Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Lomunu lẹ 4:1-25

4  Eyin mọ wẹ, etẹwẹ mí na dọ gando Ablaham mẹhe yin tọgbo mítọn to agbasa-liho go?  Di apajlẹ, eyin Ablaham ko yin lilá di dodonọ gbọn azọ́n lẹ dali wẹ, ewọ na ko tindo dodonu na awagundido; ṣigba ewọ ma sọgan doawagun to Jiwheyẹwhe nukọn.  Na etẹwẹ adà Owe-wiwe tọn lọ dọ? “Ablaham do yise hia to Jehovah mẹ, bọ e yin hihia hlan ẹn di dodowiwa.”  Todin, na mẹhe wazọ́n, azọ́nkuẹ he yè sú i ma nọ yin pinpọnhlan di nukundagbe majẹhẹ de gba, ṣigba taidi ahọ́ de.  To alọ devo mẹ, na omẹ lọ he ma nọ wazọ́n ṣigba bo nọ do yise hia to omẹ lọ he nọ lá mẹhe tindo jijọ-madi-Jiwheyẹwhe di dodonọ mẹ, yise etọn nọ yin pinpọnhlan taidi dodowiwa.  Kẹdẹdile Davidi lọsu dọho gando ayajẹ omẹ lọ he Jiwheyẹwhe pọnhlan taidi dodonọ bọ e ma yin gbọn azọ́n lẹ dali tọn go do dọmọ:  “Ayajẹnọ wẹ mẹhe walọ sẹ́nhẹngba tọn yetọn lẹ ko yin jijona podọ mẹhe ylando yetọn lẹ ko yin nuṣinyọndo;  ayajẹnọ wẹ omẹ lọ he Jehovah ma na hia ylando etọn dokọna to aliho depope mẹ.”  To whelọnu lo, be ayajẹ ehe wá mẹhe gboadà lẹ ji kavi mẹhe ma gboadà lẹ ji ga wẹ? Na mí dọmọ: “Yise Ablaham tọn yin hihia hlan ẹn di dodowiwa.” 10  To whelọnu lo, to ninọmẹ tẹlẹ mẹ wẹ e yin hihia hlan ẹn te? To whenue e ko gboadà kavi to whenue e ma ko gboadà? E ma yin to adàgbigbo mẹ, ṣigba to adàmagbo mẹ. 11  Podọ ewọ mọ ohia de yí, enẹ wẹ adàgbigbo, taidi hiadonu de na dodowiwa gbọn yise he ewọ tindo to whenue e tin to ninọmẹ adàmagbo tọn etọn mẹ dali, na ewọ nido sọgan yin otọ́ mẹhe tindo yise to whenue yé tin to adàmagbo mẹ lẹpo tọn, na e nido yin hihia hlan yé di dodowiwa; 12  podọ otọ́ ovi he yè gboadà na lẹ tọn de, e ma yin na mẹhe tẹdo adàgbigbo go lẹ kẹdẹ gba, ṣigba na mẹhe to zọnlin jijlọ zìn to afọdò yise he otọ́ mítọn Ablaham tindo to whenue ewọ tin to ninọmẹ adàmagbo tọn lọ tọn mẹ lẹ ga. 13  Na e ma yin gbọn osẹ́n gblamẹ wẹ Ablaham kavi okún etọn mọ opagbe lọ yí dọ ewọ na dugu aihọn de tọn gba, ṣigba gbọn dodowiwa na yise wutu dali wẹ. 14  Na eyin mẹhe tẹdo osẹ́n go lẹ yin gudutọ lẹ, be yise ko yin hinhẹn zun ovọ́ podọ opagbe lọ ko yin didesẹ. 15  Nado dọ hójọhó, Osẹ́n lọ wẹ nọ hẹn homẹgble Jiwheyẹwhe tọn wá, ṣigba fie osẹ́n ma tin te, mọjanwẹ sẹ́nhẹngba depope ma nọ to finẹ do niyẹn. 16  Na ehe wutu, gbọn yise gblamẹ wẹ opagbe lọ do tin, na e nido sọgan tin to kọndopọ mẹ hẹ nukundagbe majẹhẹ, na opagbe lọ nido sọgan họnwun na okún etọn lẹpo, e ma yin na mẹhe nọ tẹdo Osẹ́n lọ go lẹ kẹdẹ gba, ṣigba na mẹhe nọ tẹdo yise Ablaham tọn go lẹ ga. (Ewọ wẹ otọ́ mímẹpo tọn, 17  kẹdẹdile e ko yin kinkàndai do dọmọ: “Yẹn ko de we di otọ́ akọta susu tọn.”) Ehe jọ to nukun Omẹ lọ he mẹ ewọ tindo yise te tọn, yèdọ Jiwheyẹwhe tọn mẹ, mẹhe nọ hẹn oṣiọ lẹ gọwá ogbẹ̀ bo nọ ylọ onú he ma tin lẹ taidi dọ yé tin wẹ nkọ. 18  Dile dodonu na todido de ma tlẹ tin, ṣogan e tindo yise he sinai do todido ji, na ewọ nido sọgan lẹzun otọ́ akọta susu tọn to kọndopọ mẹ hẹ nuhe ko yin didọ dọmọ: “Mọ wẹ okún towe na te.” 19  Podọ dile etlẹ yindọ e ma gbọjọ to yise mẹ, e pọ́n agbasa ede tọn he ko gọ̀ do godo todin lọ hlan, na e ko yin nudi owhe kanweko mẹvi, mọdopolọ e pọ́n vidọ̀ Sala tọn he ko kú lọ hlan ga. 20  Ṣigba, na opagbe Jiwheyẹwhe tọn wutu, e ma tindo ayihaawe to yise tintindo mẹ, ṣigba e lẹzun huhlọnnọ gbọn yise etọn dali, bo na gigo Jiwheyẹwhe 21  bosọ tindo nujikudo mlẹnmlẹn dọ nuhe e ko dopagbe etọn, e penugo nado wà ẹ ga. 22  Enẹwutu, “e yin hihia hlan ẹn di dodowiwa.” 23  Dọ “e yin hihia hlan ẹn” yin kinkàndai, ṣigba, e ma yin na ewọ kẹdẹ gba, 24  ṣigba na mílọsu lẹ ga he e dona yin hihia hlan, na míwlẹ tindo yise to ewọ he fọ́n Jesu Oklunọ mítọn sọn oṣiọ lẹ mẹ lọ mẹ. 25  Ewọ yin zizejo na sẹ́nmẹjijẹ mítọn lẹ wutu bo yin finfọn na míwlẹ nido yin lilá di dodonọ.

Nudọnamẹ Odò Tọn