Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Lomunu lẹ 11:1-36

11  To whelọnu lo, yẹn kanse dọ, Jiwheyẹwhe ma gbẹ́ omẹ etọn lẹ dai, kavi e wàmọ wẹ? Enẹ ni ma jọ gbede blo! Na Islaelivi de wẹ yẹnlọsu yin ga, sọn okún Ablaham tọn mẹ, yèdọ sọn hẹnnu Bẹnjamini tọn mẹ.  Jiwheyẹwhe ma gbẹ́ omẹ etọn he ewọ na ayidonugo jẹnukọn lẹ dai gba. Eyọn, be mìwlẹ ma yọ́n nuhe Owe-wiwe dọ gando Elija go, to whenue e basi ovẹvivẹ hlan Jiwheyẹwhe sọta Islaeli wẹ ya?  “Jehovah, yé ko hù yẹwhegán towe lẹ, yé ko họ́ agbà towe lẹ liai, bọ yẹn kẹdẹ wẹ pò, yé sọ to alindọn ṣie dín.”  Ṣogan, etẹwẹ Jiwheyẹwhe dọna ẹn? “Yẹn ko pò sunnu fọtọ́n donu ṣinawe dai na dee, yèdọ sunnu lọ lẹ he ma ko jẹklo na Baali.”  Enẹwutu, to aliho ehe mẹ, pipotọ de ko yin jijodo to ojlẹ ehe mẹ ga bo yin dide na nukundagbe majẹhẹ wutu.  Todin, eyin ehe yin gbọn nukundagbe majẹhẹ dali, be e masọ yin na azọ́n lẹ wutu ba; eyin e ma yinmọ, be nukundagbe majẹhẹ masọ yin nukundagbe majẹhẹ ba.  To whelọnu lo, etẹwẹ mí na dọ? Islaeli ma mọ onú lọ he e to dindin vẹkuvẹku yí, ṣigba mẹhe yin dide lẹ mọ ẹn yí. Mẹhe pò lẹ lẹzun tasinyẹntọ;  kẹdẹdile e yin kinkàndai do dọmọ: “Jiwheyẹwhe ko na yé gbigbọ amlọn yìkànmẹ tọn de, e ko na yé nukun lẹ he ma sọgan mọnú bo ko na yé otó lẹ he ma sọgan sènu, kakajẹ azán ehe gbè.”  Humọ, Davidi dọmọ: “Gbọ tafo yetọn ni lẹzun omọ̀ de, fẹ́ṣà de, zannu ahlìda tọn de po ahọsumẹ de po na yé; 10  gbọ nukun yetọn lẹ ni dózin na yé ni ma do mọnú blo, bọ nẹgbé yetọn ni yin hinhẹn dẹ́ do odò to whepoponu.” 11  Enẹwutu, yẹn kanse dọ, Be yé dahli na yé nido jai mlẹnmlẹn wẹ ya? Enẹ ni ma jọ gbede blo! Ṣigba, na afọ he yé ṣì ze wutu, whlẹngán wá na omẹ akọta lẹ tọn, nado fọ́n awuwhàn yetọn dote. 12  Todin, eyin afọ he yé ṣì ze dekọtọn do dona susugege mẹ na aihọn lọ, bọ didepo yetọn dekọtọn do dona susugege mẹ na omẹ akọta lẹ tọn, lehe sọha yetọn to gigọ́ mẹ na dekọtọn do dona susugege mẹ do sọ! 13  Todin, yẹn to hodọna mì omẹ akọta lẹ tọn. Na nugbo tọn, dile etlẹ yindọ yẹn yin apọsteli de na akọta lẹ, yẹn pọ́n lizọnyizọn ṣie hlan taidi onú gigonọ de, 14  eyin yẹn sọgan gbọn aliho depope mẹ fọ́n awuwhàn mẹhe yin agbasalan ṣie titi tọn lẹ dote bo whlẹn delẹ to yé mẹ gán. 15  Na eyin gbigbẹ́ yé dai dekọtọn do whẹgbigbọ mẹ na aihọn, etẹ mẹ wẹ alọkikẹyi yé na dekọtọn do adavo sọn okú mẹ wá ogbẹ̀ mẹ? 16  Humọ, eyin adà he yin yíyí taidi sinsẹ́n tintan lẹ yin wiwe, be linfin yinyan lọ lọsu yinmọ ga; podọ eyin adọ̀ lọ yin wiwe, be alà lẹ lọsu yinmọ ga. 17  Ṣigba, eyin delẹ to alà lẹ mẹ yin finfẹ́n sẹ̀ ṣigba dile etlẹ yindọ hiẹ yin olivie nukànmẹ tọn de, bọ hiẹ ko yin tùntùn do ṣẹnṣẹn yetọn bo lẹzun mimátọ de to adọ̀ dojó olivie tọn mẹ, 18  a doawagun do alà he yin finfẹ́n sẹ̀ lẹ ji blo. Ṣigba, eyin hiẹ to awagundo do yé ji, flindọ e ma yin hiẹ wẹ hẹn adọ̀ lọ dote gba, ṣigba adọ̀ lọ wẹ hẹn we dote. 19  To whenẹnu, hiẹ na dọmọ: “Alà lẹ yin finfẹ́n sẹ̀ na yẹn nido sọgan yin tùntùn do e go.” 20  Eyọn! Na yise matindo yetọn wutu wẹ yé yin finfẹ́n sẹ̀, ṣigba hiẹ to ote gbọn yise dali. A sọ tindo linlẹn mẹdezedaga tọn lẹ ba blo, ṣigba tindo budisi. 21  Na eyin Jiwheyẹwhe ma hlá alà jọwamọ tọn lẹ dote, mọdopolọ e ma na hlá we dote. 22  Enẹwutu, pọ́n homẹdagbe po homẹgble Jiwheyẹwhe tọn po. Homẹgble tin na mẹhe jai lẹ, ṣigba homẹdagbe Jiwheyẹwhe tọn tin na hiẹ eyin a gbọṣi homẹdagbe etọn mẹ; eyin e ma yinmọ, hiẹ lọsu na yin finfẹ́n sẹ̀ ga. 23  Yelọsu ga, eyin yé ma gbọṣi yise matindo yetọn mẹ, yé na yin tùntùn do e go; na Jiwheyẹwhe penugo nado vọ́ tùn yé do e go. 24  Na eyin hiẹ yin sinsán sẹ̀ sọn atin olivie tọn he tin to nukànmẹ to jọwamọ-liho lọ go bo yin tùntùn to aliho he ma yin jọwamọ tọn mẹ do atin olivie tọn he tin to jipa mẹ lọ go, nẹmunẹmu wẹ ehelẹ he yin jọwamọ tọn ma na yin tùntùn do atin olivie tọn yetọn titi go! 25  Mẹmẹsunnu lẹ emi, na yẹn ma jlo dọ mìwlẹ ni yin wunvinọ gando aṣli wiwe ehe go, na mì nikaa yin nuyọnẹntọ to nukun mìtọn titi mẹ: na apadewhe Islaeli tọn ko lẹzun tasinyẹntọ kakajẹ whenue sọha omẹ akọta lẹ tọn to gigọ́ mẹ na ko biọ e mẹ, 26  podọ to aliho ehe mẹ Islaeli lẹpo na yin whinwhlẹngán. Kẹdẹdile e ko yin kinkàndai do dọmọ: “Ziọni wẹ whlẹngántọ lọ na wá sọn bo na de walọ jijọ-madi-Jiwheyẹwhe tọn lẹ sẹ̀ sọn ovi Jakọbu tọn lẹ ṣẹnṣẹn. 27  Podọ ehe wẹ alẹnu he yẹn basi hẹ yé, to whenue yẹn de ylando yetọn lẹ sẹ̀.” 28  Na nugbo tọn, na wẹndagbe tọn wutu wẹ yé yin kẹntọ lẹ na mìtọn wutu, ṣigba na mẹdide he Jiwheyẹwhe basi wutu, yé yin mẹyiwanna lẹ na tọgbo yetọn lẹ wutu. 29  Na nunina lẹ po oylọ-basinamẹ Jiwheyẹwhe tọn po ma yin nuhe na vẹna ẹn gba. 30  Na kẹdẹdile mìwlẹ ko yin tolivẹtọ na Jiwheyẹwhe dai ṣigba bọ lẹblanu ko yin didohia mì todin na tolivivẹ yetọn wutu, 31  mọdopolọ, todin, omẹ ehelẹ lọsu ko yin tolivẹtọ bọ lẹblanu dekọtọn sọn e mẹ na mì, na lẹblanu nido sọgan yin didohia yelọsu lẹ ga todin. 32  Na Jiwheyẹwhe ko hẹn yemẹpo to pọmẹ zun mẹmẹglọ tolivivẹ tọn, na ewọ nido sọgan do lẹblanu hia yemẹpo. 33  Lehe dona susugege, nuyọnẹn po oyọnẹn Jiwheyẹwhe tọn po siso do sọ! Lehe whẹdida etọn lẹ yin dinmamọdona bọ aliho etọn lẹ ma yọ́n dinmọ do sọ! 34  Na “mẹnu wẹ ko wá yọ́n ayiha Jehovah tọn kavi mẹnu wẹ ko lẹzun ayinamẹtọ etọn?” 35  Kavi, “Mẹnu wẹ ko na ẹn jẹnukọn, bọ ewọ dona gọjona?” 36  Na onú lẹpo wẹ wá sọn ewọ dè podọ gbọn ewọ dali podọ na ewọ. Gigo ni tin hlan ewọ kakadoi. Niṣẹ.*

Nudọnamẹ Odò Tọn

Lo 11:36* Pọ́n Lo 1:25, nudọnamẹ odò tọn.