Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 21:1-40

21  Todin, to whenue mí ko dovivẹnu bo klan sọn yé go, mí súnhún bo kùnhún tlọlọ bosọ wá Kọsi, ṣigba mí yì Lodu to aihọngbè, podọ sọn finẹ mí yì Patala.  Podọ to whenue mí mọ tọjihun de he to didasa jei Fenike, mí biọ ohún lọ mẹ bo yì.  To whenue mí mọ lopo Kiplu tọn hlan to aganu, mí gbọn apá bo jo e do amiyọn mẹ bosọ yì Silia, bo gọ̀hún do Tile, na finẹ wẹ tọjihun lọ dona de agbàn etọn lẹ do.  Mí dín devi lẹ mọ bo gbọṣi finẹ na azán ṣinawe. Ṣigba, gbọn gbigbọ dali, yé dọna Paulu pludopludo dọ ni ma dó afọ Jelusalẹm blo.  Enẹwutu, to whenue azán lọ lẹ ko pé, mí tọ́nyi bo bẹ gbejizọnlin mítọn jẹeji; ṣigba yemẹpo, to pọmẹ hẹ yọnnu lẹ po ovi lẹ po, plan mí kakajẹ gbonu tòdaho lọ tọn. Mí sọ jẹklo do huto bo hodẹ̀  bosọ dọ e yì whedenu na ode awetọ, míwlẹ sọ hẹji biọ tọjihun lọ mẹ ṣigba yewlẹ lẹkọyi owhé yetọn gbè.  Enẹgodo, mí dotana gbejizọnlin gbọn tọji he mí bẹsọn Tile lọ, bo wá Ptolẹmai, mí sọ dọnudo mẹmẹsunnu lẹ bo nọ finẹ hẹ yé na azán dopo.  To aihọngbè, mí tọ́nyi bo wá Sesalea, mí sọ biọ owhé Filippi wẹndagbe-jlatọ* lọ tọn gbè, mẹhe yin dopo to sunnu ṣinawe lọ lẹ mẹ, mí sọ nọ e dè.  Dawe ehe tindo viyọnnu ẹnẹ, he yin awhli lẹ, he nọ dọ dọdai. 10  Ṣigba, dile mí gbọṣi finẹ na azán delẹ, yẹwhegán de he nọ yin Agabu jẹte wá sọn Jude, 11  ewọ sọ wá mí dè bo yí homẹblanu Paulu tọn, bo blá afọ po alọ edetiti tọn lẹ po bosọ dọmọ: “Le wẹ gbigbọ wiwe dọ, ‘Dawe he tọn homẹblanu ehe yin wẹ Ju lẹ na blá to aliho ehe mẹ to Jelusalẹm bo na ze e do alọmẹ na omẹ akọta lẹ tọn.’” 12  Todin, whenue mí sè ehe, míwlẹ po mẹhe nọ nọ̀ finẹ lẹ po jẹ vivẹ ẹ ji ma nado hẹji yì Jelusalẹm. 13  To whenẹnu, Paulu gblọn dọmọ: “Etẹwutu mì do to avivi bo to hinhẹn mi gbọjọ to ahun mẹ? Gbọ e ni họnwun na mì dọ, yẹn ko wleawufo e ma yin nado yin biblá kẹdẹ gba ṣigba nado kú ga to Jelusalẹm na oyín Oklunọ Jesu tọn wutu.” 14  To whenue e ma sọgan yin linlẹndiọna, mí kọngbedopọ gbọn didọ dali dọmọ: “Gbọ ojlo Jehovah tọn ni yin wiwà.” 15  Todin, to azán ehelẹ godo, mí wleawuna gbejizọnlin lọ bo dedo Jelusalẹm. 16  Ṣigba, delẹ to devi lẹ mẹ sọn Sesalea hodo mí yì ga, nado plan mí wá owhé dawe he tọn gbè mí na yin yíyí do, yèdọ Kiplunu de he nọ yin Mnasọni, dopo to devi tintan lẹ mẹ. 17  To whenue mí jẹ Jelusalẹm, mẹmẹsunnu lẹ yí ayajẹ do yí mí. 18  Ṣigba, to aihọngbè, Paulu hodo mí yì Jakọbu dè to họmẹ; sunnu mẹho lẹpo sọ tin to finẹ. 19  E sọ dọnudo yé bo jẹ zẹẹmẹ basi ji to gigọ́ mẹ gando nuhe Jiwheyẹwhe wà to akọta lẹ ṣẹnṣẹn gbọn lizọnyizọn etọn gblamẹ lẹ go. 20  To whenue yé sè ehe, yé jẹ gigopana Jiwheyẹwhe ji, yé sọ dọna ẹn dọmọ: “Mẹmẹsunnu E, pọ́n fọtọ́n susu yisenọ lẹ tọn he tin to Ju lẹ ṣẹnṣẹn; yemẹpo wẹ sọ yin zohunhunnọ na Osẹ́n lọ. 21  Ṣigba, yé ko sè nuhe yin didọ gbayipe gando gowe lọ dọ hiẹ ko to atẹṣiṣi sọta Mose plọn Ju lẹpo to akọta lẹ ṣẹnṣẹn, bo to didọna yé ma nado gboadà na ovi yetọn lẹ kavi zinzọnlin to aṣa he hẹnai lẹ mẹ. 22  To whelọnu lo, etẹwẹ dona yin wiwà gando ehe go? Depope he whẹho lọ sọgan yin, yé na sè dọ hiẹ ko wá. 23  Enẹwutu, wà nuhe mí dọna we ehe: Mí tindo sunnu ẹnẹ he ko dopà de. 24  Plan omẹ ehelẹ hẹn bo klọ́ dewe wé to aṣa-liho po yé po bosọ penukundo akuẹzinzan yetọn lẹ go, na yé nido sọgan whlẹ́ ota yetọn. Gbọnmọ dali, mẹlẹpo na yọnẹn dọ nugbo depope ma tin to nuhe yin didọ gbayipe na yé gando gowe lọ mẹ, ṣigba dọ hiẹ to zọnlin jijlọ zìn, bọ hiẹ lọsu to Osẹ́n lọ yìn ga. 25  Na nuhe dù yisenọ he wá sọn akọta lẹ mẹ tọn, mí ko basi nudide mítọn bo ko do e hlan yé dọ yé dona whlá yede sọn nuhe yin yíyí do sanvọ́ hlan boṣiọ lẹ kọ̀n podọ sọn ohùn po nuhe yin kọslona hù lẹ po kọ̀n podọ sọn galilọ kọ̀n.” 26  To whenẹnu, Paulu plan sunnu lọ lẹ to azán awetọ gbè bọ ewọ po yé po klọ́ yede wé to aṣa-liho, e sọ yì tẹmpli mẹ, nado lá azán klọwé to aṣa-liho tọn lẹ, kakajẹ whenue avọ́nunina lọ dona yin nina na dopodopo yetọn. 27  Todin, to whenue azán ṣinawe lọ lẹ ko dibla wá vivọnu, dile Ju he wá sọn Asia lẹ mọ ẹn to tẹmpli mẹ, yé jẹ gbẹtọgun lọ lẹpo hẹn biọ bẹwlu mẹ ji, alọ yetọn sọ jẹ e go, 28  bọ yé to awhádo dọmọ: “Omẹ Islaeli tọn lẹ emi, mì gọalọ! Dawe lọ he to mẹlẹpo plọn to filẹpo sọta gbẹtọ lẹ po Osẹ́n lọ po gọna nọtẹn ehe die podọ, gbọnvona enẹ, e tlẹ hẹn Glẹkinu lẹ biọ tẹmpli mẹ bo ko hẹn ofi wiwe ehe flu.” 29  Na yé ko mọ Tlofimu Efesunu lọ po e po to tòdaho lọ mẹ wayi wutu, yé to linlẹn dọ Paulu ko plan ẹn biọ tẹmpli mẹ. 30  Tòdaho lọ pete sọ biọ bẹwlu mẹ, bọ gbẹtọ lẹ họ̀nwezun pli dopọ; yé sọ wle Paulu bo dọ̀n ẹn jẹ gbonu tẹmpli lọ tọn. Podọ to afọdopolọji, ohọ̀n lọ lẹ yin súsú. 31  Dile yé sọ to dindin nado hù i, awhàngán daho awhànfun-gbẹ́ lọ tọn sè dọ Jelusalẹm pete ko biọ bẹwlu mẹ; 32  podọ to afọdopolọji, ewọ bẹ awhànfuntọ lẹ po mẹkanwekowhàngán lẹ po bo họ̀nwezun yì yé dè. To whenue yé sọnukunmọ awhàngán daho lọ po awhànfuntọ lẹ po, yé doalọtena Paulu hihò. 33  To whenẹnu, awhàngán daho lọ dọnsẹpọ bo hẹn e go bosọ degbè dọ ewọ ni yin biblá po gẹdẹ awe po; e sọ jẹ kinkanse ji mẹhe ewọ yin podọ nuhe e wà. 34  Ṣigba, delẹ to gbẹtọgun lọ mẹ jẹ awhádo ji bo to onú de dọ, mẹdevo lẹ sọ to onú devo dọ. Enẹwutu, to whenue ewọ lọsu ma penugo nado sè hójọhó de na zingidi lọ wutu, e degbè dọ e ni yin hinhẹnwa opá awhànfuntọ lẹ tọn mẹ. 35  Ṣigba, to whenue e jẹ pèkán lọ ji, ninọmẹ lọ jẹ obá de mẹ bọ awhànfuntọ lẹ ze e na zingidi gbẹtọgun lọ tọn wutu; 36  na gbẹtọgun lọ to hihodo yé mapote bo to awhádo dọmọ: “De e sọn aimẹ!” 37  Podọ to whenue e ko dibla yin pinplan biọ opá awhànfuntọ lẹ tọn lọ mẹ, Paulu dọna awhàngán daho lọ dọmọ: “Be yẹn sọgan dọ ohó de na we ya?” Ewọ dọmọ: “A sọgan dó Glẹkigbe wẹ? 38  E ma yin hiẹ wẹ Egiptinu lọ, mẹhe fọ́n gufinfọn de dote jẹnukọnna azán ehelẹ, bo plan sunnu hlọnhutọ degbade yì danfafa ji ya?” 39  To whenẹnu, Paulu dọmọ: “Na nugbo tọn, Ju de wẹ yẹn, sọn Talsu Silisia tọn, tòvi tòdaho he diyin de tọn. Enẹwutu, yẹn vẹ̀ we, nagbè mi nado dọhona gbẹtọ lọ lẹ.” 40  To whenue e ko nagbè e, Paulu ṣite to pèkán lọ lẹ ji bo mìalọ hlan gbẹtọ lọ lẹ. To whenue filẹpo nabọẹ, e dọhona yé to Heblugbe mẹ, bo dọmọ:

Nudọnamẹ Odò Tọn

Ow 21:8* Kavi, “mẹdehlan.”