Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Johanu 10:1-42

10  “Nugbonugbo wẹ yẹn dọna mì dọ, ewọ he ma gbọn ohọ̀n lọ nù biọ lẹngbọpo lọ mẹ ṣigba he hẹji gbọn fidevo lẹ, ajotọ po whébẹtọ po wẹ omẹ enẹ.  Ṣigba, ewọ he gbọn ohọ̀n lọ nù biọ e mẹ wẹ lẹngbọhọtọ lẹngbọ lẹ tọn.  Họ̀njinọtọ lọ sọ hùnhọ̀n na ewọ, podọ lẹngbọ lẹ dotoaina ogbè etọn, ewọ sọ ylọ lẹngbọ etọn titi lẹ gbọn oyín yetọn dali bo plan yé tọ́n.  To whenue e ko plan etọn titi lẹpo tọ́n, e jẹnukọnna yé, lẹngbọ lẹ sọ hodo e, na yé yọ́n ogbè etọn wutu.  Jonọ de wẹ yé ma na hodo to aliho depope mẹ, ṣigba yé na họnyi sọn ewọ dè, na yé ma yọ́n ogbè jonọ lẹ tọn wutu.”  Jesu dọ nuyijlẹdonugo ehe na yé; ṣigba yé ma yọ́n zẹẹmẹ nuhe e to didọna yé lẹ tọn.  Enẹwutu, Jesu sọ vọ́ dọna yé dọmọ: “Nugbonugbo wẹ yẹn dọna mì dọ, Yẹn wẹ ohọ̀n lọ na lẹngbọ lẹ.  Ajotọ po whébẹtọ po wẹ yemẹpo he wá bo gbọn lalo dali yí oyín ṣie zan lẹ; ṣigba lẹngbọ lẹ ma dotoaina yé gba.  Yẹn wẹ ohọ̀n lọ; mẹdepope he gbọn yẹn nù biọ e mẹ na yin whinwhlẹngán, podọ ewọ na biọ e mẹ bo tọ́n bosọ mọ kanlindugbo. 10  Ajotọ ma nọ wá adavo nado fìnnú bo hùmẹ bosọ husudo. Yẹn wá na yé nido tindo ogbẹ̀ podọ nado sọgan tindo e to gigọ́ mẹ. 11  Yẹn wẹ lẹngbọhọtọ dagbe lọ; lẹngbọhọtọ dagbe nọ ze alindọn etọn jo do ota lẹngbọ lẹ tọn mẹ. 12  Pakanọ he ma yin lẹngbọhọtọ podọ he lẹngbọ lẹ ma yin etọn titi, nọ mọ ohla ja bo nọ jo lẹngbọ lẹ do bosọ nọ họnyi—ohla sọ nọ lọ́n jẹ yé ji bo nọ gbà yé do— 13  na pakanọ de wẹ ewọ bo ma nọ hò lẹngbọ lẹ tọn pọ́n. 14  Yẹn wẹ lẹngbọhọtọ dagbe lọ, podọ yẹn yọ́n lẹngbọ ṣie lẹ, lẹngbọ ṣie lẹ sọ yọ́n mi, 15  kẹdẹdile Otọ́ lọ yọ́n mi bọ yẹn yọ́n Otọ́ lọ do; yẹn sọ ze alindọn ṣie jo do ota lẹngbọ lẹ tọn mẹ. 16  “Yẹn sọ tindo lẹngbọ devo lẹ, he ma yin apó ehe tọn; yewlẹ ga wẹ yẹn dona hẹnwa, yé nasọ dotoaina ogbè ṣie, podọ yé na lẹzun lẹngbọpa dopo, lẹngbọhọtọ dopo. 17  Ehe wutu wẹ Otọ́ lọ yiwanna mi, na yẹn ze alindọn ṣie jo, na yẹn nido sọgan vọ́ ẹ mọyi. 18  E ma yin mẹde wẹ yí ogbẹ̀ ṣie gba, ṣigba yẹnlọsu wẹ ze e jo sọn ojlo mẹ wá. Yẹn tindo jlọjẹ nado ze e jo, yẹn sọ tindo jlọjẹ nado vọ́ ẹ mọyi. Otọ́ ṣie dè wẹ yẹn mọ gbedide ehe yí sọn.” 19  Whladopo dogọ, kinklan de fọ́n to Ju lẹ ṣẹnṣẹn na ohó ehelẹ wutu. 20  Susu to yé mẹ to didọmọ: “E tindo aovi de bosọ hùnalẹ̀. Naegbọn mì to todoaina ẹn?” 21  Mẹdevo lẹ nọ dọ dọ: “Ohó ehelẹ ma taidi mẹhe tindo aovi de tọn gba. Aovi de ma sọgan hùn nukun nukuntọ́nnọ lẹ tọn, kavi e sọgan wàmọ wẹ?” 22  To ojlẹ enẹ mẹ, hùnwhẹ klandowiwe tọn lọ wá aimẹ to Jelusalẹm. Avivọ-whenu sọ wẹ, 23  bọ Jesu to zọnlinzin gbọn tẹmpli mẹ to agbà gaa* Sọlomọni tọn mẹ. 24  Enẹwutu, Ju lẹ lẹdo e pé bo jẹ didọna ẹn ji dọmọ: “Nawẹ e na dẹnsọ bọ hiẹ na jo alindọn mítọn do ayihaawe mẹ? Eyin hiẹ wẹ Klisti lọ, dọna mí madoadudẹ́ji.” 25  Jesu gblọnna yé dọmọ: “Yẹn ko dọna mì, ṣogan mì ma yise. Azọ́n he yẹn to wiwà to oyín Otọ́ ṣie tọn mẹ lẹ, ehelẹ wẹ to kunnude gando go e. 26  Ṣigba, mìwlẹ ma yise, na mì ma yin lẹngbọ ṣie lẹ wutu. 27  Lẹngbọ ṣie lẹ nọ dotoaina ogbè ṣie, yẹn sọ yọ́n yé, bọ yé nọ hodo mi. 28  Podọ yẹn na na yé ogbẹ̀ madopodo, bọ yé ma na yin vivasudo gbede to aliho depope mẹ, podọ mẹdepope ma na hò yé yí sọn alọ ṣie mẹ. 29  Nuhe Otọ́ ṣie ko na mi yin nude he klohu onú devo lẹpo, podọ mẹdepope ma sọgan hò yé yí sọn alọ Otọ́ lọ tọn mẹ. 30  Dopo* wẹ yẹn po Otọ́ lọ po.” 31  Whladopo dogọ, Ju lẹ ze zannu lẹ nado dlan do e. 32  Jesu gblọnna yé dọmọ: “Azọ́n dagbe susu wẹ yẹn dohia mì sọn Otọ́ lọ dè. Detẹ to azọ́n enẹlẹ mẹ wẹ mì to zannu dlan do mi na?” 33  Ju lẹ gblọnna ẹn dọmọ: “Mí ma to zannu dlan do we na azọ́n dagbe de gba, ṣigba na nùzinzan wutu, na dile etlẹ yindọ gbẹtọ de wẹ hiẹ, a hẹn dewe zun yẹwhe de.” 34  Jesu gblọnna yé dọmọ: “Be e ma yin kinkàndai to Osẹ́n mìtọn mẹ dọ, ‘Yẹn dọmọ: “Yẹwhe lẹ wẹ mìwlẹ yin”’? 35  Eyin ewọ ylọ mẹhe ohó Jiwheyẹwhe tọn gblewhẹdo lẹ dọ ‘yẹwhe lẹ,’ ṣogan bọ Owe-wiwe ma yin hinhẹn zun ovọ́, 36  naegbọn mìwlẹ dọna yẹn mẹhe Otọ́ lọ ko hẹn zun wiwe bo dohlan aihọn lọ mẹ dọ, ‘Hiẹ zánnu,’ na yẹn dọ dọ, Visunnu Jiwheyẹwhe tọn wẹ yẹn yin wutu? 37  Eyin e ma yin azọ́n Otọ́ ṣie tọn lẹ wà wẹ yẹn te, mì ma yí mi sè blo. 38  Ṣigba, eyin azọ́n lọ lẹ wà wẹ yẹn te, eyin mìwlẹ ma tlẹ yí mi sè, mì bo yí azọ́n lọ lẹ sè, na mì nido sọgan wá yọnẹn bosọ sọgan zindonukọn to yinyọnẹn mẹ dọ Otọ́ lọ tin to kọndopọ mẹ hẹ mi podọ yẹn tin to kọndopọ mẹ hẹ Otọ́ lọ.” 39  To whenẹnu, yé sọ vọ́ tẹnpọn nado wle e; ṣigba e họnyi sọn yé dè. 40  Enẹwutu, e sọ vọ́ yì Jọdani godo fie Johanu baptizi gbẹtọ lẹ te dai, ewọ sọ nọ finẹ. 41  Gbẹtọ susu sọ wá e dè, podọ yé jẹ didọ ji dọmọ: “Na nugbo tọn, Johanu ma basi ohia dopo tata, ṣigba onú lẹpo he Johanu dọ gando dawe ehe go wẹ yin nugbo.” 42  Mẹsusu sọ tindo yise to ewọ mẹ to finẹ.

Nudọnamẹ Odò Tọn

Joh 10:23 Pọ́n Joh 5:2, nudọnamẹ odò tọn.
Joh 10:30 Kavi, “to kọndopọ mẹ.” Gl., hen, nado do gbekọndopọ mlẹnmlẹn hia.