Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Lomunu lẹ 15:1-33

15  Nalete, mí mẹhe yin huhlọnnọ lẹ dona hẹn agbàn madogán mẹhe ma yin huhlọnnọ lẹ tọn, e ma yin nado to homẹ mídelẹ tọn hẹn hùn.  Mì gbọ dopodopo mítọn ni hẹn homẹhun kọmẹnu etọn to nuhe yọ́n na jijlọ ẹ dote mẹ.  Na Klisti lọsu ma hẹn homẹhun ede; ṣigba kẹdẹdile e yin kinkàndai do dọmọ: “Vlẹko mẹhe to vivlẹ we lẹ tọn ko wá oji e.”  Na nuhe ko yin kinkàndai jẹnukọn lẹpo yin kinkàndai na oplọn mítọn, na míwlẹ nido sọgan tindo todido gbọn akọndonanu mítọn gblamẹ podọ gbọn homẹmimiọn sọn Owe-wiwe lẹ mẹ gblamẹ.  Todin, na Jiwheyẹwhe he nọ namẹ akọndonanu po homẹmimiọn po ni na mìmẹpo nado tindo pọndohlan dopolọ he Klisti Jesu tindo,  dọ to kọndopọ mẹ, mìwlẹ nido sọgan yí onù dopo do pagigona Jiwheyẹwhe podọ Otọ́ Oklunọ mítọn Jesu Klisti tọn.  Enẹwutu, mì nọ kẹalọyi ode awetọ, kẹdẹdile Klisti lọsu kẹalọyi mì do, na Jiwheyẹwhe nido yin gigopana.  Na yẹn dọ dọ Klisti na taun tọn lẹzun lizọnyizọnwatọ mẹhe gboadà lẹ tọn nado dohia dọ nugbonọ wẹ Jiwheyẹwhe podọ nado hẹn opagbe lọ lẹ he Ewọ dó na tọgbo yetọn lẹ lodo,  podọ na akọta lẹ nido sọgan pagigona Jiwheyẹwhe na lẹblanu etọn. Kẹdẹdile e yin kinkàndai do dọmọ: “Enẹwutu wẹ yẹn na pà we to gbangba to akọta lẹ ṣẹnṣẹn podọ yẹn na jihàn pipà tọn hlan oyín towe.” 10  Podọ e dọ whladopo dogọ dọmọ: “Mì jaya hẹ omẹ etọn lẹ, mì akọta lẹ emi.” 11  E sọ vọ́ dọ whladopo dogọ dọmọ: “Mì pà Jehovah, mì akọta lẹpo emi, podọ mì gbọ gbẹtọ lẹpo ni pà ẹ.” 12  Isaia sọ vọ́ dọ whladopo dogọ dọmọ: “Adọ̀ Jẹsse tọn na wá, podọ omẹ de na fọ́n nado dugán do akọta lẹ ji; ewọ ji wẹ akọta lẹ na ze todido yetọn do.” 13  Na Jiwheyẹwhe he nọ namẹ todido ni yí ayajẹ po jijọho lẹpo po do gọ́ mì mẹ gbọn yiyise mìtọn dali, na mì nido sọgan sudeji to todido mẹ gbọn huhlọn gbigbọ wiwe tọn dali. 14  Todin, mẹmẹsunnu lẹ emi, yẹnlọsu tindo nujikudo ga gando mì go, dọ mìlọsu lẹ ga gọ́ na dagbewà, dile mì ko yin hinhẹn gọ́ po oyọnẹn lẹpo po, podọ na mì nido sọgan dotuhomẹna ode awetọ ga. 15  Ṣigba, yẹn to wekanhlan mì to aliho he to tlọlọ taun de mẹ do nuagokun delẹ ji, taidi mẹhe sọ vọ́ to nuflin mì, na nukundagbe majẹhẹ he yin nina mi sọn Jiwheyẹwhe dè lọ wutu 16  na yẹn nido yin devizọnwatọ gbangba tọn na Klisti Jesu hlan akọta lẹ, bo to mahẹ tindo to azọ́n wiwe wẹndagbe Jiwheyẹwhe tọn lọ mẹ, na avọ́nunina lọ, yèdọ akọta ehelẹ nido sọgan yin alọkẹyi, na e ko yin hinhẹn zun wiwe gbọn gbigbọ wiwe dali. 17  Enẹwutu, yẹn tindo whẹwhinwhẹ́n nado doawagun to Klisti Jesu mẹ na nuhe gando Jiwheyẹwhe go lẹ. 18  Na eyin e ma yin onú enẹlẹ he Klisti wazọ́n yetọn gbọn yẹn gblamẹ lẹ tọn wutu wẹ, yẹn ma hà nado dọ nudepope he akọta lẹ na setonuna, yèdọ gbọn ohó po walọ ṣie po dali, 19  gọna huhlọn ohia lẹ po nudabla lẹ tọn po, po huhlọn gbigbọ wiwe tọn po; podọ taidi kọdetọn de, yẹn dọyẹwheho wẹndagbe tọn to gigọ́ mẹ gando Klisti go sọn Jelusalẹm podọ kaka gbọn lẹdo Illilikumi tọn lẹpo pete mẹ. 20  Na nugbo tọn, to aliho ehe mẹ, yẹn hẹn ẹn zun yanwle ṣie ma nado lá wẹndagbe lọ to fihe oyín Klisti tọn ko yin yiylọ te, na yẹn nikaa to didó do dodonu omẹ devo tọn ji; 21  ṣigba kẹdẹdile e ko yin kinkàndai do dọmọ: “Mẹhe ohó etọn ma ko yin lilá na lẹ na mọ, podọ mẹhe ma ko sè lẹ na mọnukunnujẹemẹ.” 22  Na enẹwutu ga, whlasusu wẹ nude ko nọ glọnalina mi nado wá mì dè. 23  Ṣigba, todin he yẹn masọ tindo aigba-denamẹ he ji yẹn ma ko wazọ́n te to lẹdo ehelẹ mẹ ba, bọ yẹn ko to jijlo vẹkuvẹku na owhe delẹ nado wá mì dè 24  to whedepopenu he yẹn jei Ẹspaini, hú popolẹpo, yẹn tindo todido dọ to whenue yẹn na to gbejizọnlinzin jei finẹ, yẹn na wá pọ́n mì bọ mìwlẹ na yìn mi jẹ aliho ji to whenue gbẹdohẹmẹ mìtọn na ko hẹn pekọwana mi jẹ obá de mẹ whẹ́. 25  Ṣigba, todin, yẹn na zingbejizọnlin to madẹnmẹ yì Jelusalẹm nado yilizọn* na omẹ wiwe lẹ. 26  Na mẹhe tin to Makedonia po Akaia po lẹ ko hùnhomẹ nado má onú yetọn lẹ gbọn nunina bibasi dali na wamọnọ he tin to omẹ wiwe lẹ ṣẹnṣẹn to Jelusalẹm. 27  Na nugbo tọn, homẹhunnu wẹ e yin na yé nado wàmọ, ṣogan yé yin ahọ́tọnọ lẹ na yé; na eyin akọta lẹ ko tindo mahẹ to onú gbigbọ tọn yetọn lẹ mẹ, yelọsu duahọ etọn nado yí onú agbasa tọn lẹ do yilizọn na omẹ ehelẹ to gbangba. 28  Enẹwutu, to whenue yẹn na ko dotana ehe bo na ko hẹn sinsẹ́n ehe jẹ yé dè po kọdetọn dagbe po godo, yẹn na dedo Ẹspaini bo na zẹ̀ mì dè to whenue yẹn jei dọ́n. 29  Humọ, yẹn yọnẹn dọ whenue yẹn na wá mì dè yẹn na wá po dona susugege lẹ po sọn Klisti dè. 30  Todin, mẹmẹsunnu lẹ emi, yẹn dotuhomẹna mì gbọn Oklunọ mítọn Jesu Klisti gblamẹ podọ gbọn owanyi he gbigbọ nọ wleawuna lọ gblamẹ, dọ mì ni vánkan hẹ mi to odẹ̀ mẹ hlan Jiwheyẹwhe na mi, 31  na yẹn nido sọgan yin whinwhlẹn sọn alọ mayisenọ lẹ tọn mẹ to Jude podọ na lizọnyizọn* ṣie he yin na Jelusalẹm nido sọgan yin alọkẹyi na omẹ wiwe lẹ, 32  bọ to whenue yẹn na wá mì dè po ayajẹ po gbọn ojlo Jiwheyẹwhe tọn dali, yẹn nido yin kọfana dopọ hẹ mì. 33  Na Jiwheyẹwhe he nọ namẹ jijọho ni tin hẹ mìmẹpo. Niṣẹ.*

Nudọnamẹ Odò Tọn

Lo 15:25* Kavi, “alọgọ.”
Lo 15:31* Pọ́n wefọ 25, nudọnamẹ odò tọn.
Lo 15:33* Pọ́n Lo 1:25, nudọnamẹ odò tọn.