Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Owalọ lẹ 1:1-26

1  Hiẹ Teofil E, yẹn wleawuna kandai tintan lọ gando onú lẹpo he Jesu bẹjẹeji nado wà podọ nado plọnmẹ go,  kakajẹ azán he gbè ewọ yin zize yì oji aga, to whenue e ko gbọn gbigbọ wiwe dali na anademẹ apọsteli he e de lẹ godo.  Ewọ sọ gbọn kunnudenu he họnwun susu dali do ede hia yé to whenue e ko jiya godo dọ emi to ogbẹ̀, bo yin mimọ gbọn yé dali na azán kande bọ e to nuhe gando ahọluduta Jiwheyẹwhe tọn go dọ.  Podọ to whenue e pli hẹ yé, e na yé anademẹ lẹ dọmọ: “Mì tọ́nyi sọn Jelusalẹm blo, ṣigba mì nọtepọn nuhe Otọ́ ko dopagbe etọn lọ, ehe mì sè sọn dè e;  na nugbo tọn, Johanu yí osin do baptizi, ṣigba azán vude sọn din, mìwlẹ na yin bibaptizi po gbigbọ wiwe po.”  Todin, to whenue yé ko pli, yé jẹ kinkanbiọ ji dọmọ: “Oklunọ, be hiẹ na gọ̀ ahọluduta jo na Islaeli to ojlẹ ehe mẹ lo ya?”  Ewọ dọna yé dọmọ: “E ma yin mìtọn nado yọ́n ojlẹ lẹ kavi osaa lẹ he Otọ́ ko yí do aṣẹpipa ede tọn mẹ gba;  ṣigba mì na mọ huhlọn yí to whenue gbigbọ wiwe na wá mì ji, podọ mìwlẹ na yin kunnudetọ ṣie to Jelusalẹm podọ to Jude po Samalia lẹpo po, podọ kaka yì awà he dẹn hugan aigba tọn lẹ ji.”  Podọ to whenue e ko dọ onú ehelẹ, dile yé to nupọn, ewọ yin zize yì oji aga bọ aslọ de ṣinyọ́n ẹn bọ yé ma sọgan mọ ẹn ba. 10  Podọ dile yé zín nukun yetọn do jiwhé to whenue ewọ to yìyì, sọ pọ́n! dawe awe delẹ he dó avọ̀ wewe ṣite to yé dè, 11  yé sọ dọmọ: “Mì omẹ Galili tọn lẹ, naegbọn mì ṣite bo to jiwhé pọ́n? Jesu ehe, mẹhe yin yíyí sọn mì dè sọyi jiwhé na wá domọ to aliho dopolọ mẹ dile mì mọ ẹn bọ e to yìyì jiwhé do.” 12  To whenẹnu, yé lẹkọyi Jelusalẹm sọn osó he nọ yin Osó Olivie tọn lọ ji, ehe ma dẹn do Jelusalẹm hú gbejizọnlin gbọjẹzan tọn de.* 13  Enẹwutu, to whenue yé lẹkọ, yé biọ abò aga tọn lọ mẹ, fie yé nọ nọ̀, yèdọ Pita po Johanu po, Jakọbu po Andle po, Filippi po Tọmasi po, Batelemi po Matiu po, Jakọbu visunnu Alfe tọn po Simọni zohunhunnọ lọ po, gọna Juda visunnu Jakọbu tọn. 14  To kọndopọ mẹ, yemẹpo gbọṣi odẹ̀ mẹ, to pọmẹ hẹ yọnnu delẹ po Malia onọ̀ Jesu tọn po gọna nọvisunnu Jesu tọn lẹ. 15  Todin, to azán ehelẹ gbè, Pita fọ́n to mẹmẹsunnu lẹ ṣẹnṣẹn bo dọmọ (gbẹtọgun lọ lẹpo he yì nudi kantọ̀n pli dopọ): 16  “Mì mẹmẹsunnu lẹ emi, dandan wẹ e yin dọ adà Owe-wiwe tọn lọ ni yin hinhẹndi, ehe gbigbọ wiwe ko dọ jẹnukọn gbọn onù Davidi tọn mẹ gando Juda go, mẹhe lẹzun alihiamẹtọ de na mẹhe wle Jesu lẹ, 17  na e ko yin hihia dogọ mí podọ e tindo mahẹ to lizọnyizọn ehe mẹ. 18  (Enẹwutu, dawe ehe dopolọ yí akuẹ mawadodo tọn do họ̀ aigba de, podọ to whenue e sọahọ̀ndo, adọgo etọn là bo dọnú gángán bọ adọ̀ etọn lẹpo kọnyinai. 19  E sọ lẹzun yinyọnẹn na mẹhe nọ nọ̀ Jelusalẹm lẹpo, sọmọ bọ aigba lọ yin yiylọ to ogbè yetọn mẹ dọ Akeldama, enẹ wẹ, Aigba Ohùn tọn.) 20  Na e yin kinkàn to owe Psalm lẹ tọn mẹ dọ, ‘Gbọ fininọ etọn ni jẹvọ́, podọ a dike mẹdepope nọ e mẹ blo,’ podọ, ‘Gbọ mẹdevo ni yí azọ́ntẹn nukunpedonugo tọn etọn.’ 21  Enẹwutu, e yin dandan dọ to mẹhe pli hẹ mí to ojlẹ he mẹ Oklunọ Jesu to yìyì bo to wiwá to ṣẹnṣẹn mítọn lẹpo mẹ, 22  yèdọ bẹsọn baptẹm etọn gbọn Johanu dali ji kakajẹ azán he gbè ewọ yin yíyí sọyi aga sọn mí dè, dopo to omẹ ehelẹ mẹ ni lẹzun kunnudetọ fọnsọnku etọn tọn hẹ mí.” 23  Enẹwutu, yé de omẹ awe dovo, yèdọ Josẹfu he nọ yin Balsaba, mẹhe sọ nọ yin Justu, po Matiasi po. 24  Podọ yé hodẹ̀ bo dọmọ: “Hiẹ, Jehovah E, he yọ́n ahun mẹlẹpo tọn, do mẹhe hiẹ de to dawe awe ehelẹ mẹ hia mí, 25  nado yí otẹn lizọnyizọn ehe po apọsteli-yinyin po tọn, ehe Juda jodo bo de ali edetiti tọn.” 26  Enẹwutu, yé de ovò do yé ji, bọ ovò de Matiasi; ewọ sọ yin hihia dogọ apọsteli widopo lẹ.

Nudọnamẹ Odò Tọn

Ow 1:12 Ehe yin nudi mẹtlu 890. Yijlẹdo Jọṣ 3:4 go.