Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 15:1-41

15  Podọ sunnu delẹ wá sọn Jude bo jẹ mẹmẹsunnu lẹ plọn ji dọmọ: “Eyin mìwlẹ ma gboadà sọgbe hẹ aṣa Mose tọn, mì ma sọgan yin whinwhlẹngán.”  Ṣigba, to whenue Paulu po Balnaba po ko tindo gbemanọpọ po nudindọn sinsinyẹn de po hẹ yé, tito yin bibasina Paulu po Balnaba po gọna delẹ to yé mẹ nado hẹji yì apọsteli po sunnu mẹho lẹ po dè to Jelusalẹm gando nudindọn ehe go.  Enẹwutu, to whenue agun lọ ko yìn yé vude to gbejizọnlin yetọn mẹ, sunnu ehelẹ zindonukọn to gbejizọnlin yetọn mẹ yì Fenike po Samalia po, bo to zẹẹmẹ basi to gigọ́ mẹ lehe omẹ akọta lẹ tọn to lilẹhlan Jiwheyẹwhe dè do, yé sọ to ayajẹ daho hẹnwa na mẹmẹsunnu lẹpo.  To whenue yé jẹ Jelusalẹm, agun lọ po apọsteli lẹ po gọna sunnu mẹho lẹ yí yé po homẹdagbe po, yé sọ na linlin onú susu he Jiwheyẹwhe ko basi gbọn yé gblamẹ lẹ tọn.  Ṣogan, delẹ to hagbẹ sinsẹ̀n klandovo Falesi lẹ tọn mẹ he ko yise lẹ fọnṣite sọn aisinnu yetọn lẹ ji bo dọmọ: “Dandan wẹ dọ yè ni gboadà na yé bo degbena yé nado yìn osẹ́n Mose tọn.”  Apọsteli lẹ po sunnu mẹho lẹ po sọ pli dopọ nado dọhodo whẹho ehe ji.  Todin, to whenue yé ko tindo hodọdopọ susu, Pita fọ́n bo dọna yé dọmọ: “Mì mẹmẹsunnu lẹ emi, mì yọnẹn ganji dọ Jiwheyẹwhe ko de mi to ṣẹnṣẹn mìtọn sọn bẹjẹeji na omẹ akọta lẹ tọn nido sè ohó wẹndagbe lọ tọn sọn onù ṣie mẹ bo yise;  podọ Jiwheyẹwhe, mẹhe nọ yọ́n ahun, dekunnu gbọn gbigbọ wiwe lọ nina yé dali, kẹdẹdile e basi na mílọsu do ga.  Ewọ masọ do vogbingbọn depope hia to míwlẹ po yé po ṣẹnṣẹn, ṣigba e lẹ̀ ahun yetọn wé gbọn yise yetọn dali. 10  Enẹwutu, todin, naegbọn mì do to Jiwheyẹwhe whlepọn gbọn zẹgẹ he tọgbo mítọn lẹ kavi mílọsu ma penugo nado hẹn lẹ zizedo kọ̀ji na devi lẹ dali? 11  To vogbingbọn mẹ, mí deji dọ mí na yin whinwhlẹngán gbọn nukundagbe majẹhẹ Oklunọ Jesu tọn gblamẹ kẹdẹdi omẹ enẹlẹ lọsu ga.” 12  To whenẹnu, gbẹtọgun lọ pete nabọẹ, yé sọ jẹ todoaina Balnaba po Paulu po ji dile yé to linlin ohia po nudabla susu he Jiwheyẹwhe ko basi gbọn yé gblamẹ to akọta lẹ ṣẹnṣẹn lẹ tọn na. 13  Dile yé doalọtena hodidọ, Jakọbu gblọn dọmọ: “Mì mẹmẹsunnu lẹ emi, mì sè ohó ṣie. 14  Simeọni ko basi zẹẹmẹ hezeheze gando lehe Jiwheyẹwhe to tintan whenu lẹ́ ayidonugo etọn hlan akọta lẹ nado de gbẹtọ lẹ sọn yé mẹ na oyín etọn do go. 15  Podọ ohó Yẹwhegán lẹ tọn sọgbe hẹ ehe, kẹdẹdile e ko yin kinkàndai do dọ, 16  ‘To onú ehelẹ godo, yẹn na lẹkọwa bo na vọ́ gòhọ Davidi tọn he ko họ́jai lọ gbá; podọ yẹn na vọ́ gbakija etọn lẹ gbá bo na vọ́ ẹ jlọ dote, 17  na pipotọ gbẹtọ lọ lẹ tọn nido sọgan dín Jehovah vẹkuvẹku, to pọmẹ hẹ gbẹtọ akọta lẹpo tọn, he nọ yin yiylọ gbọn oyín ṣie dali lẹ, wẹ Jehovah dọ, mẹhe to onú ehelẹ basi, 18  he yin yinyọnẹn sọn hohowhenu.’ 19  Enẹwutu, nuhe yẹn lẹn wẹ yindọ mí ni ma dotukla omẹ akọta lẹ tọn he to lilẹhlan Jiwheyẹwhe dè lẹ blo, 20  ṣigba nado kanwehlan yé nado nọla na nuhe yin hinhẹnflu gbọn boṣiọ lẹ dali lẹ podọ na galilọ podọ na nuhe yin kọslona hù lẹ* podọ na ohùn. 21  Na sọn ojlẹ hohowhenu tọn lẹ mẹ wẹ kandai Mose tọn lẹ ko tindo mẹhe to yẹwheho yetọn dọ to tòdaho de mẹ jẹ tòdaho de mẹ, na kandai etọn lẹ nọ yin hihia daga to sinagọgu lẹ mẹ to gbọjẹzan dopodopo gbè.” 22  To whenẹnu, apọsteli lẹ po sunnu mẹho lẹ po gọna agun lọ pete mọdọ e yọ́n nado do sunnu dide lẹ hlan sọn yé mẹ yì Antioku to pọmẹ hẹ Paulu po Balnaba po, sunnu lọ lẹ wẹ Juda he sọ nọ yin Balsaba po Sila po, he yin sunnu nukundeji lẹ to mẹmẹsunnu lẹ ṣẹnṣẹn; 23  yé sọ yí alọ yetọn lẹ do kàn dọmọ: “Sọn mẹmẹsunnu lẹ, yèdọ apọsteli lẹ po sunnu mẹho lẹ po dè, hlan mẹmẹsunnu he to Antioku, Silia po Silisia po lẹ, he wá sọn akọta lẹ mẹ lẹ: Mí dọnudo mì! 24  To whenuena mí sè dọ mẹdelẹ sọn ṣẹnṣẹn mítọn ko yí ohó lẹ do dotukla mì, bo to tintẹnpọn nado hù mì sudo, dile mí ma tlẹ na yé anademẹ depope, 25  mí ko wá gbèta dopo kọ̀n bo ko mọdọ e yọ́n nado de sunnu delẹ bosọ do yé hlan mì to pọmẹ hẹ mẹyiwanna mítọn lẹ, Balnaba po Paulu po, 26  yèdọ sunnu he ko ze alindọn yetọn jo na oyín Oklunọ mítọn Jesu Klisti tọn wutu lẹ. 27  Enẹwutu wẹ mí do Juda po Sila po hlan, na yé nido sọgan yí onù do na linlin onú dopolọ tọn ga. 28  Na gbigbọ wiwe po mílọsu po mọdọ e yọ́n ma nado vọ́ doagban pinpẹn na mì, adavo nuhe yin dandan tọn ehelẹ, 29  nado nọla na nuhe yin yíyí do sanvọ́ hlan boṣiọ lẹ podọ na ohùn podọ na nuhe yin kọslona hù lẹ* podọ na galilọ. Eyin mì yí sọwhiwhe do whlá mìde sọn onú ehelẹ mẹ, mì na nọ jijọho mẹ. Mì nọ dagbe!” 30  Enẹwutu, to whenue omẹ ehelẹ yin didohlan, yé yì Antioku, yé sọ pli gbẹtọgun lọ dopọ bo ze wekanhlanmẹ lọ na yé. 31  To whenue yé hia ẹ, yé jaya na tulinamẹ lọ wutu. 32  Podọ Juda po Sila po, na yelọsu yin yẹwhegán lẹ wutu, yé yí ohó susu do na tuli mẹmẹsunnu lẹ bo hẹn yé lodo. 33  Enẹwutu, to whenue yé ko nọ finẹ na ojlẹ de, mẹmẹsunnu lọ lẹ do yé hlan to jijọho mẹ yì mẹhe ko do yé hlan lẹ dè. 34  ——* 35  Ṣigba, Paulu po Balnaba po gbọṣi Antioku bo to mẹplọn bosọ to wẹndagbe ohó Jehovah tọn lá to pọmẹ hẹ mẹdevo lẹ ga. 36  Todin, to azán delẹ godo, Paulu dọna Balnaba dọmọ: “Wá mí ni lẹkọyi bo dla mẹmẹsunnu lẹ pọ́n to tòdaho he mẹ mí ko lá ohó Jehovah tọn te lẹpo nado pọ́n lehe yé te do.” 37  Balnaba, na ewọ tọn, magbe nado plan Johanu hẹn ga, mẹhe sọ nọ yin Malku. 38  Ṣigba, Paulu ma mọdọ e jẹ nado plan ewọ hẹn gba, na e mọdọ e ko jo yé do sọn Pamfilia bo ma hodo yé to azọ́n lọ mẹ. 39  Na ehe wutu, wiwọ́ sinsinyẹn de wá aimẹ, sọmọ bọ yé klan sọn yedelẹ go; Balnaba sọ plan Malku hẹn bo dó tọjihun yì Kiplu. 40  Paulu de Sila, podọ to whenue mẹmẹsunnu lẹ ko ze e do alọmẹ na nukundagbe majẹhẹ Jehovah tọn godo, e tọ́nyi. 41  Ṣigba, e jugbọn Silia po Silisia po, bo to agun lẹ hẹn lodo.

Nudọnamẹ Odò Tọn

Ow 15:20* Kavi, “nuhe yin hùhù kavi kú bọ ohùn etọn ma yin sinsọndai.”
Ow 15:29* Pọ́n wefọ 20, nudọnamẹ odò tọn.
Ow 15:34* Pọ́n Mt 17:21, nudọnamẹ odò tọn.