Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Osọhia 1:1-20

1  Osọhia de gbọn Jesu Klisti dali, ehe Jiwheyẹwhe na ẹn, nado do nuhe dona jọ to madẹnmẹ lẹ hia afanumẹ etọn lẹ. Jesu sọ do angẹli etọn hlan nado ze e donukọnna afanumẹ etọn Johanu gbọn ohia lẹ yiyizan dali,  mẹhe dekunnu gando ohó lọ he Jiwheyẹwhe na go podọ gando kunnudide he Jesu Klisti na lọ go, yèdọ gando nuhe e mọ lẹpo go.  Ayajẹnọ wẹ ewọ he nọ hia po ogbè lélé po, podọ mẹhe nọ sè ohó dọdai ehe tọn lẹ, podọ mẹhe nọ payi nuhe yin kinkàn do e mẹ go lẹ; na ojlẹ dide lọ ko sẹpọ.  Johanu, hlan agun ṣinawe he tin to Asia* lẹ: Na mì ni tindo nukundagbe majẹhẹ po jijọho po sọn “Ewọ he tin bo ko tin bosọ ja lọ” dè, podọ sọn gbigbọ ṣinawe he tin to ofìn etọn nukọn lọ lẹ dè,  podọ sọn Jesu Klisti, yèdọ “Kunnudetọ Nugbonọ lọ,” “Mẹhe yin plọnji sọn oṣiọ lẹ mẹ,” podọ “Ogán ahọlu aigba ji tọn lẹ tọn lọ” dè. Hlan ewọ he yiwanna mí bo tún mí dote sọn ylando mítọn lẹ mẹ gbọn ohùn edetiti tọn dali—  podọ e yí mí do duahọlu podọ yẹwhenọ lẹ hlan Jiwheyẹwhe etọn podọ Otọ́ etọn—mọwẹ, gigo po hlọnhlọn po ni tin hlan ẹn kakadoi. Niṣẹ.*  Pọ́n! Ewọ ja po aslọ lẹ po, bọ nukun lẹpo wẹ na mọ ẹn, gọna mẹhe sọwhán ẹn lẹ; podọ hẹnnu aigba tọn lẹpo na do awubla hia na ewọ tọn wutu. Mọwẹ, Niṣẹ.  “Yẹn wẹ Alfa podọ Omega,”* wẹ Jehovah Jiwheyẹwhe, “Mẹhe tin bo ko tin bosọ ja, yèdọ Ganhunupotọ lọ” dọ.  Yẹn Johanu, mẹmẹsunnu mìtọn podọ mimátọ de hẹ mì to nukunbibia mìtọn mẹ podọ to ahọluduta mìtọn mẹ podọ to akọndonanu mìtọn mẹ to kọndopọ mẹ hẹ Jesu, yèdọ yẹn mẹhe wá tin to lopo he nọ yin yiylọdọ Patmos ji na hodidọ gando Jiwheyẹwhe go podọ na kunnudide gando Jesu go wutu. 10  To gbọdo glọ, yẹn wá tin to azán Oklunọ tọn gbè, yẹn sọ sè ogbè huhlọnnọ de he taidi opẹ̀n de tọn sọn godo ṣie, 11  dọmọ: “Nuhe hiẹ mọ, kàn ẹn do owe-hihá de mẹ bo do e hlan agun ṣinawe lẹ, to Efesu, to Smana, to Pagamu, to Tiatila, to Sadi, to Filadẹlfia podọ to Laodikea.” 12  Yẹn sọ lẹgodo nado pọ́n mẹhe ogbè etọn to hodọ hẹ mi lọ, podọ, to whenue yẹn lẹgodo, yẹn mọ miyọ́ngbántin sika tọn ṣinawe, 13  podọ mẹde he taidi visunnu gbẹtọ tọn tin to ṣẹnṣẹn miyọ́ngbántin lọ lẹ tọn, bo dó awù he yìdo jẹ afọkọ de, bosọ yí homẹblanu sika tọn de do sìn akọ́nnu. 14  Humọ, ota etọn po oda etọn po wé taidi lẹngbọ-fún wewe, yèdọ taidi osin-agó, bọ nukun etọn lẹ taidi miyọ́n he to jiji; 15  podọ afọ etọn lẹ taidi gànvẹẹ dagbedagbe he to sisẹ́ to zòhọ de mẹ; ogbè etọn sọ taidi nudidọ osin susu tọn. 16  Ewọ sọ tindo sunwhlẹvu ṣinawe to adusilọ etọn mẹ, ohí didá onù awenọ gaa de sọ to tintọ́n sọn onù etọn mẹ, podọ nukunmẹ etọn taidi owhè he to sisẹ́ mlanmlan. 17  Podọ to whenue yẹn mọ ẹn, yẹn họ́jai to afọ etọn lẹ kọ̀n taidi oṣiọ. Ewọ sọ ze adusilọ etọn do oji e bo dọmọ: “A dibu blo. Yẹn wẹ Tintan podọ Godo tọn, 18  podọ mẹhe to ogbẹ̀; yẹn sọ lẹzun oṣiọ, ṣigba, pọ́n! yẹn to ogbẹ̀ kakadoi podọ doidoi, yẹn sọ tindo họnhungan okú po Hadẹs* po tọn lẹ. 19  Enẹwutu, kàn nuhe hiẹ mọ lẹ dai, podọ nuhe to jijọ todin lẹ gọna nuhe na wá jọ to ehelẹ godo lẹ. 20  Na nuhe dù aṣli wiwe sunwhlẹvu ṣinawe he hiẹ mọ to adusilọ ṣie mẹ lẹ podọ miyọ́ngbántin sika tọn ṣinawe lọ lẹ tọn: Sunwhlẹvu ṣinawe lọ lẹ nọtena angẹli agun ṣinawe lọ lẹ tọn, podọ miyọ́ngbántin ṣinawe lọ lẹ nọtena agun ṣinawe lọ lẹ.

Nudọnamẹ Odò Tọn

Osọ 1:4* Pọ́n Ow 2:9, nudọnamẹ odò tọn.
Osọ 1:6* Pọ́n Lo 1:25, nudọnamẹ odò tọn.
Osọ 1:8* Alfa po Omega po yin wekun tintan po godo tọn po to wekun Glẹki tọn lẹ mẹ.
Osọ 1:18* Pọ́n Nudọnamẹ Dogọ 8.