Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Kọlọsinu lẹ 3:1-25

3  Ṣigba, eyin mì ko yin zizedaga hẹ Klisti, mì zindonukọn nado to nuhe to aga lẹ dín, fihe Klisti sinai do adusilọ Jiwheyẹwhe tọn mẹ te.  Mì nọ ze ayiha mìtọn do nuhe to aga lẹ ji to whepoponu, e ma yin do nuhe to aigba ji lẹ ji gba.  Na mìwlẹ ko kú, bọ ogbẹ̀ mìtọn ko yin whiwhla dopọ hẹ Klisti to kọndopọ mẹ hẹ Jiwheyẹwhe.  To whenuena Klisti, ogbẹ̀ mítọn, na yin hinhẹn sọawuhia, to whenẹnu, mìlọsu lẹ na yin hinhẹn sọawuhia hẹ ẹ to gigo mẹ.  Enẹwutu, mì hù awutugonu mìtọn he to aigba ji lẹ, enẹ wẹ galilọ, mawé, ojlo zogbe zanhẹmẹ tọn, ojlo ylankan po nukunkẹn po, he yin boṣiọ-sinsẹ̀n.  Onú enẹlẹ wutu wẹ homẹgble Jiwheyẹwhe tọn ja.  Mìwlẹ lọsu ko nọ zinzọnlin to onú enẹlẹ mẹ to ojlẹ de mẹ wayi to whenue mì to gbẹnọ to yé mẹ.  Ṣigba todin, mì gbẹ́ onú ehe lẹpo dai mlẹnmlẹn, yèdọ homẹgble, adi, ylanwiwa gọna mẹzunzun podọ mì de ohó gbigble sẹ̀ sọn onù mìtọn mẹ.  Mì ma nọ dolalo na ode awetọ blo. Mì de gbẹtọ-yinyin hoho lọ po nuyiwa etọn lẹ po sẹ̀ sọn ogo, 10  bo yí gbẹtọ-yinyin yọyọ lọ dogo, ehe to yinyin hinhẹn jẹ yọyọ gbọn oyọnẹn he pegan dali sọgbe hẹ apajlẹ Omẹ lọ he dá ẹ tọn, 11  fie Glẹkinu kavi Ju ma tin te, adàgbigbo kavi adàmagbo, jonọ, Skitianu, afanumẹ kavi mẹhe to edekannu de ma tin te, ṣigba Klisti wẹ onú lẹpo podọ tin to popo mẹ. 12  Enẹwutu, taidi mẹdide Jiwheyẹwhe tọn lẹ, yèdọ mẹwiwe po mẹyiwanna lẹ po, mì yí owanyi sisosiso awuvẹmẹ tọn, homẹdagbe, mẹdezewhè, walọmimiọn po linsinsinyẹn po dogo. 13  Mì nọ to linsinyẹn hẹ ode awetọ bo nọ to jijona ode awetọ sọn ojlo mẹ wá zọnmii eyin mẹde tindo whẹwhinwhẹ́n nado wọ́ po mẹdevo po. Kẹdẹdile Jehovah jona mì sọn ojlo mẹ wá do, mọ wẹ mì ni nọ wà do ga. 14  Ṣigba, to popolẹpo mẹ, mì yí owanyi dogo, na enẹ wẹ gẹdẹ he nọ kọ̀n gbẹtọ lẹ dopọ to aliho pipé de mẹ. 15  Humọ, mì dike jijọho Klisti tọn ni nọ deanana mì to ahun mìtọn mẹ, na nugbo tọn, na enẹ mẹ wẹ mì yin oylọ-basina do to agbasa dopo mẹ. Mì nisọ nọ dopẹ́. 16  Mì gbọ ohó Klisti tọn ni nọ nọ̀ mì mẹ to gigọ́ mẹ to nuyọnẹn lẹpo mẹ. Mì nọ to ode awetọ mìtọn plọn bo nọ to tudohomẹna ode awetọ zọnmii gbọn psalm lẹ, pipà lẹ nina hlan Jiwheyẹwhe po ohàn gbigbọmẹ tọn he gọ́ na ojọmiọn lẹ po dali bo nọ to hànji to ahun mìtọn mẹ hlan Jehovah. 17  Podọ nudepope he mì to wiwà to ohó mẹ kavi to azọ́n mẹ, mì nọ wà onú lẹpo to oyín Oklunọ Jesu tọn mẹ, bo nọ dopẹna Jiwheyẹwhe Otọ́ lọ gbọn ewọ gblamẹ. 18  Mì asi lẹ emi, mì nọ yin mẹmẹglọ na asu mìtọn lẹ, dile e jẹ do to Oklunọ mẹ. 19  Mì asu lẹ emi, mì nọ yiwanna asi mìtọn lẹ bo ma nọ gblehomẹ sinsinyẹn do yé go blo. 20  Mì ovi lẹ emi, mì nọ setonuna mẹjitọ mìtọn lẹ to onú lẹpo mẹ, na ehe wẹ sọgbe taun to Oklunọ mẹ. 21  Mì otọ́ lẹ emi, mì ma nọ hẹn homẹgble ovi mìtọn lẹ blo, na yé nikaa gbọjọ. 22  Mì afanumẹ lẹ emi, mì nọ setonu to onú lẹpo mẹ na mẹhe yin ogán na mì to agbasa-liho lẹ, e ma yin po nuyiwa mẹnukunta-zọ́n tọn po, taidi nukundagbe gbẹtọ tọn dintọ lẹ, ṣigba po ahundoponọ-yinyin po, to budisi Jehovah mẹ. 23  Nudepope he mì to wiwà, mì nọ wà ẹ po alindọn lẹpo po taidi na Jehovah, bọ e ma yin na gbẹtọ lẹ gba, 24  na mì yọnẹn dọ Jehovah dè wẹ mì na mọ ale he jẹ lọ yí sọn taidi ogú. Mì nọ wazọ́n di afanumẹ na Ogán lọ, yèdọ Klisti. 25  Na nugbo tọn, mẹhe to oylan wà na mọ ale nuhe e yí oylan do wà lọ tọn yí, podọ mẹnukuntahihopọn de ma tin.

Nudọnamẹ Odò Tọn