Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Kọlọsinu lẹ 4:1-18

4  Mì ogán lẹ emi, mì nọ wà nuhe yin dodo po nuhe sọgbe po na afanumẹ mìtọn lẹ, to yinyọnẹn mẹ dọ mìlọsu tindo Ogán de to olọn mẹ ga.  Mì nọ sinyẹnlin to odẹ̀ mẹ, bo nọ gbọṣi nukle to e mẹ po pẹdido po,  to ojlẹ dopolọ mẹ, mì nọ to dẹ̀ho na mí ga, na Jiwheyẹwhe nido sọgan hùn ohọ̀n hodidọ tọn na mí, nado dọ ohó aṣli wiwe he gando Klisti go lọ tọn, na taun tọn, ehe wutu wẹ yẹn do tin to gẹdẹ lẹ mẹ;  na yẹn nido sọgan hẹn ẹn họnwun dile yẹn dona dọho etọn do.  Mì nọ yí nuyọnẹn do to zọnlinzin hẹ mẹhe to gbonu lẹ, bo nọ fli ojlẹ he jẹ lẹ na mìde.  Mì gbọ ohó mìtọn ni nọ gọ́ na ojọmiọn, na ojẹ̀ ni nọ pé e to whepoponu, na mì nido sọgan yọ́n lehe mì na nọ gblọnhona ode awetọ do.  Tikiku, mẹmẹsunnu mẹyiwanna ṣie, lizọnyizọnwatọ nugbonọ podọ afanumẹ hatọ to Oklunọ mẹ, na hẹn ninọmẹ ṣie lẹpo zun yinyọnẹn na mì.  Lẹndai he wutu yẹn do to ewọ dohlan mì dè wẹ yindọ, na mìwlẹ nido yọ́n ninọmẹ mítọn podọ na ewọ nido sọgan miọnhomẹna mì,  yẹn sọ to Onesimu dohlan po e po, yèdọ mẹmẹsunnu nugbonọ podọ mẹyiwanna ṣie, mẹhe wá sọn mì dè. Yé na hẹn nuhe tofi lẹpo zun yinyọnẹn na mì. 10  Alistaku, gàntọ hatọ ṣie yí nudọdomẹ etọn lẹ hlan mì, podọ Malku, hẹnnumẹ Balnaba tọn wàmọ ga, (mẹhe go mìwlẹ mọ gbedide lẹ yí gando nado yí i to whedepopenu he e na wá mì dè,) 11  podọ Jesu, mẹhe nọ yin Justu wàmọ ga, omẹ ehelẹ wá sọn mẹhe gboadà lẹ mẹ. Yewlẹ kẹdẹ wẹ yin azọ́nwatọ hatọ ṣie lẹ na ahọluduta Jiwheyẹwhe tọn, podọ omẹ ehe lọ lẹ wẹ ko lẹzun alọgọ mẹhẹnlodo tọn de na mi. 12  Epafla, mẹhe wá sọn mì dè, yèdọ afanumẹ Klisti Jesu tọn de, yí nudọdomẹ etọn lẹ hlan mì, whepoponu wẹ ewọ nọ yí vivẹnudido do to dẹ̀ho do ota mìtọn mẹ, na mìwlẹ nido sọgan nọte to pipé* mẹ to godo mẹ bo tindo nujikudo he lodo to ojlo Jiwheyẹwhe tọn lẹpo mẹ. 13  Na nugbo tọn, yẹn dekunnu gando ewọ go dọ e nọ dovivẹnu tlala do ota mìtọn mẹ podọ do mẹhe to Laodikea lẹ tọn mẹ podọ do mẹhe to Hielapoli lẹ tọn mẹ. 14  Luku, dotozọ́nwatọ mẹyiwanna lọ yí nudọdomẹ etọn lẹ hlan mì, podọ Dema wàmọ ga. 15  Mì yí nudọdomẹ ṣie lẹ na mẹmẹsunnu he to Laodikea lẹ podọ na Nimfa podọ na agun he nọ pli do owhé etọn gbè. 16  Podọ to whenue wekanhlanmẹ ehe na ko yin hihia to ṣẹnṣẹn mìtọn, mì basi tito na e nido yin hihia to agun Laodikea tọn mẹ ga podọ na mìwlẹ nisọ hia dehe wá sọn Laodikea ga. 17  Humọ, mì dọna Alkippu dọmọ: “Nọ to nukunpedo lizọnyizọn he hiẹ kẹalọyi to Oklunọ mẹ lọ go, na hiẹ nido hẹn ẹn di.” 18  Nudọdomẹ ṣie die, he yẹn Paulu yí alọ ṣie titi do kàn. Mì nọ hẹn gẹdẹ ṣie lẹ do ayiha mẹ to whepoponu. Nukundagbe majẹhẹ ni tin hẹ mì.

Nudọnamẹ Odò Tọn

Kọl 4:12* Kavi, “whèwhín.”