọnnu, pọ́n! Visunnu towe!” 27  Enẹgodo, e dọna devi lọ dọmọ: “Pọ́n! Onọ̀ towe!” Podọ sọn ojlẹ enẹ mẹ, devi lọ plan ẹn yì owhé edetiti tọn gbè. 28  To ehe godo, to whenue Jesu yọnẹn dọ onú lẹpo ko yin hinhẹndi todin, na adà Owe-wiwe tọn lọ nido sọgan yin hinhẹndi, e dọmọ: “Nugbla to hùhù mi.” 29  Núzinzan de to finẹ bọ ovẹn vẹsin gọ́ ẹ. Enẹwutu, yé ze hùmẹ-tekan he gọ́ na ovẹn vẹsin lọ do opò hisọpu tọn de nù bo dlẹn ẹn do onù na ẹn. 30  Todin, to whenue Jesu ko dọ́ ovẹn vẹsin lọ pọ́n, e dọmọ: “E ko yin wiwadotana!” podọ, dile e dẹ́ ota etọn, e jo gbigbọ etọn do. 31  To whenẹnu, na e yin azán Awuwle* tọn wutu, na oṣiọ lọ lẹ nikaa gbọṣi yatin lẹ ji to Gbọjẹzangbe (na azán daho de wẹ Gbọjẹzan enẹ yin,) Ju lẹ biọ to Pilati si nado wẹ́n afọ yetọn lẹ na oṣiọ lọ lẹ nido yin zize sẹ̀. 32  Enẹwutu, awhànfuntọ lọ lẹ wá, bo wẹ́n afọ omẹ tintan podọ omẹ awetọ he yin whiwhè do núgo dopọ hẹ ẹ lẹ tọn. 33  Ṣigba to whenue yé wá Jesu dè bo mọdọ e ko kú, yé ma wẹ́n afọ etọn lẹ. 34  Etomọṣo, dopo to awhànfuntọ lọ lẹ mẹ sọ́ owhán adà mẹ na ẹn, podọ to afọdopolọji ohùn po osin po tọ́njẹgbonu. 35  Podọ ewọ he mọ nujijọ lọ ko dekunnu, nugbo sọ wẹ kunnudide etọn, dawe enẹ sọ yọnẹn dọ nugbo wẹ nuhe e dọ lẹ, na mìlọsu nido sọgan yise. 36  Na nugbo tọn, onú ehelẹ jọ na adà Owe-wiwe tọn lọ nido yin hinhẹndi he dọmọ: “Depope to ohú etọn lẹ mẹ ma na yin gbigbà.” 37  Podọ adà Owe-wiwe tọn devo sọ dọmọ: “Yé na pọ́n Omẹ lọ he yé sọwhán.” 38  Todin, to onú ehelẹ godo, Josẹfu he wá sọn Alimate, he ko yin devi Jesu tọn de to nuglọ na obu etọn na Ju lẹ wutu, biọ to Pilati si na ewọ nido sọgan ze oṣiọ Jesu tọn yì; Pilati sọ nagbè e. Enẹwutu, e wá bo ze oṣiọ etọn sọyi. 39  Nikodẹmi lọsu ga, yèdọ dawe lọ he wá e dè to tintan whenu, hẹn zuya po aloẹsi biblá he yì nudi kilo gbàn po wá. 40  Enẹwutu, yé ze oṣiọ Jesu tọn bo yí alà lẹ do blá ẹ po nuwhẹ́nkun lẹ po kẹdẹdile Ju lẹ tindo aṣa awuwlena ṣiọdidi tọn do. 41  Podọ, jipa de tin to fihe ewọ yin whiwhè do núgo te, yọdò yọyọ de he mẹ mẹdepope ma ko yin titẹ́ do gbede sọ tin to jipa lọ mẹ. 42  Enẹwutu, na e yin azán awuwle* tọn na Ju lẹ wutu, yé tẹ́ Jesu do finẹ, na yọdò lọ to yakẹ.

Nudọnamẹ Odò Tọn

Joh 19:14* Enẹ wẹ, azán he nọ dlẹnalọdo azán he jẹnukọnna Hùnwhẹ azán ṣinawe Akla Madotọ́n lẹ tọn, ehe whenu Ju lẹ nọ wleawuna hùnwhẹ lọ, bo nọ dotana azọ́n niyaniya tọn depope he ma sọgan gbọṣi aimẹ jẹ hùnwhẹ lọ godo.
Joh 19:14* Enẹ wẹ, nudi ogàn 12 whèmẹ tọn, eyin yè hia sọn ojlẹ he mẹ owhè nọ zẹ̀.
Joh 19:31* Enẹ wẹ, azán he nọ dlẹnalọdo azán he jẹnukọnna Gbọjẹzan sẹmẹsẹmẹ tọn, ehe whenu Ju lẹ nọ wleawuna núdùdù na Gbọjẹzan lọ, bo nọ dotana azọ́n niyaniya tọn depope he ma sọgan gbọṣi aimẹ jẹ Gbọjẹzan lọ godo. (Yijlẹdo Eks16:5; 20:10 go.)
Joh 19:42* Pọ́n Joh 19:14, nudọnamẹ odò tọn.