Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 28:1-31

28  To whenue mí ko lùn owù lọ tọ́n godo, whenẹnu wẹ mí wá sè dọ lopo lọ nọ yin Malita.  Jonọgbè-dótọ lọ lẹ sọ do homẹdagbe vonọtaun hia mí, na yé flọ miyọ́n bosọ yí mímẹpo to aliho he jọmẹ tlala mẹ, na jikun to jijà podọ na fifá tin wutu.  Ṣigba, to whenue Paulu bẹ nake delẹ pli bo bẹ yé do miyọ́n lọ mẹ, amàpoe de tọ́n na yozò lọ wutu bo tẹdo alọ etọn go bosọ hẹ̀nadu i.  To whenue jonọgbè-dótọ lọ lẹ mọdọ odàn adínọ tẹdo alọ etọn go, yé jẹ didọna ode awetọ ji dọmọ: “Na nugbo tọn, hlọnhutọ de wẹ dawe ehe, podọ dile etlẹ yindọ e luntọ́n sọn ohù mẹ, whẹdida dodo ma na ẹn dotẹnmẹ nado nọgbẹ̀.”  Ṣigba, e mimí odàn adínọ lọ dlan miyọ́n mẹ, bo masọ mọ awufiẹsa depope.  Ṣigba, yé to nukundo dọ e na jí kavi na họ́jai bo kú to ajiji mẹ. To whenue yé ko nọte na ojlẹ delẹ bo mọdọ onú ylankan depope ma jọ do e go, yé diọ linlẹn yetọn bo jẹ didọ ji dọ yẹwhe de wẹ ewọ.  Todin, to lẹdo enẹ mẹ, dawe nukundeji lopo lọ tọn he nọ yin Publiu tindo aigba lẹ; ewọ sọ yí mí po gbigbọ johẹmẹ tọn po bosọ do homẹdagbe hia mí na azán atọ̀n.  Ṣigba, todin, otọ́ Publiu tọn to aimimlọn bọ agbasa-hùnmiyọ́n po zẹntin po to tuklado e, Paulu sọ biọ họmẹ yì e dè bo hodẹ̀ bosọ ze alọ etọn lẹ do e ji bo hẹnazọ̀ngbọna ẹn.  To whenue ehe ko jọ godo, mẹhe pò to lopo lọ ji bo to azọ̀njẹ lẹ jẹ e dè wá ji bosọ yin azọ̀nhẹngbọna. 10  Yé sọ doyẹyigona mí ga po nunina susu po podọ, to whenue mí jlo na súnhún, yé doagban nuhe sin nuhudo mí na tindo lẹ tọn na mí. 11  To osun atọ̀n godo, mí dó tọjihun de he tọ́n sọn Alẹkzandli he ko yí ojlẹ avivọ-whenu tọn zan to lopo lọ ji podọ ohia he to nukọn etọn wẹ “Visunnu Zeus tọn lẹ.” 12  Podọ to whenue mí glinhún do húnglintẹn Silakusi tọn, mí gbọṣi finẹ na azán atọ̀n, 13  dile mí tọ́n sọn finẹ, mí lẹdo bo jẹ Legiumi. Podọ to azán dopo godo, jẹhọn hùwaji tọn de fọ́n, mí sọ jẹ Puteoli to azán awetọ gbè. 14  To finẹ, mí mọ mẹmẹsunnu lẹ, yé sọ vẹ̀ mí nado gbọṣi yé dè na azán ṣinawe; podọ gbọnmọ dali, mí dọnsẹpọ Lomu. 15  Podọ sọn finẹ, to whenue mẹmẹsunnu lẹ sè linlin gando mí go, yé wá kaka Ahi Apiu tọn mẹ podọ Avàtẹn Atọ̀n lẹ, nado wá pé mí, to whenue Paulu sọ mọ yé, e dopẹna Jiwheyẹwhe bo mọ adọgbigbo yí. 16  To godo mẹ, to whenue mí biọ Lomu, Paulu yin dotẹnmẹna nado nọ ovò po awhànfuntọ he to ṣiṣọ́ ẹ lọ po. 17  Ṣigba, to azán atọ̀n godo, e ylọ mẹhe yin nukundeji to Ju lẹ mẹ lẹ pli dopọ. To whenue yé ko pli, e jẹ didọna yé ji dọmọ: “Mì mẹmẹsunnu lẹ emi, dile etlẹ yindọ yẹn ma wà onú depope jẹagọdo gbẹtọ lẹ kavi do aṣa tọgbo mítọn lẹ tọn go, yẹn yin zizejo taidi gàntọ de sọn Jelusalẹm do alọ Lomunu lẹ tọn mẹ. 18  Podọ, to whenue omẹ ehelẹ ko dindona mi godo, yé jlo nado tún mi dote, na yé ma mọ nudepope to yẹn mẹ he hẹn mi jẹna okú. 19  Ṣigba, to whenue Ju lẹ to hodọ mapote sọta ehe, yẹn mọdọ e yin dandan nado vọ́ owhẹ̀ ylọ to Sesali dè, ṣigba, e ma yindọ yẹn tindo nudepope he yẹn na yí do sawhẹdokọna akọta ṣie wẹ gba. 20  Na nugbo tọn, ehe wutu wẹ yẹn basi obiọ nado mọ mì bo dọho hẹ mì, na todido Islaeli tọn wutu wẹ yẹn do tin to gẹdẹ ehe mẹ.” 21  Yé dọna ẹn dọmọ: “Míwlẹ ma mọ wekanhlanmẹ lẹ yí gando gowe sọn Jude, mọjanwẹ depope to mẹmẹsunnu he ko wá lẹ mẹ ma na linlin kavi dọ onú ylankan depope do gowe do niyẹn. 22  Ṣigba, mí mọdọ e jẹ nado dotoaina linlẹn towe lẹ, na nugbo tọn, gando sinsẹ̀n klandovo ehe go, mí yọnẹn dọ filẹpo wẹ yè to onú agọ̀ dọ do e go te.” 23  Todin, yé kọngbedopọ do azán de ji hẹ ẹ, susu yetọn sọ wá e dè to fihe e nọ nọ̀. E sọ basi zẹẹmẹ whẹho lọ tọn na yé gbọn kunnudide mlẹnmlẹn gando ahọluduta Jiwheyẹwhe tọn go dali podọ gbọn linlẹndidiọna yé gando Jesu go sọn osẹ́n Mose tọn po owe Yẹwhegán lẹ tọn po mẹ dali, yèdọ sọn afọnnu kakajẹ whèjai. 24  Podọ mẹdelẹ jẹ nuhe dọ e te lẹ yise ji; mẹdevo lẹ ma yise. 25  Enẹwutu, na yé ma kọngbedopọ hẹ ode awetọ wutu, yé jẹ yìyì ji, to whenue Paulu dọ ohó ehe dọmọ: “Gbọn gbesisọ dali, gbigbọ wiwe dọ gbọn yẹwhegán Isaia dali hlan tọgbo mìtọn lẹ, 26  dọ, ‘Yì omẹ ehelẹ dè bo dọmọ: “Gbọn sisè dali, mìwlẹ na sè, ṣigba mì ma na mọnukunnujẹemẹ to aliho depope mẹ; podọ, to pinpọn mẹ, mìwlẹ na pọ́n, ṣigba mì ma na mọ to aliho depope mẹ. 27  Na ahun omẹ ehelẹ tọn ko sinyẹn, podọ yé ko yí otó yetọn lẹ do sè ṣogan bo ma yinuwa, podọ yé ko miọn nukun yetọn lẹ; na yé ma nado yí nukun yetọn lẹ do mọnú bo yí otó yetọn lẹ do sènu bosọ yí ahun yetọn lẹ do mọnukunnujẹnumẹ na yé nikaa lẹkọ bọ yẹn nado hẹnazọ̀ngbọna yé.”’ 28  Enẹwutu, mì gbọ e ni yin yinyọnẹn na mì dọ, aliho lọ he Jiwheyẹwhe nọ yizan nado whlẹnmẹ gán, ko yin didohlan akọta lẹ; na nugbo tọn, yé na dotoaina ẹn.” 29  ——* 30  Enẹwutu, e gbọṣi ohọ̀ he ewọ lọsu haya mẹ na owhe blebu awe, e sọ nọ do homẹdagbe hia mẹhe wá e dè lẹpo, 31  bo nọ to yẹwheho ahọluduta Jiwheyẹwhe tọn dọ hlan yé bosọ nọ to nuhe gando Oklunọ Jesu Klisti go lẹ plọnmẹ po awuvivo hodidọ tọn daho tlala po, matin aliglọnnamẹ.

Nudọnamẹ Odò Tọn

Ow 28:29* Pọ́n Mt 17:21, nudọnamẹ odò tọn.