Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Osọhia 19:1-21

19  To onú ehelẹ godo, yẹn sè nuhe taidi ogbè lélé angẹli susu tọn to olọn mẹ. Yé dọmọ: “Mì pà Jah, mì gbẹtọ lẹ emi! Jiwheyẹwhe mítọn tọn wẹ whlẹngán, gigo po huhlọn po,  na nugbo po dodo po wẹ whẹdida etọn lẹ wutu. Na e ko hẹn whẹdida ṣẹ do galọtọ daho lọ he ko yí galilọ etọn do hẹn aigba gblezọn lọ ji, ewọ ko sọ yiahọsu ohùn afanumẹ etọn lẹ tọn to e go.”  Yé sọ dọ whla awetọ to afọdopolọji dọmọ: “Mì pà Jah, mì gbẹtọ lẹ emi! Azọ̀ etọn sọ to tìtì kakadoi podọ doidoi.”  Podọ mẹho konukunẹnẹ lọ lẹ po mẹdida ẹnẹ lọ lẹ po ṣinyọ́n nukunmẹ yetọn ai bo sẹ̀n Jiwheyẹwhe he sinai to ofìn lọ ji, bosọ dọmọ: “Niṣẹ!* Mì pà Jah, mì gbẹtọ lẹ emi!”  Humọ, ogbè de dọnú sọn ofìn lọ kọ̀n bo dọmọ: “Mì to Jiwheyẹwhe mítọn pà, mì afanumẹ etọn lẹpo emi, mì he dibusi i lẹ, yèdọ pẹvi po daho po.”  Yẹn sọ sè nuhe taidi ogbè angẹli susu tọn, podọ taidi nudidọ osin susu tọn, podọ taidi nudidọ sinsinyẹn hẹviosò lẹ tọn. Yé dọmọ: “Mì pà Jah, mì gbẹtọ lẹ emi, na Jehovah Jiwheyẹwhe mítọn, Ganhunupotọ lọ ko jẹ gandu ji taidi ahọlu.  Mì gbọ mí ni jaya bo gọ́ na ayajẹ susu, mì sọ gbọ mí ni na gigo e, na alọwle Lẹngbọvu lọ tọn ko wá podọ asi etọn ko wleawuna ede.  Mọwẹ, yè ko nagbè e nado yí alavọ dagbedagbe he to sisẹ́ bosọ wé do doaṣọ́, na alavọ dagbedagbe lọ nọtena azọ́n dodo omẹ wiwe lẹ tọn.”  E sọ dọna mi dọ: “Kanwe dọmọ: Ayajẹnọ wẹ mẹhe yin oylọ-basina wá núdùdù whèjai alọwle Lẹngbọvu lọ tọn.” Humọ, e dọna mi dọmọ: “Ohó nugbo Jiwheyẹwhe tọn wẹ ehelẹ.” 10  Enẹwutu, yẹn ṣinyọ́n nukunmẹ ai to afọ etọn lẹ kọ̀n nado sẹ̀n ẹn. Ṣigba, e dọna mi dọmọ: “Ṣọ́ dewe! A wàmọ blo! Afanumẹ de poun wẹ yẹn kẹdẹdi hiẹ po mẹmẹsunnu towe lẹ po he tindo azọ́n kunnudide gando Jesu go tọn. Sẹ̀n Jiwheyẹwhe; na kunnudide gando Jesu go wẹ lẹndai dọdai lẹ tọn.” 11  Yẹn sọ mọ olọn hùndonuvo, podọ pọ́n! osọ́ wewe de. Mẹhe sọ sinai to e ji nọ yin yiylọdọ Nugbonọ podọ Nugbo, ewọ sọ nọ dawhẹ bosọ nọ funawhàn to dodo mẹ. 12  Nukun etọn lẹ yin miyọ́n he to jiji de, jẹgbakun susu sọ tin to ota na ẹn. Oyín de yin kinkàn do e go he mẹdepope ma yọnẹn adavo ewọ lọsu, 13  e sọ dó awugbó de he go ohùn yin húnhúnhún do, podọ ewọ nọ yin yiylọdọ Ohó Jiwheyẹwhe tọn. 14  Humọ, awhànpa he to olọn mẹ lẹ to hihodo e to osọ́ wewe lẹ ji, yé sọ dó alavọ dagbedagbe wewe de, he wé-ṣeke. 15  Podọ ohí didá gaa de tọ́n sọn onù etọn mẹ, na e nido yí i do hò akọta lẹ, e nasọ yí opò ogàn tọn do dugán* do yé ji. E sọ tùnafọ ovẹn sinsẹ́n lẹ ji to ovẹn-finyọ́ndo adi homẹgble Jiwheyẹwhe Ganhunupotọ lọ tọn mẹ. 16  E sọ tindo oyín de he yin kinkàn do awugbó etọn go to asapada etọn go dọ, Ahọlu ahọlu lẹ tọn podọ Oklunọ oklunọ lẹ tọn. 17  Yẹn sọ mọ angẹli de to ote to hinhọ́n owhè tọn mẹ, e sọ yí ogbè lélé do dawhá bo dọ hlan ohẹ̀ he nọ zlọn to agahomẹ lẹpo dọmọ: “Mì wáfi, mì pli dopọ na núdùdù daho whèjai tọn Jiwheyẹwhe tọn, 18  na mì nido dù agbasalan ahọlu lẹ tọn, agbasalan awhàngán daho lẹ tọn, agbasalan omẹ huhlọnnọ lẹ tọn, agbasalan osọ́ lẹ tọn po mẹhe sinai to yé ji lẹ tọn po, podọ agbasalan mẹlẹpo tọn, mẹhe to yedekannu lẹ tọn po afanumẹ lẹ tọn po, yèdọ pẹvi po daho po.” 19  Yẹn sọ mọ gbekanlin lọ po ahọlu aigba ji tọn lẹ po gọna awhànpa yetọn lẹ pli dopọ nado funawhàn hẹ omẹ lọ he sinai to osọ́ ji podọ hẹ awhànpa etọn. 20  Gbekanlin lọ yin wiwle gọna yẹwhegán lalo he basi ohia lẹ to nukọn etọn, yèdọ ehe e yí do klọ mẹhe mọ ohia gbekanlin lọ tọn yí lẹ po mẹhe nọ sẹ̀n boṣiọ etọn lẹ po. Yé omẹ awe lẹ yin dindọn dlan gbẹ̀te do agbàdo miyọ́n tọn he yí whèmi do to jiji lọ mẹ. 21  Ṣigba, mẹhe pò lẹ wẹ yè yí ohí gaa omẹ lọ he sinai to osọ́ ji tọn, yèdọ ohí lọ he tọ́njẹgbonu sọn onù etọn mẹ do hù. Podọ ohẹ̀ lẹpo wẹ dù agbasalan yetọn gọ́ho.

Nudọnamẹ Odò Tọn

Osọ 19:4* Pọ́n Lo 1:25, nudọnamẹ odò tọn.
Osọ 19:15* To paa mẹ, “yìn.”