Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 18:1-28

18  To onú ehelẹ godo, e tọ́n sọn Atẹni bo wá Kọlinti.  Ewọ sọ mọ Ju de he nọ yin Akuila, he yin Pọntu-vi jiji he wá sọn Itali to agọe, po Pliskila asi etọn po, na Klaudiu ko degbena Ju lẹpo nado tọ́n sọn Lomu wutu. Enẹwutu, e yì yé dè  podọ na yé yin azọ́n dopolọ watọ wutu, e nọ owhé yetọn gbè, bọ yé wazọ́n, na gòhọ-gbátọ lẹ wẹ yé.  Ṣigba, e nọ dọ togunmẹho to sinagọgu mẹ to gbọjẹzangbe lẹpo bo nọ diọlinlẹnna Ju lẹ po Glẹkinu lẹ po.  Todin, to whenue Sila po Timoti po jẹte wá sọn Makedonia, Paulu jẹ alọnu etọn hẹn ján ji petepete to ohó lọ didọ mẹ, bo to kunnude na Ju lẹ nado dohia dọ Jesu wẹ Klisti lọ.  Ṣigba, to whenue yé zindonukọn nado to nukundiọsọ ẹ bo to zùnzùn in, e húnhún awù etọn lẹ bo dọna yé dọmọ: “Ohùn mìtọn ni nọ okọ̀ na mì. Okọ̀ ṣie wé. Sọn din sọyi, yẹn na yì omẹ akọta lẹ tọn dè.”  Enẹwutu, e sẹtẹn sọn finẹ bo yì owhé dawe de he nọ yin Titiu Justu tọn gbè, yèdọ Jiwheyẹwhe sẹ̀ntọ de, mẹhe owhé etọn bọdo sinagọgu lọ go.  Ṣigba, Klispu he yin ogán sinagọgu tọn lẹzun yisenọ to Oklunọ mẹ gọna whédo etọn lẹpo. Susu Kọlintinu lẹ tọn he sè sọ yise bo yin bibaptizi.  Humọ, Oklunọ dọna Paulu to numimọ de mẹ to zánmẹ dọmọ: “A dibu blo, ṣigba zindonukọn nado to hodọ, a sọ nabọẹ blo, 10  na yẹn tin hẹ we podọ mẹdepope ma na yangbé towe nado gbleawuna we; na yẹn gbẹ́ tindo omẹ susu to tòdaho ehe mẹ.” 11  Enẹwutu, e gbọṣi finẹ na owhe dopo po osun ṣidopo po, bo to ohó Jiwheyẹwhe tọn plọnmẹ to ṣẹnṣẹn yetọn. 12  Todin, to ojlẹ he mẹ Galio yin ayimatẹn-gán Akaia tọn, Ju lẹ fọ́n do Paulu ji to pọmẹ bo plan ẹn yì whẹdaján nukọn, 13  bo dọmọ: “Dawe ehe to linlẹndiọna gbẹtọ lẹ nado sẹ̀n Jiwheyẹwhe to aliho he jẹagọdo osẹ́n otò lọ tọn mẹ.” 14  Ṣigba, dile Paulu jlo na dọho, Galio dọna Ju lẹ dọmọ: “Mì Ju lẹ emi, na nugbo tọn, eyin oylan de kavi walọ ylankan okà tọn de wẹ, yẹn na ko tindo whẹwhinwhẹ́n lọ nado dotoaina mì po sọwhiwhe po. 15  Ṣigba, eyin nudindọn lẹ gando hodidọ, oyín lẹ po osẹ́n po to mì ṣẹnṣẹn go wẹ, mìlọsu ni penukundego. Yẹn ma jlo na yin whẹdatọ onú ehelẹ tọn gba.” 16  Enẹwutu, e yàn yé sọn whẹdaján lọ nukọn. 17  To whenẹnu, yemẹpo wle Sọstene, ogán sinagọgu tọn lọ bo jẹ hihò e ji to whẹdaján lọ nukọn. Ṣigba, Galio ma kẹnù do onú ehelẹ mẹ paali. 18  Ṣigba, to whenue Paulu ko nọ finẹ na azán delẹ dogọ, e dọ e yì whedenu na mẹmẹsunnu lẹ bo dó tọjihun dedo Silia, Pliskila po Akuila po sọ yì hẹ ẹ. E sọ pà oda etọn yìdo to Kẹnklea, na ewọ ko dopà de wutu. 19  Enẹwutu, yé jẹ Efesu, ewọ sọ jo yé do finẹ; ṣigba ewọ biọ sinagọgu mẹ bo yihojlẹdohogo hẹ Ju lẹ. 20  Dile yé tlẹ to bibiọ to e si mapote nado gbọṣi finẹ hugan mọ, e ma yigbe 21  ṣigba e dọ e yì whedenu bo dọna yé dọmọ: “Yẹn na vọ́ lẹkọwa mì dè, eyin Jehovah jlo.” E sọ súnhún sọn Efesu 22  bo jẹte wá Sesalea. E sọ hẹji yì Jelusalẹm bo dọnudo agun lọ, bosọ jẹte yì Antioku. 23  Podọ to whenue e ko nọ finẹ na ojlẹ de, e tọ́n sọn finẹ bo nọ yì sọn fide jẹ fide to otò Galatia po Fligia po tọn mẹ, bosọ nọ to devi lẹpo hẹn lodo. 24  Todin, Ju de he nọ yin Apolo, Alẹkzandli-vi jiji de, yèdọ dawe de he didẹ́, wá Efesu; ewọ sọ yọ́n Owe-wiwe lẹ ganji. 25  Dawe ehe wẹ yè ko yí onù do plọn aliho Jehovah tọn podọ, na e hunzo to gbigbọ-liho wutu, e to hodọ bo to mẹplọn to aliho he sọgbe mẹ gando Jesu go, ṣigba baptẹm Johanu tọn kẹdẹ wẹ e jẹakọ hẹ. 26  Dawe ehe sọ jẹ hodọ ji po adọgbigbo po to sinagọgu mẹ. To whenue Pliskila po Akuila po sè ohó etọn, yé dọ̀n ẹn do ogbẹ́ mẹ bo hẹn aliho Jiwheyẹwhe tọn họnwun na ẹn to aliho he sọgbe mẹ dogọ. 27  Humọ, na e to jijlo nado yì Akaia wutu, mẹmẹsunnu lẹ kanwehlan devi lẹ, bo dotuhomẹna yé nado yí i po homẹdagbe po. Enẹwutu, to whenue e jẹ dọ́n, e gọalọ tlala na mẹhe ko yise na nukundagbe majẹhẹ Jiwheyẹwhe tọn wutu lẹ; 28  na e yí zohunhun do dohia hezeheze to gbangba dọ owhẹ̀ Ju lẹ tọn ma whẹ́n, dile e yí Owe-wiwe lẹ do dohia dọ Jesu wẹ Klisti lọ.

Nudọnamẹ Odò Tọn