Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 8:1-40

8  Saulu lọsu kẹalọyi hùhù etọn. To azán enẹ gbè, homẹkẹn sinsinyẹn fọ́n sọta agun he tin to Jelusalẹm; gbọnvona apọsteli lẹ, mẹlẹpo wẹ gbàpe gbọn agbegbe Jude po Samalia tọn lẹ po ji.  Ṣigba, sunnu he dibusi Jiwheyẹwhe lẹ ze Stefani bo dì i, yé sọ doavigbè sinsinyẹn do e ji.  Nalete, Saulu jẹ nuyiwa hẹ agun lọ ji po kanyinylan po. E nọ to whédegbè jẹ devo gbè biọ gánnugánnu, bo nọ to sunnu lẹ po yọnnu lẹ po dọ̀n tọ́n, bosọ nọ bẹ yé do gànpamẹ.  Ṣigba, mẹhe ko gbàpe lọ lẹ gbọn aigba lọ lẹpo ji bo to wẹndagbe ohó lọ tọn lá.  Podọ Filippi yì tòdaho Samalia tọn mẹ bo jẹ yẹwheho Klisti tọn dọna yé ji.  To kọndopọ mẹ, gbẹtọgun lọ na ayidonugo nuhe dọ Filippi te dile yé to todoai bo to pinpọn ohia he ewọ to bibasi lẹ.  Na mẹsusu wẹ tindo gbigbọ mawé lẹ, ehelẹ sọ nọ dawhá po ogbè lélé po bo nọ tọ́njẹgbonu. Humọ, susu mẹhe hò plibọ lẹ po sẹkunọ lẹ po tọn yin azọ̀nhẹngbọna.  Enẹ hẹn ayajẹ daho wá tòdaho enẹ mẹ.  Todin, dawe de tin to tòdaho lọ mẹ he nọ yin Simọni, mẹhe, jẹnukọnna ojlẹ ehe, ko nọ to nujlẹ bo nọ hẹn awuji akọta Samalia tọn, bosọ nọ to didọ dọ ewọ lọsu yin mẹjọmẹ daho de. 10  Podọ yemẹpo, sọn pẹvi ji jẹ daho pete ji wẹ nọ na ẹn ayidonugo bo nọ dọmọ: “Huhlọn Jiwheyẹwhe tọn wẹ dawe ehe, yèdọ Huhlọn Daho.” 11  Enẹwutu, yé nọ na ẹn ayidonugo na e ko nọ hẹn awuji yé na ojlẹ de gbọn nujijlẹ etọn lẹ dali. 12  Ṣigba, to whenue yé yí Filippi he to wẹndagbe ahọluduta Jiwheyẹwhe tọn po oyín Jesu Klisti tọn po lá na yé lọ sè, yé jẹ yinyin bibaptizi ji, yèdọ sunnu lẹ po yọnnu lẹ po. 13  Simọni lọsu lẹzun yisenọ de ga, podọ to whenue e ko yin bibaptizi, e nọ tin topọ hẹ Filippi to whepoponu; podọ ohia po azọ́n huhlọnnọ lẹ po he to yinyin wiwà he e mọ lẹ nọ jiawu na ẹn. 14  To whenue apọsteli he to Jelusalẹm lẹ sè dọ Samalianu lẹ ko kẹalọyi ohó Jiwheyẹwhe tọn, yé do Pita po Johanu po hlan yé; 15  podọ omẹ ehelẹ yì bo hodẹ̀ na yé, na yé nido mọ gbigbọ wiwe yí. 16  Na e ma ko jẹ do depope to yé mẹ ji dai, ṣigba baptẹm kẹdẹ wẹ yé ko yí to oyín Oklunọ Jesu tọn mẹ. 17  To whenẹnu, yé nọ ze alọ yetọn lẹ do yé ji, bọ yé nọ mọ gbigbọ wiwe yí. 18  Todin, to whenue Simọni mọdọ gbọn alọ zizedomẹji apọsteli lẹ tọn gblamẹ wẹ gbigbọ yin ninamẹ, e ze akuẹ donukọnna yé, 19  bo dọmọ: “Mì na aṣẹ ehe yẹnlọsu ga, na mẹdepope he ji yẹn ze alọ ṣie lẹ do nido sọgan mọ gbigbọ wiwe yí.” 20  Ṣigba, Pita dọna ẹn dọmọ: “Na fataka towe ni dọ̀n po hiẹ po, na hiẹ lẹn nado mọ nunina vọnu Jiwheyẹwhe tọn yí po akuẹ po. 21  Hiẹ ma tindo adà kavi mimá to whẹho ehe mẹ, na ahun towe ma jlọ to nukun Jiwheyẹwhe tọn mẹ. 22  Enẹwutu, lẹnvọjọ sọn oylan towe ehe mẹ bo vẹ̀ Jehovah dọ, eyin e yọnbasi, linlẹn ylankan ahun towe mẹ tọn nido sọgan yin jijona we; 23  na yẹn mọdọ adí vivẹ́ de podọ gẹdẹ mawadodo tọn de wẹ hiẹ.” 24  Simọni gblọnna ẹn dọmọ: “Mì dawe ehelẹ emi, mì vẹ̀ Jehovah na mi na depope to onú he mì dọ ehelẹ mẹ nikaa wá yẹn ji.” 25  Enẹwutu, to whenue yé ko dekunnu mlẹnmlẹn bo ko dọ ohó Jehovah tọn, yé lẹkọyi Jelusalẹm bo to wẹndagbe lọ lá na susu gbétatò Samalianu lẹ tọn. 26  Ṣigba, angẹli Jehovah tọn dọhona Filippi dọmọ: “Fọ́n bo yì hùwaji, yèdọ yì aliho he tọ́n sọn Jelusalẹm yì Gaza lọ ji.” (Ehe yin aliho danfafa tọn de.) 27  Enẹwutu, e fọ́n bo yì, podọ pọ́n! ojọ̀ Etiopianu de, yèdọ dawe he tindo aṣẹpipa daho to ahọsi Kandasi Etiopianu lọ glọ, he sọ tin to adọkun etọn lẹpo ji. Ewọ ko yì Jelusalẹm nado basi sinsẹ̀n, 28  ṣigba ewọ lẹkọja bo to aisinsin to osọ́-kẹkẹ etọn mẹ bosọ to owe yẹwhegán Isaia tọn hia daga. 29  Enẹwutu, gbigbọ dọna Filippi dọmọ: “Dọnsẹpọ bo kọnawudopọ hẹ osọ́-kẹkẹ ehe.” 30  Filippi họ̀nwezun plá ẹ bo sè bọ e to owe yẹwhegán Isaia tọn hia daga, ewọ sọ dọmọ: “Na nugbo tọn, be hiẹ mọnukunnujẹ nuhe hia a te mẹ ya?” 31  E dọmọ: “Na taun tọn, nawẹ yẹn sọgan wàmọ do, adavo mẹde deanana mi?” E sọ vẹ̀ Filippi nado biọ e mẹ bo sinai hẹ ẹ. 32  Podọ adà Owe-wiwe tọn he e to hihia daga lọ die: “Ewọ yin hinhẹnwa hùhùtẹn taidi lẹngbọ de, podọ taidi lẹngbọvu de he ma dọho to fúnpatọ etọn nukọn, mọ wẹ e ma kẹ̀ onù etọn do. 33  To ojlẹ winyandomẹ tọn etọn whenu, e ma mọ whẹdida jijlọ yí. Mẹnu wẹ na basi zẹẹmẹ gigọ́ whẹndo etọn tọn? Na ogbẹ̀ etọn yin yíyí sọn aigba ji wutu.” 34  Ojọ̀ lọ gblọnna Filippi dọmọ: “Yẹn vẹ̀ we, Mẹnu go wẹ yẹwhegán lọ dọ ehe gando? Gando ede go wẹ kavi gando mẹdevo go?” 35  Filippi kẹ̀ onù etọn bo lá wẹndagbe he gando Jesu go na ẹn, yèdọ bẹsọn adà Owe-wiwe tọn ehe ji. 36  Todin, dile yé to yìyì to aliho lọ ji, yé jẹ osindò de kọ̀n, bọ ojọ̀ lọ dọmọ: “Pọ́n! Osin die; etẹwẹ glọnalina mi nado yin bibaptizi?” 37  ——* 38  Enẹwutu, e degbè dọ osọ́-kẹkẹ lọ ni yin didote, yé omẹ awe lẹ sọ biọ osin lọ mẹ, yèdọ Filippi po ojọ̀ lọ po; ewọ sọ baptizi i. 39  To whenue yé tọ́n sọn osin lọ mẹ, gbigbọ Jehovah tọn plan Filippi yì po awuyiya po, bọ ojọ̀ lọ ma mọ ẹn ba, ewọ sọ to yìyì to aliho etọn ji bo to ayajẹ. 40  Ṣigba, Filippi yin mimọ to Aṣidọdi, ewọ sọ jugbọn aigba lọ ji bo to wẹndagbe lọ lá na tòdaho lọ lẹpo kakajẹ whenue e wá Sesalea.

Nudọnamẹ Odò Tọn

Ow 8:37 Pọ́n Mt 17:21, nudọnamẹ odò tọn.