Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 11:1-30

11  Todin, apọsteli lẹ po mẹmẹsunnu he tin to Jude lẹ po sè dọ omẹ akọta lẹ tọn lẹ ko kẹalọyi ohó Jiwheyẹwhe tọn ga.  Enẹwutu, to whenue Pita wá Jelusalẹm, mẹhe nọ nọgodona adàgbigbo lẹ jẹ núdọ̀n hẹ ẹ ji,  bo to didọ dọ, e ko yì owhé mẹhe ma gboadà lẹ tọn gbè bo dùnú hẹ yé.  To whenẹnu, Pita jẹ hodọ ji bo basi zẹẹmẹ nujijọ lọ lẹ tọn debọdo-dego na yé, dọmọ:  “Yẹn tin to tòdaho Jọppa tọn mẹ bo to dẹ̀ho, bọ to numimọ de mẹ, yẹn mọ núzinzan de he taidi alavọ daho de he yè hẹn tónu etọn ẹnẹ lẹ do to hinhẹn ẹn jẹte sọn olọn, e sọ wá dè e tlọlọ.  To whenue yẹn pọ́n e mẹ tlintlin, yẹn doayi e go bo mọ nudida afọ ẹnẹnọ aigba ji tọn lẹ, gbekanlin lẹ, nuhe nọ lìn lẹ po ohẹ̀ agahomẹ tọn lẹ po.  Humọ, yẹn sè ogbè de he dọna mi dọ, ‘Pita, fọ́n bo hù bosọ dù!’  Ṣigba, yẹn dọ, ‘Paali, Oklunọ, na nuhe yin hinhẹnflu bo yin mawé de ma ko biọ onù ṣie mẹ pọ́n gbede.’  Whla awetọ, ogbè he wá sọn olọn lọ gblọn dọmọ, ‘A sọ ylọ nuhe Jiwheyẹwhe ko klọwé lẹ dọ mawé ba blo.’ 10  Ogbè lọ sọ yin sisè whla atọ̀ntọ, bọ onú lẹpo sọ yin dindọn lẹkọyi olọn mẹ. 11  Podọ pọ́n! to ojlẹ enẹ dopolọ mẹ, dawe atọ̀n delẹ ṣite to owhé he gbè mí tin te, yé yin didohlan dè e sọn Sesalea. 12  Enẹwutu, gbigbọ lọ dọna mi nado hodo yé matin ayihaawe depope. Ṣigba, mẹmẹsunnu ṣidopo ehelẹ sọ hodo mi ga, mí sọ biọ owhé dawe lọ tọn gbè. 13  “E dọna mí lehe e mọ angẹli de ṣite to owhé etọn gbè do bo dọna ẹn dọmọ, ‘Domẹhlan Jọppa bo ylọ Simọni, mẹhe sọ nọ yin Pita, 14  ewọ nasọ dọ nuhe sọgan whlẹn hiẹ po whédo towe lẹpo po na we.’ 15  Ṣigba, to whenue yẹn jẹ hodọ ji, gbigbọ wiwe jẹ yé ji kẹdẹdile e wá mílọsu ji to bẹjẹeji do. 16  To whenẹnu, yẹn flin nuhe Oklunọ dọ, lehe e ko nọ dọ do dọ, ‘Johanu, na ewọ tọn, yí osin do baptizi, ṣigba mìwlẹ na yin bibaptizi po gbigbọ wiwe po.’ 17  Enẹwutu, eyin Jiwheyẹwhe na nunina vọnu dopolọ yé dile e na mílọsu lẹ he ko yise to Oklunọ Jesu Klisti mẹ do, mẹnu wẹ yẹn bọ yẹn nado sọgan glọnalina Jiwheyẹwhe?” 18  Todin, to whenue yé sè onú ehelẹ, yé kọngbedopọ, yé sọ pagigona Jiwheyẹwhe, bo dọmọ: “To whelọnu lo, be Jiwheyẹwhe ko na lẹnvọjọ omẹ akọta lẹ tọn ga nado mọ ogbẹ̀.” 19  Enẹwutu, mẹhe ko gbàpe na nukunbibia he fọ́n do Stefani ji wutu lẹ yì kaka Fenike po Kiplu po gọna Antioku, ṣigba yé ma nọ dọ ohó lọ na mẹdevo depope adavo na Ju lẹ kẹdẹ. 20  Ṣigba, omẹ delẹ to yé mẹ sọn Kiplu po Silene po, wá Antioku bo jẹ hodọna mẹhe nọ dó Glẹkigbe lẹ ji bosọ to wẹndagbe Oklunọ Jesu tọn lá. 21  Humọ, Jehovah tin po yé po, podọ sọha daho he lẹzun yisenọ lẹ lẹhlan Oklunọ dè. 22  Agun he to Jelusalẹm sè linlin lọ gando yé go, yé sọ do Balnaba hlan kaka yì Antioku. 23  To whenue e jẹ finẹ bo mọ nukundagbe majẹhẹ Jiwheyẹwhe tọn, e jaya bo jẹ tulina yemẹpo ji nado yí gbemima ahun mẹ tọn do zindonukọn to Oklunọ mẹ; 24  na omẹ dagbe de wẹ ewọ bo gọ́ na gbigbọ wiwe po yise po. Gbẹtọgun he yinukunkẹ de sọ yise to Oklunọ mẹ. 25  Enẹwutu, e yì Talsu nado dín Saulu pé 26  podọ, to whenue e mọ ẹn, e hẹn ẹn wá Antioku. Gbọnmọ dali, yé pli dopọ hẹ yé to agun lọ mẹ bo plọn gbẹtọgun he yinukunkẹ de na owhe dopo blebu, podọ gbọn anademẹ Jiwheyẹwhe tọn dali, Antioku wẹ devi lẹ yin yiylọ whla tintan dọ Klistiani lẹ te. 27  Todin, to azán enẹlẹ gbè, yẹwhegán delẹ jẹte wá Antioku sọn Jelusalẹm. 28  Dopo to yé mẹ he nọ yin Agabu fọ́n bo gbọn gbigbọ wiwe dali dohia dọ huvẹ daho de na tọ́n to madẹnmẹ to aigba lọ pete ji; ehe jọ, na nugbo tọn, to ojlẹ Klaudiu tọn mẹ. 29  Enẹwutu, mẹhe yin devi lẹ magbe, yèdọ dopodopo yetọn sọgbe hẹ nuhe go yé pé, nado do alọgọ kọgbọ tọn hlan mẹmẹsunnu he nọ nọ̀ Jude lẹ; 30  podọ yé wà ehe, bo do e hlan sunnu mẹho lẹ gbọn alọ Balnaba po Saulu po tọn mẹ.

Nudọnamẹ Odò Tọn