Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Kọlọsinu lẹ 2:1-23

2  Na yẹn jlo dọ mì ni yọ́n lehe ahi he yẹn to dídí do ota mìtọn mẹ podọ do mẹhe to Laodikea lẹ tọn mẹ podọ do mẹhe ma ko mọ mi nukun sọ nukun lẹpo tọn mẹ sinyẹn sọ,  na yé nido sọgan yin homẹmiọnna, bo yin kinkọndopọ pẹkipẹki to owanyi mẹ podọ nado tindo adọkun lẹpo, yèdọ nukunnumimọjẹ nugbo lọ mẹ ehe mẹ yé tindo jidide gigọ́ te, podọ nado tindo oyọnẹn he pegan gando aṣli wiwe Jiwheyẹwhe tọn, he yin Klisti go.  Nuyọnẹn po oyọnẹn họakuẹ lẹpo po yin whiwhla do ewọ mẹ po sọwhiwhe po.  Yẹn to ehe dọ na mẹdepope ni ma do yí hodidọ linlẹndiọnamẹ tọn lẹ do klọ mì blo.  Na dile yẹn ma tlẹ tin to finẹ to agbasalan mẹ, etomọṣo, yẹn tin po mì po to gbigbọmẹ, bo to ayajẹ bosọ to titojininọ mìtọn podọ dolilo yise mìtọn tọn to Klisti mẹ mọ.  Enẹwutu, to whenue mì ko kẹalọyi Klisti Jesu Oklunọ, mì nọ to zọnlinzin to kọndopọ mẹ hẹ ẹ zọnmii,  bo doadọ̀do bosọ nọ to yinyin didó daga to ewọ mẹ bo nọ to yinyin hinhẹn lodo to yise mẹ, kẹdẹdile mì ko yin pinplọn do, yise mìtọn ni nọ gọfla to pẹdido mẹ.  Mì nọ payi: vlavo mẹde sọgan tin he na domọwle mì taidi nuyànwẹnna etọn gbọn tamẹnuplọnmẹ po oklọ ovọ́ po dali sọgbe hẹ aṣa gbẹtọ lẹ tọn, sọgbe hẹ onú dodonu aihọn ehe tọn lẹ bọ e ma yin dehe sọgbe hẹ Klisti;  na ewọ mẹ wẹ gigọ́-yinyin pete jẹhẹnu Jiwheyẹwhe tọn nọ nọ̀ to agbasa mẹ. 10  Podọ enẹwutu wẹ mìwlẹ do tindo gigọ́-yinyin gbọn ewọ gblamẹ, yèdọ mẹhe yin ota na gandudu po aṣẹpipa lẹpo po. 11  Gbọn haṣinṣan mìtọn hẹ ewọ dali, mìwlẹ ko sọ yin adàgbona po adàgbigbo de po he ma nọ yin bibasi po alọ lẹ po gbọn agbasa gbẹtọ tọn didedai dali, gbọn adàgbigbo he yin Klisti tọn dali, 12  na mìwlẹ ko yin dìdì dopọ hẹ ẹ to baptẹm etọn mẹ, podọ gbọn haṣinṣan mìtọn hẹ ewọ dali, mì ko sọ yin finfọn dopọ hẹ ẹ gbọn yise mìtọn to nuyiwa Jiwheyẹwhe mẹhe fọ́n ẹn sọn oṣiọ lẹ mẹ tọn dali. 13  Humọ, dile etlẹ yindọ mìwlẹ ko kú to sẹ́nmẹjijẹ mìtọn lẹ mẹ podọ to ninọmẹ adàmagbo agbasalan tọn mìtọn mẹ, Jiwheyẹwhe hẹn mì wá ogbẹ̀ dopọ hẹ ẹ. E jo sẹ́nmẹjijẹ mítọn lẹpo na mí sọn ojlo mẹ wá 14  bo súnsún kandai yí alọ do kàn he jẹagọdo mí lọ sẹ̀, ehe bẹ osẹ́ndoai lẹ hẹn podọ ehe jẹagọdo mí; podọ Ewọ ko de e sẹ̀ sọn aliho ji gbọn whiwhè e do yatin go dali. 15  Gbọn hinhẹn gandudu lẹ po aṣẹpipa lẹ po jẹ agbá dali, e do yé hia to gbangba taidi mẹhe ṣíawhàn, bo hẹn yé nado zinzọnlin awhàngbigba tọn gbọn yatin lọ gblamẹ. 16  Enẹwutu, mì dike omẹ depope dawhẹna mì to dùdù po nùnù po mẹ blo kavi gando hùnwhẹ de kavi hùnwhẹ osun yọyọ tọn kavi gbọjẹzan de tọn bibasi go blo; 17  na oyẹ̀ onú he ja lẹ tọn wẹ onú ehelẹ yin, ṣigba onú jọnun* lọ yin Klisti tọn. 18  Mì dike omẹ depope he nọ mọ awuvivi to whiwhẹ oklọ tọn mẹ podọ to wunmẹ sinsẹ̀n-bibasi angẹli lẹ tọn mẹ, “he nọ ze teninọ etọn sinai do” nuhe e ko mọ lẹ ji, bosọ nọ kla gbọn pọndohlan agbasalan tọn etọn dali matin whẹwhinwhẹ́n he sọgbe de hò ale lọ yí sọn mì si blo, 19  to whenuena e yindọ ewọ ma tẹdo ota lọ go gligli, yèdọ omẹ lọ he nọ wleawuna nuhudo agbasa lọ pete tọn, bọ agbasa lọ do nọ yin kinkọndopọ pẹkipẹki gbọn hupetẹn lẹ po okàn agómẹ tọn etọn lẹ po gblamẹ, bosọ nọ to whinwhẹ́n deji po whinwhẹ́n he Jiwheyẹwhe nọ namẹ po. 20  Eyin mìwlẹ ko kú dopọ hẹ Klisti na onú dodonu aihọn tọn lẹ, naegbọn mì zindonukọn nado to mẹmẹglọ yin na osẹ́ndoai lọ lẹ taidi dọ mì gbẹ́ to gbẹnọ to aihọn lọ mẹ wẹ nkọ: 21  “Mì ze, kavi dọ́pọ́n, kavi doalọ e go blo,” 22  gando onú lọ lẹpo he dona yin vivasudo gbọn yíyí yé zan dali lẹ go, to kọndopọ mẹ hẹ gbedide po nuplọnmẹ gbẹtọ tọn lẹ po? 23  Na nugbo tọn, onú enẹlẹ wẹ ohia nuyọnẹn tintindo tọn to sinsẹ̀n-bibasi he mẹlọ lọsu zedai mẹ podọ to whiwhẹ oklọ tọn mẹ, yèdọ yasisana agbasa; ṣigba onú enẹlẹ ma tindo nuhọakuẹ depope to ahididi hẹ pekọ agbasalan tọn mẹ.

Nudọnamẹ Odò Tọn

Kọl 2:17* To paa mẹ, “agbasa.”