Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Lomunu lẹ 1:1-32

1  Paulu, afanumẹ Jesu Klisti tọn he yin yiylọ nado yin apọsteli de, bo yin kinklandovo na wẹndagbe Jiwheyẹwhe tọn,  he e dopagbe etọn jẹnukọn gbọn yẹwhegán etọn lẹ gblamẹ to Owe wiwe lẹ mẹ,  gando Visunnu etọn go, he wá sọn okún Davidi tọn mẹ to agbasa-liho,  ṣigba mẹhe yè gbọn huhlọn gbigbọ wiwe tọn dali lá di Visunnu Jiwheyẹwhe tọn to whenue ewọ yin finfọn sọn oṣiọ lẹ mẹ—mọwẹ, Jesu Klisti Oklunọ mítọn,  mẹhe gblamẹ mí mọ nukundagbe majẹhẹ po apọsteli-yinyin po yí te, na tonusisena yise lọ nido sọgan tin to akọta lẹpo ṣẹnṣẹn gando oyín etọn go,  yèdọ akọta lẹ he mẹ mìlọsu ga he yin yiylọ nado yin Jesu Klisti tọn lẹ tin te—  wekanhlanmẹ de hlan mẹhe to Lomu taidi mẹyiwanna Jiwheyẹwhe tọn lẹpo, he yin yiylọ nado yin omẹ wiwe lẹ: Na nukundagbe majẹhẹ po jijọho po sọn Jiwheyẹwhe Otọ́ mítọn dè podọ sọn Oklunọ Jesu Klisti dè ni tin hlan mì.  Jẹnukọn whẹ́, yẹn dopẹna Jiwheyẹwhe ṣie gbọn Jesu Klisti gblamẹ gando mìmẹpo go, na yè to hodọ gando yise mìtọn go to aihọn lọ pete mẹ wutu.  Na Jiwheyẹwhe, mẹhe yẹn to sinsẹ̀nzọn wiwe wà na, bo to nulẹpo wà na wẹndagbe lọ he gando Visunnu etọn go, yin kunnudetọ ṣie dọ yẹn nọ dọho to whepoponu gando mì go to odẹ̀ ṣie lẹ mẹ, 10  bo nọ to vẹvẹ dọ eyin e yọnbasi todin, yẹn na dovivẹnu nado wá mì dè eyin Jiwheyẹwhe jlo. 11  Na yẹn to jijlo vẹkuvẹku nado mọ mì, na yẹn nido sọgan na nunina gbigbọ tọn de mì na mìwlẹ nido sọgan yin hinhẹn lodo; 12  kavi, humọ, na tulinina ode awetọ nido tin to ṣẹnṣẹn mìtọn, gbọn yise mẹdopodopo tọn dali, yèdọ mìtọn po ṣie po. 13  Ṣigba, mẹmẹsunnu lẹ emi, yẹn ma jlo dọ mìwlẹ ni gọ̀n ma yọnẹn gba, dọ whlasusu wẹ yẹn ko lẹn nado wá mì dè, ṣigba yẹn ko yin aliglọnna kakajẹ din, na yẹn nido sọgan mọ sinsẹ́n delẹ yí sọn ṣẹnṣẹn mìtọn ga, yèdọ taidi sọn akọta he pò lẹ mẹ. 14  Yẹn yin ahọ́tọnọ na Glẹkinu lẹ po Akọmasegbe lẹ po, podọ na nuyọnẹntọ lẹ po gugutọ lẹ po: 15  enẹwutu, yẹn to jejeji nado lá wẹndagbe lọ na mìwlẹ ga to Lomu. 16  Na winyan wẹndagbe lọ tọn ma hù mi; na nugbo tọn, ehe wẹ huhlọn Jiwheyẹwhe tọn na whlẹngán na mẹlẹpo he tindo yise, yèdọ na Ju lẹ whẹ́ podọ na Glẹkinu lẹ ga; 17  na gbọn ehe dali podọ gbọn yise dali wẹ dodowiwa Jiwheyẹwhe tọn to yinyin didehia, kẹdẹdile e yin kinkàndai do dọmọ: “Ṣigba, dodonọ na nọgbẹ̀ gbọn yise etọn dali.” 18  Na homẹgble Jiwheyẹwhe tọn to yinyin didohia sọn olọn mẹ sọta omẹ jijọ-madi-Jiwheyẹwhe tọn podọ mawadodonọ lẹpo he to nugbo zíndo odò to aliho mawadodo tọn de mẹ, 19  na nuhe sọgan yin yinyọnẹn gando Jiwheyẹwhe go yin hinhẹn họnwun to ṣẹnṣẹn yetọn, na Jiwheyẹwhe ko hẹn ẹn họnwun na yé. 20  Na jẹhẹnu mayinukundomọ etọn lẹ to yinyin mimọ hezeheze sọn didá aihọn tọn gbọ́n, na yé yin ayidego gbọn nuhe yin bibasi lẹ dali, yèdọ huhlọn madopodo po Jiwheyẹwhe-yinyin etọn po, sọmọ bọ yé ma tindo whẹjijọ; 21  na dile etlẹ yindọ yé yọ́n Jiwheyẹwhe, yé ma pagigona ẹn taidi Jiwheyẹwhe, mọjanwẹ yé ma dopẹna ẹn, ṣigba nulẹnpọn yetọn lẹ lẹzun ovọ́ bọ ahun wunvinọ yetọn dózin. 22  Dile etlẹ yindọ yé to nùzindeji dọ yé yin nuyọnẹntọ, yé lẹzun nulunọ 23  bo diọ gigo Jiwheyẹwhe he ma nọ gble tọn zun nude he taidi boṣiọ gbẹtọ, ohẹ̀ lẹ, nudida afọ ẹnẹnọ lẹ po nuhe nọ lìn lẹ po tọn he sọgan gble. 24  Enẹwutu, sọgbe hẹ ojlo ahun yetọn tọn lẹ, Jiwheyẹwhe jo yé na mawé, na yé nido sọgan de yẹyi sọn agbasa yetọn titi go, 25  yèdọ mẹhe nọ yí lalo do diọ nugbo Jiwheyẹwhe tọn lẹ bo nọ sẹ̀n bosọ nọ wà sinsẹ̀nzọn wiwe hlan nudida kakati nido yin Omẹ lọ he dá yé, he yin pipà kakadoi. Niṣẹ.* 26  Enẹwutu wẹ Jiwheyẹwhe jo yé na ojlo zanhẹmẹ tọn he huwinyan lẹ, na yọnnu yetọn lẹ diọ zinzan jọwamọ tọn yetọn lẹ zun dehe jẹagọdo jọwamọ; 27  podọ mọdopolọ sunnu lẹ lọsu jo zinzan jọwamọ tọn hẹ yọnnu do bo lẹzun zohunhunnọ to afọdidona ojlo ylankan yetọn mẹ hlan ode awetọ, yèdọ sunnu po sunnu po to nuhe yin nugbigble wà, bo to ahọsumẹ lọ mọyi to yede mẹ to gigọ́ mẹ, na nuṣiwa yetọn wutu. 28  Podọ na yé ma jlo nado tindo oyọnẹn he pegan gando Jiwheyẹwhe go, Jiwheyẹwhe jo yé do na ninọmẹ apọ̀nmẹ tọn he ma yin alọkẹyi de, nado nọ wà nuhe ma jẹ lẹ, 29  na yé gọ́ na mawadodo, kanyinylan, nukunkẹn, ylanwiwa lẹpo, bo gọ́ na nuvẹun, hlọnhuhu, avùn, oklọ, ayiha ylankan, bosọ yin mẹnudọtọ, 30  ajànnọ, wangbẹna Jiwheyẹwhe tọ́, kanylantọ, saklanọ, mẹdezedagatọ, mẹhe nọ kàn ayiha onú ylankan lẹ tọn, tolivẹtọ do mẹjitọ lẹ go, 31  matin nukunnumọjẹnumẹ, nugbonọ-mayin na gbekọndopọ lẹ, matin owanyi jọwamọ tọn podọ lẹblanu matindotọ. 32  Dile etlẹ yindọ omẹ ehelẹ yọ́n osẹ́ndoai dodo Jiwheyẹwhe tọn ganji, dọ mẹhe nọ wà onú mọnkọtọn lẹ jẹna okú, e ma yindọ yé zindonukọn nado to wiwà yé kẹdẹ wẹ gba, ṣigba yé sọ kọngbedopọ hẹ mẹhe nọ wà yé lẹ.

Nudọnamẹ Odò Tọn

Lo 1:25* Gl., amẹn.