Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Osọhia 2:1-29

2  “Kanwehlan angẹli agun he tin to Efesu tọn dọmọ: Ehe wẹ nuhe mẹhe hẹn sunwhlẹvu ṣinawe lẹ to adusilọ etọn mẹ lọ dọ, yèdọ ewọ he to zọnlinzin to miyọ́ngbántin sika tọn ṣinawe lẹ ṣẹnṣẹn,  ‘Yẹn yọ́n walọ towe lẹ, tuklajẹ towe po akọndonanu towe po, dọ hiẹ ma sọgan kẹalọyi gbẹtọ ylankan lẹ, podọ hiẹ tẹ́n mẹhe ylọ yede dọ apọsteli, ṣigba bo ma yinmọ lẹ pọ́n, hiẹ sọ mọdọ yé yin lalonọ.  Hiẹ sọ to akọndonanu ga, podọ hiẹ ko doakọnnanu na oyín ṣie wutu bọ onú ma ṣikọna we.  Etomọṣo, yẹn tindo ehe sọta we, dọ hiẹ ko jo owanyi he a tindo to tintan whenu lọ do.  “‘Enẹwutu, flin nuhe hiẹ ko jodo, bo lẹnvọjọ bosọ zan walọ hoho tọn lẹ. Eyin hiẹ ma wàmọ, yẹn na wá dè we, podọ yẹn na de miyọ́ngbántin towe sẹ̀ sọn otẹn etọn mẹ, adavo hiẹ lẹnvọjọ.  Ṣogan, hiẹ tindo onú dagbe de, yèdọ hiẹ gbẹwanna walọ sinsẹ̀n klandovo Nikola tọn, ehe yẹnlọsu gbẹwanna.  Mì gbọ mẹhe tindo otó ni sè nuhe gbigbọ to didọna agun lẹ dọmọ: Ewọ he gbawhàn wẹ yẹn na na nado dù sọn atin ogbẹ̀ tọn lọ mẹ, ehe tin to paladisi Jiwheyẹwhe tọn mẹ.’  “Podọ kanwehlan angẹli agun he tin to Smana tọn dọmọ: Ehe wẹ nuhe mẹhe yin ‘Tintan podọ Godo tọn,’ he lẹzun oṣiọ bo gọwá ogbẹ̀ whladopo dogọ lọ dọ,  ‘Yẹn yọ́n nukunbibia po ohẹ́n towe po—ṣigba adọkunnọ wẹ hiẹ—podọ yẹn yọ́n nùzinzan mẹhe dọ dọ Ju wẹ yelọsu yin lẹ tọn, ṣogan yé ma yinmọ ṣigba sinagọgu Satani tọn de wẹ yé yin. 10  A dibuna nuhe hiẹ na jiya etọn to madẹnmẹ lẹ blo. Pọ́n! Lẹgba na to delẹ to mì mẹ bẹ do gànpamẹ mapote na mì nido sọgan yin whiwhlepọn to gigọ́ mẹ, podọ na mì nido sọgan tindo nukunbibia họ̀ azán ao. Do dewe hia di nugbonọ, yèdọ kakajẹ okú, yẹn nasọ na we jẹgbakun ogbẹ̀ tọn. 11  Mì gbọ mẹhe tindo otó ni sè nuhe gbigbọ to didọna agun lẹ dọmọ: Okú awetọ ma na gbleawuna ewọ he gbawhàn to aliho depope mẹ.’ 12  “Podọ kanwehlan angẹli agun he tin to Pagamu tọn dọmọ: Ehe wẹ nuhe ewọ he tindo ohí didá onù awenọ gaa lọ dọ, 13  ‘Yẹn yọ́n fihe hiẹ to ninọ, enẹ wẹ, fihe ofìn Satani tọn tin te; ṣogan hiẹ tẹdo oyín ṣie go gligli, bọ hiẹ ma mọ́n yise towe to yẹn mẹ etlẹ yin to azán Antipa tọn lẹ gbè, yèdọ kunnudetọ ṣie, nugbonọ lọ, mẹhe yin hùhù to nukun mìtọn mẹ, to fihe Satani to ninọ. 14  “‘Etomọṣo, yẹn tindo onú vude sọta we, dọ hiẹ tindo mẹhe to titẹdo nuplọnmẹ Balaami tọn go lẹ to finẹ, yèdọ mẹhe plọn Balaki nado ze zannu ahlìda tọn donukọnna ovi Islaeli tọn lẹ, nado dù onú he yin yíyí do sanvọ́ hlan boṣiọ lẹ podọ nado lọga. 15  Mọdopolọ, hiẹ lọsu ga tindo mẹhe to titẹdo nuplọnmẹ sinsẹ̀n klandovo Nikola tọn go lẹ. 16  Enẹwutu, lẹnvọjọ. Eyin hiẹ ma wàmọ, yẹn na wá dè we to niyaniya mẹ, yẹn nasọ yí ohí gaa he to onù ṣie mẹ do funawhàn hẹ yé. 17  “‘Mì gbọ mẹhe tindo otó ni sè nuhe gbigbọ to didọna agun lẹ dọmọ: Ewọ he gbawhàn wẹ yẹn na na delẹ to manna whiwhla lẹ mẹ, yẹn nasọ na ẹn zannu wewe pẹvi de, podọ to zannu pẹvi lọ ji wẹ oyín yọyọ de yin kinkàn do ehe mẹde ma yọnẹn adavo mẹhe mọ ẹn yí lọ.’ 18  “Podọ kanwehlan angẹli agun he tin to Tiatila tọn dọmọ: Ehe wẹ nuhe Visunnu Jiwheyẹwhe tọn, ewọ he nukun etọn lẹ taidi miyọ́n he to jiji de, bọ afọ etọn lẹ taidi gànvẹẹ dagbedagbe lọ dọ, 19  ‘Yẹn yọ́n walọ towe lẹ, owanyi, yise, lizọnyizọn po akọndonanu towe po, yẹn sọ yọnẹn dọ walọ towe agọe tọn lẹ yọnhu hoho tọn lẹ. 20  “‘Etomọṣo, yẹn tindo ehe sọta we, dọ hiẹ ko na dotẹnmẹ yọnnu enẹ, yèdọ Jezebẹli, he ylọ ede dọ yẹwhegán-yọnnu de, bọ ewọ nọ plọn afanumẹ ṣie lẹ bosọ nọ klọ yé nado lọga podọ nado nọ dù nuhe yè yí do sanvọ́ hlan boṣiọ lẹ. 21  Yẹn sọ na ẹn dotẹnmẹ nado lẹnvọjọ, ṣigba ewọ ma to jijlo nado lẹnvọjọ sọn galilọ etọn mẹ. 22  Pọ́n! Yẹn na dlan ẹn do azọ̀nzàn ji to madẹnmẹ, podọ mẹhe to galọ hẹ ẹ lẹ do nukunbibia daho mẹ, adavo yé lẹnvọjọ sọn walọ he taidi etọn nkọ lẹ mẹ. 23  Podọ ovi etọn lẹ wẹ yẹn na yí awutu ylankan do hù, sọmọ bọ agun lọ lẹpo na yọnẹn dọ yẹn wẹ mẹhe nọ gbeje ayi lẹ po ahun lẹ po pọ́n, yẹn nasọ na dopodopo mìtọn sọgbe hẹ walọ mìtọn lẹ. 24  “‘Ṣigba, yẹn dọna mì mẹhe pò to Tiatila lẹpo he ma tindo nuplọnmẹ ehe, yèdọ mì mẹhe ma ko yọ́n “onú sisosiso Satani tọn lẹ,” dile yé dọ do dọmọ: Yẹn ma na doagban pinpẹn devo depope do mì ji. 25  Adavo dọ mì ni tẹdo nuhe mì tindo lọ go kaka yẹn nado wá. 26  Podọ ewọ he gbawhàn bo tẹdo aliho ṣie lẹ go kakajẹ opodo wẹ yẹn na na aṣẹ do akọta lẹ ji, 27  ewọ nasọ yí opò ogàn tọn do plan gbẹtọ lẹ taidi lẹngbọhọtọ de sọmọ bọ yé na yin gbigbà hányán taidi núzinzan okò tọn lẹ, kẹdẹdile yẹn ko mọ aṣẹ yí sọn Otọ́ ṣie dè do, 28  yẹn nasọ na ewọ sunwhlẹvu afọnnu tọn. 29  Mì gbọ mẹhe tindo otó ni sè nuhe gbigbọ to didọna agun lẹ.’

Nudọnamẹ Odò Tọn