Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Johanu 14:1-31

14  “Mì dike ahun mìtọn biọ bẹwlu mẹ blo. Mì do yise hia to Jiwheyẹwhe mẹ, mì do yise hia to yẹnlọsu mẹ ga.  Fininọ susu wẹ tin to owhé Otọ́ ṣie tọn gbè. Eyin e ma yinmọ, yẹn na ko dọna mì, na yẹn jei nado wleawu otẹn de tọn na mì wutu.  Humọ, eyin yẹn yì bo wleawu otẹn de tọn na mì, yẹn na lẹkọwa bo na yí mì do whégbè do dee dè, na fihe yẹn te mìlọsu nido to finẹ.  Podọ fihe yẹn jei, mì yọ́n aliho lọ.”  Tọmasi dọna ẹn dọmọ: “Oklunọ, mí ma yọ́n fihe hiẹ jei. Nawẹ mí yọ́n aliho lọ gbọn?”  Jesu dọna ẹn dọmọ: “Yẹn wẹ aliho lọ, nugbo lọ po ogbẹ̀ po. Mẹdepope ma nọ wá Otọ́ dè adavo gbọn yẹn gblamẹ.  Eyin mìwlẹ ko yọ́n mi, mì na ko yọ́n Otọ́ ṣie ga; bẹsọn din, mìwlẹ ko yọ́n ewọ bo ko sọ mọ ẹn.”  Filippi dọna ẹn dọmọ: “Oklunọ, do Otọ́ lọ hia mí, podọ enẹ ko pé mí.”  Jesu dọna ẹn dọmọ: “Yẹn ko tin po mì po na ojlẹ dindẹn sọmọ, ṣogan, bọ hiẹ Filippi ma ko yọ́n mi ya? Ewọ he ko mọ mi ko mọ Otọ́ lọ ga. Naegbọn hiẹ do dọ dọ, ‘Do Otọ́ lọ hia mí’? 10  Be hiẹ ma yise dọ yẹn tin to kọndopọ mẹ hẹ Otọ́ lọ bọ Otọ́ tin to kọndopọ mẹ hẹ mi wẹ ya? Nuhe yẹn dọna mì lẹ, yẹn ma dọ sọn ojlo ṣie titi mẹ gba; ṣigba Otọ́ lọ he gbọṣi kọndopọ mẹ hẹ mi wẹ to azọ́n etọn lẹ wà. 11  Mì yí mi sè, dọ yẹn tin to kọndopọ mẹ hẹ Otọ́ lọ bọ Otọ́ tin to kọndopọ mẹ hẹ mi; eyin e ma yinmọ, mì bo yise na azọ́n lọ lẹ lọsu wutu. 12  Nugbonugbo wẹ yẹn dọna mì dọ, Ewọ he nọ do yise hia to yẹn mẹ, ewọ lọsu na wà azọ́n he yẹn wà lẹ; ewọ nasọ wà azọ́n he klohu ehelẹ, na yẹn jei Otọ́ lọ dè wutu. 13  Humọ, nudepope he mì biọ to oyín ṣie mẹ, yẹn na wà ẹ, na Otọ́ lọ nido sọgan yin gigopana gbọn Visunnu lọ gblamẹ. 14  Eyin mì biọ nudepope to oyín ṣie mẹ, yẹn na wà ẹ. 15  “Eyin mìwlẹ yiwanna mi, mì na yìn gbedide ṣie lẹ; 16  yẹn nasọ biọ Otọ́ bọ ewọ na na mì alọgọtọ devo he na nọhẹ mì kakadoi, 17  enẹ wẹ gbigbọ nugbo tọn lọ, ehe aihọn ma sọgan mọyi, na e ma nọ mọ ẹn kavi yọ́n ẹn wutu. Mìwlẹ yọ́n ẹn, na e gbọṣi mì dè bo tin to mì mẹ wutu. 18  Yẹn ma na jo mì do aluẹmẹ gba. Yẹn na lẹkọwa mì dè. 19  Whenu vude dogọ, aihọn ma nasọ mọ mi ba, ṣigba mìwlẹ na mọ mi, na yẹn to ogbẹ̀ bọ mìwlẹ nasọ nọgbẹ̀ wutu. 20  To azán enẹ gbè, mìwlẹ na yọnẹn dọ yẹn tin to kọndopọ mẹ hẹ Otọ́ ṣie bọ mìwlẹ tin to kọndopọ mẹ hẹ mi podọ yẹn to kọndopọ mẹ hẹ mì. 21  Ewọ he mọ gbedide ṣie lẹ yí bo nọ yìn yé, ewọ wẹ mẹhe yiwanna mi. To alọ devo mẹ, ewọ he yiwanna mi, Otọ́ ṣie na yiwanna ẹn, yẹn nasọ yiwanna ẹn bo na do dee hia ẹ hezeheze.” 22  Juda, e ma yin Iskaliọti, dọna ẹn dọmọ: “Oklunọ, etẹwẹ jọ bọ hiẹ do jlo na do dewe hia mí hezeheze bo ma jlo na do dewe hia aihọn lọ?” 23  Jesu sọ gblọnna ẹn dọmọ: “Eyin mẹdepope yiwanna mi, ewọ na payi ohó ṣie go, Otọ́ ṣie nasọ yiwanna ẹn, mí nasọ wá ewọ dè bo basi fininọ mítọn do e dè. 24  Ewọ he ma yiwanna mi ma nọ payi ohó ṣie lẹ go; podọ ohó he mì to sisè ma yin ṣie gba, ṣigba Otọ́ he do mi hlan lọ tọn wẹ. 25  “Yẹn ko dọ onú ehelẹ na mì to whenue yẹn tin to mì dè. 26  Ṣigba, alọgọtọ lọ, yèdọ gbigbọ wiwe, he Otọ́ lọ na dohlan to oyín ṣie mẹ, enẹ lọ wẹ na plọn mì onú lẹpo bo na hẹn onú lẹpo he yẹn ko dọna mì wá oflin mẹ na mì. 27  Yẹn jo jijọho do mì dè, yẹn na mì jijọho ṣie. Yẹn ma na ẹn mì to aliho he mẹ aihọn lọ nọ namẹ te gba. Mì dike ahun mìtọn biọ bẹwlu mẹ kavi gbàdo na obu wutu blo. 28  Mì ko sè bọ yẹn dọna mì dọ, Yẹn jei bo nasọ lẹkọwa mì dè. Eyin mì yiwanna mi, mì na jaya dọ yẹn jei Otọ́ lọ dè, na Otọ́ klohugan mi wutu. 29  Enẹwutu, todin, yẹn ko dọna mì whẹpo e nado jọ, na to whenue e na jọ, mì nido yise. 30  Yẹn ma na dọho susu hẹ mì ba, na ogán aihọn tọn lọ ja. Podọ ewọ ma tindo huhlọn do yẹn ji, 31  ṣigba, na aihọn nido yọnẹn dọ yẹn yiwanna Otọ́, yèdọ dile Otọ́ lọ ko degbena mi nado wà do, mọ wẹ yẹn to wiwà do. Mì fọ́n, mì gbọ mí ni yì sọn fi.

Nudọnamẹ Odò Tọn