Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 2:1-47

2  Todin, dile azán hùnwhẹ Pẹntikọsti* tọn to yìyì, yemẹpo tin to fidopo lọ,  podọ to ajiji mẹ, nudidọ de he taidi jẹhọn sinsinyẹn de tọn wá sọn olọn mẹ, bosọ gọ́ ohọ̀ he mẹ yé sinai do lọ pete.  Podọ yé mọ odẹ́ lẹ taidi miyọ́n bọ e gbàpe, e sọ jẹ do dopodopo yetọn ji,  yemẹpo sọ gọ́ na gbigbọ wiwe bo jẹ ogbè voovo yí do dọho ji kẹdẹdile gbigbọ lọ na yé nado dọho do.  Nalete, Ju he dibusi Jiwheyẹwhe lẹ tin to Jelusalẹm sọn akọta he tin to olọn glọ lẹpo mẹ.  Enẹwutu, to whenue nudidọ lọ yin sisè, gbẹtọgun lọ pli dopọ, awú sọ ji yé, na omẹ dopodopo sè bọ yé to hodọ do ogbè etọn titi mẹ.  Na nugbo tọn, avò vò yé bọ e jẹ pipaṣa yé ji, yé sọ dọmọ: “Mì pọ́n, Galilinu wẹ mẹhe to hodọ lọ lẹpo, kavi e ma yin mọ wẹ?  Ṣogan, naegbọn dopodopo mítọn to sisè ogbè mítọn titi he mẹ yè ji mí do?  Paltianu lẹ, Medianu lẹ, Elaminu lẹ, tòmẹnu Mẹsopotamia tọn lẹ, Jude tọn lẹ, Kapadokia tọn lẹ, Pọntu tọn lẹ po Asia* tọn lẹ po, 10  podọ Fligia po Pamfilia po tọn lẹ, Egipti po lẹdo Libia po tọn lẹ, he tin to Silene waji, podọ jonọ he wá sọn Lomu lẹ, yèdọ Ju po mẹdiọzun Ju lẹ po, 11  Kletenu lẹ po Alabianu lẹ po, mí sè yé to hodọ to ogbè mítọn lẹ mẹ gando onú jiawu Jiwheyẹwhe tọn lẹ go.” 12  Mọwẹ, avò vò yemẹpo bọ yé jẹflumẹ, bo to didọna ode awetọ dọmọ: “Etẹwẹ ehe lẹpo zẹẹmẹdo?” 13  Ṣigba, omẹ delẹ to yé vlẹ bo jẹ didọ ji dọmọ: “Ovẹn vivi wẹ yé nùmú.” 14  Ṣigba, Pita fọnṣite po omẹ widopo lẹ po bo ze ogbè etọn daga bosọ dọhona yé dọmọ: “Mì omẹ Jude tọn lẹ po tòmẹnu Jelusalẹm tọn lẹpo po emi, mì gbọ ehe ni yin yinyọnẹn na mì podọ mì dotoaina ohó ṣie lẹ ganji. 15  Na nugbo tọn, omẹ ehelẹ ma nùahànmú dile mì lẹn do gba, na gànhiho atọ̀ntọ* azán lọ tọn wẹ. 16  Kakatimọ, nuhe yin didọ gbọn yẹwhegán Joẹli gblamẹ die, 17  Jiwheyẹwhe dọmọ: ‘“Podọ to azán godo tọn lẹ mẹ, yẹn na kọ̀n gbigbọ ṣie do agbasalan wunmẹ lẹpo ji, podọ visunnu mìtọn lẹ po viyọnnu mìtọn lẹ po na dọ dọdai podọ dẹpẹ mìtọn lẹ na mọ numimọ lẹ podọ yọnhonọ mìtọn lẹ na kú odlọ lẹ; 18  podọ etlẹ yin do afanumẹ sunnu lẹ ji podọ do afanumẹ yọnnu lẹ ji wẹ yẹn na kọ̀n gbigbọ ṣie do to azán enẹlẹ gbè, bọ yé na dọ dọdai. 19  Yẹn nasọ basi nudabla lẹ to olọn mẹ aga podọ ohia lẹ to aigba ji to odò, ohùn po miyọ́n po gọna aslọ azọ̀ tọn; 20  owhè na yin didiọ zun zinvlu podọ osun zun ohùn whẹpo azán daho podọ gigonọ Jehovah tọn nido wá. 21  Podọ mẹdepope he ylọ oyín Jehovah tọn na yin whinwhlẹngán.”’ 22  “Mì omẹ Islaeli tọn lẹ emi, mì sè ohó ehelẹ: Jesu Nazalẹti tọn, dawe he Jiwheyẹwhe dohia mì to gbangba gbọn azọ́n huhlọnnọ lẹ po nudabla lẹ po gọna ohia he Jiwheyẹwhe basi gbọn ewọ dali to ṣẹnṣẹn mìtọn lẹ gblamẹ, kẹdẹdile mìlọsu yọnẹn do, 23  dawe ehe, taidi mẹhe yin zizejo gbọn lẹndai he Jiwheyẹwhe magbe etọn podọ oyọnẹn jẹnukọn etọn dali, mẹhe mì plá do pòtin go bo hù gbọn alọ dawe sẹ́nhẹngbatọ lẹ tọn mẹ. 24  Ṣigba, Jiwheyẹwhe fọ́n ẹn sọnku gbọn okàn okú tọn túntún dali, na e ma yọnbasi dọ e ni hẹn ewọ go zọnmii. 25  Na Davidi dọ gando ewọ go dọ, ‘Jehovah tin to nukọn ṣie to whepoponu; na e tin to adusilọ ṣie mẹ na yẹn ma nado yin whinwhàn gbede. 26  Enẹwutu, awuya ahun ṣie bọ odẹ́ ṣie jaya tlala. Humọ, agbasalan ṣie lọsu na tin to todido mẹ; 27  na hiẹ ma na jo alindọn ṣie do Hadẹs* mẹ, mọjanwẹ hiẹ ma na dike omẹ nugbonọ towe ni mọ gbigble. 28  Hiẹ ko hẹn aliho ogbẹ̀ tọn lẹ zun yinyọnẹn na mi, hiẹ na yí nukundagbe towe do hẹn mi gọ́ na ayajẹ.’ 29  “Mì mẹmẹsunnu lẹ emi, mì gbọ yẹn ni yí awuvivo hodidọ tọn do dọhona mì gando tatọ́ whẹndo tọn Davidi go, dọ ewọ lẹzun matintọ bo yin dìdì bọ yọdò etọn tin to mí dè jẹ azán ehe gbè. 30  Enẹwutu, na yẹwhegán de wẹ e yin bo yọnẹn dọ Jiwheyẹwhe ko yí whiwhle de do dopagbe na ẹn dọ ewọ na ze omẹ de sọn sinsẹ́n alinkàn etọn tọn mẹ sinai do ofìn etọn ji wutu, 31  ewọ mọ jẹnukọn bo dọho gando fọnsọnku Klisti tọn go, dọ e ma na yin gbigbẹdai do Hadẹs* mẹ mọjanwẹ agbasalan etọn ma na mọ gbigble. 32  Jesu ehe wẹ Jiwheyẹwhe fọnsọnku, yèdọ nugbo de he mímẹpo yin kunnudetọ na. 33  Enẹwutu, na e yin zizedaga do adusilọ Jiwheyẹwhe tọn mẹ bo mọ gbigbọ wiwe he Otọ́ dopagbe etọn lọ yí wutu, e ko kọ̀n ehe lọ he mì to mimọ bo to sisè jẹgbonu. 34  Na taun tọn, Davidi ma hẹji yì olọn mẹ, ṣigba ewọ lọsu dọmọ, ‘Jehovah dọna Oklunọ ṣie dọmọ: “Sinai to adusilọ ṣie mẹ, 35  kaka yẹn nado yí kẹntọ towe lẹ do tokloafọligbe afọ towe lẹ tọn.”’ 36  Enẹwutu, mì gbọ owhé Islaeli tọn lẹpo ni yọnẹn hezeheze dọ Jiwheyẹwhe ko yí Jesu, mẹhe mì whè do núgo lọ do basi Oklunọ po Klisti po.” 37  Todin, to whenue yé sè ehe, e vẹna yé yì ahun mẹ bọ yé dọna Pita po apọsteli he pò lẹ po dọmọ: “Mì mẹmẹsunnu lẹ emi, etẹwẹ mí na wà?” 38  Pita dọna yé dọmọ: “Mì lẹnvọjọ, bo dike dopodopo mìtọn ni yin bibaptizi to oyín Jesu Klisti tọn mẹ na jona ylando mìtọn lẹ tọn, mì nasọ mọ nunina vọnu, he yin gbigbọ wiwe yí. 39  Na mìwlẹ wẹ opagbe lọ yin didó na podọ na ovi mìtọn lẹ gọna mẹhe tin to olá lẹpo, kẹdẹdile mẹhe Jehovah Jiwheyẹwhe mítọn ylọ wá ede dè lẹ sọgan sù sọ.” 40  Podọ e yí ohó susu devo lẹ do dekunnu mlẹnmlẹn bo to tudohomẹna yé dọmọ: “Mì whlẹn mìde sọn whẹndo jijọ gbíngbánnọ ehe mẹ.” 41  Enẹwutu, mẹhe kẹalọyi ohó etọn sọn ahun mẹ wá lẹ yin bibaptizi, podọ nudi alindọn foo-fọtọ́n wẹ yin yiyidogọ to azán enẹ gbè. 42  Yé sọ zindonukọn nado to yedelẹ zejo na nuplọnmẹ apọsteli lẹ tọn podọ nado nọ wà onú lẹpo to pọmẹ, yèdọ nado nọ dùnú dopọ podọ nado nọ hodẹ̀ dopọ. 43  Na nugbo tọn, obu jẹ alindọn lẹpo ji, podọ apọsteli lẹ jẹ nudabla po ohia susu po basi ji. 44  Mẹhe lẹzun yisenọ lẹpo tin to kọndopọ mẹ bo nọ tindo onú lẹpo to pọmẹ, 45  yé sọ to núzinzan po nutindo yetọn lẹ po sà bo to akuẹ lọ lẹ má na mẹlẹpo, sọgbe hẹ nuhudo mẹdopodopo tọn. 46  Yé sọ nọ pli to whepoponu do tẹmpli mẹ egbesọegbesọ to kọndopọ mẹ, podọ yé nọ dùnú to owhé ode awetọ tọn gbè bo nọ yí ayajẹ daho po ahundopo po do dùnú, 47  bosọ nọ to Jiwheyẹwhe pà bo nọ mọ nukundagbe to gbẹtọ lẹpo dè. To ojlẹ dopolọ mẹ, Jehovah zindonukọn nado to gbẹtọ lẹ hẹnwa egbesọegbesọ nado kọnawudopọ hẹ yé to aliho whlẹngán tọn lọ ji.

Nudọnamẹ Odò Tọn

Ow 2:1* Pẹntikọsti zẹẹmẹdo “Kandeaotọ” to Glẹkigbe mẹ. Hùnwhẹ ehe nọ yin bibasi to azán 50tọ bọdo Nisan 16 go.
Ow 2:9* Tofi, “Asia” dlẹnalọdo ayimatẹn fidugando de to Ahọluigba Lomu tọn glọ.
Ow 2:15* Enẹ wẹ, nudi ogàn 9 afọnnu tọn, eyin yè hia sọn ojlẹ he mẹ owhè nọ zẹ̀.
Ow 2:27* Pọ́n Nudọnamẹ Dogọ 8.
Ow 2:31* Pọ́n Nudọnamẹ Dogọ 8.