Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Johanu 18:1-40

18  To whenue Jesu ko dọ onú ehelẹ, ewọ po devi etọn lẹ po tọ́nyi awà awetọ agbàdo Kidlọni tọn ji, fihe jipa de te, ewọ po devi etọn lẹ po sọ biọ e mẹ.  Todin, Juda, mẹdehiatọ etọn lọsu yọ́n filọ, na whlasusu wẹ Jesu ko pli po devi etọn lẹ po to finẹ.  Enẹwutu, Juda plan pipli awhànfuntọ lẹ tọn gọna ponọ yẹwhenọgán lẹ po Falesi lẹ po tọn bọ yé hẹn zòwhán lẹ, miyọ́ngbán lẹ po adanwànu lẹ po wá finẹ.  Enẹwutu, na Jesu ko yọ́n nuhe to na jọ do e go lẹpo wutu, e tọ́n bo dọna yé dọmọ: “Mẹnu wẹ mì to dindin?”  Yé gblọnna ẹn dọmọ: “Jesu Nazalẹti tọn wẹ.” E dọna yé dọmọ: “Yẹn wẹ ewọ.” Todin, Juda, mẹdehiatọ etọn lọsu to ote hẹ yé.  Ṣigba, to whenue e dọna yé dọmọ: “Yẹn wẹ ewọ,” yé joagọyigodo bo họ́jai.  To whenẹnu, e sọ vọ́ kanse yé dọmọ: “Mẹnu wẹ mì to dindin?” Yé dọmọ: “Jesu Nazalẹti tọn wẹ.”  Jesu gblọnna yé dọmọ: “Yẹn dọna mì dọ yẹn wẹ ewọ. Enẹwutu, eyin yẹn wẹ mì to dindin, mì gbọ ehelẹ ni yì”;  na ohó lọ nido yin hinhẹndi, ehe e dọ dọmọ: “Gando mẹhe hiẹ na mi lẹ go, yẹn ma hẹn dopo tata to yé mẹ bu.” 10  To whenẹnu, Simọni Pita, na ewọ tindo ohí de wutu, e sún in bo hú afanumẹ yẹwhenọ daho lọ tọn bosọ pà otó etọn adusiwhé tọn sẹ̀. Oyín afanumẹ lọ tọn wẹ Malkọs. 11  Ṣigba, Jesu dọna Pita dọmọ: “Gọ̀ ohí lọ do apà etọn mẹ. Kọfo he Otọ́ lọ ko na mi, be yẹn ma na nù in wẹ ya?” 12  To whenẹnu, pipli awhànfuntọ lẹ tọn po awhàngán daho lọ po gọna ponọ Ju lẹ tọn lẹ wle Jesu bo blá ẹ, 13  yé sọ plan ẹn yì Annas dè jẹnukọn; na ewọ wẹ asi-tọ́ Kaifa, mẹhe yin yẹwhenọ daho to owhe enẹ mẹ lọ tọn. 14  Na nugbo tọn, Kaifa wẹ mẹhe na ayinamẹ Ju lẹ dọ alenu wẹ e yin na yé dọ dawe dopo ni kú do ota gbẹtọ lẹ tọn mẹ. 15  Todin, Simọni Pita po devi devo po to hihodo Jesu. Yẹwhenọ daho lọ yọ́n devi enẹ, podọ ewọ biọ họmẹ hẹ Jesu yì awánu yẹwhenọ daho lọ tọn, 16  ṣigba, Pita to ote to họngbo ji. Enẹwutu, devi diẹ lọ, mẹhe yẹwhenọ daho lọ yọnẹn, tọ́njẹgbonu bo dọho hẹ họ̀njinọtọ lọ bosọ plan Pita biọ họmẹ. 17  To whenẹnu, deviyọnnu họ̀njinọtọ lọ dọna Pita dọmọ: “Hiẹ yin dopo to devi dawe ehe tọn lẹ mẹ ga, kavi e ma yin mọ wẹ?” E sọ dọmọ: “Yẹn ma yin dopo to yé mẹ.” 18  Todin, afanumẹ lẹ po ponọ lẹ po to ote to finẹ, na avivọ tin wutu, yé flọ akán miyọ́n bosọ to miyọ́n hú. Pita lọsu tin to ote hẹ yé bo to miyọ́n hú. 19  To whenẹnu, yẹwhenọgán lọ kanhose Jesu gando devi etọn lẹ go podọ gando nuplọnmẹ etọn go. 20  Jesu gblọnna ẹn dọmọ: “Yẹn ko dọhona aihọn lọ to gbangba. Whepoponu wẹ yẹn nọ plọnmẹ to sinagọgu mẹ podọ to tẹmpli mẹ, fihe Ju lẹpo nọ pli do; yẹn masọ dọ nudepope to nuglọ. 21  Naegbọn hiẹ do to hokanse mi? Kanhose mẹhe ko sè nuhe yẹn dọna yé lẹ. Pọ́n! Ehelẹ yọ́n nuhe yẹn dọ lẹ.” 22  To whenue e ko dọ onú ehelẹ, dopo to ponọ he tin to ote to finẹ lẹ mẹ hotómẹ na Jesu bo dọmọ: “Be mọ wẹ hiẹ na na gblọndo yẹwhenọgán lọ do ya?” 23  Jesu gblọnna ẹn dọmọ: “Eyin nuhe yẹn dọ ylan, dọ nuhe ylan to e mẹ lọ na mi; ṣigba eyin e sọgbe, naegbọn hiẹ do linú mi?” 24  To whenẹnu, Annas do e hlan biblá yì Kaifa yẹwhenọ daho lọ dè. 25  Todin, Simọni Pita to ote bo to miyọ́n hú. To whenẹnu, yé dọna ẹn dọmọ: “Hiẹ lọsu yin dopo to devi etọn lẹ mẹ ga, kavi e ma yin mọ wẹ?” E mọ́n bo dọmọ: “Yẹn ma yin dopo to yé mẹ.” 26  Dopo to afanumẹ yẹwhenọ daho lọ tọn lẹ mẹ, he yin hẹnnumẹ mẹhe Pita pà otó na lọ tọn dọmọ: “Yẹn mọ we to jipa lọ mẹ hẹ ẹ, kavi yẹn ma mọ we wẹ?” 27  Ṣigba, Pita sọ mọ́n whladopo dogọ; podọ to afọdopolọji koklo dosé. 28  To whenẹnu, yé plan Jesu sọn Kaifa dè yì họ̀nmẹ ayimatẹn-gán lọ tọn. Podọ, afọnnu fuu sọ wẹ. Ṣigba, yelọsu ma biọ họ̀nmẹ ayimatẹn-gán lọ tọn ma nado yin hinhẹnflu, na yé nido sọgan dù hùnwhẹ juwayi tọn. 29  To whenẹnu, Pilati tọ́n wá yé dè bo dọmọ: “Whẹsadokọnamẹ tẹwẹ mì hẹnwa sọta dawe ehe?” 30  Yé sọ gblọnna ẹn dọmọ: “Eyin dawe ehe ma yin ylanwatọ de, mí ma na ko ze e jo na we.” 31  To whenẹnu, Pilati dọna yé dọmọ: “Mìlọsu ni plan ẹn bo dawhẹna ẹn sọgbe hẹ osẹ́n mìtọn.” Ju lẹ dọna ẹn dọmọ: “E ma sọgbe hẹ osẹ́n dọ mí ni hù mẹdepope.” 32  Ehe yinmọ na ohó Jesu tọn nido sọgan yin hinhẹndi, ehe e dọ nado do okú wunmẹ he ewọ dona kú lọ hia. 33  Enẹwutu, Pilati sọ vọ́ biọ họ̀nmẹ ayimatẹn-gán lọ tọn bo ylọ Jesu bosọ dọna ẹn dọmọ: “Be hiẹ wẹ ahọlu Ju lẹ tọn ya?” 34  Jesu gblọn dọmọ: “Be ojlo towe titi mẹ wẹ hiẹ dọ ehe sọn, kavi mẹdevo lẹ wẹ dọhona we gando go e?” 35  Pilati gblọn dọmọ: “Yẹn ma yin Ju de, kavi e ma yin mọ wẹ? Akọta towe titi po yẹwhenọgán lẹ po wẹ ze we jo na mi. Etẹwẹ hiẹ wà?” 36  Jesu gblọn dọmọ: “Ahọluduta ṣie ma yin apadewhe aihọn ehe tọn. Eyin ahọluduta ṣie ko yin apadewhe aihọn ehe tọn wẹ, devizọnwatọ ṣie lẹ na ko hoavùn bọ yẹn ma na ko yin zizejo na Ju lẹ. Ṣigba, nalete, ahọluduta ṣie ma yin sọn aihọn ehe mẹ.” 37  To whenẹnu, Pilati dọna ẹn dọmọ: “Eyọn, todin, be ahọlu de wẹ hiẹ yin ya?” Jesu gblọn dọmọ: “Hiẹ lọsu wẹ to didọ dọ yẹn yin ahọlu de. Na ehe wutu wẹ yẹn do yin jiji, podọ na ehe wutu wẹ yẹn ko wá aihọn mẹ, na yẹn nido dekunnu gando nugbo lọ go. Mẹdepope he to adà nugbo lọ tọn mẹ nọ dotoaina ogbè ṣie.” 38  Pilati dọna ẹn dọmọ: “Etẹwẹ yin nugbo?” Podọ to whenue e ko dọ ehe, e sọ vọ́ tọ́nyi Ju lẹ dè bo dọna yé dọmọ: “Yẹn ma mọ oylan de to okọ̀ na ẹn. 39  Humọ, mì tindo aṣa de dọ yẹn ni nọ tún omẹ de dote na mì to hùnwhẹ juwayi tọn whenu. Enẹwutu, be mìwlẹ jlo dọ yẹn ni tún ahọlu Ju lẹ tọn lọ dote na mì ya?” 40  To whenẹnu, yé sọ vọ́ dawhá bo dọmọ: “E ma yin dawe ehe gba, ṣigba Balabas!” Nalete, Balabas yin jaguda de.

Nudọnamẹ Odò Tọn