Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Osọhia 20:1-15

20  Yẹn sọ mọ angẹli de to tejẹ sọn olọn bo tindo họnhungan odò mapote tọn po gẹdẹ daho de po to alọ etọn mẹ.  E sọ wle dlagọni lọ, yèdọ odàn hoho lọ, he nọ yin Lẹgba podọ Satani, bo blá ẹ họ̀ owhe fọtọ́n.  E sọ dlan ẹn do odò mapote lọ mẹ bo sú i bosọ yí hiadonu do tlẹ́ ẹ, na e ni masọ klọ akọta lẹ ba blo kakajẹ opodo owhe fọtọ́n lọ tọn. To onú ehelẹ godo, e dona yin tuntundote na ojlẹ gli de.  Yẹn sọ mọ ofìn lẹ po mẹhe sinai to yé ji lẹ po, huhlọn sọ yin nina yé nado dawhẹ. Mọwẹ, yèdọ mẹhe* yè yí asiọvi do hù na kunnudide gando Jesu go podọ na hodidọ gando Jiwheyẹwhe go wutu lẹ, podọ mẹhe ma ko sẹ̀n gbekanlin lọ kavi boṣiọ etọn bo ma ko mọ ohia lọ yí do nukọn podọ do alọ yetọn go lẹ. Yé sọ gọwá ogbẹ̀ bo duahọlu hẹ Klisti na owhe fọtọ́n.  (Oṣiọ he pò lẹ ma gọwá ogbẹ̀ kakajẹ opodo owhe fọtọ́n lọ tọn.) Ehe wẹ fọnsọnku tintan.  Ayajẹnọ podọ wiwe wẹ mẹdepope he tindo mimá to fọnsọnku tintan lọ mẹ; omẹ ehelẹ ji wẹ okú awetọ ma tindo aṣẹ depope do, ṣigba yé na yin yẹwhenọ Jiwheyẹwhe tọn lẹ podọ Klisti tọn lẹ, yé nasọ duahọlu hẹ ẹ na owhe fọtọ́n.  Todin, tlolo he owhe fọtọ́n lọ na ko wá opodo, Satani na yin tuntundote sọn gànpa etọn mẹ,  e nasọ tọ́nyi nado klọ akọta lẹ to agosu ẹnẹ aigba tọn lẹ ji, yèdọ Gọgi podọ Magọgi, nado bẹ yé pli dopọ na awhàn. Sọha omẹ ehelẹ tọn na taidi tọkẹ́n ohù tọn.  Yé sọ gbàpe yì gbigblo aigba tọn pete ji bo lẹdo omẹ wiwe lẹ po tòdaho yiwanna lọ po pé. Ṣigba, miyọ́n jẹte sọn olọn bo fiọ yé. 10  Podọ Lẹgba he to kiklọ yé yin dindlan do agbàdo miyọ́n po whèmi po tọn mẹ, fie gbekanlin lọ po yẹwhegán lalo lọ po ko te; yé nasọ yin yasana to okle po ozán po kakadoi podọ doidoi. 11  Yẹn sọ mọ ofìn wewe daho de po omẹ lọ he sinai to e ji po. Aigba po olọn po họnyi sọn nukọn etọn, otẹn depope masọ yin mimọ na yé. 12  Yẹn sọ mọ oṣiọ lẹ, daho po pẹvi po, to ote to ofìn lọ nukọn, owe-hihá lẹ sọ yin hùnhùn. Ṣigba, owe-hihá devo yin hùnhùn; owe-hihá ogbẹ̀ tọn lọ wẹ. Oṣiọ lẹ sọ yin whẹdana sọn nuhe yin kinkàn do owe-hihá lọ lẹ mẹ lẹ mẹ sọgbe hẹ walọ yetọn lẹ. 13  Ohù sọ jo oṣiọ he tin to e mẹ lẹ, okú po Hadẹs* po sọ jo oṣiọ he tin to yé mẹ lẹ, dopodopo yetọn sọ yin whẹdana sọgbe hẹ walọ yetọn lẹ. 14  Podọ okú po Hadẹs* po yin dindlan do agbàdo miyọ́n tọn mẹ. Ehe nọtena okú awetọ, yèdọ agbàdo miyọ́n tọn. 15  Humọ, mẹdepope he oyín etọn ma yin kinkàn do owe ogbẹ̀ tọn lọ mẹ yin dindlan do agbàdo miyọ́n tọn lọ mẹ.

Nudọnamẹ Odò Tọn

Osọ 20:4* To paa mẹ, “alindọn.” Sọ pọ́n Nudọnamẹ Dogọ 7.
Osọ 20:13* Pọ́n Nudọnamẹ Dogọ 8.
Osọ 20:14* Pọ́n Nudọnamẹ Dogọ 8.