Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Lomunu lẹ 14:1-23

14  Mì kẹalọyi omẹ lọ he yin madogánnọ to yise etọn mẹ, ṣigba e ma yin nado nọ dawhẹ gando kanbiọ ahun mẹ tọn lẹ go gba.  Omẹ de tindo yise nado nọ dù onú lẹpo, ṣigba omẹ lọ he yin madogánnọ nọ dù omá lẹ.  Mì gbọ omẹ lọ he to dùdù ni ma yí nukunpẹvi do pọ́n mẹhe ma to dùdù blo, podọ mì gbọ omẹ lọ he ma to dùdù ni ma dawhẹna omẹ lọ he to dùdù blo, na Jiwheyẹwhe ko kẹalọyi omẹ lọ.  Mẹnu wẹ hiẹ yin nado dawhẹna devizọnwatọ whégbè tọn mẹdevo tọn? Ogán etọn wẹ na dọ eyin e to ote kavi e jai. Na nugbo tọn, ewọ na yin hinhẹn nado nọte, na Jehovah sọgan hẹn ẹn nọte.  Omẹ de nọ pọ́n azán de hlan taidi dehe yiaga hugan devo; omẹ devo nọ pọ́n azán de hlan taidi nudopolọ hẹ dehe pò lẹpo; mì gbọ omẹ dopodopo ni tindo nujikudo mlẹnmlẹn to ayiha etọn titi mẹ.  Mẹhe nọ payi azán go nọ payi e go nado hẹn gbégbò wá na Jehovah. Mọdopolọ, mẹhe to núdù, to dùdù nado hẹn gbégbò wá na Jehovah, na ewọ nọ dopẹna Jiwheyẹwhe; podọ mẹhe ma nọ dù, ma nọ dù nado hẹn gbégbò wá na Jehovah, etomọṣo, ewọ nọ dopẹna Jiwheyẹwhe.  Na nugbo tọn, depope to mí mẹ ma nọ nọgbẹ̀ na edetiti kẹdẹ, podọ mẹdepope ma nọ kú na edetiti kẹdẹ;  na eyin mí to ogbẹ̀, mí to ogbẹ̀ na Jehovah, podọ eyin mí kú, mí kú na Jehovah. Enẹwutu, eyin mí to ogbẹ̀ podọ eyin mí kú, Jehovah tọn wẹ mí yin.  Na ehe wutu wẹ Klisti kú bo gọwá ogbẹ̀ whladopo dogọ, na ewọ nido sọgan yin Oklunọ do oṣiọ lẹ po mẹhe to ogbẹ̀ lẹ po ji. 10  Ṣigba, naegbọn hiẹ do to whẹdana mẹmẹsunnu towe? Kavi naegbọn hiẹ sọ nọ yí nukunpẹvi do pọ́n mẹmẹsunnu towe? Na mímẹpo wẹ na ṣite to whẹdaján Jiwheyẹwhe tọn nukọn; 11  na e ko yin kinkàndai dọmọ: “‘Dile yẹn to ogbẹ̀,’ wẹ Jehovah dọ, ‘kligonu lẹpo wẹ na jẹklo na mi, podọ odẹ́ lẹpo wẹ na basi gbeyiyi to gbangba hlan Jiwheyẹwhe.’” 12  Enẹwutu, to whelọnu lo, dopodopo mítọn wẹ na dogbè edetiti tọn na Jiwheyẹwhe. 13  Enẹwutu, mì gbọ mí ni ma nọ dawhẹna ode awetọ ba blo, ṣigba kakatimọ, mì basi nudide ehe, ma nado nọ ze zannu ahlìda tọn kavi afọklẹnnu de donukọnna mẹmẹsunnu de. 14  Yẹn yọnẹn bosọ kudeji to Oklunọ Jesu mẹ dọ nudepope ma yin mawé to ede mẹ; to whenue mẹde pọ́n nude di mawé kẹdẹ wẹ e nọ yin mawé na ẹn. 15  Na eyin mẹmẹsunnu towe yin hinhẹn blawu na núdùdù wutu, hiẹ masọ to zọnlinzin to kọndopọ mẹ hẹ owanyi ba gba. Hiẹ gbọn núdùdù towe dali hù mẹhe Klisti kú na lọ sudo blo. 16  Enẹwutu, mì dike onú ylankan yin didọ gando dagbe he mì nọ wà go blo. 17  Na ahọluduta Jiwheyẹwhe tọn ma zẹẹmẹdo dùdù po nùnù po, ṣigba e zẹẹmẹdo dodowiwa, jijọho po ayajẹ po he gbigbọ wiwe nọ hẹnwa. 18  Na mẹhe yin afanumẹ na Klisti to aliho ehe mẹ na yin alọkẹyi gbọn Jiwheyẹwhe dali bo na yin alọkẹyi to gbẹtọ lẹ dè. 19  Enẹwutu, to whelọnu lo, mì gbọ mí ni doafọna nuhe nọ hẹn jijọho wá lẹ po nuhe nọ jlọ ode awetọ dote lẹ po. 20  Hiẹ sọ họ́ azọ́n Jiwheyẹwhe tọn liai na núdùdù wutu ba blo. Na nugbo tọn, onú lẹpo wẹ wé, ṣigba onú ylankan wẹ e yin na omẹ lọ he tin to ninọmẹ mẹhẹn dahli tọn mẹ bo dù. 21  E pọnte ma nado dù olàn kavi nù ovẹn kavi wà onú depope he na hẹn mẹmẹsunnu towe dahli. 22  Yise he hiẹ tindo, yí i zan na dewe to Jiwheyẹwhe nukọn. Ayajẹnọ wẹ omẹ lọ he ma hẹn ede biọ whẹdida mẹ gbọn nuhe e nọ kẹalọyi dali. 23  Ṣigba, eyin e tindo ayihaawe, ewọ ko yin whẹgbledo dote eyin e dù, na e ma yí yise do dù wutu. Na nugbo tọn, nudepope he ma yin gbọn yise dali yin ylando.

Nudọnamẹ Odò Tọn