Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 9:1-43

9  Ṣigba, Saulu he gbẹ́ pò to gbigbọ budonamẹ tọn po mẹhùhù tọn po gbọ sọta devi Oklunọ tọn lẹ yì yẹwhenọ daho lọ dè  bo biọ to e si nado na ẹn wekanhlanmẹ lẹ na sinagọgu he to Damasku lẹ, na e nido sọgan hẹn mẹdepope he e mọ bọ e yin Aliho Lọ* tọn wá Jelusalẹm biblá, yèdọ sunnu po yọnnu po.  Todin, dile e to gbejizọnlinzin, e sẹpọ Damasku, bọ to ajiji mẹ, hinhọ́n de họ́n lẹdo e pé sọn olọn,  ewọ sọ jai do kọmẹ bo sè ogbè de dọna ẹn dọmọ: “Saulu, Saulu, naegbọn hiẹ do to homẹkẹndo mi?”  Ewọ dọmọ: “Hiẹ mẹnu wẹ, Oklunọ?” E dọmọ: “Yẹn Jesu wẹ, mẹhe hiẹ to homẹkẹndo.  Ṣigba, fọ́n bo biọ tòdaho lọ mẹ, podọ nuhe hiẹ dona wà na yin didọna we.”  Todin, na nugbo tọn, sunnu he to gbejizọnlinzin hẹ ẹ lẹ ṣite abọẹ, bo to sisè nudidọ ogbè de tọn, ṣigba bo ma mọ mẹdepope.  Ṣigba, Saulu fọ́n sọn kọmẹ, podọ dile nukun etọn lẹ tlẹ to hùnhùn e ma to nudepope mọ. Enẹwutu, yé hẹn alọ na ẹn bo plan ẹn yì Damasku.  Podọ na azán atọ̀n, e ma mọ nudepope, mọdopolọ e masọ dù kavi nù. 10  Devi de tin to Damasku he nọ yin Ananias, Oklunọ sọ dọna ẹn to numimọ de mẹ dọmọ: “Ananias!” Ewọ dọmọ: “Yẹn die, Oklunọ.” 11  Oklunọ dọna ẹn dọmọ: “Fọ́n, yì tòhomẹ-liho he nọ yin yiylọdọ Jijlọ lọ ji, podọ to owhé Juda tọn gbè, dín dawe de he nọ yin Saulu, he wá sọn Talsu. Na pọ́n! ewọ to dẹ̀ho, 12  podọ to numimọ de mẹ, e ko mọ dawe de he nọ yin Ananias wá e dè bo ze alọ etọn lẹ do e ji na ewọ nido sọgan mọnú.” 13  Ṣigba, Ananias gblọn dọmọ: “Oklunọ, yẹn ko sè sọn mẹsusu dè dogbọn dawe ehe dali, onú ylankan susu he e ko wà na omẹ wiwe towe lẹ to Jelusalẹm. 14  Podọ tofi, e tindo aṣẹ sọn yẹwhenọgán lẹ dè nado wle mẹhe to oyín towe ylọ lẹpo do gànpamẹ.” 15  Ṣigba, Oklunọ dọna ẹn dọmọ: “Yì, na núzinzan dide de wẹ dawe ehe yin na mi nado hẹn oyín ṣie yì akọta lẹ, ahọlu lẹ po ovi Islaeli tọn lẹ po dè. 16  Na yẹn na do onú susu he ewọ dona jiya etọn na oyín ṣie tọn wutu lẹ hia ẹ hezeheze.” 17  Enẹwutu, Ananias yì bo biọ owhé lọ gbè, ewọ sọ ze alọ etọn lẹ do e ji bo dọmọ: “Mẹmẹsunnu Saulu, Oklunọ lọ, yèdọ Jesu he sọawuhia we to aliho he ji hiẹ gbọn wá, ko do mi hlan na hiẹ nido sọgan mọnú bo gọ́ na gbigbọ wiwe.” 18  Podọ to afọdopolọji, nuhe taidi ohán lẹ flẹ sọn nukun etọn lẹ ji, ewọ sọ mọnú; podọ e fọ́n bo yin bibaptizi, 19  e sọ dùnú bo gọ̀ huhlọn mọyi. Na azán delẹ, e nọhẹ devi lẹ to Damasku, 20  podọ to afọdopolọji, e jẹ yẹwheho Jesu tọn dọ ji to sinagọgu lẹ mẹ, dọ Visunnu Jiwheyẹwhe tọn wẹ Ewọ. 21  Ṣigba, avò vò mẹhe to ohó etọn sè lẹpo bọ yé nọ dọmọ: “Be e ma yin dawe he gbà mẹhe nọ ylọ oyín ehe to Jelusalẹm lẹ do, bo ko sọ wáfi na lẹndai ehe wutu, nado sọgan hẹn yé biblá yì yẹwhenọgán lẹ dè lọ die ya?” 22  Ṣigba, Saulu to huhlọn mọyi dogọ janwẹ bo nọ hẹn awuji Ju he nọ nọ̀ Damasku lẹ dile e dohia to aliho he họnwun mẹ dọ ehe wẹ Klisti lọ. 23  Todin, to whenue azán susu ko to jujuwayi, Ju lẹ dewé dopọ nado hù i. 24  Ṣigba, núbibla yetọn sọta ẹ lẹzun yinyọnẹn na Saulu. Ṣogan, yé to họngbo lẹ ṣọ́ sinsinyẹn to okle po ozán po nado sọgan hù i. 25  Enẹwutu, devi etọn lẹ ze e bo hẹn ẹn jẹte to ohà de mẹ gbọn nùvo adó lọ tọn de mẹ to zánmẹ. 26  To whenue e jẹ Jelusalẹm, e dovivẹnu nado kọ̀n ede dopọ hẹ devi lẹ; ṣigba yemẹpo to budina ẹn, na yé ma yise dọ e ko lẹzun devi de. 27  Enẹwutu, Balnaba gọalọna ẹn bo plan ẹn yì apọsteli lẹ dè, ewọ sọ basi zẹẹmẹ na yé to gigọ́ mẹ lehe e mọ Oklunọ do to aliho ji bọ e dọhona ẹn, podọ lehe e ko yí adọgbigbo do dọho to oyín Jesu tọn mẹ to Damasku do. 28  E sọ gbọṣi yé dè bo to yìyì bosọ to gigọ̀ to Jelusalẹm, bo yí adọgbigbo do to hodọ to oyín Oklunọ tọn mẹ; 29  podọ e to hodọ bo to núdọ̀n hẹ Ju he nọ dó Glẹkigbe lẹ. Ṣigba, omẹ ehelẹ tẹnpọn nado hù i. 30  To whenue mẹmẹsunnu lẹ doayi ehe go, yé hẹn ẹn wá Sesalea bo do e hlan Talsu. 31  To whenẹnu, na nugbo tọn, agun he tin lẹdo Jude po Galili po gọna Samalia lẹpo pé biọ ojlẹ jijọho tọn de mẹ, bo to yinyin hinhẹn lodo; podọ agun lọ pete to jijideji dile e zindonukọn to budisi Jehovah mẹ podọ to homẹmimiọn gbigbọ wiwe tọn mẹ. 32  Todin, dile Pita to jujugbọn lẹdo lọ lẹpo mẹ, e sọ wá omẹ wiwe he nọ nọ̀ Lidda lẹ dè ga. 33  E mọ dawe de to finẹ he nọ yin Enea, he ko tin to aimimlọn to adọ́zan etọn ji na owhe ṣinatọ̀n, na e to awukuzọ̀n jẹ wutu. 34  Pita sọ dọna ẹn dọmọ: “Enea, Jesu Klisti hẹnazọ̀ngbọna we. Fọ́n bo vọ́ adọ́zan towe jlado.” Ewọ sọ fọ́n to afọdopolọji. 35  Mẹhe nọ nọ̀ Lidda po dankló Ṣalọni tọn po ji lẹpo sọ mọ ẹn bosọ lẹhlan Oklunọ dè. 36  Ṣigba, devi de tin to Jọppa he nọ yin Tabita ehe lẹdogbedevomẹ etọn yin Dọlka. E sù to azọ́n dagbe lẹ po nunina lẹblanu tọn he e nọ basi lẹ po mẹ. 37  Ṣigba, to azán enẹlẹ gbè, e jẹazọ̀n bo kú. Enẹwutu, yé lawu na ẹn bo tẹ́ ẹ do abò aga tọn de mẹ. 38  Todin, to whenuena e yindọ Lidda ma dẹn do Jọppa, to whenue devi lẹ sè dọ Pita tin to tòdaho ehe mẹ, yé do omẹ awe hlan ẹn nado vẹ̀ ẹ dọmọ: “Jaale, a whleawu* nado wá mí dè blo.” 39  Enẹwutu, Pita fọ́n bo yì po yé po. Podọ to whenue e jẹ finẹ, yé plan ẹn yì abò aga tọn lọ mẹ; asuṣiọsi lẹpo sọ wá bo to avivi bosọ to awù odò tọn po awugbó susu po he Dọlka ko basi to whenue e gbẹ́ pò to yé dè lẹ dohia. 40  Ṣigba, Pita de mẹlẹpo tọ́njẹgbonu podọ to whenue e jẹklo, e hodẹ̀, bo lẹhlan oṣiọ lọ bosọ dọmọ: “Tabita, fọ́n!” Ewọ hùn nukun etọn lẹ podọ dile e mọ Pita, e fọ́n sinai. 41  To whenue e hẹn alọ na ẹn, e fọ́n ẹn ṣite, podọ e ylọ omẹ wiwe lẹ po asuṣiọsi lọ lẹ po bo do e hia yé to ogbẹ̀. 42  Ehe lẹzun yinyọnẹn lẹdo Jọppa lẹpo pé, mẹsusu sọ lẹzun yisenọ to Oklunọ mẹ. 43  E gbọṣi Jọppa na azán vude to Simọni, he yin ayú-zọ́nwatọ de dè.

Nudọnamẹ Odò Tọn

Ow 9:2* Ehe dlẹnalọdo aliho gbẹninọ tọn po nuplọnmẹ Klistiani tọn po.
Ow 9:38* Kavi, “a dọngbàn blo.”