Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 5:1-42

5  Ṣigba, dawe de he nọ yin Ananias, to pọmẹ po asi etọn Safila po, sà nutindo de  bo ze apadewhe akuẹ lọ tọn whlá, asi etọn lọsu yọ́n ehe, e sọ hẹn apadewhe etọn poun wá bo ze e bọdai do afọ apọsteli lẹ tọn kọ̀n.  Ṣigba, Pita dọmọ: “Ananias, naegbọn Satani hẹn we tliji nado dolalo na gbigbọ wiwe podọ nado ze apadewhe akuẹ aigba lọ tọn whlá?  Be e ma yin towe wẹ whẹpo hiẹ do sà ẹ, podọ to whenue e ko yin sisà, be hiẹ ma vò nado yí i do wà nuhe jlo we ya? Naegbọn hiẹ do lẹn onú ehe nkọ to ahun towe mẹ? Hiẹ ma dolalo na gbẹtọ gba, ṣigba na Jiwheyẹwhe.”  To whenue Ananias sè ohó ehelẹ, e họ́jai bo kú. Obu daho sọ jẹ mẹhe to ehe sè lẹpo ji.  Ṣigba, jọja sunnu lẹ fọ́n bo blá ẹ do avọ̀ lẹ mẹ bosọ ze e tọ́n bo dì i.  Todin, to nudi gànhiho atọ̀n godo, asi etọn biọ họmẹ, bo ma yọ́n nuhe ko jọ.  Pita dọna ẹn dọmọ: “Dọna mi, be akuẹ he mì omẹ awe lẹ sà aigba lọ yin die ya?” E dọmọ: “Mọwẹ, akuẹ lọ niyẹn.”  Enẹwutu, Pita dọna ẹn dọmọ: “Naegbọn mì omẹ awe lẹ kọngbedopọ nado tẹ́n gbigbọ Jehovah tọn pọ́n? Pọ́n! Afọ mẹhe dì asu towe tọn lẹ tin to ohọ̀n ji, yé nasọ ze we tọ́n.” 10  To afọdopolọji, ewọ họ́jai to afọ etọn lẹ kọ̀n bo kú. To whenue jọja sunnu lọ lẹ biọ họmẹ, yé mọdọ e ko kú, yé sọ ze e tọ́n bo dì i do asu etọn pá. 11  Enẹwutu, obu daho jẹ agun lọ pete podọ mẹhe to onú ehelẹ sè lẹpo ji. 12  Humọ, apọsteli lẹ zindonukọn nado to ohia po nudabla susu po basi to gbẹtọ lẹ ṣẹnṣẹn; podọ yemẹpo to pọmẹ tin to agbà gaa* Sọlomọni tọn mẹ. 13  Na nugbo tọn, dopo tata to mẹdevo lẹ mẹ ma tindo adọgbigbo nado kọ̀n ede dopọ hẹ yé; etomọṣo, gbẹtọ lẹ to yé pà. 14  Humọ, mẹhe yise to Oklunọ mẹ lẹ to jijideji, yèdọ susugege sunnu po yọnnu lẹ po tọn; 15  sọmọ bọ yé hẹn mẹhe to azọ̀njẹ lẹ tọ́n kaka wá jẹ alihogbó lẹ ji bo tẹ́ yé do akanma po adọ́zan lẹ po ji to finẹ, bọ eyin Pita juwajei, e whè gbau oyẹ̀ etọn nido sọgan jẹ do delẹ to yé mẹ ji. 16  Mọdopolọ, gbẹtọgun lẹ sọn tòdaho he lẹdo Jelusalẹm pé lẹ mẹ to yedelẹ bẹpli, bo nọ hẹn mẹhe to azọ̀njẹ lẹ podọ mẹhe gbigbọ mawé lẹ to tuklado lẹ wá, dopodopo yetọn sọ nọ yin azọ̀nhẹngbọna. 17  Ṣigba, yẹwhenọ daho, gọna mẹhe to finẹ hẹ ẹ lẹpo, yèdọ sinsẹ̀n klandovo Sadusi lẹ tọn whenẹnu tọn lẹ fọ́n bo gọ́ na awuwhàn, 18  podọ yé wle apọsteli lẹ bo ze yé do gànpa gbẹtọ paa lẹ tọn mẹ. 19  Ṣigba, angẹli Jehovah tọn hùn ohọ̀n gànpa lọ tọn to zánmẹ, bo de yé tọ́n bosọ dọmọ: 20  “Mì yì, podọ, to whenue mì jẹ tẹmpli mẹ, mì to hodọna gbẹtọ lẹ zọnmii gando ohó ogbẹ̀ tọn lẹpo go.” 21  To whenue yé sè ehe, yé biọ tẹmpli mẹ to afọnnu fliflimẹ bo jẹ mẹplọn ji. Todin, to whenue yẹwhenọ daho po mẹhe gọna ẹn lẹ po wá, yé ylọ hagbẹ Whẹdatẹn Daho Ju lẹ tọn* pli gọna pipli sunnu mẹho ovi Islaeli tọn lẹpo tọn, yé sọ domẹhlan gànpamẹ nado plan yé wá. 22  Ṣigba, to whenue ponọ lọ lẹ jẹ finẹ, yé ma mọ yé to gànpamẹ. Enẹwutu, yé lẹkọyi bo na linlin, 23  dọmọ: “Mí mọ gànpa lọ to súsú gbanun-gbanun bọ nuhọ́tọ lẹ to ote to ohọ̀n lẹ ji, ṣigba to ohọ̀n lọ hùnhùn godo, mí ma mọ mẹdepope to họmẹ.” 24  Todin, to whenue ogán tẹmpli-ṣọ́tọ lẹ tọn po yẹwhenọgán lẹ po sè ohó ehelẹ, onú ehelẹ dabla do yé bọ yé ma yọ́n nuhe mẹ ehe na dekọtọn do. 25  Ṣigba, dawe de wá bo na linlin yé dọmọ: “Mì pọ́n! Dawe he mì zedo gànpamẹ lọ lẹ tin to tẹmpli mẹ, bo to ote bosọ to gbẹtọ lẹ plọn.” 26  To whenẹnu, ogán tẹmpli-ṣọ́tọ lẹ tọn lọ tọ́nyi po ponọ etọn lẹ po bo plan yé wá, ṣigba e ma yin po zingidi po, na yé dibu ma nado yin zannu dlan do dogbọn gbẹtọ lẹ dali. 27  Enẹwutu, yé plan yé wá bo hẹn yé ṣite to Whẹdatẹn Daho Ju lẹ tọn lọ mẹ. Yẹwhenọ daho sọ kanhose yé 28  bo dọmọ: “Mí dosẹ́n na mì sinsinyẹn ma nado nọ plọnmẹ to oyín ehe mẹ ba, ṣogan, mì pọ́n! mì ko hẹn Jelusalẹm gọ́ po nuplọnmẹ mìtọn po, mì ko sọ magbe nado hẹn ohùn dawe ehe tọn wá mí ji.” 29  Pita po apọsteli he pò lẹ po gblọn dọmọ: “Míwlẹ dona setonuna Jiwheyẹwhe taidi ogán kakati nido yin gbẹtọ lẹ. 30  Jiwheyẹwhe tọgbo mítọn lẹ tọn fọ́n Jesu sọnku, mẹhe mìwlẹ hù gbọn zize e plá do pòtin go dali. 31  Jiwheyẹwhe ze ewọ daga do adusilọ etọn mẹ taidi Afọzedaitọ-gán podọ Mẹwhlẹngántọ, na Islaeli nido sọgan lẹnvọjọ bo mọ jona ylando lẹ tọn yí. 32  Podọ mí yin kunnudetọ whẹho ehelẹ tọn, mọdopolọ wẹ gbigbọ wiwe lọsu ga, he Jiwheyẹwhe ko na mẹhe setonuna ẹn di ogán lẹ.” 33  To whenue yé sè ehe, adi do yé sinsinyẹn bọ yé jlo nado hù yé. 34  Ṣigba, dawe de fọ́n he yin dopo to hagbẹ Whẹdatẹn Daho Ju lẹ tọn lọ tọn mẹ, yèdọ Falesi de he nọ yin Gamalieli, Osẹ́n plọnmẹtọ de he gbẹtọ lẹpo nọ na sisi, bo degbè dọ yè ni de dawe lọ lẹ tọ́njẹgbonu na ojlẹ gli de. 35  Podọ, ewọ dọna yé dọmọ: “Mì omẹ Islaeli tọn lẹ emi, mì payi mìde go gando nuhe mì to linlẹn nado wà na dawe ehelẹ go. 36  Di apajlẹ, jẹnukọnna azán ehelẹ, Teuda fọ́n bo dọ dọ emi lọsu yin mẹjọmẹ, bọ sunnu sọha de, he yì fowe kọnawudopọ hẹ pipli etọn. Ṣigba, ewọ yin hùhù, bọ mẹhe nọ setonuna ẹn lẹpo gbàpe bo busẹ sọn aimẹ. 37  To ewọ godo, Juda Galilinu lọ fọ́n to azán yinkọ zizedai tọn lẹ gbè, ewọ sọ dọ̀n mẹsusu hodo ede. Ṣogan, dawe enẹ dọ̀n bọ mẹhe nọ setonuna ẹn lẹpo gbàpe. 38  Enẹwutu, to ninọmẹ ehe mẹ, yẹn dọna mì dọ, Mì ma dó nukun whẹho omẹ ehelẹ tọn mẹ blo, ṣigba mì jo yé do whii; (na eyin gbẹtọ dè wẹ tito ehe kavi azọ́n ehe wá sọn, e na yin hihọliai; 39  ṣigba eyin sọn Jiwheyẹwhe dè wẹ, mì ma na penugo nado họ́ yé liai;) eyin e ma yinmọ, na taun tọn, vlavo mìwlẹ sọgan yin mimọ nado to avùnho hẹ Jiwheyẹwhe.” 40  Enẹwutu, yé dotoaina ẹn, yé sọ ylọ apọsteli lọ lẹ bo hò yé, bosọ dosẹ́n na yé ma nado nọ dọho to oyín Jesu tọn mẹ ba, bo tún yé dote. 41  Enẹwutu, omẹ ehelẹ tọ́nyi sọn hagbẹ Whẹdatẹn Daho Ju lẹ tọn lọ nukọn, bo to ayajẹ na yé ko yin hihia jẹ nado yin winyando na oyín etọn wutu. 42  Podọ egbesọegbesọ to tẹmpli mẹ podọ sọn whédegbè jẹ whédegbè, yé zindonukọn nado to mẹplọn bo to wẹndagbe lọ lá mapote gando Klisti Jesu go.

Nudọnamẹ Odò Tọn

Ow 5:12* Pọ́n Joh 5:2, nudọnamẹ odò tọn.
Ow 5:21* To paa mẹ, Sanhedlin.