Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Osọhia 3:1-22

3  “Podọ kanwehlan angẹli agun he tin to Sadi tọn dọmọ: Ehe wẹ nuhe mẹhe tindo gbigbọ ṣinawe Jiwheyẹwhe tọn lẹ po sunwhlẹvu ṣinawe lẹ po dọ, ‘Yẹn yọ́n walọ towe lẹ, dọ hiẹ tindo oyín lọ dọ hiẹ to ogbẹ̀, ṣigba oṣiọ wẹ hiẹ.  Tin to aṣeji bo hẹn nuhe pò he ko dibla kú lẹ lodo, na yẹn ma mọdọ azọ́n towe lẹ yin wiwà to gigọ́ mẹ to Jiwheyẹwhe ṣie nukọn.  Enẹwutu, nọ flin lehe hiẹ mọyi do podọ lehe hiẹ sè do to whepoponu, bo zindonukọn nado nọ payi e go, bosọ lẹnvọjọ. Na nugbo tọn, eyin hiẹ ma fọ́n, yẹn na wá taidi ajotọ de, podọ hiẹ ma na yọ́n ogàn he mẹ yẹn na wá oji we te gba.  “‘Etomọṣo, hiẹ tindo omẹ vude to Sadi he ma ko hẹn awugbó yetọn lẹ flu, yé nasọ zinzọnlin hẹ mi to awugbó wewe yetọn lẹ mẹ, na yé jẹ wutu.  Gbọnmọ dali, ewọ he gbawhàn na yin aṣọ́dona po awugbó wewe lẹ po; yẹn ma nasọ de oyín etọn sẹ̀ sọn owe ogbẹ̀ tọn lọ mẹ to aliho depope mẹ, ṣigba yẹn na yigbe to Otọ́ ṣie nukọn podọ to angẹli etọn lẹ nukọn dọ yẹn yọ́n oyín etọn.  Mì gbọ mẹhe tindo otó ni sè nuhe gbigbọ to didọna agun lẹ.’  “Podọ kanwehlan angẹli agun he tin to Filadẹlfia tọn dọmọ: Ehe wẹ nuhe mẹhe yin wiwe, mẹhe yin nugbo, mẹhe tindo họnhungan Davidi tọn, mẹhe nọ hùn bọ mẹde ma nọ sú, bo nọ sú bọ mẹde ma nọ hùn lọ dọ,  ‘Yẹn yọ́n walọ towe lẹ—pọ́n! yẹn ko ze ohọ̀n he to nùvo de donukọnna we, ehe mẹdepope ma sọgan sú—yẹn yọnẹn dọ huhlọn vude wẹ hiẹ tindo, hiẹ sọ whlá ohó ṣie bo ma mọ́n oyín ṣie.  Pọ́n! Yẹn na na mẹhe sọn sinagọgu Satani tọn mẹ he ylọ yede dọ Ju, ṣogan bo ma yinmọ ṣigba to lalodo lẹ—pọ́n! yẹn na hẹn yé wá bọ yé na litai to afọ towe lẹ kọ̀n bo nasọ hẹn yé yọnẹn dọ yẹn yiwanna we. 10  Na hiẹ yí ohó he gando akọndonanu ṣie go whlá wutu, yẹn nasọ whlá we sọn ojlẹ mẹtẹnpọn tọn mẹ ga, ehe na wá aigba fininọ tọn lẹpo ji, yèdọ nado tẹ́n mẹhe nọ nọ̀ aigba ji lẹ pọ́n. 11  Yẹn ja to niyaniya mẹ. Tẹdo nuhe hiẹ tindo lọ go gligli, na mẹdepope ni ma do yí jẹgbakun towe blo. 12  “‘Mẹhe gbawhàn—yẹn na hẹn ẹn zun dòtin de to tẹmpli Jiwheyẹwhe ṣie tọn mẹ, podọ ewọ ma na tọ́n sọn e mẹ to aliho depope mẹ gbede, yẹn nasọ kàn oyín Jiwheyẹwhe ṣie tọn podọ oyín tòdaho Jiwheyẹwhe ṣie tọn, yèdọ Jelusalẹm yọyọ lọ he jẹte sọn olọn sọn Jiwheyẹwhe ṣie dè, po oyín yọyọ ṣie enẹ po do ewọ ji. 13  Mì gbọ mẹhe tindo otó ni sè nuhe gbigbọ to didọna agun lẹ.’ 14  “Podọ kanwehlan angẹli agun Laodikea tọn dọmọ: Ehe wẹ nuhe Niṣẹ,* kunnudetọ nugbonọ po nugbo po, mẹhe yin bẹjẹeji nudida Jiwheyẹwhe tọn lẹ tọn lọ dọ, 15  ‘Yẹn yọ́n walọ towe lẹ, dọ hiẹ ma miọn kavi hùnmiyọ́n. Yẹn jlo dọ hiẹ ni miọn kavi hùnmiyọ́n. 16  Enẹwutu, na hiẹ gblọ bo ma hùnmiyọ́n kavi miọn wutu, yẹn na slú we sọn onù ṣie mẹ. 17  Na hiẹ dọmọ: “Adọkunnọ wẹ yẹn bo ko jẹ adọkun bo masọ tindo nuhudo nudepope tọn paali” wutu, ṣigba bọ hiẹ ma yọnẹn dọ tapònọ, lèlènọ, wamọnọ, nukuntọ́nnọ wẹ hiẹ bosọ to omẹ́, 18  yẹn na we ayinamẹ nado họ̀ sika he yè kọ̀n to miyọ́n mẹ sọn dè e na hiẹ nido sọgan lẹzun adọkunnọ, podọ awugbó wewe lẹ na hiẹ nido sọgan sọnú na mẹdevo lẹ nikaa mọ omẹ́ towe bọ winyan na hù we, podọ nukun-masin nado sá do nukun towe lẹ na hiẹ nido sọgan mọnú. 19  “‘Mẹhe yẹn yiwanna lẹpo wẹ yẹn nọ wọhẹ bo nọ domẹplọnlọ yé go. Enẹwutu, yin zohunhunnọ bo lẹnvọjọ. 20  Pọ́n! Yẹn to ote to ohọ̀n ji bo to họ̀nhúhú. Eyin mẹdepope sè ogbè ṣie bo hùnhọ̀n, yẹn na biọ owhé etọn gbè bo na dù núdùdù whèjai tọn hẹ ẹ podọ ewọ hẹ yẹn. 21  Ewọ he gbawhàn wẹ yẹn na na dotẹnmẹ nado sinai hẹ mi to ofìn ṣie ji, yèdọ dile yẹn gbawhàn bo sinai hẹ Otọ́ ṣie to ofìn etọn ji do. 22  Mì gbọ mẹhe tindo otó ni sè nuhe gbigbọ to didọna agun lẹ.’”

Nudọnamẹ Odò Tọn

Osọ 3:14* Pọ́n Lo 1:25, nudọnamẹ odò tọn.