Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Lomunu lẹ 7:1-25

7  Mẹmẹsunnu lẹ emi, be vlavo mìwlẹ ma yọnẹn wẹ, (na mẹhe yọ́n osẹ́n lẹ wẹ yẹn to hodọna,) dọ Osẹ́n lọ yin ogán do gbẹtọ ji dile mẹlọ to ogbẹ̀ dẹnsọ ya?  Di apajlẹ, yọnnu he wlealọ de yin sìnsìn do asu etọn go gbọn osẹ́n dali to whenue asu etọn to ogbẹ̀; ṣigba eyin asu etọn kú, ewọ yin didesẹ sọn osẹ́n asu etọn tọn glọ.  Enẹwutu, to whelọnu lo, to whenue asu etọn pò to ogbẹ̀, ewọ na yin yiylọdọ ayọdetọ eyin e lẹzun sunnu devo tọn. Ṣigba, eyin asu etọn kú, e vò sọn osẹ́n etọn glọ, bọ ewọ ma na yin ayọdetọ de eyin e lẹzun sunnu devo tọn.  Enẹwutu, mẹmẹsunnu ṣie lẹ emi, mìlọsu lẹ ga ko yin hinhẹn nado kú na Osẹ́n lọ gbọn agbasa Klisti tọn gblamẹ, na mì nido sọgan lẹzun mẹdevo tọn, yèdọ mẹlọ he yin finfọn sọn oṣiọ lẹ mẹ, na mí nido de sinsẹ́n tọ́n na Jiwheyẹwhe.  Na to whenue mí tin to kọndopọ mẹ hẹ agbasalan, ojlo zogbe ylando tọn lẹ he nọ yin hinhẹn sọawuhia gbọn Osẹ́n lọ dali to azọ́nwa to awutugonu mítọn lẹ mẹ na mí nido de sinsẹ́n tọ́n na okú.  Ṣigba, todin, míwlẹ ko yin didesẹ sọn Osẹ́n lọ glọ, na mí ko kú na enẹ he yè ko yí do sìn mí, na mí nido sọgan yin afanumẹ lẹ to aliho yọyọ de mẹ gbọn gbigbọ dali, bọ e ma na yin to aliho hoho lọ mẹ gbọn kandai osẹ́n tọn lọ dali.  To whenẹnu, etẹwẹ mí na dọ lo? Be ylando wẹ Osẹ́n lọ yin ya? Ni ma yinmọ gbede blo! Na taun tọn, yẹn ma na ko yọ́n ylando eyin e ma yin na Osẹ́n lọ tọn wutu; podọ, di apajlẹ, yẹn ma na ko yọ́n nukunkẹn, eyin Osẹ́n lọ ma ko dọ dọmọ: “Hiẹ ma dona donukunkẹn.”  Ṣigba, na gbedide lọ wutu, dotẹnmẹ hundote na ylando nado wleawuna nukunkẹn wunmẹ lẹpo to yẹn mẹ, na matin osẹ́n, ylando kú.  Na nugbo tọn, yẹn ko nọgbẹ̀ to ojlẹ de mẹ wayi matin osẹ́n; ṣigba to whenue gbedide wá, ylando gọwá ogbẹ̀, ṣigba yẹn kú. 10  Podọ gbedide lọ he na ko dekọtọn do ogbẹ̀ mẹ, yẹn mọdọ okú mẹ wẹ e dekọtọn do. 11  Na gbedide lọ wutu, dotẹnmẹ hundote na ylando nado doyẹklọ mi bo hù mi. 12  To whenẹnu, na ewọ tọn wutu, Osẹ́n lọ yin wiwe, podọ gbedide lọ yin wiwe, dodo po dagbe po. 13  To whelọnu lo, be nuhe yin dagbe ko wá lẹzun okú na mi wẹ? Enẹ ni ma jọ gbede blo! Ṣigba, ylando wàmọ, na e nido sọgan yin didohia dile ylando dekọtọn do okú mẹ na mi gbọn enẹ he yin dagbe gblamẹ; na ylando nido sọgan ylan dogọ gbọn gbedide lọ gblamẹ. 14  Na mí yọnẹn dọ Osẹ́n lọ yin gbigbọ tọn; ṣigba yẹn yin agbasalan tọn, bo yin sisà do ylando glọ. 15  Na yẹn ma yọ́n nuhewutu yẹn nọ yinuwa to aliho ehe mẹ. Na nuhe yẹn jlo, yẹn ma nọ wà ẹ; ṣigba nuhe yẹn gbẹwanna wẹ yẹn nọ wà. 16  Etomọṣo, eyin nuhe yẹn ma jlo wẹ yẹn nọ wà, yẹn yigbe dọ Osẹ́n lọ yọ́n. 17  Ṣigba, todin, e ma yin yẹn wẹ to wiwà ẹ ba gba, ṣigba ylando he nọ nọ̀ yẹn mẹ wẹ. 18  Na yẹn yọnẹn dọ to yẹn mẹ, enẹ wẹ, to agbasalan ṣie mẹ, onú dagbe depope ma nọ nọ̀ finẹ; na nugopipe nado jlo tin to yẹn mẹ, ṣigba nugopipe nado wà nuhe yin dagbe ma tin. 19  Na dagbe he yẹn jlo, yẹn ma nọ wà, ṣigba oylan he yẹn ma jlo wẹ yẹn nọ wà. 20  Todin, eyin nuhe yẹn ma jlo wẹ yẹn nọ wà, be mẹhe to wiwà ẹ lọ masọ yin yẹn ba, ṣigba ylando he nọ nọ̀ yẹn mẹ lọ wẹ. 21  To whenẹnu, yẹn mọ osẹ́n ehe to ninọmẹ ṣie mẹ: dọ to whenue yẹn jlo nado wà nuhe sọgbe, nuhe ylan wẹ nọ tin to dè e. 22  Na taun tọn, yẹn nọ mọ awuvivi to osẹ́n Jiwheyẹwhe tọn mẹ sọgbe hẹ mẹhe yẹn yin to homẹ, 23  ṣigba yẹn mọ osẹ́n devo to awutugonu ṣie lẹ mẹ he to awhànfun sọta osẹ́n ayiha ṣie mẹ tọn bo to hinhẹn mi zun kanlinmọ na osẹ́n ylando tọn he tin to awutugonu ṣie lẹ mẹ. 24  Gbẹtọ tapònọ he yẹn yin! Mẹnu wẹ na whlẹn mi sọn agbasa he to okú ehe hẹnwa to yẹn mẹ lọ si? 25  Opẹ́ wẹ na Jiwheyẹwhe gbọn Jesu Klisti Oklunọ mítọn gblamẹ! Enẹwutu, to whenẹnu, yẹnlọsu yin afanumẹ de na osẹ́n Jiwheyẹwhe tọn to ayiha ṣie mẹ, ṣigba agbasalan ṣie yin na osẹ́n ylando tọn.

Nudọnamẹ Odò Tọn