Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Johanu 17:1-26

17  Jesu dọ onú ehelẹ, podọ, to whenue e ze nukun etọn lẹ daga hlan olọn, e dọmọ: “Otọ́ E, ojlẹ lọ ko wá; pagigona visunnu towe, na visunnu towe nido sọgan pagigona we,  kẹdẹdile hiẹ ko na ẹn aṣẹ do agbasalan lẹpo ji do, dọ gando mẹhe hiẹ ko na ẹn lẹpo go, ewọ nido sọgan na yé ogbẹ̀ madopodo.  Ehe wẹ ogbẹ̀ madopodo, dọ yé ni to vivẹnudo zọnmii nado yọ́n hiẹ Jiwheyẹwhe nugbo dopo kẹdẹ lọ, podọ mẹhe hiẹ dohlan, yèdọ Jesu Klisti.  Yẹn ko pagigona we to aigba ji, na yẹn ko dotana azọ́n he hiẹ na mi nado wà.  Enẹwutu, todin, Otọ́ E, yí gigo he yẹn ko tindo to apá towe whẹpo aihọn do wá tintin mẹ lọ do pagigona mi to apá towe.  “Yẹn ko do oyín towe hia mẹhe hiẹ na mi sọn aihọn mẹ lẹ. Towe wẹ yé, bọ hiẹ yí yé na mi, yé ko sọ payi ohó towe go.  Todin, yé ko yọnẹn dọ nuhe hiẹ na mi lẹpo, dè we wẹ yé wá sọn;  na yẹn ko na yé ohó he hiẹ na mi lẹ, yé ko sọ kẹalọyi yé bo ko yọnẹn na taun tọn dọ yẹn wá taidi afọzedaitọ towe, podọ yé ko yise dọ hiẹ wẹ do mi hlan.  Yẹn basi obiọ gando yé go; yẹn basi obiọ, e ma yin gando aihọn lọ go gba, ṣigba gando mẹhe hiẹ na mi lẹ go; na towe wẹ yé yin wutu, 10  podọ nuhe yẹn tindo lẹpo, towe wẹ, bọ towe lẹ sọ yin ṣie, yẹn ko sọ yin gigopana to ṣẹnṣẹn yetọn. 11  “Humọ, yẹn masọ to aihọn lọ mẹ ba, ṣigba yewlẹ tin to aihọn lọ mẹ bọ yẹn ja dè we. Otọ́ Wiwe, họ́ yé na oyín towe he hiẹ ko na mi lọ wutu, na yé nido sọgan yin dopo kẹdẹdile míwlẹ te do. 12  To whenue yẹn tin po yé po, yẹn nọ họ́ yé na oyín towe he hiẹ ko na mi lọ wutu; yẹn ko sọ whlá yé bọ dopo tata to yé mẹ ma yin vivasudo adavo visunnu vasudo tọn lọ, na adà Owe-wiwe tọn lọ nido sọgan yin hinhẹndi. 13  Ṣigba, todin, yẹn ja dè we, yẹn sọ to onú ehelẹ dọ to whenue yẹn gbẹ́ pò to aihọn lọ mẹ na yé nido sọgan tindo ayajẹ ṣie to gigọ́ mẹ. 14  Yẹn ko na ohó towe yé, ṣigba aihọn lọ ko gbẹwanna yé, na yé ma yin apadewhe aihọn lọ tọn wutu, kẹdẹdile yẹn ma yin apadewhe aihọn tọn do. 15  “Yẹn biọ we, e ma yin nado de yé sẹ̀ sọn aihọn lọ mẹ gba, ṣigba nado họ́ yé na mẹylankan lọ tọn wutu. 16  Yé ma yin apadewhe aihọn tọn, kẹdẹdile yẹn ma yin apadewhe aihọn tọn do. 17  Hẹn yé zun wiwe gbọn nugbo lọ gblamẹ; ohó towe wẹ nugbo. 18  Kẹdẹdile hiẹ do mi hlan aihọn mẹ do, yẹnlọsu do yé hlan aihọn lọ mẹ. 19  Yẹn sọ to dee hẹn zun wiwe na yetọn wutu, na yelọsu nido sọgan yin hinhẹn zun wiwe gbọn nugbo gblamẹ. 20  “Yẹn basi obiọ, e ma yin gando ehelẹ kẹdẹ go, ṣigba gando mẹhe to yise tindo to yẹn mẹ gbọn ohó yetọn gblamẹ lẹ go ga; 21  na yemẹpo nido sọgan yin dopo, kẹdẹdile hiẹ, Otọ́, tin to kọndopọ mẹ hẹ mi bọ yẹn tin to kọndopọ mẹ hẹ we do, na yelọsu nido sọgan tin to kọndopọ mẹ hẹ mí, na aihọn lọ nido sọgan yise dọ hiẹ wẹ do mi hlan. 22  Humọ, yẹn ko na yé gigo he hiẹ na mi, na yé nido sọgan yin dopo kẹdẹdile míwlẹ yin dopo do. 23  Yẹn tin to kọndopọ mẹ hẹ yé podọ hiẹ tin to kọndopọ mẹ hẹ mi, na yé nido sọgan yin hinhẹn zun pipé to dopo mẹ, na aihọn nido yọnẹn dọ hiẹ wẹ do mi hlan bọ hiẹ sọ yiwanna yé kẹdẹdile hiẹ yiwanna mi do. 24  Otọ́ E, gando mẹhe hiẹ na mi lẹ go, yẹn jlo dọ fihe yẹn te, finẹ wẹ yelọsu ni te hẹ mi ga, na yé nido sọgan mọ gigo ṣie he hiẹ ko na mi, na hiẹ ko yiwanna mi jẹnukọnna didá aihọn tọn wutu. 25  Otọ́ dodonọ E, na nugbo tọn, aihọn lọ ma ko yọ́n we; ṣigba yẹn ko yọ́n we, podọ ehelẹ ko yọnẹn dọ hiẹ wẹ do mi hlan. 26  Yẹn ko sọ hẹn oyín towe zun yinyọnẹn na yé bo nasọ hẹn ẹn zun yinyọnẹn, na owanyi he hiẹ tindo na mi nido sọgan tin to yé mẹ bọ yẹn na tin to kọndopọ mẹ hẹ yé.”

Nudọnamẹ Odò Tọn