Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Jakọbu 3:1-18

3  Mẹmẹsunnu ṣie lẹ emi, mẹsusu to mì mẹ ni ma lẹzun mẹplọntọ lẹ blo, to yinyọnẹn mẹ dọ mí na mọ whẹdida he sinyẹn hugan yí.  Na mímẹpo wẹ nọ dahli whlasusu. Eyin mẹde ma nọ dahli to ohó mẹ, omẹ pipé de wẹ ewọ, bosọ penugo nado dogànnuna agbasa etọn blebu ga.  Eyin mí nọ dogànnuna osọ́ lẹ na yé nido setonuna mí, mí nọ deanana agbasa yetọn blebu ga.  Mì pọ́n! Etlẹ yin tọjihun lẹ, mahopọnna dọ yé klo taun bo nọ yin hinhẹn dánpe gbọn jẹhọn sinsinyẹn lẹ dali, yé nọ yin anadena gbọn azẹ̀ pẹvi tlala de dali yì fie ayilinlẹn mẹhe to anadena ohún lọ tọn jlo.  Mọdopolọ ga, odẹ́ yin awutugonu pẹvi de ṣogan bo nọ yí nùgo onú daho lẹ tọn. Mì pọ́n lehe miyọ́n pẹvi de ko pé nado dozò zùnkan daho tlala de do sọ!  Mọwẹ, miyọ́n de wẹ odẹ́ yin. Odẹ́ to ede mẹ yin aihọn mawadodo tọn de to awutugonu mítọn lẹ mẹ, na e nọ hẹn agbasa blebu kudiho bo nọ símiyọ́n gbẹ̀zọnlin jọwamọ tọn podọ e nọ yin miyọ́n sí gbọn Gẹhẹnna* dali.  Na gbẹtọvi lẹ sọgan hòhuwhẹ gbekanlin alọpa lẹpo gọna ohẹ̀ lẹ, nuhe nọ lìn lẹ po nudida ohù mẹ tọn lẹ po, podọ yé ko sọ hòhuwhẹ yé.  Ṣigba depope to gbẹtọvi lẹ mẹ ma sọgan hòhuwhẹ odẹ́. Onú ylankan tasinyẹntọ de wẹ, e gọ́ na adí he nọ hùmẹ.  Ewọ wẹ mí nọ yí do pà Jehovah, yèdọ Otọ́, ṣogan ewọ wẹ mí sọ nọ yí do hodẹ̀do gbẹtọ he ko wá tintin mẹ “to apajlẹ Jiwheyẹwhe tọn mẹ.” 10  Sọn onù dopolọ mẹ wẹ dona po dẹ̀hodo po nọ wá sọn. Mẹmẹsunnu ṣie lẹ emi, e ma sọgbe dọ onú ehelẹ ni zindonukọn nado to jijọ to aliho ehe mẹ. 11  Asisa osin tọn de ma nọ hẹn osin he vivi po dehe vẹ́ po ví jẹgbonu sọn nùvo dopolọ mẹ gba, kavi e ma yin mọ wẹ? 12  Mẹmẹsunnu ṣie lẹ emi, ovòtin de ma sọgan sẹ́n olivie lẹ, mọdopolọ vẹntin de ma sọgan sẹ́n ovò sinsẹ́n lẹ gba, kavi e sọgan wẹ? Mọjanwẹ jẹ̀sin ma sọgan de osin vivi jẹgbonu. 13  Mẹnu to mì mẹ wẹ yin nuyọnẹntọ bo tindo nukunnumọjẹnumẹ? Gbọ e ni do azọ́n etọn lẹ hia gbọn walọyizan dagbe etọn dali to pọmẹ hẹ walọmimiọn he yin nuyọnẹn tọn. 14  Ṣigba eyin mì tindo awuwhàn sinsinyẹn po wiwọ́ po to ahun mìtọn lẹ mẹ, mì nọ ze mìde daga blo, mì sọ nọ dolalo do nugbo lọ kọ̀ blo. 15  Ehe ma yin nuyọnẹn he wá sọn aga, ṣigba aigba ji tọn wẹ, kanlinjọmẹ tọn, po aovi tọn po. 16  Na fie awuwhàn po wiwọ́ po te, finẹ wẹ bẹwlu po onú ylankan lẹpo po te. 17  Ṣigba jẹnukọn whẹ́, nuyọnẹn he wá sọn aga wé, enẹgodo e yin jijọho-dintọ, lẹnpọn dagbenọ, e nọ wleawufo nado setonu, bo gọ́ na lẹblanu po sinsẹ́n dagbe lẹ po, e ma nọ hò mẹnukuntapọn, bo masọ nọ wayẹnu. 18  Humọ, okún sinsẹ́n dodowiwa tọn nọ yin didó to jijọho mẹ na mẹhe nọ dín jijọho lẹ.

Nudọnamẹ Odò Tọn

Jak 3:6* Pọ́n Nudọnamẹ Dogọ 9.