Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 27:1-44

27  Todin, dile nudide ko yin bibasi dọ mí na dohún yì Itali, yé ze Paulu po gàntọ devo delẹ po do alọmẹ na mẹkanwekowhàngán awhànfun-gbẹ́ Augusti tọn he nọ yin Juliu.  Mí biọ tọjihun de mẹ he tọ́n sọn Adlamittiu bo jlo na gbọn fihe to huto agbegbe Asia tọn lẹ, mí sọ súnhún, podọ Alistaku he yin Makedonianu de sọn Tẹsalonika tin po mí po.  Podọ to aihọngbè, mí gọ̀hún do Sidoni, Juliu sọ do homẹdagbe hia Paulu taun bo na ẹn dotẹnmẹ nado yì họntọn etọn lẹ dè bosọ duvivi nukunpedomẹgo yetọn tọn.  Podọ to whenue mí súnhún sọn finẹ, mí kùnhún gbọn oyẹ̀ Kiplu tọn glọ, na jẹhọn agọ̀ to yìnyìn wutu;  mí sọ kùnhún gbọn ohù he siso lọ ji gbọn Silisia po Pamfilia po bo wá glinhún do húnglintẹn Mila tọn to Likia.  Ṣigba, to finẹ, mẹkanwekowhàngán lọ mọ tọjihun de he tọ́n sọn Alẹkzandli bo jei Itali, e sọ bẹ mí do e mẹ.  Enẹgodo, to whenue mí ko kùnhún dẹẹdẹ na azán sọha delẹ bo wá Kinidu po awusinyẹn po na jẹhọn ma na mí dotẹnmẹ wutu, mí kùnhún gbọn oyẹ̀ Klete tọn glọ to Salmọne,  podọ to whenue mí ko whlẹ́ gbọn olá lọ go po awusinyẹn po, mí wá fide he nọ yin Tọjihun-Glintẹn Dagbe, he ma dẹn do tòdaho Lasea.  Dile ojlẹ delẹ ko juwayi podọ todin e yin owùnu nado kùnhún na ojlẹ nùbibla azán ovẹsè tọn* tlẹ ko juwayi wutu, Paulu na ayinamẹ, 10  bo dọna yé dọmọ: “Mì omẹ ṣie lẹ emi, yẹn mọdọ húnkùnkùn na yin po nugbajẹmẹji po gọna nuhẹngu susu, e ma yin na agbàn lẹ po tọjihun lọ po kẹdẹ gba, ṣigba na alindọn mílọsu tọn lẹ ga.” 11  Ṣigba, mẹkanwekowhàngán lọ dotoaina húnkùntọ lọ po ohúnnọ lọ po kakati ni yin nuhe Paulu dọ lẹ. 12  Todin, to whenue e yindọ e ma bọawu nado yí ojlẹ avivọ-whenu tọn zan to tọjihun-glintẹn lọ, mẹsusu na ayinamẹ nado súnhún sọn finẹ, nado pọ́n eyin yé sọgan penugo bo yì Fonisi nado yí ojlẹ avivọ-whenu tọn zan, yèdọ to tọjihun-glintẹn Klete tọn he pannukọn agewaji-whèzẹtẹn tọn podọ hùwaji-whèzẹtẹn tọn. 13  Humọ, to whenue jẹhọn hùwaji tọn to yìnyìn dẹẹdẹ, yé lẹndọ yé ko dibla jẹ yanwle yetọn kọ̀n, yé sọ de húnsingàn sọn otọ̀ mẹ bo jẹ whiwhlẹ́ gbọn olá Klete tọn go ji. 14  Ṣigba, to ojlẹ vude godo, jẹhọn-ahizi de he nọ yin Eulakilo* yìn sinsinyẹn. 15  Dile jẹhọn to tuklado tọjihun lọ badabada bọ e ma penugo nado pannukọn jẹhọn lọ, mí gbọ bo jo míde na ẹn bọ e dọ̀n mí dedo. 16  Todin, mí jẹ lopo pẹvi de he nọ yin Kauda kọ̀n, bo jẹ yẹbẹ ji gbọn e go, ṣogan, e ma bọawu whẹpo mí do yì húnyonu fie ohún pẹvi lọ te. 17  Ṣigba, to whenue yé ko biọ e mẹ, yé jẹ alọgọnu lẹ yizan ji nado blá tọjihun lọ sọn glọ; na yé sọ to budi ma nado slé do tọkẹ́n Siltis* tọn ji wutu, yé dọ̀n okàn alà lọ tọn lẹ wá odò bọ jẹhọn sọ jẹ yé dọ̀n yì ji. 18  Ṣogan, na jẹhọn-ahizi lọ to yigọyigọ-dona mí sinsinyẹn wutu, to aihọngbè, yé jẹ agbàn depò sọn ohún lọ mẹ ji; 19  podọ to azán atọ̀ntọ gbè, yé bẹ nuyizan tọjihun lọ tọn lẹ dlan po alọ yetọn titi po. 20  Todin, to whenue owhè kavi sunwhlẹvu lẹ ma sọawuhia na azán susu, bọ jẹhọn-ahizi he to tuklado mí lọ ma yin pẹvide, to godo mẹ, todido mítọn lẹpo nado yin whinwhlẹngán jẹ bubusẹ ji. 21  Podọ to whenue yé nọ onú ma dù na ojlẹ dindẹn, to whenẹnu, Paulu fọnṣite to ṣẹnṣẹn yetọn bo dọmọ: “Mì omẹ ṣie lẹ emi, na taun tọn, mì dona ko yí ayinamẹ ṣie bọ mì ma na ko súnhún sọn Klete bo na ko dapana nugbajẹmẹji po nuhẹngu ehe po. 22  Etomọṣo, todin, yẹn na ayinamẹ mì nado gboadọ, na alindọn depope to mì mẹ ma to na dọ̀n, adavo tọjihun lọ kẹdẹ. 23  Na to ozán mẹ, angẹli Jiwheyẹwhe he yẹn nọ sẹ̀n podọ mẹhe yẹn nọ basi sinsẹ̀nzọn wiwe hlan lọ tọn de ṣite to apá na mi, 24  bo dọmọ, ‘A dibu blo, Paulu. Hiẹ dona ṣite to Sesali nukọn, podọ, pọ́n! na towe tọn wutu, Jiwheyẹwhe na whlẹn mẹhe dó tọjihun hẹ we lẹpo.’ 25  Enẹwutu, mì gboadọ, mì omẹ ṣie lẹ emi; na yẹn yí Jiwheyẹwhe sè, dọ nuhe yin didọna mi na jọ domọ pẹpẹ. 26  Ṣigba, ohún na siọ mí sẹpọ lopo de kọ̀n.” 27  Todin, to ozán azán wiẹnẹtọ tọn mẹ, dile jẹhọn to yigọyigọ-dona mí to ohù Adlia tọn ji, to zánhomẹ, azọ́nwatọ ohún mẹ tọn lẹ jẹ linlẹn ji dọ yé to dindọnsẹpọ agé. 28  Yé sọ jlẹ sisosiso ohù tọn pọ́n bo mọdọ e yì mẹtè* ko; enẹwutu, yé yinukọn vude dogọ bosọ vọ́ jlẹ sisosiso ohù lọ tọn pọ́n bo mọdọ e yì mẹtè fọtọ̀n. 29  Podọ na obu lọ dọ mí nikaa slé do osé lẹ ji wutu, yé ze húnsingàn ẹnẹ do ohù mẹ sọn húnyonu bo jẹ nukundo ji dọ ai ni họ́n. 30  Ṣigba, to whenue azọ́nwatọ ohún mẹ tọn lẹ to dindin nado họnyi sọn tọjihun lọ mẹ bo de ohún pẹvi lọ jẹte do ohù mẹ bo basi taidi dọ yé jlo na de húnsingàn lẹ sọn ohúnkọ̀ wẹ nkọ, 31  Paulu dọna mẹkanwekowhàngán lọ po awhànfuntọ lọ lẹ po dọmọ: “Eyin omẹ ehelẹ ma gbọṣi tọjihun lọ mẹ, mì ma sọgan yin whinwhlẹngán.” 32  To whenẹnu, awhànfuntọ lọ lẹ sán okàn ohún pẹvi lọ tọn sọn tọjihun lọ go bo jo e do bọ e yì. 33  Todin, to whenue ai ko to hinhọ́n, Paulu jẹ tulina mẹlẹpo ji nado dùnú, bo to didọmọ: “E ko yì azán wiẹnẹ to egbé bọ mì ko to alihọ́ bo to huvẹ bo masọ dù nude. 34  Enẹwutu, yẹn na tuli mì nado dùnú, na dagbemẹninọ mìtọn wutu; na dopo tata to oda he to ota na mì lẹ mẹ ma na dọ̀n.” 35  To whenue e ko dọ ehe, e sọ yí akla de, bo dopẹna Jiwheyẹwhe to yemẹpo nukọn bosọ wẹ́n ẹn bo jẹ núdù ji. 36  Enẹwutu, awuya yemẹpo bọ yelọsu jẹ núdù ji. 37  Todin, to pọmẹ, mí mẹhe tin to tọjihun lọ mẹ lẹ yin alindọn fọde kandegbàn-atọ́n-nukundopo. 38  To whenue yé ko dùnú gọ́ho, yé jẹ tọjihun lọ hẹn fua ji gbọn likun lẹ bibẹ dlan ohù mẹ dali. 39  To godo mẹ, to whenue ai ko họ́n, yé ma sọgan yọ́n fihe agé te, ṣigba yé mọ ogblọ́n de he tindo huto, podọ na enẹwutu yé magbe dọ, eyin e yọnbasi, yé na glinhún lọ do huto. 40  Enẹwutu, to whenue yé ko sán húnsingàn lọ lẹ, yé dike bọ yé flẹ jẹ ohù mẹ, to ojlẹ dopolọ mẹ dile yé tún okàn azẹ̀ lọ lẹ tọn podọ, to whenue yé ko kẹ́ alà he to nukọn lọ, yé pànta huto lọ. 41  To whenue yé hẹ pópló tọkẹ́n tọn he agbówhẹn to hihò to adà awe lẹ mẹ de ji, yé glin tọjihun lọ bọ ohúnkọ̀ lọ whè do kọmẹ gbanun-gbanun bo ma sọgan sẹtẹn, ṣigba agbówhẹn lẹ to hihò jẹ húnyonu lọ go bo gbà ẹ do flinflin. 42  Enẹwutu, awhànfuntọ lẹ magbe nado hù gàntọ lẹ, na depope to yé mẹ ni ma linsin bo họnyi blo. 43  Ṣigba, mẹkanwekowhàngán lọ jlo nado whlẹn Paulu, e sọ glọnalina yé ma nado yinuwa sọgbe hẹ lẹndai yetọn. Podọ e degbena mẹhe penugo nado linsin lẹ nado lọ́n jẹ ohù mẹ bo jẹ agé whẹ́, 44  bọ mẹhe pò lẹ na wà onú dopolọ, mẹdelẹ gbọn owhlẹ lẹ ji podọ mẹdevo lẹ gbọn onú delẹ ji sọn tọjihun lọ mẹ. Gbọnmọ dali, mẹlẹpo yin hinhẹn jẹ agé awuyẹyẹ-afọyẹyẹ.

Nudọnamẹ Odò Tọn

Ow 27:9* Kavi, “nùbibla afò-whenu tọn.”
Ow 27:14* Kavi, “jẹhọn agewaji-whèzẹtẹn tọn.”
Ow 27:17* Enẹ wẹ, ohù plitẹn daho awe he ma siso to huto Libia tọn, to Agewaji Aflika tọn.
Ow 27:28* Pọ́n Nudọnamẹ Dogọ 11.