Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 12:1-25

12  To nudi ojlẹ enẹ dopolọ mẹ, ahọlu Hẹlọdi* jẹ homẹkẹndo delẹ to mẹhe tin to agun lọ mẹ lẹ ji.  E hù Jakọbu nọvisunnu Johanu tọn po ohí po.  To whenue e mọdọ e hẹn homẹ Ju lẹ tọn hùn, e zindonukọn nado wle Pita lọsu. (Nalete, azán enẹlẹ yin azán hùnwhẹ akla madotọ́n lẹ tọn.)  Podọ to whenue e wle e, e ze e do gànpamẹ, bo ze e do alọmẹ na pipli ẹnẹ awhànfuntọ lẹ tọn nado nọ to ṣiṣọ́ ẹ gbọn yedelẹ didiọ dali. Pipli dopodopo bẹ awhànfuntọ ẹnẹ hẹn. Na e to linlẹn nado hẹn ẹn wá gbẹtọ lẹ nukọn to juwayi lọ godo.  Enẹwutu, Pita yin ginglọndo gànpamẹ; ṣigba agun lọ to dẹ̀ho hlan Jiwheyẹwhe vẹkuvẹku do ota etọn mẹ.  Todin, to whenue Hẹlọdi jlo na hẹn ẹn jẹgbonu, Pita to amlọndọ to gẹdẹ awe mẹ to awhànfuntọ awe ṣẹnṣẹn to ozán enẹ mẹ, podọ hihọ́tọ he to ohọ̀n lọ ji lẹ to gànpa lọ ṣọ́.  Ṣigba, pọ́n! angẹli Jehovah tọn ṣite to e dè, podọ hinhọ́n de họ́n to gànhọ lọ mẹ. E linú adà mẹ na Pita bo fọ́n ẹn, bosọ dọmọ: “Fọ́n plaun!” Gẹdẹ etọn lẹ sọ flẹ sọn alọ etọn lẹ go.  Angẹli lọ dọna ẹn dọmọ: “Wleawuna dewe bo sìn afọpa towe lẹ.” Ewọ sọ wàmọ. Enẹgodo, e dọna ẹn dọmọ: “Ze awugbó towe dó bo hodo mi.”  Ewọ sọ tọ́njẹgbonu bo hodo e, ṣigba e ma yọnẹn dọ nuhe angẹli lọ to wiwà lẹ yin nugbo. Na taun tọn, e lẹndọ numimọ de mọ wẹ emi te. 10  To whenue yé ko zẹ̀ hihọ́tẹn tintan po awetọ po go, yé jẹ họngbo ogàn tọn he biọ tòdaho lọ mẹ kọ̀n, ehe sọ hùn na ede hlan yé. Podọ to whenue yé tọ́njẹgbonu, yé gbọn tòhomẹ-liho dopo ji bo to yìyì, angẹli lọ sọ yì sọn e dè to afọdopolọji. 11  Podọ, to whenue Pita gọ̀ biọ ede mẹ, e dọmọ: “Todin, yẹn yọnẹn nugbonugbo dọ Jehovah wẹ do angẹli etọn hlan nado whlẹn mi sọn alọ Hẹlọdi tọn mẹ podọ sọn nuhe akọta Ju lẹ tọn to nukundo lẹpo mẹ.” 12  Podọ, to whenue e ko lẹnnupọndo ehe ji, e yì owhé Malia onọ̀ Johanu, mẹhe sọ nọ yin Malku tọn gbè, fihe gbẹtọ sọha de pli dopọ te bo to dẹ̀ho. 13  To whenue e húhú ohọ̀n họngbo lọ tọn, deviyọnnu de he nọ yin Lodẹ wá nado siọ, 14  podọ, to whenue e họnwun na ẹn dọ ogbè Pita tọn wẹ, na ayajẹ wutu, e ma hùn họngbo lọ, ṣigba e họ̀nwezun biọ họmẹ bo na linlin dọ Pita wẹ to ote to họngbo ji. 15  Yé dọna ẹn dọmọ: “Alẹ̀ wẹ a hùn.” Ṣigba, e gbẹ́ tẹkudeji dọ ewọ wẹ. Yé jẹ didọ ji dọmọ: “Angẹli etọn wẹ.” 16  Ṣigba, Pita gbọṣi finẹ bo to họ̀nhúhú. To whenue yé hùn in, yé mọ ẹn bọ avò vò yé. 17  Ṣigba, e mìalọ hlan yé nado nabọẹ bo dọna yé to gigọ́ mẹ lehe Jehovah de e tọ́n sọn gànpamẹ do, e sọ dọna yé dọmọ: “Mì dọ onú ehelẹ na Jakọbu po mẹmẹsunnu lẹ po.” Enẹgodo, e tọ́njẹgbonu bo zingbejizọnlin yì fidevo. 18  Todin, to whenue ai ko họ́n, bẹwlu he fọ́n to ṣẹnṣẹn na awhànfuntọ lọ lẹ gando nuhe na ko jọ taun do Pita go ma yin pẹvide. 19  Hẹlọdi dín in vẹkuvẹku podọ, to whenue e ma mọ ẹn, e dindona hihọ́tọ lọ lẹ bo degbè dọ yé ni yin pinplan yì nado yin yasana; ewọ sọ tọ́n sọn Jude yì Sesalea bo nọ finẹ na ojlẹ de. 20  Todin, e to homẹgble do omẹ Tile po Sidoni po tọn lẹ go. Enẹwutu, yé kọngbedopọ bo wá e dè podọ, to whenue yé ko diọlinlẹnna Blastu, mẹhe paṣẹ do whédo ahọlu tọn ji, yé jẹ jijọho dín ji, na otò ahọlu lọ tọn mẹ wẹ yé nọ mọ núdùdù yí sọn wutu. 21  Ṣigba, to azán vonọtaun de gbè, Hẹlọdi yí avọ̀ ahọlu tọn do doaṣọ́na ede bo sinai do whẹdaján ji bosọ jẹ hodidọ gbangba tọn de dọna yé ji. 22  To whenẹnu, mẹhe pli dopọ lẹ jẹ awhádo ji dọmọ: “Ogbè yẹwhe de tọn wẹ, e ma yin gbẹtọ de tọn gba!” 23  To afọdopolọji, angẹli Jehovah tọn linú in, na e ma na gigo Jiwheyẹwhe wutu; ewọ sọ jiwé bo kú. 24  Ṣigba, ohó Jehovah tọn to whinwhẹ́n deji bo to gbigbayipe. 25  Na nuhe dù Balnaba po Saulu po, to whenue yé ko hẹn alọgọ kọgbọ tọn yì Jelusalẹm godo, yé lẹkọwa bo plan Johanu, mẹhe sọ nọ yin Malku hẹn.

Nudọnamẹ Odò Tọn

Ow 12:1* Enẹ wẹ, Hẹlọdi Aglipa I.