Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Osọhia 21:1-27

21  Yẹn sọ mọ olọn yọyọ de po aigba yọyọ de po; na olọn hoho lọ po aigba hoho lọ po ko juwayi, ohù masọ tin ba.  Yẹn mọ tòdaho wiwe lọ ga, yèdọ Jelusalẹm Yọyọ, to tejẹ sọn olọn sọn Jiwheyẹwhe dè bo yin awuwlena taidi asiyọyọ he yè doaṣọ́na na asu etọn.  Enẹwutu, yẹn sè ogbè lélé de sọn ofìn lọ kọ̀n dọmọ: “Mì pọ́n! Gòhọ Jiwheyẹwhe tọn tin to gbẹtọvi lẹ dè, ewọ nasọ nọhẹ yé, yé nasọ yin omẹ etọn lẹ. Podọ Jiwheyẹwhe lọsu na tin po yé po.  Ewọ nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.”  Podọ Omẹ lọ he sinai to ofìn ji dọmọ: “Pọ́n! Yẹn to onú lẹpo hẹn zun yọyọ.” Humọ, e dọmọ: “Kanwe, na ohó ehelẹ tindo jidide bo yin nugbo wutu.”  Ewọ sọ dọna mi dọmọ: “Yé ko yin hinhẹndi! Yẹn wẹ Alfa podọ Omega,* yèdọ bẹjẹeji po opodo po. Mẹdepope he nugbla to hùhù wẹ yẹn na na sọn asisa osin ogbẹ̀ tọn lọ mẹ vọnu.  Mẹdepope he gbawhàn wẹ na dugu onú ehelẹ tọn, yẹn nasọ yin Jiwheyẹwhe etọn bọ ewọ na yin visunnu ṣie.  Ṣigba, na nuhe dù butọnọ lẹ, mẹhe ma tindo yise lẹ, mẹhe yin awuhiọnu to dihó yetọn mẹ lẹ, hlọnhutọ lẹ, galọtọ lẹ, mẹhe nọ tindo mahẹ to afinyọnnuwiwa mẹ lẹ, boṣiọ-sẹ̀ntọ lẹ po lalonọ lẹpo po, otẹn yetọn na tin to agbàdo miyọ́n tọn he yí whèmi do to jiji lọ mẹ. Ehe nọtena okú awetọ.”  Podọ dopo to angẹli ṣinawe he tindo agbán ṣinawe he gọ́ na azọ̀nylankan ṣinawe he gbọngodo lọ lẹ mẹ wá, e sọ dọho hẹ mi bo dọmọ: “Wáfi, yẹn na do asiyọyọ lọ, yèdọ asi Lẹngbọvu lọ tọn hia we.” 10  Enẹwutu, e ze mi gbọn huhlọn gbigbọ tọn dali yì osó daho he yiaga taun de ji, e sọ do tòdaho wiwe lọ hia mi, yèdọ Jelusalẹm he to tejẹ sọn olọn sọn Jiwheyẹwhe dè 11  bo tindo gigo Jiwheyẹwhe tọn. Sisẹ́ etọn taidi zannu he họakuẹ taun de, taidi zannu jaspali he to sisẹ́ di klistali. 12  E tindo adó daho he yiaga taun de bo tindo họngbo wiawe, podọ angẹli wiawe tin to họngbo lọ lẹ ji, oyín whẹndo wiawe ovi Islaeli tọn lẹ tọn sọ yin kinkàn do họngbo lọ lẹ ji. 13  Họngbo atọ̀n to whèzẹtẹn, họngbo atọ̀n to agewaji, họngbo atọ̀n to hùwaji, podọ họngbo atọ̀n to whèyihọ. 14  Adó tòdaho lọ tọn sọ tindo zannu dodonu tọn wiawe ga, podọ oyín wiawe apọsteli wiawe Lẹngbọvu lọ tọn lẹ tọn yin kinkàn do yé go. 15  Todin, omẹ lọ he to hodọ hẹ mi hẹn ofánpò sika tọn de di nujlẹnu, na e nido sọgan jlẹ tòdaho lọ po họngbo etọn lẹ po gọna adó etọn. 16  Tòdaho lọ sọ sọzẹn to adà ẹnẹ lẹ mẹ, tedidi etọn po gbigblo etọn po sọ yin nudopolọ. E sọ yí ofánpò lọ do jlẹ tòdaho lọ, yèdọ stade fọtọ́n donu wiawe*; tedidi po gbigblo etọn po gọna jiyiyi etọn sọzẹn. 17  Humọ, e jlẹ adó etọn, yèdọ awagbà kantọ̀n-konukunẹnẹ,* sọgbe hẹ nujlẹnu gbẹtọ tọn, podọ angẹli tọn ga. 18  Todin, adó etọn yin didó po jaspali po, tòdaho lọ sọ yin sika akú taidi mẹpọ́nnu he mọnú gblegede de. 19  Dodonu adó tòdaho lọ tọn yin aṣọ́dona po zannu he họakuẹ wunmẹ lẹpo po: dodonu tintan yin jaspali, awetọ yin safili, atọ̀ntọ yin kalkedoni, ẹnẹtọ yin emẹlaldi, 20  atọ́ntọ yin sadoniki, ṣidopotọ yin saldiu, ṣinawetọ yin klisọlite, ṣinatọ̀ntọ yin belili, ṣinẹnẹtọ yin topazi, aotọ yin klizoplasu, widopotọ yin hayakintu podọ wiawetọ yin amẹtisti. 21  Humọ, họngbo wiawe lọ lẹ yin peali wiawe; dopodopo họngbo lọ lẹ tọn yin bibasi po peali dopodopo po. Alihogbó tòdaho lọ tọn sọ yin sika akú taidi mẹpọ́nnu he nọ mọnú jẹ awà awetọ ji. 22  Yẹn masọ mọ tẹmpli de to e mẹ, na Jehovah Jiwheyẹwhe Ganhunupotọ lọ po Lẹngbọvu lọ lọsu po wẹ tẹmpli etọn. 23  Tòdaho lọ masọ tindo nuhudo owhè tọn kavi osun tọn nado họ́n do e ji, na gigo Jiwheyẹwhe tọn wẹ to hinhọ́n na ẹn, podọ miyọ́ngbán etọn wẹ Lẹngbọvu lọ. 24  Akọta lẹ nasọ zinzọnlin to hinhọ́n etọn mẹ, podọ ahọlu aigba ji tọn lẹ na hẹn gigo yetọn wá e mẹ. 25  Họngbo etọn lẹ ma nasọ yin súsú gbede to okle, na ozán ma na nọ kú to finẹ paali. 26  Yé nasọ hẹn gigo po gbégbò akọta lẹ tọn po wá e mẹ. 27  Ṣigba, nudepope he ma yin wiwe podọ mẹdepope he hẹn awuhiọnu de podọ lalo de ma na biọ e mẹ to aliho depope mẹ; oyín mẹhe tọn yin kinkàn do owe-hihá ogbẹ̀ tọn Lẹngbọvu lọ tọn mẹ lẹ kẹdẹ wẹ na biọ e mẹ.

Nudọnamẹ Odò Tọn

Osọ 21:6 Alfa po Omega po yin wekun tintan po godo tọn po to wekun Glẹki tọn lẹ mẹ.
Osọ 21:16 Enẹ wẹ, nudi kilomẹtlu 2200. Stade dopo yin nujlẹpo Glẹki hohowhenu tọn de he tedidi etọn yin mẹtlu 185.
Osọ 21:17 Enẹ wẹ, nudi mẹtlu 64. Sọ pọ́n Nudọnamẹ Dogọ 11.