Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Johanu 1:1-51

1  To whẹwhẹwhenu wẹ Ohó lọ ko tin, podọ Ohó lọ ko tin po Jiwheyẹwhe po, Ohó lọ sọ yin yẹwhe de.  Ewọ ko tin to whẹwhẹwhenu hẹ Jiwheyẹwhe.  Onú lẹpo wá aimẹ gbọn ewọ gblamẹ, podọ matin ewọ onú dopo tata ma wá aimẹ. Nuhe ko wá aimẹ  gbọn ewọ dali wẹ ogbẹ̀, podọ ogbẹ̀ lọ wẹ hinhọ́n gbẹtọ lẹ tọn.  Podọ hinhọ́n lọ to wunhọ́n to zinvlu mẹ, ṣigba zinvlu ma dohuhlọn do e ji.  Dawe de tin, he yin didohlan taidi afọzedaitọ Jiwheyẹwhe tọn: oyín etọn wẹ Johanu.  Dawe ehe wá taidi kunnudetọ de, yèdọ nado dekunnu gando hinhọ́n lọ go, na gbẹtọ wunmẹ lẹpo nido sọgan tindo yise gbọn ewọ gblamẹ.  Ewọ ma wẹ yin hinhọ́n lọ gba, ṣigba ewọ yin yiyizan nado dekunnu gando hinhọ́n lọ go.  Hinhọ́n nugbo lọ he nọ na hinhọ́n gbẹtọ wunmẹ lẹpo na wá aihọn mẹ to madẹnmẹ. 10  Ewọ ko tin to aihọn lọ mẹ, aihọn lọ sọ wá aimẹ gbọn ewọ gblamẹ, ṣigba aihọn lọ ma yọ́n ewọ. 11  E wá owhé edetiti tọn gbè, ṣigba omẹ etọn titi lẹ ma yí i do whégbè. 12  Ṣigba, mẹhe kẹalọyi i lẹpo wẹ e na jlọjẹ nado lẹzun ovi Jiwheyẹwhe tọn lẹ, na yé do yise hia to oyín etọn mẹ wutu; 13  yé sọ yin jiji, e ma yin gbọn ohùn dali kavi gbọn ojlo agbasalan tọn dali kavi gbọn ojlo gbẹtọ tọn dali gba, ṣigba gbọn Jiwheyẹwhe dali. 14  Enẹwutu, Ohó lọ lẹzun agbasalan bo nọ ṣẹnṣẹn mítọn, mí sọ mọ gigo etọn, yèdọ gigo he taidi ovi detọ́n dopo akàn sọn otọ́ de dè tọn nkọ; ewọ sọ gọ́ na nukundagbe majẹhẹ po nugbo po. 15  (Johanu dekunnu gando ewọ go, mọwẹ, na taun tọn, e dawhá jẹgbonu—ewọ wẹ omẹ lọ he dọ—dọmọ: “Omẹ lọ he ja to godo ṣie ko jẹnukọnna mi, na ewọ ko tin jẹnukọnna mi wutu.”) 16  Mímẹpo wẹ mọ nukundagbe majẹhẹ susugege yí sọn e dè, na ewọ gọ́ na nukundagbe majẹhẹ wutu. 17  Na Osẹ́n lọ yin nina gbọn Mose gblamẹ wutu, nukundagbe majẹhẹ po nugbo lọ po wá gbọn Jesu Klisti gblamẹ. 18  Mẹdepope ma ko mọ Jiwheyẹwhe pọ́n gbede; yẹwhe dopo akàn he tin to akọ́nnu Otọ́ tọn wẹ omẹ lọ he ko do e hia. 19  Todin, ehe wẹ kunnudide Johanu tọn to whenue Ju lẹ do yẹwhenọ lẹ po Levinu lẹ po hlan ẹn sọn Jelusalẹm nado kanse e dọmọ: “Mẹnu wẹ hiẹ?” 20  Podọ e yigbe bo ma gbẹ́, ṣigba e yigbe dọmọ: “E ma yin yẹn wẹ Klisti lọ.” 21  Yé sọ kanse e dọmọ: “Mẹnu wẹ hiẹ yin lo? Be hiẹ wẹ Elija ya?” Ewọ sọ dọmọ: “Yẹn ma wẹ.” “Be hiẹ wẹ Yẹwhegán Lọ ya?” E sọ gblọn dọmọ: “Lala!” 22  Enẹwutu, yé dọna ẹn dọmọ: “Mẹnu wẹ hiẹ? Na mí nido sọgan yì dọna mẹhe do mí hlan lẹ. Etẹwẹ hiẹ dọ gando dewe go?” 23  E dọmọ: “Yẹn wẹ omẹ lọ he to awhádo jẹgbonu to danfafa ji dọ, ‘Mì jlọ omọ́ji Jehovah tọn,’ kẹdẹdile yẹwhegán Isaia dọ do.” 24  Todin, mẹhe yin didohlan lẹ wá sọn Falesi lẹ mẹ. 25  Enẹwutu, yé kannubiọ ẹ bo dọna ẹn dọmọ: “To whelọnu lo, naegbọn hiẹ do to omẹ lẹ baptizi eyin hiẹ lọsu ma yin Klisti kavi Elija kavi Yẹwhegán Lọ?” 26  Johanu gblọnna yé dọmọ: “Yẹn yí osin do baptizi. To ṣẹnṣẹn mìtọn, mẹde to ote mẹhe mì ma yọnẹn, 27  mẹhe ja to godo ṣie, ṣigba afọpakàn mẹhe tọn yẹn ma jẹ nado tún.” 28  Onú ehelẹ jọ to Bẹtani, to Jọdani godo, fihe Johanu to gbẹtọ lẹ baptizi te. 29  To aihọngbè, e mọ bọ Jesu ja e dè, ewọ sọ dọmọ: “Pọ́n, Lẹngbọvu Jiwheyẹwhe tọn lọ he ze ylando aihọn tọn yì! 30  Omẹ ehe lọ go wẹ yẹn ko dọ gando dọ, To godo ṣie dawe de ja he ko jẹnukọnna mi, na ewọ ko tin jẹnukọnna mi wutu. 31  Dile etlẹ yindọ yẹn ma yọ́n ewọ, whẹwhinwhẹ́n he wutu yẹn yí osin do to omẹ lẹ baptizi wẹ yindọ, na ewọ nido sọgan yin hinhẹn sọawuhia Islaeli.” 32  Johanu lọsu dekunnu dọmọ: “Yẹn mọ gbigbọ to tejẹ taidi apoe de sọn olọn, e sọ jẹ do e ji. 33  Dile etlẹ yindọ yẹn ma yọ́n ewọ, ṣigba Omẹ lọ he do mi hlan nado yí osin do baptizi dọna mi dọ, ‘To whenue hiẹ mọ gbigbọ ja odò bosọ jẹ do mẹde ji, hiẹ ni yọnẹn dọ omẹ enẹlọ wẹ nọ yí gbigbọ wiwe do baptizi.’ 34  Podọ yẹn ko mọ ẹn, yẹn ko sọ dekunnu dọ omẹ ehe lọ wẹ Visunnu Jiwheyẹwhe tọn.” 35  Whladopo dogọ, to aihọngbè, Johanu tin to ote po awe to devi etọn lẹ mẹ po, 36  podọ dile e mọ bọ Jesu to zọnlinzin, e dọmọ: “Mì pọ́n, Lẹngbọvu Jiwheyẹwhe tọn lọ!” 37  Podọ to whenue devi awe lọ lẹ sè hodidọ ehe, yé hodo Jesu. 38  To whenẹnu, Jesu lẹgodo podọ, to whenue e mọdọ yé to hihodo e, e dọna yé dọmọ: “Etẹ dín wẹ mì te?” Yé dọna ẹn dọmọ: “Labbi, (he lẹdogbedevomẹ etọn zẹẹmẹdo, Mẹplọntọ,) fie wẹ hiẹ nọ nọ̀?” 39  E dọna yé dọmọ: “Mì wá, mì nasọ mọ.” Enẹwutu, yé yì bo mọ fihe e nọ nọ̀, yé sọ nọ hẹ ẹ to azán enẹ gbè; e yin nudi gànhiho aotọ* mẹ. 40  Andle nọvisunnu Simọni Pita tọn yin dopo to omẹ awe he sè nuhe Johanu dọ bosọ hodo Jesu lọ lẹ mẹ. 41  Jẹnukọn whẹ́, ewọ mọ nọvisunnu etọn titi, Simọni, bo dọna ẹn dọmọ: “Mí ko mọ Mẹssia lọ” (he lẹdogbedevomẹ etọn zẹẹmẹdo, Klisti). 42  E plan ẹn yì Jesu dè. To whenue Jesu pọ́n ẹn, e dọmọ: “Hiẹ wẹ Simọni visunnu Johanu tọn; hiẹ na nọ yin yiylọdọ Kefa” (he lẹdogbedevomẹ etọn zẹẹmẹdo Pita). 43  To aihọngbè, e jlo nado yì Galili. To whenẹnu, Jesu mọ Filippi bo dọna ẹn dọmọ: “Lẹzun hodotọ ṣie.” 44  Todin, Filippi wá sọn Bẹtsaida, sọn tòdaho Andle po Pita po tọn mẹ. 45  Filippi mọ Natanaeli bo dọna ẹn dọmọ: “Mí ko mọ omẹ lọ he Mose, to Osẹ́n lọ mẹ, po Yẹwhegán lẹ po ko kanwe gandego, yèdọ Jesu, visunnu Josẹfu tọn, sọn Nazalẹti.” 46  Ṣigba, Natanaeli dọna ẹn dọmọ: “Be onú dagbe depope sọgan wá sọn Nazalẹti ya?” Filippi dọna ẹn dọmọ: “Wá pọ́n.” 47  Jesu mọ Natanaeli ja e dè bo dọ gando ewọ go dọmọ: “Pọ́n, Islaelivi nugbo de, mẹhe mẹ oklọ depope ma tin te.” 48  Natanaeli dọna ẹn dọmọ: “Nawẹ hiẹ wagbọn do yọ́n mi?” Jesu gblọnna ẹn dọmọ: “Whẹpo Filippi do ylọ we, to whenue hiẹ tin to ovòtin glọ, yẹn ko mọ we.” 49  Natanaeli gblọnna ẹn dọmọ: “Labbi, hiẹ wẹ Visunnu Jiwheyẹwhe tọn lọ, hiẹ wẹ Ahọlu Islaeli tọn.” 50  Jesu gblọnna ẹn dọmọ: “Na yẹn dọna we dọ yẹn mọ we to ovòtin glọ wutu wẹ hiẹ do yí mi sè ya? Hiẹ na mọ onú he klohugan ehelẹ.” 51  Humọ, e dọna ẹn dọmọ: “Nugbonugbo wẹ yẹn dọna mì, Mì na mọ olọn hùndonuvo bọ angẹli Jiwheyẹwhe tọn lẹ na to jihẹ bo to tejẹ wá Visunnu gbẹtọ tọn dè.”

Nudọnamẹ Odò Tọn

Joh 1:39* Enẹ wẹ, nudi ogàn 4 whèjai tọn, eyin yè hia sọn ojlẹ he mẹ owhè nọ zẹ̀.