Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 10:1-48

10  Todin, dawe de tin to Sesalea he nọ yin Kọneliọsi, mẹkanwekowhàngán awhànfun-gbẹ́ Itali tọn de, dile e nọ yin yiylọdọ,  yèdọ dawe de he nọ yí ahundopo do sẹ̀n bo nọ dibusi Jiwheyẹwhe, to pọmẹ po whédo etọn lẹpo po, ewọ sọ nọ basi nunina lẹblanu tọn susu na gbẹtọ lẹ bosọ nọ basi ovẹvivẹ hlan Jiwheyẹwhe to gbesisọ mẹ.  To nudi gànhiho ṣinẹnẹtọ* azán lọ tọn mẹ, e mọ to numimọ de mẹ hezeheze bọ angẹli Jiwheyẹwhe tọn de wá e dè bo dọna ẹn dọmọ: “Kọneliọsi!”  Dawe lọ pọ́n ẹn tlintlin podọ, na obu di i wutu, e dọmọ: “Etẹwẹ, Oklunọ?” E dọna ẹn dọmọ: “Odẹ̀ towe lẹ po nunina lẹblanu tọn towe lẹ po ko hẹji bo yin finflin gbọn Jiwheyẹwhe dali.  Enẹwutu, todin, domẹhlan Jọppa bo ylọ dawe de he nọ yin Simọni, mẹhe sọ nọ yin Pita.  Dawe ehe tin to owhé Simọni ayú-zọ́nwatọ lọ tọn gbè taidi jonọ de, mẹhe owhé etọn tin to huto.”  Tlolo he angẹli he dọhona ẹn lọ ko yì, e ylọ awe to devizọnwatọ whégbè tọn etọn lẹ mẹ gọna awhànfuntọ de he nọ yí ahundopo do sẹ̀n sọn mẹhe nọ wadevizọn hlan ẹn to whepoponu lẹ mẹ,  bo basi zẹẹmẹ onú lẹpo tọn na yé bosọ do yé hlan Jọppa.  To aihọngbè, dile yé to gbejizọnlinzin bo to sisẹpọ tòdaho lọ, Pita yì họta to nudi gànhiho ṣidopotọ* mẹ nado hodẹ̀. 10  Ṣigba, huvẹ hù i taun bọ e jlo na dùnú. Dile yé to awuwlena núdùdù, e jẹ numimọ de mọ ji 11  bo mọ olọn hùndonuvo, bọ núzinzan de he taidi alavọ daho de he yè hẹn tónu etọn ẹnẹ lẹ do to hinhẹn ẹn jẹte sọn olọn; 12  bọ nudida afọ ẹnẹnọ wunmẹ lẹpo po nuhe nọ lìn to aigba ji lẹ po gọna ohẹ̀ agahomẹ tọn lẹ tin to e mẹ. 13  Ogbè de sọ dọna ẹn dọmọ: “Pita, fọ́n bo hù bosọ dù!” 14  Ṣigba, Pita dọmọ: “Paali, Oklunọ, na yẹn ma ko dù nudepope he yin hinhẹnflu bosọ yin mawé pọ́n gbede.” 15  Ogbè lọ sọ vọ́ dọhona ẹn whla awetọ dọmọ: “A sọ ylọ nuhe Jiwheyẹwhe ko klọwé lẹ dọ mawé ba blo.” 16  Ogbè lọ sọ yin sisè whla atọ̀ntọ, podọ to afọdopolọji, núzinzan lọ yin yíyí sọyi olọn mẹ. 17  Todin, dile Pita to bẹwlu daho mẹ to ede mẹ gando nuhe numimọ he e mọ lọ sọgan zẹẹmẹdo go, pọ́n! dawe lọ lẹ he Kọneliọsi dohlan ko kàn owhé Simọni tọn gbè biọ bo ṣite to họngbo ji. 18  Yé sọ ylọ bo kanbiọ eyin Simọni, mẹhe sọ nọ yin Pita tin to finẹ taidi jonọ de. 19  Dile Pita to nulẹnpọn to ayiha etọn mẹ gando numimọ lọ go, gbigbọ lọ dọmọ: “Pọ́n! Dawe atọ̀n to dindin we. 20  Enẹwutu, fọ́n bo jẹte bosọ yì po yé po matin ayihaawe depope, na yẹn wẹ do yé hlan.” 21  Enẹwutu, Pita jẹte yì dawe lọ lẹ dè bo dọmọ: “Mì pọ́n! Yẹn wẹ mẹhe mì to dindin. Whẹwhinwhẹ́n tẹ wutu wẹ mì do wá?” 22  Yé dọmọ: “Kọneliọsi, mẹkanwekowhàngán de, dawe dodonọ de he dibusi Jiwheyẹwhe bọ akọta Ju lẹ tọn pete nọ dekunnu etọn dagbe wẹ angẹli wiwe de dowẹn sọn Jiwheyẹwhe dè nado domẹhlan we nado wá owhé etọn gbè podọ na ewọ nido sè nuhe hiẹ tindo nado dọ.” 23  Enẹwutu, e basi oylọna yé biọ họmẹ bo yí yé taidi jonọ. To aihọngbè, e fọ́n bo tọ́nyi po yé po, delẹ to mẹmẹsunnu Jọppa tọn lẹ mẹ sọ yì hẹ ẹ. 24  To aihọngbè, e biọ Sesalea. Na nugbo tọn, Kọneliọsi ko to nukundo yé bo ko ylọ hẹnnumẹ po họntọn vivẹ etọn lẹ po pli dopọ. 25  Dile Pita biọ họmẹ, Kọneliọsi pé e, bo jẹklo to afọ etọn lẹ kọ̀n bosọ litaina ẹn. 26  Ṣigba, Pita jlọ ẹ ṣite bo dọmọ: “Fọ́n; gbẹtọ de wẹ yẹnlọsu ga.” 27  Podọ dile e to hodọ hẹ ẹ, e biọ họmẹ bo mọ mẹsusu he ko pli dopọ, 28  e sọ dọna yé dọmọ: “Mìwlẹ yọnẹn ganji lehe e ma sọgbe hẹ osẹ́n na Ju de nado kọ̀n ede dopọ kavi dọnsẹpọ omẹ akọ̀ devo tọn do; ṣogan Jiwheyẹwhe ko dohia mi dọ yẹn sọ ylọ mẹdepope dọ hẹnflu kavi mawé blo. 29  Enẹ wẹ zọ́n bọ yẹn do wá, na taun tọn, matin nudindọn depope, to whenue yè dowẹn hlan mi. Enẹwutu, yẹn to whẹwhinwhẹ́n he wutu mì dowẹn hlan mi kanse.” 30  Enẹwutu, Kọneliọsi dọmọ: “To gànhiho ehe mẹ to azán ẹnẹ die, yẹn to dẹ̀ho to ohọ̀ ṣie mẹ to gànhiho ṣinẹnẹtọ* mẹ, to whenuena, pọ́n! dawe de he dó avọ̀ he to sisẹ́ de ṣite to apá na mi 31  bo dọmọ, ‘Kọneliọsi, odẹ̀ towe ko yin sisè podọ nunina lẹblanu tọn towe lẹ ko yin finflin gbọn Jiwheyẹwhe dali. 32  Enẹwutu, domẹhlan Jọppa nado ylọ Simọni, mẹhe sọ nọ yin Pita. Dawe ehe tin to owhé Simọni ayú-zọ́nwatọ lọ tọn he to huto lọ gbè taidi jonọ.’ 33  Enẹwutu, yẹn domẹhlan we to afọdopolọji, hiẹ sọ wà dagbe nado tin tofi. Podọ todin, mímẹpo tin to Jiwheyẹwhe nukọn nado sè nuhe Jehovah ko degbè etọn na we nado dọ lẹpo.” 34  Enẹwutu, Pita kẹ̀ onù etọn bo dọmọ: “Na nugbo tọn, yẹn mọdọ Jiwheyẹwhe ma yin mẹnukuntahopọntọ gba, 35  ṣigba to akọta lẹpo mẹ, mẹhe nọ dibusi i bo nọ wazọ́n dodo tọn wẹ nọ yin alọkẹyi to e dè. 36  E dowẹn hlan ovi Islaeli tọn lẹ nado lá wẹndagbe jijọho tọn gbọn Jesu Klisti gblamẹ na yé: dọ Omẹ ehe wẹ Oklunọ mẹlẹpo tọn. 37  Mìwlẹ yọ́n nuhe yin hodọdeji lẹdo Jude lẹpo pé, yèdọ bẹsọn Galili to baptẹm he Johanu dọyẹwheho etọn lọ godo, 38  yèdọ lehe Jiwheyẹwhe yí gbigbọ wiwe po huhlọn po do yiamisisadode Jesu he wá sọn Nazalẹti lọ do, bọ ewọ jugbọn aigba lọ ji bo to dagbe wà bosọ to azọ̀nhẹngbọna mẹhe Lẹgba ko gbidikọna lẹpo; na Jiwheyẹwhe tin hẹ ẹ wutu. 39  Míwlẹ sọ yin kunnudetọ onú lẹpo he e wà to otò Ju lẹ tọn mẹ podọ to Jelusalẹm lẹ tọn; ṣigba yé hù i gbọn zize e plá do pòtin de go dali. 40  Jiwheyẹwhe fọ́n Ewọ to azán atọ̀ntọ gbè bo hẹn yọnbasi na ẹn nado sọawuhia gbẹtọ lẹ, 41  e ma yin hlan gbẹtọ lẹpo, ṣigba hlan kunnudetọ lẹ he ko yin dide jẹnukọn gbọn Jiwheyẹwhe dali, yèdọ hlan míwlẹ, mẹhe dù bo nù dopọ hẹ ẹ to whenue e ko fọ́n sọn oṣiọ lẹ mẹ godo. 42  Humọ, e degbena mí nado dọyẹwheho na gbẹtọ lẹ podọ nado dekunnu mlẹnmlẹn dọ ehe wẹ Omẹ lọ he Jiwheyẹwhe ko de nado yin whẹdatọ mẹhe to ogbẹ̀ po oṣiọ lẹ po tọn. 43  Ewọ go wẹ yẹwhegán lẹpo dekunnu gando, dọ omẹ depope he tindo yise to ewọ mẹ na mọ jona ylando lẹ tọn yí gbọn oyín etọn gblamẹ.” 44  Dile Pita gbẹ́ to hodọ dogbọn onú ehelẹ dali, gbigbọ wiwe jẹ mẹhe to ohó lọ sè lẹpo ji. 45  Awú sọ ji omẹ nugbonọ he hodo Pita wá lẹ, he yin mẹhe ko gboadà lẹ, na gbigbọ wiwe he yin nunina vọnu ko yin kinkọnjẹgbonu do omẹ akọta lẹ tọn lẹ ji ga. 46  Na yé sè bọ yé yí ogbè devo lẹ do to hodọ bo to gigopana Jiwheyẹwhe wutu. To whenẹnu, Pita dọmọ: 47  “Be mẹdepope sọgan gbẹ́ dọ omẹ ehelẹ he ko mọ gbigbọ wiwe yí, yèdọ dile míwlẹ mọyi do, ni ma yin bibaptizi po osin po ya?” 48  Enẹwutu, e degbè dọ yé ni yin bibaptizi to oyín Jesu Klisti tọn mẹ. Enẹgodo, yé biọ to e si nado gbọṣi yé dè na azán delẹ.

Nudọnamẹ Odò Tọn

Ow 10:3* Enẹ wẹ, nudi ogàn 3 whèmẹ tọn, eyin yè hia sọn ojlẹ he mẹ owhè nọ zẹ̀.
Ow 10:9* Enẹ wẹ, nudi ogàn 12 whèmẹ tọn, eyin yè hia sọn ojlẹ he mẹ owhè nọ zẹ̀.
Ow 10:30* Pọ́n wefọ 3, nudọnamẹ odò tọn.