Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 24:1-27

24  To azán atọ́n godo, yẹwhenọ daho Ananias wá po sunnu mẹho delẹ po gọna whẹ̀yidọtọ de he nọ yin Teltulu, yé sọ jẹ owhẹ̀ Paulu tọn na ayimatẹn-gán lọ.  To whenue e yin yiylọ wá, Teltulu jẹ whẹsadokọna ẹn ji, bo dọmọ: “Mimọ dọ mí to vivi jijọho daho tọn dù sọn hiẹ dè bọ diọdo lẹ to aimẹ wá to akọta ehe mẹ gbọn numọhlan-nukọn towe dali,  mí yí pẹdido daho do kẹalọyi onú ehelẹ to whepoponu podọ to filẹpo ga, Hiẹ Gigonọ Daho Feliksi.  Ṣigba, ma nado hẹn whenu towe gú dogọ, yẹn vẹ̀ we nado sè ohó mítọn na whenu vude to homẹdagbe towe mẹ.  Na mí ko mọ dawe ehe he yin adlanọ de bọ e to gufinfọn hẹnwa Ju lẹpo ṣẹnṣẹn gbọn aigba fininọ lẹpo ji bosọ yin tọ́ntlọ́ngbọ́n na sinsẹ̀n klandovo Nazalẹtinu lẹ tọn,  mẹhe sọ nọ tẹnpọn nado hẹn tẹmpli lọ flu bọ mí wle e.  ——*  Hiẹ lọsu sọgan kanhose e gando onú ehe lẹpo he mí to owhẹ̀ etọn sadokọna ẹn lẹ go.”  To whenẹnu, Ju lẹ lọsu kọnawudopọ hẹ ẹ to mẹgbeyinyan lọ mẹ, bo zinnudeji dọ nugbo wẹ onú ehelẹ. 10  Podọ Paulu, to whenue ayimatẹn-gán lọ ko mimí ota hlan ẹn nado dọho, e gblọn dọmọ: “To yinyọnẹn mẹ ganji dọ hiẹ ko yin whẹdatọ akọta ehe tọn na owhe susu lẹ, po homẹhunhun po wẹ yẹn do to hodọ nado yiavunlọna whẹho he gando go e lẹ, 11  dile hiẹ tin to otẹn dagbe mẹ nado dindona dọ e ma ko hú azán wiawe he yẹn hẹji yì Jelusalẹm nado basi sinsẹ̀n; 12  yé masọ mọ mi to núdọ̀n hẹ mẹdepope to tẹmpli mẹ mọdopolọ yẹn ma bẹ gbẹtọgun he to adán ji de pli dopọ, vlavo to sinagọgu mẹ kavi to fidepope to tòdaho lọ mẹ. 13  Mọjanwẹ yé ma sọgan do nugbo-yinyin onú he yé to owhẹ̀ etọn sadokọna mi lẹ tọn hia we todin do niyẹn. 14  Ṣigba yẹn yigbe ehe tọn na we, dọ sọgbe hẹ aliho lọ he yé nọ ylọdọ ‘sinsẹ̀n klandovo’ de, mọ wẹ yẹn to sinsẹ̀nzọn wiwe wà hlan Jiwheyẹwhe tọgbo ṣie lẹ tọn, dile yẹn tindo yise to onú lẹpo he yin kinkàn to Osẹ́n lọ mẹ podọ to Yẹwhegán lẹ mẹ; 15  podọ yẹn tindo todido to Jiwheyẹwhe mẹ, yèdọ todido he omẹ ehelẹ lọsu tindo, dọ fọnsọnku dodonọ lẹ po mawadodonọ lẹ tọn po de na tin. 16  Enẹwutu, na nugbo tọn, yẹn nọ to vivẹnudo to whepoponu nado mọdọ ayihadawhẹnamẹnu ṣie wé bọ yẹn ma hùwhẹ do Jiwheyẹwhe podọ do gbẹtọ. 17  Enẹwutu, to owhe delẹ godo, yẹn wá nado na nunina lẹblanu tọn lẹ omẹ ṣie lẹ, podọ nado basi avọ́nunina lẹ. 18  Dile yẹn to onú ehelẹ basi, yé mọ mi to tẹmpli mẹ to whenue yẹn to yinyin kiklọwé to aṣa-liho, ṣigba yé ma mọ mi po gbẹtọgun de po kavi po zingidi po gba. Ṣigba, Ju delẹ tin he wá sọn agbegbe Asia tọn ji, 19  he dona tin tofi to nukọn towe nado sawhẹdokọna mi eyin yé sọgan mọ nudepope jẹagọdo mi. 20  Kavi, gbọ mẹhe tin tofi lẹ lọsu ni dọ eyin yé mọ oylan de to whenue yẹn ṣite to hagbẹ Whẹdatẹn Daho Ju lẹ tọn* lọ nukọn, 21  adavo onú dopo ehe, gando ehe go yẹn yí ogbè lélé do dawhá to whenue yẹn ṣite to ṣẹnṣẹn yetọn dọ, ‘Na fọnsọnku oṣiọ lẹ tọn wutu wẹ yẹn to yinyin whẹdana to nukọn mìtọn to egbé!’” 22  Ṣigba, na Feliksi yọ́n whẹho he gando Aliho ehe go lẹ ganji wutu, e sẹ̀ owhẹ̀ yetọn donukọn bo dọmọ: “Whedepopenu he Lisia awhàngán daho lọ wá, yẹn na basi nudide do whẹho he gando mì go ehelẹ ji.” 23  E sọ degbena mẹkanwekowhàngán lọ dọ dawe lọ ni yin hinhẹn gọyì gànmẹ podọ mẹdekannujẹ vude ni yin nina ẹn, e ni masọ gbẹ́ na depope to omẹ etọn lẹ mẹ nado yilizọn na ẹn blo. 24  To azán delẹ godo, Feliksi wá po Dlusila asi etọn po, mẹhe yin yọnnu Ju de, e sọ domẹhlan Paulu bo dotoaina ẹn gando yise to Klisti Jesu mẹ go. 25  Ṣigba, dile e dọho dogbọn dodowiwa po mawazẹjlẹgo po gọna whẹdida he ja lọ dali, budi Feliksi bọ e gblọn dọmọ: “Yì todin whẹ́, ṣigba eyin yẹn tindo dotẹnmẹ hundote de, yẹn nasọ vọ́ dowẹn hlan we.” 26  Nalete, to ojlẹ dopolọ mẹ, e to nukundo dọ Paulu na na ẹn alọgodo-kuẹ. Enẹwutu, e nọ dowẹn hlan ẹn gbọzangbọzan dogọ bo nọ dọho hẹ ẹ. 27  Ṣigba, to whenue owhe awe ko juwayi, Pọlkiu Festu jẹ otẹn Feliksi tọn mẹ; podọ na Feliksi jlo nado mọ nukundagbe Ju lẹ tọn wutu, e jo Paulu do gànmẹ.

Nudọnamẹ Odò Tọn

Ow 24:7* Pọ́n Mt 17:21, nudọnamẹ odò tọn.
Ow 24:20* To paa mẹ, Sanhedlin.