Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Lomunu lẹ 8:1-39

8  Enẹwutu, mẹhe tin to kọndopọ mẹ hẹ Klisti Jesu lẹ ma tindo whẹgbledomẹ depope.  Na osẹ́n gbigbọ he nọ namẹ ogbẹ̀ to kọndopọ mẹ hẹ Klisti Jesu lọ tọn ko tún we dote sọn osẹ́n ylando tọn po okú tọn po mẹ.  Na enẹ he Osẹ́n lọ ma penugo nado wà, na e yin madogánnọ gbọn agbasalan gblamẹ wutu, Jiwheyẹwhe ko wà ẹ, bo do Visunnu etọn titi hlan to awusọhia he taidi gbẹtọvi* lẹ tọn mẹ nado de ylando sẹ̀. Podọ gbọnmọ dali, e gblewhẹdo ylando to agbasalan mẹ,  na nubiọtomẹsi dodo tọn Osẹ́n lọ tọn nido sọgan yin hinhẹndi to míwlẹ mẹ, yèdọ mí mẹhe to zọnlinzin, e ma yin to kọndopọ mẹ hẹ agbasalan, ṣigba to kọndopọ mẹ hẹ gbigbọ.  Na yé he tin to kọndopọ mẹ hẹ agbasalan nọ ze ayiha yetọn do onú agbasalan tọn lẹ ji, ṣigba yé he tin to kọndopọ mẹ hẹ gbigbọ do onú gbigbọ tọn lẹ ji.  Na ayiha zizedo agbasalan ji nọ dekọtọn do okú mẹ, ṣigba ayiha zizedo gbigbọ ji nọ dekọtọn do ogbẹ̀ po jijọho po mẹ;  na ayiha zizedo agbasalan ji nọ dekọtọn do okẹ̀n mẹ hẹ Jiwheyẹwhe, na e ma nọ yin mẹmẹglọ na osẹ́n Jiwheyẹwhe tọn, mọdopolọ e masọ sọgan wàmọ.  Enẹwutu, mẹhe tin to kọndopọ mẹ hẹ agbasalan ma sọgan hẹn homẹ Jiwheyẹwhe tọn hùn.  Ṣigba, eyin gbigbọ Jiwheyẹwhe tọn nọ nọ̀ mì mẹ nugbonugbo, mìwlẹ tin to kọndopọ mẹ, e ma yin hẹ agbasalan, ṣigba hẹ gbigbọ. Ṣigba, eyin mẹdepope ma tindo gbigbọ Klisti tọn, mẹlọ ma yin ewọ tọn. 10  Ṣigba, eyin Klisti tin to kọndopọ mẹ hẹ mì, na nugbo tọn, agbasa yin oṣiọ na ylando wutu, ṣigba gbigbọ nọ namẹ ogbẹ̀ na dodowiwa wutu. 11  Todin, eyin gbigbọ omẹ lọ he fọ́n Jesu sọn oṣiọ lẹ mẹ tọn nọ nọ̀ mì mẹ, ewọ he fọ́n Klisti Jesu sọn oṣiọ lẹ mẹ nasọ hẹn agbasa mìtọn he nọ kú gọwá ogbẹ̀ gbọn gbigbọ etọn he nọ nọ̀ mì mẹ lọ gblamẹ. 12  Enẹwutu, to whelọnu lo, mẹmẹsunnu lẹ emi, mí ma to dandannu glọ nado nọgbẹ̀ to kọndopọ mẹ hẹ agbasalan bo wà ojlo etọn lẹ; 13  na eyin mì nọ nọgbẹ̀ to kọndopọ mẹ hẹ agbasalan, e họnwun dọ mì na kú; ṣigba eyin mì gbọn gbigbọ dali do hù azọ́n agbasalan tọn lẹ, mì na nọgbẹ̀. 14  Na mẹhe yin anadena gbọn gbigbọ Jiwheyẹwhe tọn dali lẹpo, yewlẹ wẹ visunnu Jiwheyẹwhe tọn lẹ. 15  Na mìwlẹ ma mọ gbigbọ afanumẹ-yinyin tọn he sọ nọ hẹn obu wá yí gba, ṣigba gbigbọ sọdodovi tọn de wẹ mì mọyi, yèdọ gbigbọ he nọ whàn mí nado dawhá dọmọ: “Abba,* Otọ́!” 16  Gbigbọ lọ lọsu nọ dekunnu hẹ gbigbọ mítọn dọ ovi Jiwheyẹwhe tọn lẹ wẹ mí yin. 17  To whenẹnu, eyin ovi lẹ wẹ mí yin, be mí sọ yin gudutọ lẹ ga: na nugbo tọn, gudutọ Jiwheyẹwhe tọn lẹ, ṣigba gudutọgbẹ́ lẹ hẹ Klisti, eyin mí jiya dopọ hẹ ẹ, mí nasọ yin gigopana dopọ hẹ ẹ ga. 18  Enẹwutu, yẹn mọdọ yajiji ojlẹ ehe tọn lẹ ma sọ̀ nude eyin yè yí yé jlẹdo gigo he na wá yin didehia to mí mẹ lọ go. 19  Na nukundido vẹkuvẹku nudida tọn to tenọpọn awusọhia visunnu Jiwheyẹwhe tọn lẹ tọn. 20  Na nudida yin hinhẹn zun mẹmẹglọ na ovọ́, e ma yin sọn ojlo etọn titi mẹ, ṣigba gbọn ewọ he hẹn ẹn zun mẹmẹglọ gblamẹ, to dodonu todido tọn ji 21  na nudida lọsu na ede nido yin hinhẹn jẹ mẹdekannu sọn afanumẹ-yinyin na gbigble mẹ bo tindo mẹdekannujẹ gigonọ he yin ovi Jiwheyẹwhe tọn lẹ tọn. 22  Na mí yọnẹn dọ nudida lẹpo wẹ to hunwẹn dopọ bo tin to awufiẹsa mẹ dopọ kakajẹ din. 23  E ma yin enẹ kẹdẹ, ṣigba mílọsu lẹ ga, he tindo sinsẹ́n tintan lẹ, enẹ wẹ, gbigbọ lọ, mọwẹ, mílọsu lẹ to hunwẹn to ohò míde tọn mẹ, dile mí to tenọ vẹkuvẹku pọ́n sọdodovi mítọn, yèdọ tundote sọn agbasa mítọn lẹ mẹ gbọn ofligọ dali. 24  Na mí yin whinwhlẹngán to todido ehe mẹ; ṣigba todido he yin mimọ ma yin todido gba, na to whenue omẹ de mọ nude, be e nọ tindo todido na ẹn wẹ? 25  Ṣigba, eyin mí tindo todido na nuhe mí ma mọ, mí nọ yí akọndonanu do to tenọpọn ẹn zọnmii. 26  Mọdopolọ, gbigbọ lọ ga nọ gọalọna mí to madogán mítọn mẹ; na eyin mí ma yọ́n nuhe mí na hodẹ̀ na to whenue mí tindo nuhahun, to whenẹnu gbigbọ lọsu nọ vẹvẹ do ota mítọn mẹ po hunwinwẹn he ma yin didọtọn lẹ po. 27  Ṣogan, omẹ lọ he nọ dindona ahun nọ yọ́n lẹndai gbigbọ lọ tọn, na e to vẹvẹ sọgbe hẹ ojlo Jiwheyẹwhe tọn na omẹ wiwe lẹ. 28  Todin, mí yọnẹn dọ Jiwheyẹwhe nọ hẹn azọ́n etọn lẹpo kọngbedopọ na dagbe mẹhe yiwanna Jiwheyẹwhe lẹ tọn, yèdọ omẹ lọ lẹ he yin yiylọ sọgbe hẹ lẹndai etọn; 29  na mẹhe ewọ na ayidonugo etọn jẹnukọn lẹ wẹ e sọ de jẹnukọn nado hẹn yé sọgbe hẹ apajlẹ Visunnu etọn tọn, na e nido sọgan yin plọnji to nọvisunnu susu lẹ ṣẹnṣẹn. 30  Humọ, mẹhe e de jẹnukọn lẹ wẹ omẹ lọ lẹ he e ylọ ga; podọ omẹ he e ylọ lẹ wẹ omẹ lọ lẹ he e lá di dodonọ lẹ ga. To godo mẹ, mẹhe e lá di dodonọ lẹ wẹ omẹ lọ lẹ he e pagigona ga. 31  To whenẹnu, etẹwẹ mí na dọ gando onú ehelẹ go? Eyin Jiwheyẹwhe tin hẹ mí, mẹnu wẹ na jẹagọdo mí? 32  Ewọ he ma tlẹ whlá Visunnu etọn titi, ṣigba bo ze e jo na mímẹpo, naegbọn ewọ ma nado yí homẹdagbe do na mí onú devo lẹpo dopọ hẹ ẹ? 33  Mẹnu wẹ na sawhẹdokọna mẹdide Jiwheyẹwhe tọn lẹ? Jiwheyẹwhe wẹ Omẹ lọ he lá yé di dodonọ. 34  Mẹnu wẹ mẹlọ he na gblewhẹdo yé? Klisti Jesu wẹ omẹ lọ he kú, mọwẹ, humọ ewọ wẹ yin finfọn sọn oṣiọ lẹ mẹ, bo tin to adusilọ Jiwheyẹwhe tọn mẹ, bosọ nọ vẹvẹ do ota mítọn mẹ ga. 35  Mẹnu wẹ na klan mí sọn owanyi Klisti tọn go? Be nukunbibia kavi ayimajai kavi homẹkẹn kavi huvẹ kavi omẹ́jijẹ kavi owù kavi ohí na wàmọ wẹ? 36  Kẹdẹdile e yin kinkàndai do dọmọ: “Na towe tọn wutu wẹ yè to mí hù to azán lẹpo gbè, mí ko yin pinpọnhlan taidi lẹngbọ he na yin hùhù.” 37  To vogbingbọn mẹ, mí gbawhàn mlẹnmlẹn to onú ehe lẹpo mẹ gbọn mẹlọ he yiwanna mí gblamẹ. 38  Na yẹn tindo nujikudo dọ okú kavi ogbẹ̀ kavi angẹli lẹ kavi gandudu lẹ kavi nuhe tin tofi todin lẹ kavi nuhe ja lẹ kavi huhlọn lẹ 39  kavi aga kavi odò kavi nudida devo depope ma na penugo nado klan mí sọn owanyi Jiwheyẹwhe tọn he tin to Klisti Jesu Oklunọ mítọn mẹ lọ go.

Nudọnamẹ Odò Tọn

Lo 8:3* To paa mẹ, “agbasalan ylandonọ.”
Lo 8:15* Pọ́n Mk 14:36, nudọnamẹ odò tọn.