Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Osọhia 16:1-21

16  Yẹn sọ sè ogbè lélé de sọn fiwiwe lọ he dọna angẹli ṣinawe lọ lẹ dọmọ: “Mì yì bo kọ̀n agbán homẹgble Jiwheyẹwhe tọn ṣinawe lẹ do aigba ji.”  Tintan sọ yì bo kọ̀n nuhe to agbán etọn mẹ do aigba ji. Agàdá ylankan podọ yinyọ̀n de sọ kọnyìn mẹhe tindo ohia gbekanlin lọ tọn bo to boṣiọ etọn sẹ̀n lẹ go.  Awetọ sọ kọ̀n nuhe to agbán etọn mẹ do ohù mẹ. E sọ diọ zun ohùn he taidi omẹ kúkú de tọn, podọ alindọn gbẹ̀te lẹpo kú, mọwẹ, yèdọ nuhe to ohù mẹ lẹ.  Atọ̀ntọ sọ kọ̀n nuhe to agbán etọn mẹ do tọ̀sisa lẹ po asisa osin tọn lẹ po mẹ. Yé sọ diọ zun ohùn.  Yẹn sọ sè bọ angẹli he tindo aṣẹ do osin lẹ ji dọmọ: “Hiẹ, Omẹ lọ he tin bo ko tin, yèdọ Omẹ nugbonọ lọ wẹ dodonọ, na hiẹ ko basi nudide ehelẹ wutu,  na yé ko sọ̀n ohùn omẹ wiwe lẹ tọn po yẹwhegán lẹ tọn po dai wutu bọ hiẹ ko na yé ohùn nado nù. Yé jẹna ẹn.”  Yẹn sọ sè bọ agbà lọ dọmọ: “Mọwẹ, Jehovah Jiwheyẹwhe, Ganhunupotọ, nugbo po dodo po wẹ nudide whẹdida tọn towe lẹ.”  Ẹnẹtọ sọ kọ̀n nuhe to agbán etọn mẹ do owhè ji; yè sọ nagbè owhè nado yí miyọ́n do mẹ̀n gbẹtọ lẹ.  Yozò sinsinyẹn sọ mẹ̀n gbẹtọ lẹ, ṣigba yé zánnu do oyín Jiwheyẹwhe, mẹhe tindo aṣẹ do azọ̀nylankan ehelẹ ji tọn go, yé masọ lẹnvọjọ nado na gigo e. 10  Atọ́ntọ sọ kọ̀n nuhe to agbán etọn mẹ do ofìn gbekanlin lọ tọn ji. Ahọluduta etọn sọ dozinvlu, yé sọ jẹ adúhẹn odẹ́ yedetiti tọn ji na awufiẹsa wutu, 11  ṣigba yé zánnu do Jiwheyẹwhe olọn tọn go na awufiẹsa yetọn lẹ podọ na agàdá yetọn lẹ wutu, yé masọ lẹnvọjọ sọn azọ́n yetọn lẹ mẹ. 12  Ṣidopotọ sọ kọ̀n nuhe to agbán etọn mẹ do otọ̀ daho Euflate tọn mẹ, osin etọn sọ hú, na yè nido wleawuna aliho na ahọlu lẹ sọn whèzizẹ. 13  Yẹn sọ mọ ohó gbọdo mawé atọ̀n he taidi opàn lẹ tọ́n sọn onù dlagọni lọ tọn mẹ podọ sọn onù gbekanlin lọ tọn mẹ podọ sọn onù yẹwhegán lalo lọ tọn mẹ. 14  Na nugbo tọn, ehelẹ wẹ ohó he yin gbigbọdo gbọn aovi lẹ dali he to ohia lẹ basi, yé sọ yì ahọlu aigba fininọ lẹpo tọn lẹ dè, nado bẹ yé pli dopọ na awhàn azán daho Jiwheyẹwhe Ganhunupotọ lọ tọn. 15  “Pọ́n! Yẹn ja taidi ajotọ de. Ayajẹnọ wẹ omẹ lọ he gbọṣi nukle bo whlá awugbó etọn lẹ, na e nikaa zinzọnlin matin awugbó* bọ gbẹtọ lẹ na mọ winyan etọn.” 16  Yé sọ bẹ yé pli dopọ do fihe nọ yin yiylọ to Heblugbe mẹ dọ Amagẹdọni. 17  Ṣinawetọ sọ kọ̀n nuhe to agbán etọn mẹ do jẹhọn mẹ. To whenẹnu, ogbè lélé de dọnú sọn fiwiwe lọ podọ sọn ofìn lọ kọ̀n bo dọmọ: “E ko vọ̀!” 18  Podọ abì lẹ, ogbè lẹ po hẹviosò lẹ po sọ wá aimẹ, aigba sisọsisọ daho de sọ jọ ehe nkọ ma ko jọ sọn whenue gbọ́n gbẹtọ lẹ ko tin to aigba ji, yèdọ aigba sisọsisọ daho, he sinyẹn tlala de. 19  Podọ otò daho lọ má do atọ̀n ji, tòdaho akọta lẹ tọn lẹ sọ họliai; Babilọni Daho lọ sọ yin finflin to Jiwheyẹwhe nukọn, nado na ẹn kọfo ovẹn adi homẹgble etọn tọn. 20  Humọ, lopo lẹpo họnyi, osó lẹ masọ yin mimọ. 21  Podọ kẹnsu daho de he agó etọn dopodopo pẹ̀n sọ talẹnti* de ja sọn olọn do gbẹtọ lẹ ji, gbẹtọ lẹ sọ zánnu do Jiwheyẹwhe go na azọ̀nylankan kẹnsu tọn lọ wutu, na azọ̀nylankan enẹ sinyẹn tlala wutu.

Nudọnamẹ Odò Tọn

Osọ 16:15* To paa mẹ, “zinzọnlin to omẹ́.” Hogbe Glẹki tọn gumnọs sọ nọ zẹẹmẹdo awù odò tọn kẹdẹ didó poun.
Osọ 16:21* Nudi kilo 20,4. Sọ pọ́n Nudọnamẹ Dogọ 11.