Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 16:1-40

16  Enẹwutu, e wá Delbe podọ Listla ga. Podọ, pọ́n! devi de tin to finẹ he nọ yin Timoti, visunnu nawe Juvi yisenọ de tọn, ṣigba otọ́ etọn yin Glẹkinu de,  podọ mẹmẹsunnu he to Listla po Ikonioni po lẹ nọ dekunnu etọn dagbe.  Paulu do ojlo hia nado hẹn ewọ sọyi, e sọ plan ẹn bo gboadà na ẹn na Ju he tin to ofi enẹlẹ wutu, na yemẹpo wẹ yọnẹn dọ Glẹkinu de wẹ otọ́ etọn.  Todin, dile yé to gbejizọnlinzin gbọn tòdaho lọ lẹ mẹ, yé nọ dọ gbèta he kọ̀n apọsteli lẹ po sunnu mẹho he to Jelusalẹm lẹ po ko wá na mẹhe tin to finẹ lẹ, na yé nido nọ setonuna.  Enẹwutu, na nugbo tọn, agun lẹ to yinyin hinhẹn lodo zọnmii bo to jijideji to sọha mẹ egbesọegbesọ.  Humọ, yé jugbọn Fligia po otò Galatia tọn po mẹ, na gbigbọ wiwe gbẹ́ na yé ma nado dọ ohó lọ to agbegbe Asia tọn ji.  Mọdopolọ, to whenue yé wá Misia, yé dovivẹnu nado yì Bitinia, ṣigba gbigbọ Jesu tọn ma dike na yé.  Enẹwutu, yé jugbọn Misia bo wá Tloa.  Paulu sọ mọ numimọ de to zánmẹ: dawe Makedonianu de to ote bo to vivẹ ẹ bosọ to didọmọ: “Wá Makedonia bo gọalọna mí.” 10  Todin, tlolo he e mọ numimọ lọ, mí wleali nado yì Makedonia, na mí mọdọ Jiwheyẹwhe wẹ ko ylọ mí nado lá wẹndagbe lọ na yé. 11  Enẹwutu, mí súnhún sọn Tloa bo zọ̀n tlọlọ wá Samotlaki, ṣigba to aihọngbè, mí yì Neapoli, 12  podọ sọn finẹ mí yì Filippi, yèdọ tòdaho he tin to Lomu glọ, he yin tòdaho nukundeji agbegbe Makedonia tọn lọ. Mí gbọṣi tòdaho enẹ mẹ na azán delẹ. 13  Podọ to gbọjẹzangbe, mí tọ́nyi gbonu họngbo lọ tọn to tọ̀sisa de tó, fihe mí lẹndọ e yin nọtẹn dẹ̀hiho tọn de; mí sọ sinai bo jẹ hodọna yọnnu he ko pli do finẹ lẹ ji. 14  Podọ yọnnu de he nọ yin Lidia, sopẹ́-vọ̀ sàtọ de, he wá sọn tòdaho Tiatila tọn mẹ, bo nọ sẹ̀n Jiwheyẹwhe to todoai, Jehovah sọ hùn ahun etọn nado na ayidonugo nuhe dọ Paulu te lẹ. 15  Todin, to whenue ewọ po whédo etọn po ko yin bibaptizi, e vẹvẹ dọmọ: “Eyin mìwlẹ mọdọ yẹn yin nugbonọ na Jehovah, mì biọ owhé ṣie gbè bo nọ finẹ.” E sọ vẹ̀ mí nado wá. 16  Podọ to whenue mí jei fie yè nọ hodẹ̀ te, deviyọnnu de he tindo gbigbọ aovi dọṣẹdidọ tọn de pé mí. E ko nọ hẹn ale susu wá na ogán etọn lẹ gbọn azọ́n dọdai didọ tọn dali. 17  Viyọnnu ehe to hihodo Paulu po mí po mapote bo nọ to awhádo dọmọ: “Afanumẹ Jiwheyẹwhe Gigogán lọ tọn lẹ wẹ dawe ehelẹ, mẹhe to aliho whlẹngán tọn lọ lá na mì.” 18  E to ehe wà na azán susu. To godo mẹ, agbọ́ etọn pé Paulu bọ e lẹ́ bo dọna gbigbọ lọ dọmọ: “Yẹn degbè do we to oyín Jesu Klisti tọn mẹ nado tọ́njẹgbonu sọn ewọ mẹ.” E sọ tọ́njẹgbonu to gànhiho enẹ mẹ. 19  Todin, to whenue ogán etọn lẹ mọdọ todido ale yetọn tọn ko yì, yé wle Paulu po Sila po bo dọ̀n yé yì ogán lẹ dè to ahimẹ, 20  podọ, to whenue yé dọ̀n yé yì ogán otò tọn lẹ dè, yé dọmọ: “Dawe he yin Ju ehelẹ to bẹwlu hẹnwa tòdaho mítọn mẹ taun, 21  yé sọ to lilá na mí nado kẹalọyi kavi payi aṣa he ma sọgbe hẹ osẹ́n lẹ go, dile yé tlẹ yọnẹn dọ Lomunu lẹ wẹ mí.” 22  Gbẹtọgun lọ sọ fọ́n do yé ji to pọmẹ; podọ to whenue ogán otò tọn lẹ ko tlẹ́n awugbó yetọn lẹ sọn yé go, yé degbè dọ yè ni yí opò do hò yé. 23  To whenue yé ko linú yé whlasusu godo, yé ze yé dlan gànpamẹ, bo degbena gàntọ-ṣọ́tọ lọ nado nọ ṣọ́ yé ganji. 24  Na e mọ gbedide mọnkọtọn yí wutu, e ze yé dlan gànpa ṣẹnṣẹn tọn lọ mẹ bo bẹ afọ yetọn lẹ do osópò lẹ mẹ. 25  Ṣigba, to nudi zángbodawe mẹ, Paulu po Sila po to dẹ̀ho bo yí ohàn do to Jiwheyẹwhe pà; mọwẹ, gàntọ lẹ to ogbè yetọn sè. 26  To ajiji mẹ, aigba sisọsisọ daho de jọ, sọmọ bọ dodonu gànpa lọ tọn lẹ whàn. Humọ, ohọ̀n lọ lẹpo hùn to afọdopolọji, gẹdẹ yemẹpo tọn sọ wẹ́n. 27  To whenue gàntọ-ṣọ́tọ lọ fọ́n sọn amlọn mẹ bo mọ ohọ̀n gànpa lọ tọn lẹ to hùnhùn, e dọ̀n ohí etọn sún bo jlo na hù ede, na e lẹndọ gàntọ lọ lẹ ko họnyi. 28  Ṣigba, Paulu yí ogbè lélé do dawhá, bo dọmọ: “A gbleawuna dewe blo, na mímẹpo tofi!” 29  Enẹwutu, e biọ miyọ́ngbán bo lọ́n biọ họmẹ podọ, na obu jẹ e ji wutu, e jẹklo to Paulu po Sila po nukọn. 30  E sọ plan yé jẹgbonu bo dọmọ: “Mẹdaho lẹ emi, etẹwẹ yẹn dona wà nado yin whinwhlẹngán?” 31  Yé dọmọ: “Yise to Oklunọ Jesu mẹ podọ hiẹ na yin whinwhlẹngán, hiẹ po whédo towe po.” 32  Yé sọ dọ ohó Jehovah tọn na ewọ po mẹhe tin to owhé etọn gbè lẹpo po. 33  Ewọ sọ plan yé to gànhiho ozán lọ tọn enẹ mẹ bo klọ́ bápa yetọn lẹ; ewọ po omẹ etọn lẹpo po sọ yin bibaptizi matin gbàndindọn. 34  E sọ plan yé wá owhé etọn gbè bo bẹ núdùdù do tafo ji na yé, ewọ sọ jaya tlala hẹ whédo etọn pete todin he e ko yise to Jiwheyẹwhe mẹ. 35  To aihọngbè, ogán otò tọn lẹ do ponọ-zọ́nwatọ lẹ hlan nado yì bo dọ: “Tún dawe enẹlẹ dote.” 36  Enẹwutu, gàntọ-ṣọ́tọ lọ dọ nuhe yé dọ lẹ na Paulu dọmọ: “Ogán otò tọn lẹ ko domẹhlan dọ mì omẹ awe lẹ ni yin tuntundote. Enẹwutu, todin, mì tọ́n bo yì to jijọho mẹ.” 37  Ṣigba, Paulu dọna yé dọmọ: “Yé hò mí to gbangba matin whẹgbledomẹ, míwlẹ he yin Lomunu lẹ, bo ze mí dlan gànpamẹ; podọ todin be túntún mí dote to nuglọ wẹ yé te ya? Gbede pọ́n! ṣigba, gbọ yelọsu ni wá bo de mí tọ́n.” 38  Enẹwutu, ponọ-zọ́nwatọ lọ lẹ dọ onú ehelẹ na ogán otò tọn lẹ. Obu sọ di yé to whenue yé sè dọ dawe lọ lẹ yin Lomunu lẹ. 39  Enẹwutu, yé wá bo vẹ̀ yé podọ, to whenue yé de yé tọ́n, yé biọ to yé si nado tọ́n sọn tòdaho lọ mẹ. 40  Ṣigba, yé tọ́n sọn gànpa lọ mẹ bo yì owhé Lidia tọn gbè, podọ to whenue yé mọ mẹmẹsunnu lẹ, yé na tuli yé bosọ yì.

Nudọnamẹ Odò Tọn