Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Lomunu lẹ 6:1-23

6  Enẹwutu, etẹwẹ mí na dọ? Be mí na zindonukọn to ylando mẹ na nukundagbe majẹhẹ nido sọgan sudeji wẹ ya?  Enẹ ni ma jọ gbede blo! To whenuena e yindọ mí ko kú na ylando wutu, nawẹ míwlẹ na gbẹsọ to gbẹnọ zọnmii to e mẹ gbọn?  Kavi be mìwlẹ ma yọnẹn dọ mímẹpo he yin bibaptizi to Klisti Jesu mẹ wẹ ko yin bibaptizi to okú etọn mẹ ya?  Enẹwutu, mí ko yin dìdì po e po gbọn baptẹm mítọn to okú etọn mẹ gblamẹ, na kẹdẹdile Klisti yin finfọn sọn oṣiọ lẹ mẹ gbọn gigo Otọ́ lọ tọn gblamẹ do, mọdopolọ wẹ mílọsu lẹ dona zan gbẹzan yọyọ de do ga.  Na eyin mí ko yin kinkọndopọ hẹ ẹ to okú he taidi etọn nkọ mẹ, e họnwun dọ mí nasọ yin kinkọndopọ hẹ ẹ to fọnsọnku he taidi etọn nkọ mẹ ga;  na mí yọnẹn dọ gbẹtọ-yinyin hoho mítọn ko yin whiwhè do núgo hẹ ẹ, na agbasa ylandonọ mítọn ma nado tindo huhlọn do mí ji, bọ míwlẹ ma nado to afanumẹ ylando tọn yin zọnmii ba.  Na ewọ he kú ko yin whẹsuna sọn ylando etọn mẹ.  Humọ, eyin míwlẹ kú hẹ Klisti, mí yise dọ mí nasọ nọgbẹ̀ hẹ ẹ ga.  Na mí yọnẹn dọ, todin he Klisti ko yin finfọn sọn oṣiọ lẹ mẹ, e ma nasọ kú ba; okú masọ yin ogán do ewọ ji ba. 10  Na okú he ewọ kú, e kú nado de ylando sẹ̀ whladopo podọ kakadoi; ṣigba ogbẹ̀ he ewọ te, e to ogbẹ̀ na Jiwheyẹwhe. 11  Mọdopolọ, mìlọsu ga: na nugbo tọn, mì nọ pọ́n mìde hlan di mẹhe ko kú na ylando wutu, ṣigba bo tin to ogbẹ̀ na Jiwheyẹwhe gbọn Klisti Jesu dali. 12  Enẹwutu, mì dike ylando zindonukọn nado to gandu taidi ahọlu do agbasa mìtọn he nọ kú ji bọ mì nado to tonusena ojlo etọn lẹ blo. 13  Mọdopolọ, mì zindonukọn nado nọ ze awutugonu mìtọn lẹ jo na ylando taidi adanwànu mawadodo tọn lẹ blo, ṣigba mì ze mìde jo na Jiwheyẹwhe taidi mẹhe gọwá ogbẹ̀ sọn oṣiọ lẹ mẹ, humọ mì ze awutugonu mìtọn lẹ jo na Jiwheyẹwhe taidi adanwànu dodowiwa tọn lẹ. 14  Na ylando ma dona yin ogán do mì ji, dile mì mọdọ mì ma tin to osẹ́n glọ ṣigba tin to nukundagbe majẹhẹ glọ. 15  Etẹwẹ ehe zẹẹmẹdo? Be mí na waylando na mí ma to osẹ́n glọ, ṣigba bo to nukundagbe majẹhẹ glọ wutu wẹ ya? Enẹ ni ma jọ gbede blo! 16  Be mì ma yọnẹn dọ eyin mì zindonukọn nado to mìde zejo na mẹde taidi afanumẹ lẹ nado nọ setonuna ẹn, afanumẹ etọn lẹ wẹ mì yin na mì nọ setonuna ẹn wutu, vlavo mì yin afanumẹ na ylando he nọ dekọtọn do okú mẹ kavi mì yin afanumẹ na tonusise he nọ dekọtọn do dodowiwa mẹ ya? 17  Etomọṣo, opẹ́ wẹ na Jiwheyẹwhe dọ mì yin afanumẹ na ylando dai ṣigba mì ko lẹzun tonusetọ sọn ahun mẹ na nuplọnmẹ wunmẹ enẹ he yin zizedo alọmẹ na mì. 18  Mọwẹ, to whenuena e yindọ mìwlẹ ko yin tuntundote sọn ylando mẹ, mì lẹzun afanumẹ lẹ na dodowiwa. 19  Yẹn to hogbe he gbẹtọvi lẹ jẹakọ hẹ lẹ yizan na madogán agbasa tọn mìtọn wutu: na dile mìwlẹ tlẹ ko ze awutugonu mìtọn lẹ jo na mawé po sẹ́nhẹngba po taidi afanumẹ lẹ gando sẹ́nhẹngba go, ṣigba, todin, mì ze awutugonu mìtọn lẹ jo taidi afanumẹ lẹ na dodowiwa gando wiwe-yinyin go. 20  Na to whenue mìwlẹ yin afanumẹ lẹ na ylando, mì vò sọn dodowiwa mẹ. 21  To whelọnu lo, etẹwẹ yin sinsẹ́n lọ he mì nọ detọ́n to ojlẹ enẹ mẹ? Nuhe nọ huwinyan na mì todin lọ lẹ wẹ. Na okú wẹ opodo onú enẹlẹ tọn. 22  Ṣigba, todin, na mìwlẹ ko yin tuntundote sọn ylando mẹ ṣigba bo lẹzun afanumẹ lẹ na Jiwheyẹwhe wutu, mì to sinsẹ́n detọ́n gando wiwe-yinyin mìtọn go, podọ opodo etọn wẹ ogbẹ̀ madopodo. 23  Na ale ylando tọn wẹ okú, ṣigba nunina he Jiwheyẹwhe nọ namẹ wẹ ogbẹ̀ madopodo gbọn Klisti Jesu Oklunọ mítọn dali.

Nudọnamẹ Odò Tọn