Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 20:1-38

20  Todin, to whenue zingidi lọ ko depò, Paulu dowẹn hlan devi lẹ, podọ to whenue e ko na tuli yé bo dọ e yì whedenu na yé, e zingbejizọnlin dedo Makedonia.  To whenue e ko jugbọn lẹdo enẹlẹ mẹ bo ko yí ohó susu do na tuli mẹhe tin to finẹ lẹ, e wá Glẹki.  Podọ to whenue e ko nọ finẹ na osun atọ̀n, na núbibla he Ju lẹ wleawuna sọta ẹ to whenue e ko dibla dó tọjihun yì Silia wutu, e basi dide nado lẹkọ gbọn Makedonia.  Sopateli visunnu Pilusi Beleanu lọ tọn, Alistaku po Sekundu po he yin Tẹsalonikanu lẹ, podọ Gaiu Delbe tọn, podọ Timoti, gọna Tikiku po Tlofimu po he wá sọn agbegbe Asia tọn ji lẹ, hodo e.  Omẹ ehelẹ jẹnukọnna mí bo to tenọpọn mí to Tloa;  ṣigba, míwlẹ súnhún sọn Filippi to aihọngbè azán hùnwhẹ akla madotọ́n lẹ tọn, mí sọ wá yé dè to Tloa to azán atọ́n gblamẹ; mí sọ nọ finẹ na azán ṣinawe.  To azán tintan osẹ tọn gbè, to whenue mí pli dopọ nado dùnú, Paulu jẹ hodọna yé ji, na aihọngbè etọn wẹ e na yì wutu; e sọ dlẹnkanna hodidọ etọn kakajẹ zánhomẹ.  Miyọ́ngbán sọ sù vude to abò aga tọn lọ mẹ fihe mí pli dopọ do.  Jọja sunnu de he nọ yin Eutiku sinai to fleṣe nù bo damlọn yìkànmẹ dile Paulu to hodọ, e sọ flẹ to amlọn mẹ, bo jai sọn petlezìn aga atọ̀nnọ ji bọ yè ze kúkú etọn. 10  Ṣigba, Paulu jẹte yì odò bo dẹ́ ede do e ji bosọ gbò e fán bo dọmọ: “Mì gbọ awhádo, ewọ ko gọwá ogbẹ̀.” 11  Todin, e hẹji yì aga bo bà núdùdù bosọ jẹ núdù ji, podọ to whenue e ko dọhona ojlẹ de, yèdọ kakajẹ afọnnu fliflimẹ, e yì to godo mẹ. 12  Enẹwutu, yé plan yọpọ sunnu lọ yì gbẹ̀te bo yin homẹmiọnna hugan nuhe yè sọgan jlẹ. 13  Todin, mí jẹnukọn yì tọjihun lọ kọ̀n bo súnhún yì Asso, fie mí to linlẹn nado plan Paulu biọ ohún lọ mẹ te, na, to whenue ewọ ko na mí anademẹ ehelẹ godo, ewọ lọsu to linlẹn nado zọ̀n afọ yì. 14  Enẹwutu, to whenue e wá plá mí to Asso, mí plan ẹn biọ ohún lọ mẹ bo yì Mitilene; 15  podọ, to whenue mí súnhún sọn finẹ to aihọngbè, mí dasá yì awà awetọ Kio tọn ji, ṣigba to azán awetọ gbè mí zẹ̀ Samo, podọ to aihọngbè mí wá Miletu. 16  Na Paulu ko basi dide nado dó tọjihun zẹ̀ Efesu go, na ewọ ma nado yí whenu depope zan to agbegbe Asia tọn ji; na e to whlẹndo ji nado jẹ Jelusalẹm to azán hùnwhẹ Pẹntikọsti tọn gbè eyin e sọgan yọnbasi. 17  Ṣigba, e domẹhlan Efesu sọn Miletu bo ylọ mẹho agun lọ tọn lẹ. 18  To whenue yé wá e dè, e dọna yé dọmọ: “Mìwlẹ yọnẹn ganji lehe yẹn tin po mì po to ojlẹ lẹpo mẹ sọn azán tintan he gbè yẹn wá agbegbe Asia tọn mẹ do, 19  bo yí mẹdezewhè daho po dasin lẹ po gọna whlepọn he núbibla Ju lẹ tọn hẹnwa ji e lẹ do to azọ́nwa na Oklunọ di afanumẹ; 20  dile yẹn ma gboawupo sọn nuhe na hẹn ale wá lẹ didọna mì mẹ kavi sọn pinplọn mì to gbangba podọ sọn whédegbè jẹ whédegbè mẹ do. 21  Ṣigba, yẹn dekunnu mlẹnmlẹn na Ju lẹ po Glẹkinu lẹ po dọ yé ni lẹnvọjọ bo lẹhlan Jiwheyẹwhe dè bosọ tindo yise to Oklunọ mítọn Jesu mẹ. 22  Podọ todin, mì pọ́n! na gbigbọ hẹn ẹn yin dandan na mi wutu, yẹn zingbejizọnlin jei Jelusalẹm, dile etlẹ yindọ yẹn ma yọ́n nuhe na jọ do go e to finẹ lẹ, 23  adavo dọ sọn tòdaho de mẹ jẹ tòdaho de mẹ, gbigbọ wiwe nọ to avase na mi gbọzangbọzan bo nọ to didọ dọ gànpamẹ po nukunbibia lẹ po wẹ to tepọn mi. 24  Etomọṣo, yẹn ma hia alindọn ṣie di nuhọakuẹ de na mi gba, eyin yẹn ko gbẹ́ sọgan dotana alèwezun ṣie po lizọnyizọn he yẹn mọyi sọn Oklunọ Jesu dè po, nado dekunnu wẹndagbe nukundagbe majẹhẹ Jiwheyẹwhe tọn mlẹnmlẹn. 25  “Podọ todin, mì pọ́n! yẹn yọnẹn dọ mìmẹpo he yẹn dọyẹwheho ahọluduta lọ tọn na lẹ ma na mọ mi ba. 26  Enẹwutu wẹ yẹn ylọ mì nado dekunnu na ehe to egbé dọ yẹn wé sọn ohùn gbẹtọ lẹpo tọn mẹ, 27  na yẹn ma gboawupo sọn lẹndai Jiwheyẹwhe tọn lẹpo didọna mì mẹ. 28  Mì payi mìde po apó lọ pete po go, ehe mẹ gbigbọ wiwe ko de mì nado yin nugopọntọ lẹ te, nado nọ yìn agun Jiwheyẹwhe tọn, ehe e yí ohùn Visunnu etọn titi tọn do họ̀. 29  Yẹn yọnẹn dọ to yìyì ṣie godo, ohla kanylantọ* lẹ na biọ ṣẹnṣẹn mìtọn bo ma na yinuwa hẹ apó lọ po awuvẹmẹ po, 30  podọ sọn mìlọsu lẹ ṣẹnṣẹn wẹ sunnu lẹ na fọ́n sọn bo na slokọna nuplọnmẹ lẹ nado dọ̀n devi lẹ do godo yede tọn. 31  “Enẹwutu, mì nọ nukle, bo hẹn do ayiha mẹ dọ na owhe atọ̀n, yẹn ma nọma yí dasin do dotuhomẹna dopodopo mìtọn to ozán po okle po. 32  Podọ todin, yẹn ze mì do alọmẹ na Jiwheyẹwhe podọ na ohó nukundagbe majẹhẹ etọn, yèdọ ohó he sọgan hẹn mì lodo bo na mì ogú lọ to omẹ klandowiwe lẹpo ṣẹnṣẹn. 33  Yẹn ma donukunkẹn gando fataka kavi sika kavi avọ̀ mẹde tọn go gba. 34  Mìlọsu lẹ yọnẹn dọ alọ ehelẹ wẹ penukundo nuhudo ṣie lẹ po mẹhe to dè e lẹ po tọn go. 35  Yẹn ko dohia mì to onú lẹpo mẹ dọ gbọn tuklajijẹ to aliho mọnkọtọn mẹ dali wẹ mì dona gọalọna mẹhe yin madogánnọ lẹ, podọ mì dona hẹn ohó Oklunọ Jesu tọn lẹ do ayiha mẹ, to whenue ewọ lọsu dọ dọ, ‘Ayajẹ sù to nunamẹ mẹ hú to mimọyi mẹ.’” 36  Podọ to whenue e ko dọ onú ehelẹ, e jẹklo po yemẹpo po bo hodẹ̀. 37  Na nugbo tọn, yemẹpo sọ viavi tlala, bo gbò Paulu fán bosọ donùnùgo na ẹn, 38  na ohó he e ko dọ, dọ yé ma nasọ mọ emi ba, blawu na yé tlala wutu. To whenẹnu, yé plan ẹn dedo tọjihun lọ kọ̀n.

Nudọnamẹ Odò Tọn

Ow 20:29* Kavi, “kọgbidinamẹtọ.”