Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 19:1-41

19  To enẹgodo, to whenue Apolo tin to Kọlinti, Paulu jugbọn lẹdo he dẹn do ohù lẹ ji bo jẹte wá Efesu, bosọ mọ devi delẹ;  ewọ sọ dọna yé dọmọ: “Be mìwlẹ mọ gbigbọ wiwe yí to whenue mì lẹzun yisenọ ya?” Yé dọna ẹn dọmọ: “Etẹ nkọ, mí ma ko sè pọ́n eyin gbigbọ wiwe de tin.”  Ewọ sọ dọmọ: “To whelọnu lo, etẹ mẹ wẹ mì yin bibaptizi te?” Yé dọmọ: “To baptẹm Johanu tọn mẹ.”  Paulu dọmọ: “Johanu yí baptẹm he yin ohia lẹnvọjọ tọn do baptizi, bo nọ dọna gbẹtọ lẹ nado yise to omẹ lọ he na wá to ewọ godo lọ mẹ, enẹ wẹ, to Jesu mẹ.”  To whenue yé sè ehe, yé yin bibaptizi to oyín Oklunọ Jesu tọn mẹ.  Podọ to whenue Paulu ze alọ etọn do yé ji, gbigbọ wiwe wá yé ji, bọ yé jẹ ogbè devo lẹ yí do dọho ji bo to dọdai dọ.  Yemẹpo to pọmẹ yin nudi sunnu wiawe.  To whenue e biọ sinagọgu mẹ, e yí adọgbigbo do dọhona osun atọ̀n, bo nọ to togunmẹho lẹ dọ bosọ nọ to linlẹndiọnamẹ gando ahọluduta Jiwheyẹwhe tọn go.  Ṣigba, to whenue mẹdelẹ jẹ ayiha yetọn hẹn sinyẹn ji bo ma yise, bosọ to ohó ylankan dọ do Aliho Lọ* go to gbẹtọgun lọ nukọn, e tọ́n sọn yé mẹ bo klan devi lẹ sọn yé go, bosọ nọ dọ togunmẹho egbesọegbesọ to wehọmẹ Tilannusi tọn. 10  Ehe zindonukọn na owhe awe, sọmọ bọ mẹhe nọ nọ̀ agbegbe Asia tọn ji lẹpo sè ohó Oklunọ tọn, yèdọ Ju lẹ po Glẹkinu lẹ po. 11  Jiwheyẹwhe sọ zindonukọn nado to azọ́n huhlọnnọ he jiawu lẹ wà gbọn alọ Paulu tọn mẹ, 12  sọmọ bọ avọ̀ lẹ po azọ́nvọ̀ lẹ po nọ yin didesọn agbasa etọn go bo nọ yin hinhẹn yì mẹhe to azọ̀njẹ lẹ dè, azọ̀n lẹ sọ nọ gbọ na yé, gbigbọ ylankan lẹ sọ nọ tọ́njẹgbonu. 13  Ṣigba, mẹdelẹ sọn Ju he nọ to dindanpe bo nọ to aovi lẹ yàn jẹgbonu lẹ mẹ sọ jẹ tintẹnpọn ji nado yí oyín Oklunọ Jesu tọn zan do mẹhe tindo gbigbọ ylankan lẹ ji, bo nọ dọmọ: “Yẹn degbena we vivẹvivẹ gbọn Jesu he Paulu nọ dọyẹwheho etọn dali.” 14  Todin, Skeva, yẹwhenọgán Juvi lẹ tọn de tindo visunnu ṣinawe, he to ehe wà. 15  Ṣigba, gbigbọ ylankan lọ gblọnna yé dọmọ: “Yẹn yọ́n Jesu bosọ jẹakọ hẹ Paulu; ṣigba mẹnu wẹ mìwlẹ yin?” 16  To whenẹnu, dawe he mẹ gbigbọ ylankan lọ tin te lọ́n jẹ yé ji, bo tindo huhlọn hú dopodopo yetọn, bosọ duto yé ji, sọmọ bọ yé họnyi sọn owhé enẹ gbè to omẹ́ podọ po apà po to ogo. 17  Ehe lẹzun yinyọnẹn na mẹlẹpo, yèdọ Ju lẹ po Glẹkinu lẹ po he nọ nọ̀ Efesu; obu sọ jẹ yemẹpo ji, oyín Oklunọ Jesu tọn sọ to yinyin gigopana zọnmii. 18  Podọ mẹsusu he ko lẹzun yisenọ lẹ nọ wá bo nọ yigbe ylando yetọn lẹ tọn bosọ nọ dọ nuhe yé wà lẹ to gbangba. 19  Na nugbo tọn, susu mẹhe yin nujlẹtọ lẹ tọn bẹ owe yetọn lẹ pli bo mẹ̀n yé to mẹlẹpo nukọn. Yé sọ lẹn akuẹ yetọn dopọ bo mọdọ e yì fataka-kuẹ fọtọ́n donu kandeao. 20  Enẹwutu, ohó Jehovah tọn to whinwhẹ́n deji bo to gbigbayipe to aliho huhlọnnọ de mẹ. 21  Todin, to whenue onú ehelẹ ko yin tadona, Paulu lẹn to ayiha etọn mẹ dọ, to Makedonia po Akaia po yìyì godo, e na zingbejizọnlin yì Jelusalẹm, bo dọmọ: “Eyin yẹn jẹ dọ́n, yẹn sọ dona yì Lomu ga.” 22  Enẹwutu, e do awe to mẹhe nọ yilizọn na ẹn lẹ mẹ hlan Makedonia, yèdọ Timoti po Elastu po, ṣigba ewọ lọsu gbọṣi agbegbe Asia tọn ji na ojlẹ de. 23  To ojlẹ enẹ dopolọ mẹ, bẹwlu sinsinyẹn de fọ́n gando Aliho Lọ* go. 24  Na dawe de he nọ yin Demetliu, ayátọ fataka tọn de, gbọn fataka tẹmpli pẹvi Altemis* tọn bibasi dali hẹn ale susu wá na alọnuzọ́nwatọ lẹ; 25  ewọ sọ bẹ yewlẹ po mẹhe nọ wà azọ́n mọnkọtọn lẹ po pli bo dọmọ: “Mì gbẹtọ lẹ emi, mì yọnẹn ganji dọ gbọn azọ́n ehe gblamẹ wẹ mí lẹzun adọkunnọ. 26  Mọdopolọ, mì mọ bosọ sè lehe Paulu ehe ko diọlinlẹnna gbẹtọ susugege bo lẹ́ yé hlan linlẹn devo kọ̀n do, e ma yin to Efesu kẹdẹ ṣigba diblayin to agbegbe Asia tọn lẹpo ji, gbọn didọ dali dọ nuhe yè yí alọ do basi lẹ ma yin yẹwhe lẹ gba. 27  Humọ, owù lọ ma yindọ agbasazọ́n mítọn ehe na yin vọdona kẹdẹ gba, ṣigba dọ tẹmpli yẹwhe-yọnnu daho Altemis* tọn nasọ yin pinpọn di onú ovọ́ ga podọ gigo daho etọn ga ehe agbegbe Asia tọn pete gọna mẹhe nọ nọ̀ aigba ji lẹ nọ sẹ̀n na wá yin hinhẹn zun ovọ́.” 28  To whenue sunnu lọ lẹ sè ehe bo gọ́ na homẹgble, yé jẹ awhádo ji, bo to didọmọ: “Daho wẹ Altemis* Efesunu lẹ tọn!” 29  Enẹwutu, tòdaho lọ gọ́ na bẹwlu, podọ yemẹpo to pọmẹ wọ̀ biọ nupọntẹn lọ, bo yí huhlọn do plan Gaiu po Alistaku po hẹn, yèdọ Makedonianu lọ lẹ he yin tomẹyitọ hatọ Paulu tọn lẹ. 30  Na ewọ tọn, Paulu to jijlo nado biọ họmẹ yì gbẹtọ lẹ dè, ṣigba devi lẹ ma dike na ẹn. 31  Etlẹ yin delẹ to mẹhe nọ deanana hùnwhẹ lẹ po aihun lẹ po, he ko jihọntọn hẹ ẹ lẹ mẹ, dowẹn hlan ẹn bo jẹ vivẹ ẹ ji ma nado ze ogbẹ̀ etọn do owù mẹ gbọn nupọntẹn lọ yìyì dali. 32  Nugbo lọ wẹ yindọ mẹdelẹ to awhádo bo to onú de dọ bọ mẹdevo lẹ to onú devo dọ; na pipli lọ tin to bẹwlu mẹ, suhugan yetọn masọ yọ́n whẹwhinwhẹ́n he wutu yé do pli dopọ. 33  Enẹwutu, to pọmẹ, yé plan Alẹkzandle sọn gbẹtọgun lọ mẹ, bọ Ju lẹ to sisẹsisẹ ẹ hlan nukọn; Alẹkzandle sọ mìalọ bo to jijlo nado yiavunlọna ede to gbẹtọ lọ lẹ nukọn. 34  Ṣigba, to whenuena yé yọnẹn dọ Ju de wẹ ewọ, awhá de fọ́n sọn yemẹpo ṣẹnṣẹn bọ yé to awhádo na nudi gànhiho awe dọmọ: “Daho wẹ Altemis* Efesunu lẹ tọn!” 35  To godo mẹ, to whenue tòwekantọ* lọ ko hẹn gbẹtọgun lọ nabọẹ, e dọmọ: “Mì omẹ Efesu tọn lẹ emi, na nugbo tọn, mẹnu wẹ tin to gbẹtọvi lẹ mẹ he ma yọnẹn dọ tòdaho Efesu tọn wẹ nọ ṣọ́ tẹmpli Altemis* daho lọ tọn po boṣiọ he flẹ sọn olọn lọ tọn po? 36  Enẹwutu, to whenue onú ehelẹ ma sọgan yin gbigbẹdai, e jẹ dọ mí ni nabọẹ bo ma yinuwa po sọmawhe po blo. 37  Na mì ko hẹn dawe ehelẹ he ma yin ajotọ tẹmpli mẹ tọn lẹ kavi nùzantọ do yẹwhe-yọnnu mítọn go wá. 38  Enẹwutu, eyin Demetliu po alọnuzọ́nwatọ he topọ hẹ ẹ lẹ po tindo owhẹ̀ de sọta mẹde, azán whẹdidọ tọn lẹ tin podọ ayimatẹn-gán lẹ tin; mì gbọ yé ni hẹn owhẹ̀ he yé tindo sọta ode awetọ lẹ wá. 39  Nalete, eyin mì to onú de dín hú enẹ, pipli paa he sọgbe hẹ osẹ́n de whenu wẹ yè dona magbe do enẹ ji. 40  Na nugbo tọn, mí tin to owù mẹ nado yin owhẹ̀ gufinfọn tọn sadokọna gando whẹho egbehe tọn go, whẹwhinwhẹ́n depope ma tin he mí na yí do suwhẹna bẹwlu gbẹtọgun zingidinọ ehe tọn.” 41  Podọ to whenue e ko dọ onú ehelẹ, e gbà mẹplidopọ lọ do.

Nudọnamẹ Odò Tọn

Ow 19:9* Pọ́n Ow 9:2, nudọnamẹ odò tọn.
Ow 19:23* Pọ́n Ow 9:2, nudọnamẹ odò tọn.
Ow 19:24* Kavi, “Diana.”
Ow 19:27* Pọ́n wefọ 24, nudọnamẹ odò tọn.
Ow 19:28* Pọ́n wefọ 24, nudọnamẹ odò tọn.
Ow 19:34* Pọ́n wefọ 24, nudọnamẹ odò tọn.
Ow 19:35* Gl.: glammatẹus. To gandudu agbegbe tọn he yin tòdaho he to yedekannu to Asia Pẹvi mẹ to Ahọluigba Lomu tọn glọ lẹ mẹ, tòwekantọ lọ yin ahọluzọnwatọ nukundeji hugan lọ.
Ow 19:35* Pọ́n wefọ 24, nudọnamẹ odò tọn.