Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 7:1-60

7  Ṣigba, yẹwhenọ daho lọ dọmọ: “Be nugbo wẹ onú ehelẹ ya?”  E dọmọ: “Mì mẹmẹsunnu po otọ́ lẹ po emi, mì sè. Jiwheyẹwhe gigonọ lọ sọawuhia tọgbo mítọn Ablaham to whenue e to Mẹsopotamia, whẹpo e do wá Halani,  e sọ dọna ẹn dọ, ‘Tọ́nyi sọn aigba towe ji podọ sọn hẹnnumẹ towe lẹ mẹ bo yì aigba he yẹn na dohia we lọ ji.’  To whenẹnu, e tọ́nyi sọn aigba Kaldeanu lẹ tọn ji bo sawhé do Halani. Podọ to whenue otọ́ etọn kú godo, Jiwheyẹwhe hẹn ẹn nado diọ fininọ etọn sọn finẹ bo wá aigba he ji mìwlẹ to ninọ todin ehe ji.  Ṣogan, e ma na ẹn aigba depope taidi ogú to finẹ gba, lala, etlẹ yin afọpapa dopo; ṣigba e dopagbe nado na ẹn aigba lọ pete taidi nutindo de, podọ na okún etọn to ewọ godo, to whenue ewọ ma ko tindo ovi de to whenẹnu.  Humọ, Jiwheyẹwhe dọ ehe, dọ okún etọn na nọ nọ̀ jonọ-gbéji to aigba jonọ tọn de ji bọ akọta lọ na hẹn yé zun afanumẹ bo na sayana yé họ̀ owhe fowe.  ‘Yẹn nasọ dawhẹna akọta enẹ he yé na yin afanumẹ na,’ wẹ Jiwheyẹwhe dọ, ‘podọ to onú ehelẹ godo, yé na tọ́njẹgbonu bo na basi sinsẹ̀nzọn wiwe hlan mi tofi.’  “E sọ basi alẹnu adàgbigbo tọn de hẹ ẹ ga; podọ gbọnmọ dali, e ji Isaki bo gboadà na ẹn to azán ṣinatọ̀ntọ gbè, podọ Isaki ji Jakọbu, Jakọbu sọ ji tatọ́ whẹndo wiawe lẹ tọn lẹ.  Tatọ́ whẹndo tọn lọ lẹ sọ lẹzun awuwhàntọ do Josẹfu go bo sà ẹ do Egipti. Ṣigba Jiwheyẹwhe tin hẹ ẹ, 10  bo whlẹn ẹn sọn nukunbibia etọn lẹpo mẹ bosọ na ẹn ojọmiọn po nuyọnẹn po to ahọlu Falo Egipti tọn nukọn. Ewọ sọ de e nado dugán do Egipti ji podọ do owhé etọn pete ji. 11  Ṣigba, huvẹ de tọ́n to Egipti blebu po Kenani po, yèdọ nukunbibia daho de; tọgbo mítọn lẹ masọ tindo núdùdù depope. 12  Ṣigba, Jakọbu sè dọ núdùdù tin to Egipti bọ ewọ do tọgbo mítọn lẹ hlan whla tintan. 13  Podọ to whla awetọ lọ whenu, Josẹfu hẹn ede zun yinyọnẹn na nọvisunnu etọn lẹ; podọ hukan whẹndo Josẹfu tọn wá họnwun na Falo. 14  Enẹwutu, Josẹfu domẹhlan bo ylọ Jakọbu otọ́ etọn po hẹnnumẹ etọn lẹpo po sọn dọ́n, he sọha yetọn yin alindọn kandegbàn-atọ́n. 15  Jakọbu jẹte yì Egipti. Ewọ sọ lẹzun matintọ; mọdopolọ wẹ tọgbo mítọn lẹ ga, 16  yé sọ yin tẹnsẹna yì Ṣekẹmi bo yin titẹ́ do yọdò he Ablaham ko yí fataka-kuẹ sọha de do họ̀ sọn visunnu Hamọli tọn lẹ si to Ṣekẹmi lọ mẹ. 17  “Dile ojlẹ lọ to sisẹpọ na hẹndi opagbe he Jiwheyẹwhe ko lá to gbangba na Ablaham tọn, akọta lọ sù bo jideji to Egipti, 18  kakajẹ whenue ahọlu devo dugán do Egipti ji, mẹhe ma yọ́n Josẹfu. 19  Ewọ yí ayiha gigẹdẹ aṣẹpipa tọn zan sọta akọ̀ mítọn bo yí huhlọn do hẹn otọ́ lẹ to aliho agọ̀ mẹ nado ze viyẹyẹ yetọn lẹ jo, na yé nikaa yin hinhẹn do ogbẹ̀. 20  To ojlẹ enẹ lọ mẹ wẹ Mose yin jiji, ewọ sọ yọnwhanpẹ tlala etlẹ yin to nukun Jiwheyẹwhe tọn mẹ. Podọ ewọ yin nukunpedego na osun atọ̀n to owhé otọ́ etọn tọn gbè. 21  Ṣigba, to whenue e yin didehia, viyọnnu Falo tọn ze e bo penukundego whẹ́n taidi visunnu etọn titi. 22  Enẹwutu, nuyọnẹn Egipti tọn lẹpo yin pinplọn Mose. Na nugbo tọn, ewọ yin huhlọnnọ to ohó po nuyiwa po mẹ. 23  “Todin, to whenuena e tin to owhe kandetọ etọn mẹ, e wá ahun etọn mẹ nado dla mẹmẹsunnu etọn lẹ, yèdọ ovi Islaeli tọn lẹ pọ́n. 24  Podọ to whenue e mọ dopo to yé mẹ to yinyin titafú, e yiavunlọna ẹn bo yiahọsu na mẹhe yè to yasana lọ gbọn hùhù Egiptinu lọ dali. 25  E to linlẹn dọ mẹmẹsunnu etọn lẹ na mọnukunnujẹemẹ dọ Jiwheyẹwhe wẹ to whinwhlẹn yé gán gbọn alọ emitọn mẹ, ṣigba yé ma mọnukunnujẹ ehe mẹ. 26  Podọ to aihọngbè, e sọawuhia yé dile yé to avùnho, e sọ tẹnpọn nado gbò avùn na yé to jijọho mẹ, bo dọmọ, ‘Mẹmẹsunnu lẹ emi, nọvi-nọvi wẹ mì. Naegbọn mì do to titafú ode awetọ?’ 27  Ṣigba, ewọ he to titafú kọmẹnu etọn bẹ ẹ fú, bo dọ, ‘Mẹnu wẹ de we taidi ogán podọ whẹdatọ do mí ji? 28  Hiẹ ma jlo na hù mi dile hiẹ hù Egiptinu lọ do to osọ he wayi nẹ, kavi hiẹ jlo na wàmọ wẹ?’ 29  Na ohó ehe wutu, Mose họnyi bo lẹzun mẹhe nọ nọ̀ jonọ-gbéji to aigba Midiani tọn ji, fie e ji visunnu awe te. 30  “Podọ to whenue owhe kande pé, angẹli de sọawuhia ẹ to danfafa Osó Sinai tọn ji to miyọ́n wùnkan he to jiji de tọn mẹ. 31  Todin, to whenue Mose mọ ehe, nuhe e mọ lọ jiawu na ẹn. Ṣigba dile e to dindọnsẹpọ nado dindona, ogbè Jehovah tọn dọho dọ, 32  ‘Yẹn wẹ Jiwheyẹwhe tọgbo towe lẹ tọn, Jiwheyẹwhe Ablaham tọn, Isaki tọn, podọ Jakọbu tọn.’ Na obu jẹ Mose ji wutu, e ma tẹnpọn nado dindona yinukọn. 33  Jehovah dọna ẹn dọ, ‘De afọpa towe lẹ sọn afọ, na aigba wiwe de ji wẹ fihe hiẹ ṣite te. 34  Na nugbo tọn, yẹn ko mọ lehe yè to nuyiwa hẹ omẹ ṣie he to Egipti lẹ to aliho agọ̀ mẹ do, yẹn ko sọ sè hunwinwẹn yetọn podọ yẹn ko jẹte wá nado whlẹn yé. Podọ todin, wá, yẹn na do we hlan Egipti.’ 35  Mose ehe, mẹhe yé gbẹ́ dai, bo dọ, ‘Mẹnu wẹ de we taidi ogán podọ whẹdatọ?’ dawe ehe wẹ Jiwheyẹwhe dohlan taidi ogán podọ whlẹngántọ gbọn alọ angẹli he sọawuhia ẹ to wùnkan mẹ lọ tọn dali. 36  Dawe ehe wẹ plan yé tọ́n to whenue e ko wà nudabla po ohia lẹ po to Egipti podọ to Ohù Vẹẹ mẹ podọ to danfafa ji na owhe kande. 37  “Mose ehe wẹ dọna ovi Islaeli tọn lẹ dọ, ‘Jiwheyẹwhe na ze yẹwhegán de he taidi yẹn daga na mì sọn mẹmẹsunnu mìtọn lẹ mẹ.’ 38  Omẹ ehe lọ wẹ wá tin to agun lọ ṣẹnṣẹn to danfafa ji hẹ angẹli lọ he dọhona ẹn to Osó Sinai ji bọ ewọ dọhona tọgbo mítọn lẹ, ewọ sọ mọ nulila wiwe he dẹn-to-aimẹ lẹ yí nado na mì. 39  Tọgbo mítọn lẹ gbẹ́ nado setonuna ẹn, kakatimọ yé bẹ ẹ fú podọ to ahun yetọn mẹ, yé lẹkọ do Egipti, 40  gbọn didọna Aalọn dali dọmọ, ‘Basi yẹwhe lẹ na mí nado deanana mí. Na mí ma yọ́n nuhe jọ do Mose ehe go, mẹhe plan mí tọ́n sọn aigba Egipti tọn ji.’ 41  Enẹwutu, yé basi oyìnvu de to azán enẹlẹ gbè bo basi avọ́sinsan de hlan boṣiọ lọ bosọ jẹ ayajẹ ji to azọ́n alọ yetọn tọn lẹ mẹ. 42  Enẹwutu, Jiwheyẹwhe lilẹ́ bo ze yé jo nado basi sinsẹ̀nzọn wiwe hlan awhànpa olọn tọn, kẹdẹdile e ko yin kinkàndai to owe yẹwhegán lẹ tọn mẹ do dọmọ, ‘Mì owhé Islaeli tọn E, e ma yin yẹn wẹ mìwlẹ yí kanlin lẹ do sanvọ́ hlan bo basi avọ́sinsan lẹ hlan na owhe kande to danfafa ji gba, kavi yẹn wẹ? 43  Ṣigba, gòhọ Moloki tọn po sunwhlẹvu yẹwhe Lefani tọn po wẹ mì kẹalọyi, yèdọ ojlẹmọ he mì basi nado sẹ̀n lẹ. Enẹwutu, yẹn na bẹ mì yì zẹ̀ Babilọni go.’ 44  “Tọgbo mítọn lẹ tindo gòhọ kunnudide tọn to danfafa ji, kẹdẹdile e degbè etọn do to whenue e to hodọna Mose nado basi i kẹdẹdi ohia nuhe e mọ tọn. 45  Podọ tọgbo mítọn he dugu etọn lẹ po Jọṣua po sọ hẹn ẹn wá aigba akọta lọ lẹ he Jiwheyẹwhe yàn sọn tọgbo mítọn lẹ nukọn tọn ji. Finẹ wẹ e gbọṣi kakajẹ azán Davidi tọn lẹ gbè. 46  Ewọ mọ nukundagbe Jiwheyẹwhe tọn bo biọ lẹblanulọkẹyi lọ nado wleawuna fininọ de na Jiwheyẹwhe Jakọbu tọn. 47  Ṣigba, Sọlomọni wẹ gbá ohọ̀ de na ẹn. 48  Ṣogan, Gigogán lọ ma nọ nọ̀ ohọ̀ he yin bibasi po alọ po lẹ mẹ gba; kẹdẹdile yẹwhegán lọ dọ do dọ, 49  ‘Olọn wẹ ofìn ṣie, podọ aigba wẹ tokloafọligbe ṣie. Ohọ̀ nankọ wẹ mìwlẹ na gbá na mi? wẹ Jehovah dọ. Kavi fie wẹ gbọjẹtẹn ṣie te? 50  Alọ ṣie wẹ basi onú ehe lẹpo, kavi e ma yin mọ wẹ?’ 51  “Mì tasinyẹntọ lẹ podọ mì mẹhe ma gboadà to ahun po otó mìtọn lẹ po mẹ emi, whepoponu wẹ mì nọ diọnukunsọ gbigbọ wiwe; dile tọgbo mìtọn lẹ basi do, mọ wẹ mìlọsu nọ basi do. 52  Detẹ to yẹwhegán lẹ mẹ wẹ tọgbo mìtọn lẹ ma dohomẹkẹn? Mọwẹ, yé hù mẹhe lá jẹnukọn gando wiwá Omẹ dodonọ lọ tọn go lẹ, yèdọ mẹdehiatọ podọ hlọnhutọ mẹhe tọn mìwlẹ lẹzun todin, 53  mìwlẹ mẹhe kẹalọyi Osẹ́n lọ he yin nina gbọn angẹli lẹ dali ṣigba bo ma payi e go.” 54  Todin, to whenue yé sè onú ehelẹ, adi do yé sinsinyẹn bọ yé jẹ adúkúnkún dù do e go ji. 55  Ṣigba ewọ, dile e gọ́ na gbigbọ wiwe, zín nukun etọn do olọn bo mọ gigo Jiwheyẹwhe tọn podọ Jesu ṣite to adusilọ Jiwheyẹwhe tọn mẹ, 56  ewọ sọ dọmọ: “Mì pọ́n! yẹn mọ olọn hùndonuvo bọ Visunnu gbẹtọ tọn ṣite to adusilọ Jiwheyẹwhe tọn mẹ.” 57  Na ehe tọn wutu, yé yí ogbè lélé do dawhá bo yí alọ yetọn lẹ do sú otó yetọn bosọ dlí wá e ji to pọmẹ. 58  Podọ to whenue yé ko ze e dlan gbonu tòdaho lọ tọn, yé jẹ zannu dlan do e ji. Kunnudetọ lọ lẹ sọ bẹ awugbó yetọn lẹ do afọ jọja sunnu he nọ yin Saulu tọn kọ̀n. 59  Podọ yé zindonukọn nado to zannu dlan do Stefani dile ewọ vẹvẹ bo dọmọ: “Oklunọ Jesu, yí gbigbọ ṣie.” 60  To whenẹnu, whenue e jẹklo, e yí ogbè lélé do dawhá jẹgbonu dọmọ: “Jehovah, a lẹn ylando ehe do okọ̀ na yé blo.” Podọ to ehe didọ godo, e damlọn to okú mẹ.

Nudọnamẹ Odò Tọn