Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 17:1-34

17  Todin, yé zingbejizọnlin gbọn Amfipoli po Apolonia po bo wá Tẹsalonika, fie sinagọgu Ju lẹ tọn de te.  Enẹwutu, dile e ko yin aṣa Paulu tọn do, e biọ họmẹ yì yé dè, bo to hoyijlẹdohogo hẹ yé sọn Owe-wiwe lẹ mẹ na gbọjẹzan atọ̀n,  bo to zẹẹmẹ basi bosọ to didohia gbọn alọdlẹndonu lẹ dali dọ dandan wẹ dọ Klisti ni jiya bo fọ́n sọn oṣiọ lẹ mẹ, bosọ to didọmọ: “Ehe wẹ Klisti lọ, Jesu ehe, yèdọ mẹhe yẹn to lilá na mì.”  Taidi kọdetọn de, delẹ to yé mẹ lẹzun yisenọ bo kọnawudopọ hẹ Paulu po Sila po, podọ gbẹtọgun daho Glẹkinu lẹ tọn he nọ sẹ̀n Jiwheyẹwhe po yọnnu nukundeji susu po sọ wàmọ ga.  Ṣigba, na Ju lẹ jẹ awuwhàn ji wutu, yé dọ̀n mẹylankan delẹ dogọ yede sọn nuvọ́nọ ahimẹ tọn lẹ mẹ bo wleawuna gbẹtọgun zingidinọ de bosọ jẹ bẹwlu hẹnwa tòdaho lọ mẹ ji. Yé sọ biọ owhé Jasoni tọn gbè gánnugánnu bo to yé dín nado dọ̀n yé wá gbẹtọgun he to bẹwlu mẹ lọ dè.  To whenue yé ma mọ yé, yé dọ̀n Jasoni po mẹmẹsunnu delẹ po wá ogán tòdaho tọn lẹ dè, bo to awhádo dọmọ: “Omẹ ehelẹ he ko sọtadona aigba lọ tin tofi ga,  Jasoni ko sọ yí yé po gbigbọ johẹmẹ tọn po. Omẹ ehe lẹpo sọ nọ yinuwa jẹagọdo gbedide Sesali tọn lẹ, bo nọ dọ dọ ahọlu devo de tin, yèdọ Jesu.”  Na nugbo tọn, yé hẹn gbẹtọgun lọ po ogán tòdaho tọn lẹ po he sè onú ehelẹ biọ bẹwlu mẹ;  to whenue yé ko sọ yí akuẹ mẹtundote tọn he pé sọn Jasoni po mẹhe pò lẹ po si, yé tún yé dote. 10  To afọdopolọji, mẹmẹsunnu lẹ do Paulu po Sila po hlan Belea to zánmẹ, podọ to whenue yé jẹ dọ́n, yé biọ sinagọgu Ju lẹ tọn mẹ. 11  Todin, omẹ ehelẹ yin ayiha dagbenọ hú omẹ Tẹsalonika tọn lẹ, na yé yí jeje daho tlala do kẹalọyi ohó lọ, bo nọ yí sọwhiwhe do gbadopọnna Owe-wiwe lẹ egbesọegbesọ nado pọ́n eyin onú ehelẹ yinmọ. 12  Enẹwutu, susu to yé mẹ lẹzun yisenọ, podọ yọnnu Glẹkinu nukundeji susu gọna sunnu lẹ wàmọ ga. 13  Ṣigba, to whenue Ju Tẹsalonika tọn lẹ sè dọ Paulu ko lá ohó Jiwheyẹwhe tọn to Belea ga, yé wá finẹ ga bo hẹn agundaho lọ fọnadán bosọ hẹn bẹwlu wá. 14  To whenẹnu, mẹmẹsunnu lẹ do Paulu hlan to afọdopolọji nado yì kaka ohù lọ tó; ṣigba Sila po Timoti po gbọṣi finẹ. 15  Ṣigba, mẹhe plan Paulu lẹ hodo e kaka wá Atẹni podọ, to whenue e ko dowẹn yé nado do Sila po Timoti po dọ yé ni yawu wá e dè dile e sọgan yọnbasi do godo, yé yì. 16  Todin, dile Paulu to tenọpọn yé to Atẹni, adi do e to whenue e mọdọ tòdaho lọ gọ́ na boṣiọ lẹ. 17  Enẹwutu, e jẹ hoyijlẹdohogo ji to sinagọgu mẹ hẹ Ju lẹ po mẹdevo lẹ po he nọ sẹ̀n Jiwheyẹwhe podọ egbesọegbesọ to ahimẹ hẹ mẹhe e mọ to finẹ lẹ. 18  Ṣigba, mẹdelẹ he yin tamẹnuplọnmẹtọ Epikule* tọn lẹ po Stoiki* tọn lẹ po jẹ núdọ̀n hẹ ẹ ji, mẹdelẹ sọ nọ dọmọ: “Etẹwẹ hówladọtọ ehe jlo na dọ?” Mẹdevo lẹ nọ dọmọ: “E taidi dọ lilatọ yẹwhe jonọ lẹ tọn de wẹ ewọ.” Ehe yinmọ na e to wẹndagbe Jesu tọn po fọnsọnku po lá wutu. 19  Enẹwutu, yé wle e bo plan ẹn yì Aleopagu,* bo dọmọ: “Be mí sọgan yọ́n nuhe nuplọnmẹ yọyọ he hiẹ to ohó etọn dọ ehe yin ya? 20  Na hiẹ to nuhe otó mítọn lẹ ma ko sè pọ́n lẹ dọ. Enẹwutu, mí jlo nado yọ́n nuhe onú ehelẹ zẹẹmẹdo.” 21  Na nugbo tọn, Atẹninu po jonọ he to finẹ lẹpo po ma nọ yí whenu he vò na yé lẹ zan na nudevo depope adavo nado nọ to didọ kavi to todoaina onú yọyọ lẹ. 22  Todin, Paulu ṣite to Aleopagu lọ ṣẹnṣẹn bo dọmọ: “Mì omẹ Atẹni tọn lẹ emi, yẹn doayi e go dọ to onú lẹpo mẹ, e taidi dọ mì nọ dibusi yẹwhe lẹ hú lehe mẹdevo lẹ nọ basi do. 23  Di apajlẹ, dile yẹn juwajei bo yí sọwhiwhe do to numẹsẹ̀n mìtọn lẹ pọ́n, yẹn doayi agbà de go ga ehe ji yè kàn do dọ ‘Hlan Jiwheyẹwhe Mayọnẹn de.’ Enẹwutu, nuhe mìwlẹ to mìde zejo na to mayọnẹn mẹ, ehe wẹ yẹn to lilá na mì. 24  Jiwheyẹwhe he basi aihọn po nuhe tin to e mẹ lẹpo po, yèdọ Ewọ lọ, he yin Oklunọ olọn po aigba po tọn ma nọ nọ̀ tẹmpli he yè yí alọ do basi lẹ mẹ gba, 25  mọdopolọ, alọ gbẹtọvi tọn lẹ ma nọ wadevizọn na ẹn taidi dọ e tindo nuhudo nudepope tọn, na ewọ lọsu wẹ nọ na gbẹtọ lẹpo ogbẹ̀, gbọfufu po onú lẹpo po. 26  Ewọ sọ hẹn akọta gbẹtọ tọn lẹpo wá sọn omẹ dopo mẹ, nado nọ nọ̀ nukunmẹ aigba tọn pete ji, ewọ sọ de ojlẹ dide lẹ bosọ na dogbó fininọ tọn gbẹtọ lẹ, 27  na yé nido dín Jiwheyẹwhe, eyin yé sọgan dín in vẹkuvẹku bo mọ ẹn nugbonugbo, dile etlẹ yindọ, na nugbo tọn, ewọ ma dẹn do dopodopo mítọn. 28  Na gbọn ewọ dali wẹ mí tindo ogbẹ̀ bo nọ yì bosọ tin, yèdọ kẹdẹdile delẹ to ohó milomilo-kàntọ he to ṣẹnṣẹn mìtọn lẹ ko dọ do dọ, ‘Na ovi etọn wẹ míwlẹ yin ga.’ 29  “Enẹwutu, to whenue e yindọ ovi Jiwheyẹwhe tọn wẹ mí, mí ma dona lẹndọ Jiwheyẹwhe taidi sika kavi fataka kavi zannu, yèdọ taidi nude he yè yí alọ do basi gbọn anazọ́n po ayikinkan gbẹtọ tọn po dali gba. 30  Na nugbo tọn, Jiwheyẹwhe ko de nukun sọn ojlẹ wunvi tọn enẹlẹ go, ṣogan, todin ewọ to didọna gbẹtọvi lẹ dọ yemẹpo dona lẹnvọjọ to filẹpo. 31  Na e ko de azán de he gbè e lẹn nado dawhẹna mẹhe nọ nọ̀ aigba ji lẹ to dodo mẹ gbọn dawe de he e ko de dali, e ko sọ na jide gbẹtọ lẹpo to enẹ mẹ dọ e ko fọ́n ẹn sọn oṣiọ lẹ mẹ.” 32  Todin, to whenue yé sè dogbọn fọnsọnku oṣiọ lẹ tọn dali, delẹ to yé mẹ jẹ mẹṣanko ji, bọ mẹdevo lẹ sọ to didọmọ: “Mí nasọ vọ́ sè ehe sọn dè we to whedevonu.” 33  Enẹwutu, Paulu tọ́n sọn ṣẹnṣẹn yetọn, 34  ṣigba sunnu delẹ kọnawudopọ hẹ yé bo lẹzun yisenọ, delẹ to yé mẹ sọ wẹ Dionisiu, whẹdatọ de to whẹdatẹn Aleopagu tọn, podọ yọnnu de he nọ yin Damali, mẹdevo lẹ sọ gọna yé.

Nudọnamẹ Odò Tọn

Ow 17:18* Pipli de he nọ hodo tamẹnuplọnmẹtọ Epikule bo nọ dọ dọ gbẹtọ lẹ dona pò na gbẹdudu kẹdẹ to gbẹ̀mẹ.
Ow 17:18* Pipli de he nọ hodo tamẹnuplọnmẹtọ Zeno bo nọ dọ dọ gbẹtọ lẹ dona nọgbẹ̀ sọgbe hẹ lẹnpọn dagbe poun bo ma dona nọ kiya na awufiẹsa po ayajẹ po.
Ow 17:19* Enẹ wẹ, pópló de to Atẹni hohowhenu tọn, ehe ji hagbẹ whẹdatẹn daho hugan lọ tọn lẹ sọ nọ pli do ga.