Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Lomunu lẹ 2:1-29

2  Enẹwutu, a ma tindo whẹjijọ, hiẹ dawe E, mahopọnna mẹdepope he hiẹ yin, eyin hiẹ nọ dawhẹnamẹ; na to onú he mẹ hiẹ dawhẹna mẹdevo te, hiẹ gblewhẹdo dewe, to whenuena hiẹ he to whẹda to onú dopolọ lẹ wà.  Todin, mí yọnẹn dọ whẹdida Jiwheyẹwhe tọn he to kọndopọ mẹ hẹ nugbo, jẹagọdo mẹhe nọ wà onú mọnkọtọn lẹ.  Ṣigba, hiẹ dawe E, to whenue hiẹ to whẹdana mẹhe wà onú mọnkọtọn lẹ ṣogan bọ hiẹ to yé wà, be hiẹ lẹndọ hiẹ na họ̀ngán sọn whẹdida Jiwheyẹwhe tọn mẹ ya?  Kavi be hiẹ nọ gbẹkọ homẹdagbe, homẹfa po linsinsinyẹn susugege etọn po go, na hiẹ ma yọnẹn dọ homẹdagbe Jiwheyẹwhe tọn to tintẹnpọn nado hẹn we jẹ lẹnvọjọ kọ̀n wutu wẹ?  Ṣigba, sọgbe hẹ sinsinyẹn towe po ahun he ma tindo lẹnvọjọ towe po, hiẹ to homẹgble bẹpli na dewe hlan azán homẹgble tọn po awusọhia whẹdida dodo Jiwheyẹwhe tọn tọn po gbè.  Ewọ nasọ suahọ omẹ dopodopo sọgbe hẹ azọ́n etọn lẹ:  ogbẹ̀ madopodo na mẹhe to gigo, gbégbò po magble po dín gbọn akọndonanu to azọ́n he yin dagbe lẹ mẹ dali;  ṣigba na mẹhe tindo gbigbọ wiwọ́ tọn lẹ gọna omẹ lọ lẹ he nọ vẹtolina nugbo ṣigba bo nọ setonuna mawadodo, adi po homẹgble po na wá yé ji,  nukunbibia po ayimajai po na wá alindọn gbẹtọ lẹpo he nọ wà azọ́n ylankan lẹ tọn ji, yèdọ Ju lẹ whẹ́ podọ Glẹkinu lẹ ga; 10  ṣigba gigo, gbégbò po jijọho po na mẹhe nọ wà azọ́n he yin dagbe lẹpo, na Ju lẹ whẹ́ podọ na Glẹkinu lẹ ga. 11  Na mẹnukuntahihopọn depope ma tin to Jiwheyẹwhe dè. 12  Di apajlẹ, mẹhe waylando matin osẹ́n lẹpo na dọ̀n matin osẹ́n ga; ṣigba mẹhe waylando to osẹ́n glọ lẹpo na yin whẹdana gbọn osẹ́n dali. 13  Na e ma yin mẹhe nọ dotoaina osẹ́n wẹ yin dodonọ to Jiwheyẹwhe nukọn gba, ṣigba basitọ osẹ́n tọn wẹ na yin lilá di dodonọ. 14  Na to whenuena omẹ akọta lẹ tọn he ma tindo osẹ́n nọ wà nuhe yin osẹ́n tọn lẹ gbọn jọwamọ dali, omẹ ehelẹ, dile etlẹ yindọ yé ma tindo osẹ́n yin osẹ́n de na yede. 15  Yelọsu titi wẹ nọ do azọ́n osẹ́n tọn he na yin kinkàn do ahun yetọn lẹ mẹ hia, to whenue ayihadawhẹnamẹnu yetọn to kunnudena yé, bọ yé to yinyin whẹsadokọna kavi tlẹ yin whẹsuna to linlẹn yetọn titi mẹ. 16  Ehe na jọ to azán lọ gbè to whenuena Jiwheyẹwhe na gbọn Klisti Jesu gblamẹ dawhẹna onú whiwhla gbẹtọvi lẹ tọn, sọgbe hẹ wẹndagbe he yẹn lá. 17  Todin, eyin hiẹ yin yiylọdọ Ju bo nọ to ginganjẹ osẹ́n go bosọ to awagundo to Jiwheyẹwhe mẹ, 18  bọ hiẹ yọ́n ojlo etọn bosọ kẹalọyi nuhe yọ́n hugan lẹ na yè ko yí onù do plọn Osẹ́n lọ we wutu; 19  hiẹ ko sọ kudeji dọ alihiamẹtọ de wẹ hiẹ na nukuntọ́nnọ lẹ, yèdọ hinhọ́n de na mẹhe to zinvlu mẹ lẹ, 20  nuplọnmẹtọ nulunọ lẹ tọn, mẹplọntọ ovivu lẹ tọn, he tindo adà tangan oyọnẹn tọn po nugbo lọ tọn po to Osẹ́n lọ mẹ— 21  ṣigba, be hiẹ mẹhe to mẹdevo plọn ma plọn dewe wẹ? Hiẹ he to yẹwhehodọ dọ “A fìnnú blo,” be hiẹ nọ fìnnú wẹ? 22  Hiẹ mẹhe to didọ dọ “A deayọ blo,” be hiẹ nọ deayọ wẹ? Hiẹ mẹhe gbẹwanna boṣiọ lẹ sinsinyẹn, be hiẹ nọ jajo to tẹmpli lẹ mẹ wẹ? 23  Hiẹ mẹhe nọ doawagun to osẹ́n mẹ, be gbọn Osẹ́n lọ gbigbà dali hiẹ ma to masin kọ̀n do Jiwheyẹwhe go wẹ? 24  Na “yè to nùzan do oyín Jiwheyẹwhe tọn go to akọta lẹ ṣẹnṣẹn na mìwlẹ tọn wutu”; kẹdẹdile e ko yin kinkàndai do. 25  Na nugbo tọn, adàgbigbo tindo ale kiki eyin hiẹ nọ yìn osẹ́n; ṣigba eyin hiẹ nọ gbà osẹ́n, adàgbigbo towe ko lẹzun adàmagbo. 26  Enẹwutu, eyin mẹhe ma gboadà de nọ payi nubiọtomẹsi dodo Osẹ́n lọ tọn lẹ go, adàmagbo etọn na yin pinpọnhlan taidi adàgbigbo, kavi e ma yin mọ wẹ? 27  Podọ adàmagbonọ he yinmọ gbọn jọwamọ dali na gbọn Osẹ́n lọ yìnyìn dali dawhẹna hiẹ mẹhe nọ gbà osẹ́n mahopọnna kandai osẹ́n tọn he hiẹ tindo po adàgbigbo towe po. 28  Na ewọ ma yin Ju de he yinmọ to gbonu, mọjanwẹ adàgbigbo ma yin enẹ he to gbonu to agbasa go do niyẹn. 29  Ṣigba ewọ yin Ju de he yinmọ to homẹ, adàgbigbo etọn sọ yin ahun mẹ tọn gbọn gbigbọ dali, bọ e ma yin gbọn kandai osẹ́n tọn de dali gba. Pipà omẹ enẹ tọn nọ wá, e ma yin sọn gbẹtọ lẹ dè, ṣigba sọn Jiwheyẹwhe dè.

Nudọnamẹ Odò Tọn