Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 4:1-37

4  Todin, dile yé omẹ awe lẹ to hodọna gbẹtọ lẹ, yẹwhenọgán lẹ po ogán tẹmpli-ṣọ́tọ lẹ tọn po gọna Sadusi lẹ wá yé ji to ajiji mẹ,  na homẹgble yé, na omẹ ehelẹ to gbẹtọ lẹ plọn bo to lilá to aliho he họnwun mẹ gbọn apajlẹ Jesu tọn yiyizan dali dọ oṣiọ lẹ na fọnsọnku wutu;  yé sọ wle yé bo ze yé do gànmẹ jẹ azán awetọ gbè, na owhè ko jai wutu.  Ṣigba, susu mẹhe ko dotoaina hodidọ lọ lẹ tọn yise, podọ sọha sunnu lọ lẹ tọn lẹzun nudi degbade-fọtọ́n.  To aihọngbè, ogán yetọn lẹ, sunnu mẹho lẹ po wekantọ lẹ po pli dopọ to Jelusalẹm  (gọna Annas yẹwhenọgán lọ po Kaifa po, podọ Johanu po Alẹkzandle po gọna mẹhe yin hẹnnumẹ yẹwhenọgán lọ tọn lẹpo),  yé sọ hẹn yé ṣite to ṣẹnṣẹn yetọn bo jẹ kinkanse yé ji dọmọ: “Gbọn huhlọn tẹ dali kavi to oyín mẹnu tọn mẹ wẹ mì wà ehe te?”  To whenẹnu, Pita gọ́ na gbigbọ wiwe bo dọna yé dọmọ: “Mì ogán gbẹtọ lẹ tọn po sunnu mẹho lẹ po emi,  eyin yè to dodinna mí to egbé, na dagbe he yin wiwà na dawe de he to azọ̀njẹ wutu, nado yọ́n omẹ lọ he gblamẹ dawe ehe yin hinhẹn jẹgangan, 10  mì gbọ e ni yin yinyọnẹn hlan mìmẹpo podọ hlan omẹ Islaeli tọn lẹpo, dọ to oyín Jesu Klisti Nazalẹti tọn mẹ, mẹhe mìwlẹ whè do núgo ṣigba he Jiwheyẹwhe fọ́n sọn oṣiọ lẹ mẹ, gbọn omẹ ehe lọ dali wẹ dawe he ṣite tofi lọ do tin to gángán to nukọn mìtọn. 11  Ehe lọ wẹ ‘zannu he mì họ̀dotọ lẹ gbẹ́ dai he ko lẹzun gángánsu họ̀gosu tọn.’ 12  Humọ, whlẹngán ma tin to mẹdevo de mẹ, na oyín devo de ma to olọn glọ he ko yin nina gbẹtọ gbọn ehe dali mí sọgan yin whinwhlẹngán.” 13  Todin, to whenue yé mọ adọgbigbo Pita po Johanu po tọn, bo mọdọ yé ma sewé bosọ yin omẹ tata lẹ, e paṣa yé. E sọ jẹ hinhọnwun na yé ji dọ yé ko nọ zọnhẹ Jesu dai; 14  podọ dile yé to dawe he ko yin azọ̀nhẹngbọna he ṣite to yé dè lọ pọ́n, yé ma yọ́n nuhe yé na gblọn. 15  Enẹwutu, yé degbè dọ yé ni tọ́njẹgbonu sọn Whẹdatẹn Daho Ju lẹ tọn* lọ mẹ, yé sọ jẹ wede hẹ ode awetọ ji, 16  dọmọ: “Etẹwẹ mí na wà na dawe ehelẹ? Na nugbo tọn, ohia ayidego tọn de ko yin bibasi gbọn yé dali, he họnwun na omẹ Jelusalẹm tọn lẹpo; podọ mí ma sọgan mọ́n ehe. 17  Etomọṣo, na e nikaa yin lilá pé dogọ to gbẹtọ lẹ ṣẹnṣẹn, mì gbọ mí ni yí nukunvinván do dọna yé ma nado dọho to oyín ehe mẹ na omẹ depope ba.” 18  Enẹwutu, yé ylọ yé bo dosẹ́n na yé, ma nado dọho kavi plọnmẹ to oyín Jesu tọn mẹ to fidepope ba. 19  Ṣigba, Pita po Johanu po gblọnna yé dọmọ: “Eyin e yin dodo to nukun Jiwheyẹwhe tọn mẹ nado dotoaina mì kakati nido yin Jiwheyẹwhe, mì yì lẹnpọn. 20  Ṣigba, na míwlẹ tọn, mí ma sọgan nọma dọ onú he mí ko mọ bosọ sè lẹ.” 21  Enẹwutu, to whenue yé ko sọ vọ́ vannukundo yé dogọ, yé tún yé dote, to whenuena e yindọ yé ma mọ dodonu depope he ji yé na sayana yé do podọ na gbẹtọ lọ lẹ wutu, na yemẹpo wẹ to gigopana Jiwheyẹwhe na nuhe ko jọ lọ; 22  na dawe he yin azọ̀nhẹngbọna to azọ́njiawu-liho lọ ko hú owhe kande mẹvi. 23  To whenue yé ko yin tuntundote godo, yé yì omẹ yetọn titi lẹ dè bo na linlin yé gando nuhe yẹwhenọgán lẹ po sunnu mẹho lẹ po dọna yé lẹ go. 24  To whenue yé sè ehe, yé ze ogbè yetọn daga to kọndopọ mẹ hlan Jiwheyẹwhe bo dọmọ: “Oklunọ Nupojipetọ, hiẹ wẹ Omẹ lọ he dá olọn po aigba po gọna ohù po nuhe tin to yé mẹ lẹpo po, 25  podọ mẹhe gbọn gbigbọ wiwe gblamẹ dọ gbọn onù tọgbo mítọn Davidi, devizọnwatọ towe tọn mẹ dọ, ‘Naegbọn akọta lẹ do biọ bẹwlu mẹ bọ gbẹtọ lẹ to ayihamẹlẹnpọn do onú ovọ́ lẹ ji? 26  Ahọlu aigba ji tọn lẹ fọnṣite bọ ogán lẹ bẹ yedelẹ pli sọta Jehovah podọ sọta mẹyiamisisadode etọn lọ.’ 27  Etomọṣo, Hẹlọdi* po Pọntiu Pilati po gọna omẹ akọta lẹ tọn po omẹ Islaeli tọn lẹ po, na taun tọn, bẹ yedelẹ pli to tòdaho ehe mẹ sọta devizọnwatọ wiwe towe, Jesu, mẹhe hiẹ yiamisisadode, 28  nado sọgan wà nuhe alọ towe po lẹndai towe po ko dọ jẹnukọn dọ e na jọ lẹ. 29  Podọ todin, Jehovah, doayi nukunvandomẹ yetọn lẹ go, bo na afanumẹ towe lẹ nado to ohó towe dọ po adọgbigbo lẹpo po, 30  dile hiẹ dlẹnalọ towe jẹgbonu nado hẹnazọ̀ngbọnamẹ podọ dile ohia lẹ po nudabla lẹ po yin bibasi gbọn oyín devizọnwatọ wiwe towe, Jesu tọn gblamẹ.” 31  Podọ to whenue yé ko basi ovẹvivẹ, fihe yé pli dopọ do lọ whàn; dopodopo yetọn sọ gọ́ na gbigbọ wiwe bo yí adọgbigbo do to ohó Jiwheyẹwhe tọn dọ. 32  Humọ, susugege mẹhe yise lẹ tọn tindo ahun po alindọn dopo po, podọ omẹ dopo tata ma nọ dọ dọ depope to nuhe e tindo lẹ mẹ yin etọn titi; ṣigba yé tindo onú lẹpo to pọmẹ. 33  Mọdopolọ, apọsteli lẹ yí huhlọn daho do to kunnude zọnmii gando fọnsọnku Oklunọ Jesu tọn go; yemẹpo sọ tindo nukundagbe majẹhẹ to gigọ́ mẹ. 34  Na nugbo tọn, mẹdepope ma tin to nuhudo mẹ to yé mẹ; na mẹlẹpo he tindo ogle lẹ kavi owhé lẹ nọ sà yé bo nọ hẹn akuẹ nuhe yin sisà lọ lẹ tọn wá 35  bosọ nọ ze yé bọdai do afọ apọsteli lẹ tọn kọ̀n. Enẹgodo, yé nọ yin mimá kẹdẹdile omẹ dopodopo tindo nuhudo etọn do. 36  Enẹwutu, Josẹfu mẹhe apọsteli lẹ sọ nọ ylọdọ Balnaba, he lẹdogbedevomẹ etọn zẹẹmẹdo, Visunnu Homẹmimiọn tọn, mẹhe yin Levinu de, he yin jiji to Kiplu, 37  tindo aigba de, bo sà ẹ bosọ hẹn akuẹ lọ wá bo ze e bọdai do afọ apọsteli lẹ tọn kọ̀n.

Nudọnamẹ Odò Tọn

Ow 4:15* To paa mẹ, Sanhedlin.
Ow 4:27* Pọ́n Luk 3:1, nudọnamẹ odò tọn.