Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Lomunu lẹ 13:1-14

13  Mì gbọ alindọn lẹpo ni yin mẹmẹglọ na aṣẹpipa daho lẹ, na aṣẹpipa depope ma tin bọ e ma yin sọn Jiwheyẹwhe dè; aṣẹpipa he tin lẹ, Jiwheyẹwhe wẹ na yé otẹn he tindo dogbó yetọn lẹ.  Enẹwutu, mẹhe jẹagọdo aṣẹpipa ko diọnukunsọ tito Jiwheyẹwhe tọn; mẹhe diọnukunsọ ẹ lẹ na mọ whẹdida yetọn yí.  Na mẹhe to gandu lẹ nọ yin budisi, e ma yin gbọn mẹhe to walọ dagbe zan lẹ dali gba, ṣigba gbọn mẹhe to onú ylankan wà lẹ dali. To whenẹnu, be hiẹ ma na jlo nado dibusi aṣẹpipa ya? Nọ to dagbe wà, hiẹ nasọ mọ pipà yí sọn e dè;  na lizọnyizọnwatọ Jiwheyẹwhe tọn wẹ e yin na we na dagbe towe. Ṣigba, eyin hiẹ to nuhe yin ylankan wà, nọ dibu: na e ma yin tata wẹ e hẹn ohí lọ gba; na lizọnyizọnwatọ Jiwheyẹwhe tọn wẹ e yin, yèdọ ahọsuyitọ nado do homẹgble hia mẹhe to onú ylankan wà.  Enẹwutu, dandan wẹ e yin na mì nado yin mẹmẹglọ, e ma yin na homẹgble enẹ kẹdẹ wutu gba, ṣigba na ayihadawhẹnamẹnu mìtọn wutu ga.  Na enẹwutu wẹ mìwlẹ do to tòkuẹ lẹ na ga; na devizọnwatọ gbangba tọn Jiwheyẹwhe tọn lẹ wẹ yé yin bo nọ to lẹndai ehe hẹndi to whepoponu.  Mì nọ na omẹ dopodopo nuhe e jẹna, yèdọ tòkuẹ na mẹhe tòkuẹ jẹna; takuẹ na mẹhe takuẹ jẹna; budisi na mẹhe budisi jẹna; gbégbò na mẹhe gbégbò jẹna.  Mì duahọ nudepope tọn do mẹde blo, adavo nado yiwanna ode awetọ; na ewọ he yiwanna gbẹtọ hatọ etọn ko hẹn osẹ́n di.  Na todohukanji osẹ́n tọn he dọ, “Hiẹ ma dona deayọ, Hiẹ ma dona hùhlọ̀n, Hiẹ ma dona fìnnú, Hiẹ ma dona donukunkẹn,” gọna gbedide devo depope he pò ko yin bibladopọ to hogbe ehe mẹ dọ, “Hiẹ dona yiwanna kọmẹnu towe di dewe.” 10  Owanyi ma nọ wà onú ylankan do kọmẹnu etọn go; enẹwutu, owanyi wẹ hẹndi osẹ́n tọn. 11  Mì nọ wà ehe ga, na mìwlẹ yọ́n ojlẹ he mẹ mí tin te ehe, dọ ojlẹ lọ ko wá na mì nado fọ́n sọn amlọn mẹ, na whlẹngán mítọn ko sẹpọ hugan ojlẹ he mẹ mí lẹzun yisenọ te. 12  Ozán ko sẹyì taun; ai ko dibla họ́n. Enẹwutu, mì gbọ mí ni klọ́n azọ́n he yin zinvlu tọn lẹ dai bo gbọ mí ni ze gbaja hinhọ́n tọn lẹ dogo. 13  Mì gbọ mí ni zinzọnlin jijlọ taidi to okle, e ma yin to paṣadudu, ahànnu-zẹjlẹgo, fẹnnuwiwa zanhẹmẹ tọn, wantuntun, avùn po awuwhàn po mẹ gba. 14  Ṣigba, mì ze Oklunọ Jesu Klisti dogo, mì sọ nọ basi tito dai na ojlo agbasalan tọn lẹ blo.

Nudọnamẹ Odò Tọn