Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Lomunu lẹ 9:1-33

9  Nugbo wẹ yẹn to didọ to Klisti mẹ; yẹn ma to lalodo, na ayihadawhẹnamẹnu ṣie gbọn gbigbọ wiwe dali do to kunnude na mi,  dọ yẹn tindo awubla daho po awufiẹsa po to ahun ṣie mẹ to whepoponu.  Na yẹn na ko jlo dọ yẹnlọsu ni yin kinklandovo sọn Klisti go taidi mẹhodẹ̀do do ota mẹmẹsunnu ṣie lẹ tọn mẹ, yèdọ hẹnnumẹ ṣie lẹ to agbasa-liho,  mẹhe gbọnmọ dali do yin Islaelivi lẹ, mẹhe tọn sọdodovi, gigo, alẹnu lẹ, Osẹ́n lọ ninamẹ, sinsẹ̀nzọn wiwe po opagbe lẹ po yin;  mẹhe tọn tọgbo lẹ yin podọ sọn mẹhe dè Klisti wá sọn to agbasa-liho: Jiwheyẹwhe, mẹhe tindo aṣẹ do onú lẹpo ji, ni yin pipà kakadoi. Niṣẹ.*  Etomọṣo, e ma yindọ ohó Jiwheyẹwhe tọn ko gboawupo wẹ gba. Na e ma yin mẹhe yin jiji gbọn Islaeli dali lẹpo wẹ yin “Islaeli” na taun tọn gba.  Mọdopolọ, e ma yindọ yé yin okún Ablaham tọn wẹ zọ́n bọ yemẹpo do yin ovi etọn lẹ gba, ṣigba: “Mẹhe na yin yiylọdọ ‘okún towe’ na yin gbọn Isaki gblamẹ.”  Enẹ wẹ yindọ, ovi lẹ to agbasa-liho ma nọ yin ovi Jiwheyẹwhe tọn lẹ na taun tọn gba, ṣigba ovi opagbe tọn lẹ wẹ nọ yin pinpọnhlan taidi okún lọ.  Na ohó opagbe tọn lọ dọmọ: “To ojlẹ dide lọ mẹ, yẹn na wá bọ Sala na tindo visunnu de.” 10  Ṣogan, e ma yin to whẹho enẹ kẹdẹ mẹ, ṣigba to whenue Lebeka mọhò ahoho lẹ tọn sọn dawe lọ, yèdọ Isaki tọgbo mítọn dè ga: 11  na sọn whenue gbọ́n yé ma ko yin jiji kavi ma ko wà onú dagbe kavi ylankan depope, na lẹndai Jiwheyẹwhe tọn gando dide yé go nido sọgan zindonukọn, e ma yin sinai do azọ́n lẹ ji, ṣigba do Omẹ lọ he nọ ylọ omẹ ji, 12  wẹ e ko dọna ẹn dọmọ: “Mẹho lọ na yin afanumẹ na yọpọ lọ.” 13  Kẹdẹdile e ko yin kinkàndai do dọmọ: “Yẹn yiwanna Jakọbu, ṣigba Esau wẹ yẹn gbẹwanna.” 14  To whelọnu lo, etẹwẹ mí na dọ? Be whẹdida mawadodo tin to Jiwheyẹwhe dè wẹ ya? Ni ma yinmọ gbede blo! 15  Na e dọna Mose dọmọ: “Yẹn na do lẹblanu hia mẹdepope he yẹn de nado do lẹblanu hia, podọ yẹn na do awuvẹmẹ hia mẹdepope he yẹn de nado do awuvẹmẹ hia.” 16  Enẹwutu, to whelọnu lo, nado de omẹ, e ma nọ sinai do mẹhe to jijlo kavi mẹhe to wezundo ji gba, ṣigba do Jiwheyẹwhe, he nọ do lẹblanu hia lọ ji. 17  Na Owe-wiwe dọ gando Falo go dọmọ: “Na ehe wutu wẹ yẹn ko hẹn we gbọṣi aimẹ, na yẹn nido sọgan gbọn hiẹ dali do huhlọn ṣie hia, podọ na oyín ṣie nido sọgan yin lilá to aigba lẹpo ji.” 18  Enẹwutu, to whelọnu lo, mẹhe e jlo wẹ e nọ do lẹblanu hia, ṣigba mẹhe e jlo wẹ e nọ dike e ni lẹzun tasinyẹntọ. 19  Enẹwutu, hiẹ na dọna mi dọmọ: “Naegbọn ewọ gbẹ́ pò to nuṣiwa dín? Na mẹnu wẹ ko jẹagọdo ojlo etọn he họnwun?” 20  To whelọnu lo, hiẹ dawe, mẹnu wẹ hiẹ yin na taun tọn nado nọ to gbèdána Jiwheyẹwhe? Be nuhe yin bibasi na dọna mẹhe basi i dọ, “Naegbọn hiẹ do basi mi to aliho ehe mẹ?” 21  Be hiẹ ma yọnẹn dọ zẹ́ndotọ wẹ nọ tindo aṣẹ do okò ji nado basi núzinzan de na yizan yẹyi tọn podọ devo na yizan madoyẹyi tọn sọn okọ́ yinyan dopolọ mẹ ya? 22  Todin, dile etlẹ yindọ Jiwheyẹwhe tindo ojlo nado do homẹgble etọn hia podọ nado hẹn huhlọn etọn zun yinyọnẹn, eyin e gbọn linsinsinyẹn susu dali na dotẹnmẹ núzinzan homẹgble tọn lẹ he jẹna vasudo, 23  na ewọ nido sọgan hẹn gigo susugege etọn zun yinyọnẹn do núzinzan lẹblanu tọn lẹ ji, he e ko wleawuna jẹnukọn, na gigo, 24  enẹ wẹ míwlẹ, mẹhe e ylọ, e ma yin sọn Ju lẹ kẹdẹ ṣẹnṣẹn gba, ṣigba sọn akọta lẹ ṣẹnṣẹn ga, etẹwẹ na yin mimọdọ do enẹ go lo? 25  Kẹdẹdile ewọ dọ to Hosea mẹ do ga dọmọ: “Mẹhe ma yin omẹ ṣie lẹ wẹ yẹn na ylọdọ ‘omẹ ṣie lẹ,’ podọ yọnnu he ma yin mẹyiwanna dọ ‘mẹyiwanna’; 26  podọ fihe e yin didọna yé te dọ, ‘Mì ma yin omẹ ṣie lẹ,’ finẹ wẹ yé na yin yiylọ te dọ ‘visunnu Jiwheyẹwhe ogbẹ̀nọ tọn lẹ.’” 27  Humọ, Isaia yí ogbè lélé do dọ gando Islaeli go dọmọ: “Dile etlẹ yindọ sọha ovi Islaeli tọn lẹ tọn sọgan sù taidi tọkẹ́n ohù tọn, pipotọ de wẹ na yin whinwhlẹngán. 28  Na Jehovah na dawhẹ to aigba ji, bo dotana ẹn bosọ sán ẹn dogli.” 29  Humọ, kẹdẹdile Isaia ko dọ jẹnukọn do dọmọ: “Eyin Jehovah awhànpa lẹ tọn ma ko jo okún de dai na mí, mí na ko lẹzun Sodọmi nkọ, podọ mí na ko yin hinhẹn zun Gomọla nkọ.” 30  To whelọnu lo, etẹwẹ mí na dọ? Dile etlẹ yindọ omẹ akọta lẹ tọn, he ma nọ doafọna dodowiwa, mọ dodowiwa yí, yèdọ dodowiwa he yise nọ hẹnwa; 31  ṣigba dile Islaeli tlẹ nọ to afọdona osẹ́n dodowiwa tọn de, yé ma jẹ yanwle osẹ́n lọ tọn kọ̀n. 32  Na whẹwhinwhẹ́n tẹ wutu? Na e doafọna ẹn, e ma yin gbọn yise dali, ṣigba taidi gbọn azọ́n lẹ dali. Yé dahli to “zannu ahlidida tọn” lọ ji; 33  dile e yin kinkàndai do dọmọ: “Pọ́n! Yẹn to zannu ahlidida tọn po osé gángán afọklẹn tọn de po zedai to Ziọni, ṣigba ewọ he ze yise etọn sinai do e ji ma na jẹflumẹ.”

Nudọnamẹ Odò Tọn

Lo 9:5* Pọ́n Lo 1:25, nudọnamẹ odò tọn.