Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Johanu 13:1-38

13  Todin, na Jesu ko yọnẹn jẹnukọnna hùnwhẹ juwayi tọn lọ dọ ojlẹ emitọn ko wá nado tọ́n sọn aihọn ehe mẹ yì Otọ́ lọ dè wutu, dile e ko yiwanna etọn titi he to aihọn lọ mẹ lẹ, e yiwanna yé jẹ opodo.  Enẹwutu, dile núdùdù whèjai tọn lọ to yìyì, Lẹgba ko yí i do ahun mẹ na Juda Iskaliọti, visunnu Simọni tọn, nado de e hia,  na ewọ yọnẹn dọ Otọ́ lọ ko yí onú lẹpo do alọ emitọn mẹ podọ Jiwheyẹwhe dè wẹ emi wá sọn bo nasọ lẹkọyi Jiwheyẹwhe dè wutu,  e fọ́n sọn núdùdù whèjai tọn lọ kọ̀n bo de awugbó etọn lẹ do apadopo. Podọ, to whenue e yí awusúnsúnvọ̀ de, e blagbajana ede.  To whenue e ko kọ̀n osin do basia de mẹ, e jẹ afọ klọ́ na devi etọn lẹ ji bo nọ yí awusúnsúnvọ̀ he e yí do blagbajana ede lọ do súnsún.  E sọ jẹ Simọni Pita dè. Ewọ dọna ẹn dọmọ: “Oklunọ, hiẹ jlo na klọ́ afọ ṣie lẹ wẹ?”  Jesu sọ gblọnna ẹn dọmọ: “Nuhe yẹn to wiwà, hiẹ ma mọnukunnujẹemẹ todin, ṣigba hiẹ na wá mọnukunnujẹemẹ to onú ehelẹ godo.”  Pita dọna ẹn dọmọ: “Lala, hiẹ ma na klọ́ afọ ṣie lẹ gbede.” Jesu gblọnna ẹn dọmọ: “Eyin yẹn ma klọ́ yé, hiẹ ma tindo mimá hẹ mi gba.”  Simọni Pita dọna ẹn dọmọ: “Oklunọ, e ma yin afọ ṣie lẹ kẹdẹ gba, ṣigba alọ ṣie lẹ po ota ṣie po ga.” 10  Jesu dọna ẹn dọmọ: “Ewọ he ko lawu ma tindo nuhudo hugan afọ etọn lẹ kiklọ tọn, ṣigba e ko wé pete. Podọ mìwlẹ wé, ṣigba e ma yin mìmẹpo gba.” 11  Na nugbo tọn, e ko yọ́n mẹhe to na de e hia. Enẹwutu wẹ e do dọmọ: “E ma yin mìmẹpo wẹ wé gba.” 12  Todin, to whenue e ko klọ́ afọ yetọn lẹ bo ko ze awugbó etọn lẹ dó bo ko sọ vọ́ jagla to tafo kọ̀n, e dọna yé dọmọ: “Be mìwlẹ yọ́n nuhe yẹn ko wà na mì lọ ya? 13  Mì nọ ylọ mi dọ, ‘Mẹplọntọ,’ podọ, ‘Oklunọ,’ owhẹ̀ mìtọn whẹ́n, na mọ wẹ yẹn yin. 14  Enẹwutu, eyin yẹn, he tlẹ yin Oklunọ po Mẹplọntọ po klọ́ afọ mìtọn lẹ, mìlọsu dona nọ klọ́ afọ ode awetọ mìtọn lẹ tọn ga. 15  Na ohia wẹ yẹn zedai na mì, dọ, kẹdẹdile yẹn basi na mì do, mọ wẹ mìlọsu dona nọ basi do ga. 16  Nugbonugbo wẹ yẹn dọna mì dọ, Afanumẹ de ma nọ klohu oklunọ etọn, mọdopolọ mẹhe yin didohlan ma nọ klohu mẹhe do e hlan gba. 17  Eyin mìwlẹ yọ́n onú ehelẹ, ayajẹnọ wẹ mì eyin mì nọ basi yé. 18  Yẹn ma to hodọ gando mìmẹpo go gba; yẹn yọ́n mẹhe yẹn ko de lẹ. Ṣigba, na Owe-wiwe nido sọgan yin hinhẹndi dọ, ‘Ewọ he ko nọ dù núdùdù ṣie ko ze afọgbẹn etọn daga sọta mi.’ 19  Bẹsọn din, yẹn to didọna mì whẹpo e nado jọ, na to whenue e na jọ, mìwlẹ nido yise dọ yẹn wẹ omẹ lọ. 20  Nugbonugbo wẹ yẹn dọna mì dọ, Ewọ he yí mẹdepope he yẹn dohlan yí yẹnlọsu ga. Podọ ewọ he yí mi, yí mẹhe do mi hlan lọsu ga.” 21  To onú ehelẹ didọ godo, Jesu yin tuklado to gbigbọ mẹ, ewọ sọ dekunnu dọmọ: “Nugbonugbo wẹ yẹn dọna mì dọ, Dopo to mì mẹ na de mi hia.” 22  Devi lẹ jẹ ode awetọ pọ́n ji, na yé ma yọ́n mẹhe hodọ ewọ te wutu. 23  Dopo to devi lẹ mẹ, yèdọ mẹhe Jesu yiwanna lọ jagla to nukọn Jesu tọn to akọ́nnu etọn. 24  Enẹwutu, Simọni Pita mì ota hlan ewọ bo dọna ẹn dọmọ: “Dọ mẹhe hodọ e te lọ na mí.” 25  To whenẹnu, ewọ dẹ́ yì godo hlan akọ́nnu Jesu tọn bo dọmọ: “Oklunọ, mẹnu wẹ?” 26  Enẹwutu, Jesu gblọn dọmọ: “Omẹ lọ he yẹn na ze nùdo he yẹn yí do siọ agbán mẹ na lọ wẹ.” Todin, to whenue e ko yí nùdo lọ do siọ agbán mẹ, e ze e bo yí na Juda, visunnu Simọni Iskaliọti tọn. 27  Podọ to nùdo lọ godo, to whenẹnu, Satani biọ ewọ mẹ. Enẹwutu, Jesu dọna ẹn dọmọ: “Nuhe hiẹ to bibasi, basi i po awuyiya po dogọ.” 28  Ṣigba, depope to mẹhe jagla to tafo kọ̀n hẹ ẹ lẹ mẹ ma yọ́n lẹndai he wutu e do dọ ehe na ẹn. 29  Na taun tọn, delẹ to yé mẹ to linlẹn dọ, to whenue e yindọ Juda si wẹ apotin akuẹ tọn lọ te, didọna ẹn wẹ Jesu te dọmọ: “Họ̀ onú he mí tindo nuhudo etọn lẹ na hùnwhẹ lọ,” kavi dọ ewọ ni na nude wamọnọ lẹ. 30  To whenẹnu, to whenue e ko yí nùdo lọ, e tọ́njẹgbonu to afọdopolọji. Zánmẹ sọ wẹ. 31  Enẹwutu, to whenue e ko tọ́nyi, Jesu dọmọ: “Todin, Visunnu gbẹtọ tọn ko yin gigopana, podọ Jiwheyẹwhe ko yin gigopana gbọn ewọ gblamẹ. 32  Jiwheyẹwhe lọsu nasọ pagigona ẹn, podọ e na pagigona ẹn to afọdopolọji. 33  Yọpọ lẹ emi, yẹn na gbẹ́ nọ mì dè vude dogọ. Mìwlẹ na dín mi; podọ kẹdẹdile yẹn ko dọna Ju lẹ do dọ, ‘Fihe yẹn jei, mìwlẹ ma sọgan wá,’ todin, yẹn sọ vọ́ dọ ẹ na mìlọsu. 34  Gbedide yọyọ de wẹ yẹn to nina mì, dọ mì ni yiwanna ode awetọ; kẹdẹdile yẹn ko yiwanna mì do, dọ mìlọsu ni yiwanna ode awetọ mìtọn. 35  Gbọn ehe dali wẹ mẹlẹpo na yọnẹn dọ devi ṣie lẹ wẹ mì yin, eyin mì tindo owanyi to mìdelẹ ṣẹnṣẹn.” 36  Simọni Pita dọna ẹn dọmọ: “Oklunọ, fie wẹ hiẹ jei?” Jesu gblọn dọmọ: “Fihe yẹn jei, hiẹ ma sọgan hodo mi todin, ṣigba hiẹ na hodo mi to godo mẹ.” 37  Pita dọna ẹn dọmọ: “Oklunọ, naegbọn yẹn ma sọgan hodo we todin? Yẹn na ze alindọn ṣie jo do ota towe mẹ.” 38  Jesu gblọn dọmọ: “Be didọ wẹ a te dọ hiẹ na ze alindọn towe jo do ota ṣie mẹ ya? Nugbonugbo wẹ yẹn dọna we dọ, Koklo ma na ko dosé to aliho depope mẹ whẹpo hiẹ nado mọ́n mi whla atọ̀n.”

Nudọnamẹ Odò Tọn