Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 25:1-27

25  Enẹwutu, to whenue Festu ko jẹ gandu ji do ayimatẹn lọ ji godo, e hẹji sọn Sesalea yì Jelusalẹm to azán atọ̀n godo;  yẹwhenọgán lẹ po Ju nukundeji lẹ po sọ jẹ owhẹ̀ Paulu tọn na ẹn. Enẹwutu, yé jẹ vivẹ ẹ ji,  bo to nukundagbe biọ na yedelẹ jẹagọdo dawe lọ dọ ewọ ni dowẹn hlan ẹn nado wá Jelusalẹm, dile yé to pọ̀wutọna ẹn nado hù i to aliho ji.  Ṣigba, Festu gblọn dọ Paulu ni yin hinhẹn do Sesalea bosọ dọ dọ ewọ lọsu jlo na yì finẹ to madẹnmẹ.  Ewọ sọ dọmọ: “Enẹwutu, mì dike mẹhe yin nukọntọ to ṣẹnṣẹn mìtọn lẹ ni jẹte hẹ mi yì bo sawhẹdokọna ẹn eyin yé mọ nuhe jẹagọ depope to dawe ehe mẹ.”  Enẹwutu, to whenue e ko nọ ṣẹnṣẹn yetọn na nuhe ma hú azán ṣinatọ̀n kavi ao, e jẹte yì Sesalea, podọ to aihọngbè, e sinai to whẹdaján ji bo degbè dọ Paulu ni yin hinhẹnwa.  To whenue e wá, Ju he ko wá sọn Jelusalẹm lẹ ṣite lẹdo e pé, bo to owhẹ̀ sinsinyẹn susu he yé ma sọgan do kunnudenu etọn hia lẹ sadokọna ẹn.  Ṣigba, nado yiavunlọna ede, Paulu dọmọ: “Yẹn ma waylando depope sọta Osẹ́n Ju lẹ tọn kavi sọta tẹmpli lọ kavi sọta Sesali.”  Na Festu jlo nado mọ nukundagbe Ju lẹ tọn wutu, e gblọnna Paulu dọmọ: “Be hiẹ jlo nado hẹji yì Jelusalẹm nado yin whẹdana to dọ́n to nukọn ṣie gando onú ehelẹ go wẹ?” 10  Ṣigba, Paulu dọmọ: “Yẹn ko to ote to whẹdaján Sesali tọn nukọn, fihe yẹn dona yin whẹdana te. Yẹn ma wà oylan depope do Ju lẹ, dile hiẹ lọsu ga to mimọ do hezeheze. 11  Ṣigba, eyin yẹn yin ylanwatọ de nugbonugbo, bo ko wà nudepope he jẹna okú, yẹn ma gbẹ́ nado kú; to alọ devo mẹ, eyin depope to nuhe omẹ ehelẹ to owhẹ̀ etọn sadokọna mi lẹ mẹ ma yin nugbo, mẹdepope ma sọgan ze mi jo na yé nado mọ nukundagbe yí. Yẹn vọ́ owhẹ̀ ṣie ylọ to Sesali dè!” 12  To whenẹnu, to whenue Festu ko dọho hẹ pipli ayinamẹtọ lẹ tọn godo, e gblọn dọmọ: “Hiẹ ko vọ́ owhẹ̀ ylọ to Sesali dè; Sesali dè wẹ hiẹ nasọ yì.” 13  Todin, to whenue azán delẹ ko juwayi, ahọlu Aglipa po Belnike po basi dlapọn wá Sesalea nado wá dọnudo Festu. 14  Enẹwutu, dile yé to finẹ na azán delẹ, Festu ze whẹho Paulu tọn donukọnna ahọlu lọ, bo dọmọ: “Dawe de tin he Feliksi jodo di gàntọ, 15  podọ to whenue yẹn tin to Jelusalẹm, yẹwhenọgán lẹ po sunnu mẹho Ju lẹ tọn po hẹn ohó etọn wá, bo to whẹdida whẹgbledomẹ tọn biọ sọta ẹ. 16  Ṣigba, yẹn gblọnna yé dọ e ma yin aliho nuyiwa Lomunu lẹ tọn nado nọ jo omẹ depope namẹ nado mọ nukundagbe yí adavo mẹhe yin whẹsadokọna lọ mọ whẹsadokọnamẹtọ etọn lẹ nukun sọ nukun whẹ́ bo tindo dotẹnmẹ lọ nado dọho bosọ yiavunlọna ede gando whẹsadokọnamẹ lọ go. 17  Enẹwutu, to whenue yé pli dopọ tofi, yẹn ma dọngbàn, ṣigba to aihọngbè, yẹn sinai to whẹdaján ji bo degbè dọ dawe lọ ni yin hinhẹnwa. 18  To whenue whẹsadokọnamẹtọ lọ lẹ fọnṣite, yé ma jẹ owhẹ̀ onú ylankan he yẹn ko lẹn gando e go lẹ tọn depope sọta ẹ gba. 19  Nudindọn delẹ wẹ yé tindo hẹ ẹ poun gando sinsẹ̀n-bibasi hlan yẹwhe yetọn titi go podọ gando Jesu de he ko kú ṣigba he Paulu to nùzindeji mapote dọ e to ogbẹ̀ go. 20  Enẹwutu, to whenue yẹn biọ bẹwlu mẹ gando nudindọn yetọn do whẹho ehelẹ ji go, yẹn kanse e eyin ewọ na jlo nado yì Jelusalẹm bo yin whẹdana to dọ́n gando whẹho ehelẹ go. 21  Ṣigba, to whenue Paulu biọ dọ emi ni yin jijodo gànmẹ kakajẹ whenue Omẹ Gigonọ lọ na basi nudide gando emi go, yẹn degbè dọ ewọ ni yin jijodo gànmẹ jẹ whenue yẹn na do e hlan Sesali dè.” 22  Todin, Aglipa dọna Festu dọmọ: “Yẹnlọsu ga na jlo nado sè ohó dawe ehe tọn.” E dọmọ: “Hiẹ na sè ohó etọn to osọ he ja.” 23  Enẹwutu, to aihọngbè, Aglipa po Belnike po wá po aṣọ́dido daho po bosọ biọ ahọlu-gbasa to pọmẹ po awhàngán daho lẹ po gọna sunnu nukundeji tòdaho lọ tọn lẹ, podọ to whenue Festu degbè, Paulu yin hinhẹnwa. 24  Festu sọ dọmọ: “Ahọlu Aglipa po mì mẹhe tin tofi hẹ mí lẹpo po emi, dawe lọ he agundaho Ju lẹ tọn lẹpo ko biọ to yẹn si to Jelusalẹm podọ tofi, bo to awhádo dọ e ma jẹ dọ ewọ nisọ nọgbẹ̀ ba lọ mọ die mì te. 25  Ṣigba, yẹn mọdọ e ma wà oylan depope he hẹn ẹn jẹna okú. Enẹwutu, to whenue ewọ lọsu vọ́ owhẹ̀ ylọ to Omẹ Gigonọ lọ dè, yẹn basi dide nado do e hlan. 26  Ṣigba, yẹn ma tindo onú tangan de he yẹn na kàn hlan Oklunọ ṣie gando ewọ go. Enẹwutu wẹ yẹn hẹn ẹn wá nukọn mìtọn, podọ na taun tọn, wá nukọn towe, hiẹ Ahọlu Aglipa, bọ to dodinnanu whẹdida tọn lọ godo, yẹn nido sọgan mọ nude he yẹn na kàn. 27  Na to nukun ṣie mẹ, e ma sọgbe hẹ lẹnpọn dagbe nado do gàntọ de hlan bo ma do owhẹ̀ he yin sisadokọna ẹn lọ lẹ lọsu hia gba.”

Nudọnamẹ Odò Tọn